!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Европол им испрати разгледници на криминалците во бегство: Ни недостигате!


Хаг, 4 август, 2017 - 11:22 (META) 

Европските полициски сили во рамки на новата летна кампања им испратиле „духовити“ разгледници на најбараните европски криминалци во бегство, со желба тие да се вратат што побргу.

„Драг Артур, белгискиот помфрит е најдобар и знаеме дека ти недостига. Врати се да уживаш во него – имаме убаво изненадување за тебе“, стои во разгледницата на белгиската полиција.

Комплетирана со манекенот Пис, порција помфрит и со чаша пиво, разгледницата е адресирана на Артур Новроцк, осуден за трговија со дрога, кој е во бегство.

Кампањата летни разгледници на Европол е објавена денеска, во рамки на иницијативата да се фатат европските најбарани криминалци.

„Мил Фарук, сигурно знаеш дека животот е најдобар во слатката Франција. Се надеваме дека ќе се вратиш наскоро“, пишува на разгледницата на француската полиција, со слика од Ајфеловата кула и со поздрав на француски „ни недостигаш“.

Фарук Хачи во 2009 година беше осуден во отсуство на 20 години затвор поради неколку вооружени грабежи.
Целта на духовитата кампања на Европол е да ги повика граѓаните да ја следат веб-страницата на агенцијата, со надеж дека ќе може да помогнат да им се влезе во трага на најбараните криминалци.

„И додека повеќето од вас уживаат во заслужениот летен одбор, криминалците не прават пауза во криминалот. Туристичките дестинации се популарни места за криење на криминалците“, стои во соопштението на Европол.


Европол: Во ЕУ е разбиен синџир за трговија со луѓе


Брисел, 24 јули, 2017 - 12:09 (META) 

Ервопол ја поддржал акцијата за сузбивање организирани криминални групи, кои се занимаваат со трговија со луѓе за сексуална експлоатација. Операцијата е спроведена во повеќе европски земји.

Во рамки на операцијата се приведени и уапсени 107 осомничени за трговија со луѓе и илегална миграција, а идентификувани се 910 потенцијални жртви.

Во 22 земји членки на ЕУ, во периодот од 26 јуни до 2 јули, спроведени се полициски акции за сузбивање на трговијата со луѓе и за спречување илегални миграција.

Преку полициска соработка, координирано преку Европол, а предводено од Австрија, проверени се 126.927 лица и 6.363 возила, а претресени се 4.245 локации.

Особено внимание е посветено на интернетот, преку кој се врбувале и се нуделе жртви за сексуална експлоатација, се наведува во соопштението.

Информациите собрани преку оваа операција довела до поведување на 25 нови истраги во Европа.

Апсењето и идентификувањето на жртвите во акцијата покажеле дека најактивни во Европа се мрежите за трговија со луѓе од Нигерија, Јужна Америка и од Источна Европа.


Европол предупреди за можни нови напади на ИД во Европа


Хаг, 2 декември, 2016 - 14:25 (META) 

Европската полициска служба – Европол денеска предупреди дека Исламска држава (ИД) во блиска иднина најверојатно ќе изведе нови напади во земји од Европската Унија, како што ги губи своите територии на Блискиот Исток. Напади, според Европол, се можни и во други земји кои се дел од меѓународната коалиција на чело со САД, која се бори против терористичката организација во Сирија и во Ирак.

„Проценките на некои од разузнавачките служби покажуваат дека неколку десетици лица, со кои раководи Исламска држава и кои е можно во моментов да се наоѓаат во Европа, се способни да изведат терористички напади“, се наведува во извештајот на Европол.

Во извештајот се предупредува дека тактиките што екстремистите на ИД ги користат во Сирија и во Ирак, како што автомобили бомби, киднапирања и изнуда, можно е да бидат искористени на цели во Европа.

Според Европол, постои мала веројатност цел на нападите да бидат важни инфраструктирни точки, како што се нуклеарните постројки. Во извештајот се укажува на промена во нападите, од симболични цели, како што се полицајци или војници, во случајни напади на „меки цели“, како што беа минатогодишните напади во Париз.

„Нападите на случајни цели имаат многу силен ефект на јавноста, што е еден од главните цели на тероризмот – заплашување на цивилното население“, се наведува во соопштението на Европол.

Разузнавачките агенции во земјите членки на ЕУ, се додава во извештајот, се согласни дека „терористичката група има мали способности за изведување на сајбер-напади“, но дека тие не треба да се исклучуваат.

Европол наведува дека автоматското огнено оружје, ножевите и возилата, поради нивната ефикасност, достапност и едноставното користење, ќе останат најчесто користените средства за терористички напади.


Европол уапси 24 од најбараните криминалци


Хаг, 30 ноември, 2016 - 16:57 (META) 

Европската полициска служба (Европол) денеска соопшти дека уапсила 24 од 60 криминалци кои се наоѓаат на листата најбарани во Европа.

Како што се наведува во соопштението, многу криминалци од листата и понатаму се кријат во Европа, поради што Европол заедно со Европската мрежа за барање бегалци (ЕНФАСТ) од 1 до 23 декември секој ден ќе објавува по една фотографија од бегалец кој е баран во една од 23 различни европски земји.

Европол истакна дека откако на почетокот на годинава беа објавени листи со имиња и со фотографии од 60 најбарани лица, кои се осудени или осомничени за убиство, киднапирање, тероризам, трговија со дрога, голем дел веќе се фатени благодарение на медиумското внимание што го предизвикаа.

„Многу од нив и понатаму се кријат во Европа и европските агенции со спроведување на законот заедно работат за да ги фатат. Сите овие криминалци бегаат од одговорност и од казни, а тоа тешко им паѓа не само на жртвите, туку и на семејствата и на пријателите на жртвите“, стои во соопштението.


Регионалната полициска соработка е клучна во борбата против организираниот криминал


Белград, 14 ноември, 2016 - 16:27 (META) 

Министрите за внатрешни работи на Србија, Црна Гора и на Македонија, денеска во Белград оценија дека регионалната полициска соработка е клучна во борбата против сите видови организиран криминал.

Министрите Небојша Стафановиќ, Горан Даниловиќ и Оливер Спасовски на конференцијата насловена „Регионална процена на закани од тежок и организиран криминал (СОКТА)“, изразија подготвеност за унапредување на сите видови полициска соработка. Тие оценија дека организираниот криминал не познава граници и нагласија дека полициите на трите земји се подготвени преку меѓусебна соработка да бидат пред него.

Проектот „Регионална процена на закани од тежок и организиран криминал“ на Европол е прв обид во овој дел од Западниот Балкан да се претстави стратешка процена на ризикот и на заканите од тежок и организиран криминал по безбедноста на земјите.

Проектот, кој е почнат во март 2014 година, ќе трае до декември годинава. Финансиите, во износ околу 390.000 евра, се обезбедени од швајцарската агенција за развој и за соработка, а е реализиран од мисијата на ОБСЕ во Србија, Црна Гора и Македонија во партнерство со Европол.


Европол уапси повеќе од 300 лица и заплени еден тон кокаин


Хаг, 19 октомври, 2016 - 13:07 (META) 

Полицијата уапсила повеќе од 300 лица и запленила повеќе од еден тон кокаин во еднонеделната акција против мрежа што се занимава со трговија на наркотици, криумчарење на луѓе и со криминал во Европа и пошироко, соопшти денеска Европол.

Преку истрагата била откриена една лажна туристичка агенција во Грција која помагала во трговијата со луѓе и бордел во Австрија каде што канабисот бил одгледуван, пренесуваат светските медиуми.

Европол соопштува дека агенцијата ги координирала истрагите во ЕУ и 24 држави надвор од Унијата и дека во операцијата биле откриени криминални мрежи со потекло од Нигерија, Азија, Источна Европа и од други области.

„Земјите и организациите во светот кои работат заедно како еден субјект се современ одговор на тешкиот и организиран криминал кој не познава граници,“ изјави директорот на Европол, Роб Вејнрајт.

Полицијата, како што се додава во соопштението, идентификувала повеќе од 500 жртви на трговијата со луѓе.


Разбиена банда крадци на луксузни возила во акција на Европол


Хаг, 15 септември, 2016 - 19:48 (META) 

Европската полиција (Европол) денеска соопшти дека разбила меѓународна организирана криминална група, чии членови се осомничени за кражби и за препродавање на луксузни автомобили во Европа и во Северна Африка.

Полициите на Италија, Шпанија и на Белгија извршиле 28 апсења и претреси на 29 локации во Италија и во Шпанија, соопшти Европол.

Според информациите, водачите на криминалната група се со потекло од Италија и од Мароко, а имале широка мрежа на соработници низ цела Европа.

Во полициската акција биле запленети 40 автомобили, чија вредност, според италијанската полиција, се проценува на околу 3 милиони евра, но и компјутери, лажни лични карти и фалсификувани пари.

Истрагата за групата почнала минатата година, по бројните пријави од жртви чии возила биле украдени. Италијанската полиција ја открила шемата по која оперирала групата, а одвоени истраги биле водени и во Белгија и во Шпанија.


Вајнрајт: Можни се нови терористички напади во Европа


Рим, 4 мај, 2016 - 16:40 (META) 

Директорот на Европол, Роб Вајнрајт, денеска во Рим предупреди дека во Европа најверојатно ќе се случи нов терористички напад од голем обем.

– Заканата од терористички напади и понатаму е особено голема, најсериозна од 11 септември и стравувам дека во иднина ќе бидат можни нови напади во Европа – рече Вајнрајт во обраќањето пред комитетот за Шенгенскиот договор на италијанскиот парламент.

Вајнрајт додаде дека Европол нема информации за конкретни закани за Италија.

– Знаевме дека Исламска држава воспоставува нова командна структура во Сирија и оти се планираат напади на европски градови и тогаш, за жал, се случи Брисел – наведе шефот на Европол.

Вајнрајт истакна дека затоа е приоритет да се идентификуваат активностите на другите терористички мрежи во Европа.


Жителите на ЕУ годишно трошат по 24 милијарди евра на дрога


Брисел, 5 април, 2016 - 15:46 (META) 

Државјаните на Европска Унија секоја година трошат по околу 24 милијарди евра за нелегална дрога, што значи дека трговијата со дрога е една од најпрофитабилните активности на организираните криминални групи, се наведува во соопштението што денеска го објави Европскиот центар за надзор на дрога и на зависности од дрога.

Во извештајот се наведува дека појавата на нови технологии, како што се кодирани мрежи и дигитални валути, го отворила пазарот за снабдување со дрога преку интернет.

Како што напредува технологијата, така организираните криминални групи трагаат по нови патишта за шверцување дрога во Европа, се наведува во извештајот во кој се истакнува дека е зголемено криумчарењето хероин преку Јужен Кавказ.

Директорот на Европол, Роб Ванрајт, оценил дека соработката меѓу државите членки на ЕУ е неопходна за да се реши проблемот и додаде дека криминалните мрежи кои се вмешани со трговија со дрога често дејствуваат и во други криминални области.


Европол: Илјадници „странски борци“ на ИД, закана за безбедноста на Европа


Лондон, 20 февруари, 2016 - 16:16 (META) 

Меѓу 3.000 и 5.000 т.н. странски борци, државјани на Европската унија, кои се обучувале во камповите на Исламска држава (ИД), се вратиле во земјите на ЕУ и претставуваат нов предизвик и закана за безбедноста на Европа, вели директорот на полицијата на Европската унија – Европол, Роб Вејнрајт, во интервју за германскиот весник „Оснабрукер цајтунг“.

Според Вејнрајт, постои голема можност припадниците на ИД или на други терористички организации да извршат нови напади во Европа, чија цел би била масовни жртви меѓу цивилното население.

„Европа во моментов се соочува со најголемата безбедносна закана во изминатите 10 години“, вели шефот на Европол.

Тој во интервјуто за германскиот весник одбил да ја поврзе заканата од тероризмот со актуелната бегалска криза во Европа и ја отфрлил претпоставката дека терористите се инфилтрираат во Европа под маската на баратели на азил.

Според Вејнрајт, нема индиции дека терористите го користат приливот на бегалци за да дојдат во Европа незабележани.