Можна средба на Могерини со премиерите од Западен Балкан во декември


Белград, 29 ноември, 2018 - 12:57 (META) 

Во Европската Комисија се разгледува можноста високата претставничка за надворешна политика Федерика Могерини во втората половина на декември да се сретне со премиерите од Западен Балкан.

Како што пренесуваат медиумите во Србија повикувајќи се на извори во Брисел, би станувало збор за Западнобалканската шестка – Албанија, БиХ, Црна Гора, Косово, Македонија и Србија – а засега нема најава за нова рунда од дијалогот на Белград и Приштина.

Како можен датум за средбата се посочува 19 декември, а темите би биле регионалната соработка и процесот на евроинтеграции, заедно со преглед на сработеното од реформите во текот на 2018 година, која што беше најавувана како преломна година за процесот на проширување и следните чекори на патот кон ЕУ.


Османи – Хан: Македонија ќе успее да ја оствари Агендата 2025 на ЕК


Брисел, 12 ноември, 2018 - 16:41 (META) 

Македонија успешно ќе се приклучи на стратегијата на Комисијата за проширување со земјите од Западниот Балкан и ќе успее да ја оствари Агендата 2025, му порачал вицепремиерот Бујар Османи на еврокомесарот за проширување и соседска политика Јоханес Хан на нивната денешна средба во Брисел, соопшти Секретаријатот за европски прашања.

– Планот 18 е веќе усвоен на Влада и неговата имплементација, сега за сега, се одвива непречено. Очекувам навреме да бидат адресирани сите клучни области и да се создадат услови за конфирмација на одлуката за почеток на преговорите. Собранието го даде првото зелено светло за уставните измени согласно договорот од Преспа, со што, не само што се отвори патот за имплементација на обврските од Договорот, туку се создадоа услови и за забрзување на реформскиот процес на земјата согласно заклучоците на Европскиот совет од јуни – рекол Османи на средбата.

Тој нагласил дека односите меѓу Македонија и Грција се унапредуваат со забрзано темпо, потсетувајќи на обновата на авионските летови меѓу Атина и Скопје, по пауза од 10 години.

Османи го информирал Хан и за напредокот во подготовката на преговарачката структура за почеток на преговорите, нагласувајќи дека Владата работи на тоа да го вклучи во процесот и граѓанскиот сектор и академската заедница.


Димитров: Реформите се за Македонија да стане функционална демократија


Берлин, 8 ноември, 2018 - 9:23 (META) 

Mинистерот за надворешни работи Никола Димитров на вчерашната средба во Берлин со Јан Хекер, советникот за надворешна политика на германската канцеларка Ангела Меркел, порачал дека реализацијата на реформите во Македонија се, пред се, за бенефит на самите граѓани и трансформација на земјата во кредибилна европска демократија. Притоа двајцата соговорници заеднички констатирале „дека историската посета на канцеларката Меркел на 8 септември е доказ за исклучително високото ниво на македонско-германските односи“, соопшти македонското министерсто за надворешни работи (МНР).

Во текот на дводневната посета на Берлин, која завршува денеска, Димитров вчера на покана на претседателот на Комисијата за ЕУ прашања во германскиот Бундестаг, Гунтер Крихбаум, зборувал пред комисијата. Како што извести МНР, шефот на македонската дипломатија зборувал за најновиот развој на внатрешно-политичките состојби во Македонија, со нагласок на претстојните активности поврзани со целосна имплементација на Договорот од Преспа.

Притоа, Димитров ги нагласил реформската ЕУ и НАТО агенда, како и на македонскиот придонес во развојот на добрососедските односи и регионалната соработка во Југоисточна Европа.

– Решени сме да успееме и на следната средба заедно да го прославиме отворањето на пристапните преговори со ЕУ – им рекол македонскиот министер за надворешни работи на членовите на комисијата на Бундестагот.
Димитров одржал и предавање на Институтот за општествени науки при Универзитетот Хумболт на тема „Дипломатија, демократија и компромис во Западен Балкан-прогресивниот пат на Македонија кон пристапот во ЕУ и лекциите за регионот”.

Димитров имал и други средби во Берлин, а денеска ќе се сретне со својот германски колега Хајко Мас.


Палмер: Опозицијата да размисли што нуди Договорот од Преспа


Скопје, 1 август, 2018 - 19:21 (META) 

Метју Палмер, в.д. заменик-помошник на Државниот секретар на САД за Европа и Евроазија, по денешните средби со Христијан Мицкоски и со премиерот Зоран Заев, упати порака на опозицијата дека треба сериозно да размисли што нуди Договорот со Грција за Македонија. Тој се обрати и до македонскиот народ, дека треба да се искористи моментот за историски важна одлука.

-На опозицијата и порачав и ќе продолжам да ја пренесувам таа порака дека на оваа ситуација треба да ја гледа стратегиски, да ја стави Македонија на прво место, и да мисли за иднината на младите луѓе, и што како иднина нуди Договорот од Преспа како европска иднина на Македонија, што отвора како можности и да најдат начин како да ја поддржат оваа европска иднина, рече Палмер по средбата во Владата со Заев.

Тој претходно се сретна со Мицкоски и со претседателот Ѓорге Иванов. вечерва треба да одржи средба и со лидерот на ДУИ Али Ахмети.

Американскиот дипломат го нарече референдумот за Договорот од Преспа историски момент за Македонија и порача оти се надева дека граѓаните ќе излезат на референдумот да го кажат својот став.

„Македонија веќе доби историска покана од страна на НАТО, а доби и јасен пат за пристапни преговори со ЕУ. Референдумот на 30 септември ќе биде важен датум. Се надеваме дека граѓаните ќе излезат да гласаат да го кажат својот став и дека ќе го направат тоа во атмосфера ослободена од дезинформации и обесхрабрување. Ова е навистина историски момент за Македонија и Договорот од Преспа ја отвора европската иднина за Македонија – рече Палмер.


Мицкоски на Палмер му се пожалил дека власта избегала од компромис


Скопје, 1 август, 2018 - 19:08 (META) 

Претседателот на ВМРО-ДПМНЕ Христијан Мицкоски денеска на средбата, заедно со партиска делегација, со заменикот-помошник државен секретар на САД за Европа и Евроазија Метју Палмер, порачал дека државата, граѓаните и надворешните пријатели на Македонија „стануваат заложник на неодговорна и непринципиелна политика на политичкиот естаблишмент на власта, како и креираните очекувања кои сега не се во состојба да ги реализираат“, соопшти ВМРО-ДПМНЕ.

Мицкоски рекол дека „е неодговорно и антидемократски е што власта се одлучи на чекор да заобиколи компромис и одби да ги прифати аргументите на опозицијата во однос на формулирањето на референдумското прашање, кое треба да биде производ на општ консензус, а не едностран акт на парламентарното мнозинство“.

Претседателот на ВМРО-ДПМНЕ порачал дека со тоа се  нарушуваат демократските процеси.

Сепак, на средбата и двајцата соговорници се согласиле дека евроатлантската интеграција е единствениот пат за Македонија кон иднината.


Хан: Да не се ризикува иднината на Македонија поради дневно-политички причини


Брисел, 30 јули, 2018 - 16:53 (META) 

Ги повикувам сите политички лидери да постапуваат конструктивно за да се постигне целта и да не се загрози напредокот поради дневно-политички причини, им порача еврокомесарот за проширување на Европската унија, Јоханес Хан на македонските политичари во интервју за „Еурактив“.

Тој вели дека дефинитивно Македонија постигнала најголема напредок во изминатава година, со тоа што ја надминала длабоката политичка криза со демократски средства.

– Земјата отствари значителен напредок со спроведувањето на Пржинскиот договор и реформските приоритети со нова, реформски ориентирана и проевропска влада. Посебно важни за одбележување се напорите на владата на Зоран Заев за добрососедски односи. По договорот за пријателство со Бугарија, конечно, по 27 години јалови обиди под посредништво на ОН, спорот за името меѓу Скопје и Атина е е решен. Овој историски договор е важен чекор кон остварување на евроатлантските перспективи на земјата – вели Хан, ословувајќи ја земјава „Поранешна југословенска република Македонија“.

Тој потсетува дека за успешен договор неопходен е и успешен референдум.

– Поради тоа, ги повикувам сите политички чинители конструктивно да работат за да ја постигнат оваа цел, а не да го загрозат напредокот поради дневно-политички интереси. Се работи за иднината на земјата, поради што референдумот за договорот со Грција и новото име треба да се спроведе што е можно поскоро. Ратификацијата и успешниот референдум се суштински чекори на патот кон членство во НАТО и ЕУ – потенцира еврокомесарот Хан.

На прашањето дали 2025 година, која во Стратегијата се наведува како година за можно проширување на ЕУ, е премногу далеку за земјите кои сакаат да бидат дел од Унијата, Хан потенцира дека тој индикативен датум не е предалеку, бидејќи за реформи и усвојување на стандардите на ЕУ е потребно време. Тој вели дека не станува збор само за промена на законите, туку и за нивна примена.


Бујар Османи ќе биде шеф на преговарачкиот тим со ЕУ


Скопје, 17 јули, 2018 - 9:58 (META) 

Вицепремиерот за европски прашања Бујар Османи е назначен за шеф на делегацијата и главен преговарач за Европската Унија, соопшти утрово премиерот Зоран Заев на заедничката прес-конференција со еврокомесарот, Јоханес Хан, по тематската владина седница посветена на скрининг процесот за почеток на преговорите со ЕУ.

За негов заменик е назначен советникот на премиерот за евроатлантски интеграции Бојан Маричиќ.


Димитров: Преговорите за Македонија следната година се тест за кредибилитетот на ЕУ


Брисел, 13 јули, 2018 - 16:35 (META) 

Министерот за надворешни работи, Никола Димитров, по 14. Совет за стабилизација и асоцијација кој се одржа во Брисел, порача дека една од причините зашто е важен почетокот на преговорите со Македонија е тоа што се и тест за кредибилитетот на Европската унија.

-Ние сме фанови на холандската стриктност и правичност, сакаме да го започнеме пристапниот процес токму затоа што е реформска алатка, сакаме да го направиме ова на начин што ќе го тестира кредибилитетот на сите земји членки. Станува се појасно дека ако Македонија не е една од земјите со пристапни преговори, тогаш има премногу преправање, а не доволно објективна проценка во нашиот регион – изјави Димитров на новинарско прашање како Владата може да се осигура дека идната година земји како Франција и Холандија нема повторно да го блокираат стартот на преговорите со Македонија во ЕУ.

Министерот оцени дека Македонија сака да се фокусира на домашните реформи и дека тоа што владата се обидува да го направи сега за една, две или три години е она што можеше да биде направено во последните петнаесет години.

– Ако порано беше автопат, сега патот е тесен и нагорен – рече Димитров.

Димитров заедно со државниот секретар за ЕУ, Бујар Османи, високата претставничка за надворешни работи, Федерика Могерини и еврокомесарот за проширување, Јоханес Хан, изразија огромно задоволство за последните случувања во Македонија, отворањето на патот за преговори во јуни 2019, поканата за членство во НАТО, постигнатиот договор со Грција како и со Бугарија.

Могерини, потпишувањето на Договорот со Грција го нарече „една од најголемите успешни приказни на нашето време без страв дека претерувам кога го кажувам ова”.  Хан потврди дека ќе биде во Македонија на 17 јули за стартот на техничкиот дел на процесот на скрининг со Владата.


Димитров и Османи на 14-от состанок на Советот за стабилизација и асоцијација


Брисел, 13 јули, 2018 - 9:30 (META) 

Вицепремиерот за европски прашања Бујар Османи и министерот за надворешни работи Никола Димитров во Брисел денеска ќе учествуваат на 14-от состанок на Советот за стабилизација и асоцијација на Македонија и ЕУ.

На состанокот се очекува да бидат разгледани теми за односите меѓу Македонија и ЕУ во рамки на Спогодбата за стабилизација и асоцијација, подготовките и предизвиците кои произлегуваат од временската рамка за почеток на преговорите, која неодамна ја усвои Советот на Европската Унија, како и останати теми поврзани со европските интеграции на Македонија.

Со годинешниот состанок ќе претседава високата претставничка на ЕУ и потпретседателката на Европската Комисија, Федерика Могерини, а во делегацијата на ЕУ е и еврокомесарот за  проширување Јоханес Хан. Копретседавач ќе биде македонскиот министер за надворешни работи Никола Димитров, а ќе учествува и вицепремиерот за европски прашања Бујар Османи.

Советот за стабилизација и асоцијација меѓу Република Македонија и ЕУ, како највисока форма на институционална соработка меѓу двете страни, заседава еднаш годишно.


Пенс до Заев: Честитки за договорот со Грција – се отвораат вратите за ЕУ и за НАТО


Скопје, 6 јули, 2018 - 9:48 (META) 

Потпретседателот на САД, Мајк Пенс, во телефонски разговор со македонскиот премиер Зоран Заев, вчера го честитал постигнувањето на Договорот на Македонија со Грција за решавање на спорот за името и им честитал на Заев и на неговиот грчки колега Алексис Ципрас за покажаното лидерство, соопшти македонската влада.

„Според потпретседателот Пенс, договорот покажува јасен сигнал дека Република Македонија се доближува кон развиениот западен свет, што ќе биде јасно верификувано на самитот на НАТО во Брисел наредната недела. Поканата за влез во НАТО, како што рече Пенс, е јасен сигнал дека позитивниот резултат од референдумот ќе значи конечно полноправно членство на Македонија во Северно-атлантската алијанса“, стои во владиното соопштение.

Пенс порачал дека САД ќе бидат и понатаму вклучени и ќе ги поддржат процесите кои следуваат во наредниот период во Македонија, посебно за спроведување на реформите, како и за целосно спроведување на договорот со Грција. Тој посакал и  успешни преговори за членство во Европската Унија, известува Владата.

Пенс за телефонскиот разговор извести преку својот Твитер-профил, порачувајќи дека искажал поддршка за Договорот со Грција. Тој вели дека успешното спроведување на договорот ќе ја отвори вратата кон евроинтеграцијата и ќе ги засили просперитетот и стабилноста на регионот.

Потпретседателот на САД имал телефонски разговор и со грчкиот премиер Ципрас, кому му ја упатил истата порака за значењето на Договорот за напредокот на регионот.