Димитров – Бјорнстад: Норвешка двојно ќе ја зголеми финансиската помош за Македонија


Скопје, 7 февруари, 2018 - 17:42 (META) 

Министерот за надворешни работи, Никола Димитров денеска имал средба со амбасадорот на Норвешка во земјава, Арне Санес Бјорнстад, во чиј фокус била норвешката поддршка за евроатлантската интеграција на Македонија, вклучително и проектната помош за подобрување на подготвеноста на Македонија за отпочнување на пристапните преговори со Европската Унија.

Амбасадорот Бјорнстад ја повторил поддршката за евроатланската интеграција на Македонија и неопходните реформи и информирал за одлуката на Норвешка за двојно зголемување на финансиската помош за Македонија во наредниот период.

Двете земји во август 2017 година во Осло потпишаа заедничка изјава за партнерство и соработка.

„Последна потврда за истата е започнувањето на проектот за техничка помош наменет за подобрување на капацитетите за процесирање и заштита на документи и унапредување целокупниот систем за комуникации на Министерството за надворешни работи на Република Македонија, како корисник на проектот. Спроведувањето на овој проект со времетраење од 12 месеци е предвидено да заврши до крајот на 2018 година, додека проценетата вредност на средствата за неговото спроведување изнесува 1,5 милиони евра“, стои во соопштението на Министерството за надворешни работи.

Иако не е членка на ЕУ, Норвешка во континуитет го споделува своето големо искуство во преговарањето и одржувањето тесни врски со Унијата преку Европската економска област, Шенгенската зона и други форуми на соработка.


Орбан му соопштил на Мицкоски дека ги поддржува евроинтеграциите на Македонија


Будимпешта, 2 февруари, 2018 - 19:08 (META) 

Лидерот на ВМРО-ДПМНЕ, Христијан Мицкоски, придружуван од потпретседателот на партијата, Александар Николоски, денеска во Будимпешта се сретна со унгарскиот премиер, Виктор Орбан.

На средбата, досегашната соработка помеѓу ВМРО-ДПМНЕ и унгарската владејачка партија ФИДЕЗ била оценета како одлична и од двете страни било констатирано дека истата треба да продолжи да се развива и во иднина. Од ВМРО-ДПМНЕ соопштија дека Орбан изразил целосна поддршка за новото раководство на партијата и за патот кон евроинтеграциите на нашата земја.

„Мицкоски го информираше Орбан за актуелната политичка ситуација во Република Македонија, потенцирајќи дека власта врши политички терор врз своите неистомисленици. На средбата беше посочено дека Македонија назадува и на економски план и на полето на демократијата со целосно нарушен систем на владеење на правото како основен столб на здравото општество. Како посебен проблем беше разговарано и за слободата на медиумите кои се под притисок во врска со критичкото опсервирање на владините политики“, велат од ВМРО-ДПМНЕ.

Орбан и Мицкоски заклучиле дека соработката помеѓу ВМРО-ДПМНЕ и ФИДЕЗ и понатаму ќе продолжи да се развива насока на продлабочување на пријателските односи, како и во насока на споделување на искуствата помеѓу двете партии.


Столтенберг ќе се обрати пред македонските пратеници на 18 јануари


Скопје, 5 јануари, 2018 - 12:27 (META) 

Генералниот секретар на НАТО, Јенс Столтенберг, кој месецов доаѓа во посета на Македонија, на 18 јануари на пленарана седница ќе им се обрати на пратениците во македонското Собрание.

Седницата, како што е наведено на официјалната веб-страницата на Собранието, е закажан за точно напладне и освен неа за овој ден не се закажани други седници на законодавниот дом.

Инаку, посетата на Столтенберг доаѓа во период на засилени активности и комуникација на властите во Скопје и Атина околу решевањето на деценискиот спор со името и очекувањата на Македонија за напредок во евроатлантските интеграции.


Џафери – Баша: Опозицијата да учествува во градење на здраво демократско општество


Тирана, 20 декември, 2017 - 19:14 (META) 

Претседателот на Собранието, Талат Џафери се сретна со претседателот на најголемата опозициска партија во Албанија, Љуљзим Баша, и пратениците во нејзин состав. Баша нагласил дека Демократската партија на Албанија (ДПА) е силен поддржувач на Македонија во однос на евроатланските интеграции.

Џафери истакнал дека „од особена важност е негувањето на добрососедските односи со пријателска Албанија, бидејќи двете земји споделуваат заеднички интереси“.

„Што се однесува до улогата на опозицијата, на средбата се истакна дека таа треба да биде конструктивна и да делува во насока на градење на здраво демократско општество каде слободата на изразување е неприкосновено право на секој поединец“, се вели во соопштението на собраниските служби.

Џафери, денеска се сретна и со претседателот на Собранието на Република Албанија, Грамоз Ручи, како и со претседателот на Албанија, Илир Мета.


Владата денеска ќе расправа за програмата за членство во НАТО


Скопје, 5 декември, 2017 - 11:31 (META) 

На денешната седница, Владата ќе расправа за неколку важни прашања, меѓу кои предничат информацијата за реконструкцијата на пругата Куманово – Бељаковце од железничкиот коридор 8, како и за проекти на ЕЛЕМ кои не се во рамките на основната дејност на државниот производител на струја.

Од стратешките теми, на маса е и предлог-текстот на годишната Национална програма на Република Македонија за членство во НАТО за 2017-2018 година.

На предлог на Управата за хидрометереолошки работи, ќе се разговара за потребата за санација на метеоролошките станици во Демир Капија, Штип и во Крива Паланка и за поправка на радарскиот систем „Ѓуриште“.

На дневниот ред е и предлог-законот за ратификација на Конвенцијата за спречување и борба против насилството врз жените и домашното насилство на Советот на Европа.

Министрите денеска ќе ја разгледаат и одлуката за утврдување на цената на годишната претплата на „Службен весник на Република Македонија“ и за годишната претплата на Регистарот на прописи на Република Македонија за 2018 година.

Ќе се разговара и за превентивни прегледи на социјално ранливи категории на граѓани, како и за предлог-законот за изменување и за дополнување на Законот за заштита на културното наследство.


Мета: Изборот на Албанец за претседател на Собранието ќе го зајакне соживотот


Скопје, 20 ноември, 2017 - 16:10 (META) 

Претседателот на Албанија, Илир Мета, на средбата со претседателот на Собранието на Република Македонија, Талат Џафери, истакнал дека го радува фактот што првпат претставник од албанската заедница во Република Македонија е претседател на Собранието и дека извршувањето на оваа висока и важна функција ќе биде само поттик за зајакнување на меѓуетничките односи и за соживотот во Република Македонија, соопштија од Собранието.

Албанскиот претседател, исто така, нагласил дека е потребно во следниот период двете страни тесно да соработуваат во областа на евроинтеграциите и дека постои голема потреба за деблокирање на процесот за евроатлантска интеграција на Македонија.

Собранискиот спикер Џафери истакнал дека како претседател на Собранието ќе придонесува за зајакнување и за интензивирање на односите меѓу двете пријателски земји на сите полиња, а особено во рамките на парламентарната соработка. Џафери, исто така, се заблагодарил за континуираната поддршка од страна на Албанија во врска со посакуваното зачленување на Македонија во НАТО.


Османи утре во работна посета на Париз


Скопје, 22 октомври, 2017 - 18:30 (META) 

Вицепремиерот задолжен за европски прашања, Бујар Османи, утре ќе отпатува во работна посета на Париз, соопшти денеска неговиот кабинет.

Османи утре во Париз ќе има средби со министерката за европски прашања при Министерството за надворешни и европски работи на Франција, Натали Лоазо, потоа со Емануел Ленан, советник во кабинетот на премиерот Едуард Филип, и со Сабине Тилае, претседател на комисијата за европски прашања во Националното собрание. При крајот на посетата, предвидена е средба и со Бертранд Соре, претседател на Франко-македонската група во Националното собрание на Франција.

„Вицепремиерот Османи ќе ја искористи посетата за да им ги претстави на високите претставници на Франција напредокот во процесот на европска интеграција на земјава, имплементацијата на планот „3-6-9“, како и напредокот во отстранувањето на политичките пречки, кои ѝ стојат на Република Македонија на патот на европските и на евроатлантските интеграции“, стои во соопштението.


Хан до Заев: Продолжете да работите демократски на започнатите реформи


Њујорк, 21 септември, 2017 - 12:12 (META) 

Продолжете да работите демократски на започнатите реформи, тоа што ќе го постигнете е важно за перспективите на вашата држава и за целиот регион, порачал еврокомесарот за проширување и добрососедска политика, Јоханес Хан на средбата со премиерот Зоран Заев, во рамките на 72. Генерално собрание на Обединетите нации во Њујорк.

Хан ги оценил иницијативите на Владата за добрососедство и регионална соработка како корисни во процесот на интегрирање на целиот Западен Балкан во Европската Унија и во НАТО.

Премиерот Заев на средбата истакнал дека Владата е активно фокусирана на реализацијата на планот „3-6-9“ и на активностите потребни за остварување на евроатлантските цели на државата.

– Ја заокружуваме првата фаза според предвидениот рок, до крајот на септември. Го имаме извештајот на експертот од ЕУ, Рајнхард Прибе и неговите сугестии ќе бидат земени предвид во вториот дел од планот на којшто веќе работиме. Работиме напорно, инклузивно, вклучувајки ги граѓаните, граѓанските организации, политичките партии, ги зацврстуваме постоечките пријателства и градиме нови со државите од соседството и на меѓународен план. Со право очекуваме исчекор во европските интеграции на есен, преку тргање на условеноста на препораката, а потоа и датум за преговори – рекол Заев на средбата со Хан, стои во соопштението од владината прес-служба.

На средбата, како што се додава, Заев и Хан разговарале и за отворените можности за напредок на Македонија на економски план, преку зголемениот интерес на домашните и странските инвеститори.

По едночасовната средба со Хан, премиерот присуствувал на вечерата која за лидерите на Западен Балкан ја организираше високата преставничка за надворешна и безбедносна политика на ЕУ, Федерика Могерини, во седиштето на делегацијата на ЕУ при ОН.


Џафери – Брглез: Словенија континуирано ја поддржува Македонија на патот кон ЕУ и НАТО


Скопје, 12 септември, 2017 - 14:15 (META) 

Словенија континуирано ја поддржува Македонија во процесот на евроатлантските интеграции, бидејќи целосната интеграција на регионот придонесува за зајакнувањето на стабилноста, мирот и на просперитетот. Ова било истакнато на денешната средба меѓу претседателот на Собранието, Талат Џафери, и неговиот колега – претседателот на Државниот збор на Словенија, Милан Брглез, кој е во посета на земјава.

Како што соопштија собраниските служби, за време на средбата Џафери го информирал својот словенечки колега за работата на Собранието, за претстојните локални избори и за динамиката на спроведувањето на реформите од планот „3-6-9“.

„Во однос на билатералната соработка, соговорниците се согласија дека таа е добра, но и дека може да биде продлабочена и проширена особено во доменот на парламентарната дипломатија. Двата парламенти соработуваат во рамките на Парламентарното собрание на Процесот за соработка во Југоисточна Европа (ПС на ПСЈИЕ) со кое во моментов претседава Република Словенија, а кое воедно претставува важен форум за зајакнување и за проширување на регионалната соработка“, стои во соопштението за средбата.

Џафери и Брглез разговарале и за мигрантската криза – за состојбите и мерките што ги презема Македонија на овој план, заедно со земјите – партнери, меѓу кои е и Словенија.


Димитров во Лондон ќе се сретне со Данкан и со британските парламентарци


Лондон, 12 септември, 2017 - 9:35 (META) 

Министерот за надворешни работи, Никола Димитров, ќе биде во прва работна посета на Велика Британија на 12 и 13 септември.

Домаќин на Димитров во Лондон ќе биде британскиот државен министер за Европа, сер Алан Данкан. За време на посетата, Димитров ќе има билатерални средби со британските парламентарци, а ќе има одделна средба и со Комисијата за надворешни односи во Горниот дом на Парламентот.

Во рамки на посетата, министерот Димитров ќе се обрати и на конференцијата „Демократија Велика Британија: Глобални вредности во несигурен свет“ (Democracy UK: Global Values in an Uncertain World) што ја организира „Вестминстер фондацијата за демократија“ (WFD) по повод 25-годишнината од нејзиното основање.

За време на посетата се очекува потврда на британската поддршка за евроатлантските интеграции на Македонија, а ќе биде разговарано и за унапредување на билатералните односи, преку конкретни проекти во различни области на соработка.