!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Хрватска се подготвува за воведување на еврото


Загреб, 9 октомври, 2017 - 10:31 (META) 

Народна банка на Хрватска подготви стратегија за воведување на еврото, која содржи анализа во корист на можните ризици од влегување во еврозоната, а ќе се објави на крајот на овој месец, пишуваат хрватските медиуми.

Евростратегијата ќе послужи како темелен документ за јавна расправа за воведување на еврото, која ќе ја отвори премиерот Андреј Пленковиќ.

Пленковиќ изјави дека се залага за воведување на еврото, по што би следувало официјално барање за влегување на Хрватска во Европскиот механизам на девизен курс (ЕРМ2).

Последен пат одлука за влегување на некоја земја во ЕРМ2 беше донесена во 2005 година и тоа за Словачка.


Еврото на шестмесечен максимум по победата на Макрон


Токио, 8 мај, 2017 - 12:12 (META) 

По победата на Емануел Макрон на претседателските избори во Франција, утринава еврото ја достигна највисоката вредност во последните шест месеци во однос на доларот и на јенот, јавија светските медиуми.

Причината е што инвеститорите се убедени дека ваквиот резултат, односно победата на Макрон над ултранационалистката Марин ле Пен, претседателка на крајно десничарската партија Национален фронт, ќе предизвика свеж дотек на пари во еврозоната.

Доларот во однос на еврото падна на 1,202, кога берзите во Азија реагираа оптимистички, но набргу се искачи на 1,099 кога почнаа со работа и европските берзи. Индексите на европските берзи исто така почнаа да се зголемуваат, а FTSE 100 во Лондон се искачи на самото отворање за 0,5 отсто.

На азиските берзи, исто така, едно евро се продаваше за 124,59 јени, во споредба со 124,05 јени на крајот од минатата недела и го достигна својот највисок курс кон јапонската валута по повеќе од една година.


По референдумот во Италија, еврото изгуби од својата вредност во однос на доларот


Рим, 5 декември, 2016 - 11:20 (META) 

Еврото изгуби од вредноста во однос на доларот и падна на 1,055 од 1,0625 долари, по првите анкети кои покажаа дека Италијаните на референдум ги отфрлија уставните промени на премиерот Матео Ренци, јавуваат светските медиуми.

Финансиските пазари реагираа на референдумот, а губењето на вредноста на еврото е последица на таквата реакција.

Италијанскиот премиер Матео Ренци го призна поразот на референдумот и рече дека презема целосна одговорност, па потоа поднесе оставка.

Референдумот во Италија беше за менување на уставот заради намалување на овластувањата и на големината на сенатот, а според оценките на аналитичарите, тоа би дало многу поголеми овластувања на претседателот на владата.


По победата на Трамп, вредноста на доларот почна да се зголемува


Вашингтон, 16 ноември, 2016 - 14:55 (META) 

Трговците со валути сметаат дека постојат 45 проценти шанси за вредноста на доларот спрема еврото да се зголеми на еден долар до крајот на идната година, пишува „Блумберг“.

Пазарот денеска се потпира на ветувањето на новиот американски претседател Доналд Трамп дека ќе ги намали даноците и дека ќе ја зајакне потрошувачката. Тоа би требало да го зголеми економскиот пораст, а тоа на крајот би довело до побрзо зголемување на каматните стапки на централната банка.

Аналитичар во „Дојче банка“, која е четврти најголем трговец со валути во светот, предвидува дека курсот ќе се зголеми на 1,05 долари за едно евро, а до крајот на следната година едно евро би можело да чини 95 центи.

На тој начин еврото во однос на доларот би било најслабо од 2002 година.


ЕУ нема да ја преживее следната економска криза, предупредуваат стручњаците


Париз, 22 септември, 2016 - 12:29 (META) 

Доколку креаторите на европските политики не спроведат клучни измени во монетарната политика на Европската Унија, еврото веројатно нема да ја преживее следната голема криза, предупредуваат од францускиот институт „Жак Делор“.

„Европа ќе биде погодена од следна економска криза. Не знаеме кога точно ќе се случи таа, но стравуваме дека Европската монетарна унија ќе биде лошо подготвена за една таква криза“, се наведува во извештајот на тој институт, а го пренесуваат светските агенции.

Авторите на истражувањето признаваат дека реформата на еврото можеби нема да биде популарна, но, како што истакнуваат, таа е од клучно значење и итно е потребна.

Стручњаците од институтот предлагаат зајакнување на европскиот стабилизационен механизам (ЕСМ), банкарската унија и координирање на економските политики.


ЕУ почна процедура за санкционирање на Шпанија и на Португалија


Брисел, 12 јули, 2016 - 13:57 (META) 

Министрите за финансии од еврозоната донеле одлука да почнат процедура за санкционирање на Шпанија и на Португалија поради кршење на правилата на ЕУ за трошење.

Двете земји се обвинети дека не прават доволно напори да го намалат нивниот буџетски дефицит, кој според регулативите на ЕУ треба да изнесува помалку од три проценти од домашниот бруто-производ (БДП). Правилото беше воведено во 1999 година, пред воведувањето на еврото, а досега ниту една земја не била казнета за неково прекршување.

Санкциите би значеле казна од 0,2 отсто од БДП на земјата и суспензија од обврските или исплатите од структуралните фондови на ЕУ од околу 0,5 отсто.

Брисел минатата година побара од Шпанија да го намали дефицитот на 4,2 отсто од БДП, но Мадрид не успеа во тоа, па тој на крајот на годината изнесуваше 5,1 отсто, што е за 0,8 отсто помалку во споредба со дефицитот од 2014 година.

Лисабон, пак, минатата година имаше дефицит од 4,4 отсто, што е за околу 10 отсто помалку во споредба со 2010 година, но помалку од три отсто во споредба со 2014 година, кога дефицитот изнесувал 7,2 отсто.


Брисел по Брексит би можел да притиска за воведување на еврото во цела ЕУ


Брисел, 29 јуни, 2016 - 15:43 (META) 

Осум земји членки на Европската Унија кои не го користат еврото како официјално средство за плаќање, поради Брексит, ќе мора веднаш да ја воведат заедничката европска валута, пишува весникот „Дејли експрес“.

Весникот наведува дека Данска, Шведска, Бугарија, Хрватска, Чешка, Унгарија, Полска и Романија би можеле да се најдат пред ултиматум кој ќе им го наметне претседателот на Европската комисија, Жан-Клод Јункер, кој по излегувањето на Британија од Унијата сака што побргу да ги поврзе другите членки на ЕУ со заедничка валута, за ЕУ да стане монетарна унија во целост.

Доколку еврото се воведе во кај сите членки, челниците на ЕУ ќе можат посериозно да се зафатат со идните чекори за поврзување на Европа во даночна унија.

Германскиот весник „Франфуртер алгемајне цајтунг“, исто така, пишува дека по излегувањето на Велика Британија од ЕУ ќе се забрзаат плановите за довршување на монетарната унија.


Брексит може да се почувствува и во македонската трговија


Скопје, 24 јуни, 2016 - 16:14 (META) 

Намалување на увозот и на извозот со Велика Британија е можна последица за македонската економија од излегувањето на оваа држава од Европска Унија. Но, генерално нема да има позначајни поместувања и негативни ефекти за македонското стопанство.

– Трговската размена со Британија не е мала. Британија последниве години е еден од најголемите трговски партнери на Македонија. Сепак, тоа е така поради една специфична компанија „Џонсон Мети“. Оваа компанија работи на тој принцип што увезува многу во Македонија, додава мала вредност тука, а потоа го извезува сето тоа. Затоа, слабеењето на фунтата, до кое дојде по Брексит, би можело да предизвика намалување и на увозот и на извозот, но тоа нема да значи промена на вкупниот трговски дефицит. Можно е да има одредени асиметричности, доколку извозот и увозот на оваа компанија не се во иста валута, бидејќи увозот доаѓа од Велика Британија, а извозот оди во Германија, но не верувам дека е така – вели економскиот аналитичар Бранимир Јовановиќ.

Од Стопанската комора на Македонија велат дека влијанието на Брексит за македонската економија многу зависи од следните чекори што ќе се преземат во однос на усогласување на сите детали и услови за излегување, како и од регулирањето на трговските договори со другите земји кои не се членки на Унијата.

– Сега е прашање дали и кога ќе се активира членот 50 од Лисабонскиот договор, кој го опфаќа процесот на одвојување од ЕУ кој би траел две години. Бидејќи Велика Британија е прва земја што ја напушта Унијата, засега не е докрај прецизирано и познато, и во рамки на ЕУ, какви сè импликации би можеле да настанат по оваа одлука – велат од Стопанска комора.

Оттаму додаваат дека ова не е едноставен процес, особено од економски аспект, бидејќи е поврзан со постигнување нови трговски договори и со начините за надминување на евентуалните нови тарифи и бариери, како и со слободното движење на стоки и на услуги.

– За бизнис-секторот е важно условите што ќе се дефинираат да не условат усложнување на воспоставените правила и принципи кои се пременуваа досега. Надворешно-трговската размена на Македонија со Велика Британија од 2001 година досега се одвиваше во согласност со Спогодбата за стабилизација и асоцијација меѓу Македонија и Европскaтa заедницa. Велика Британија е еден од главните трговски партнери, но и земја со посериозен обем на инвестиции во Македонија. Македонската економија, пак, е врзана за еврото, со што падот на британската фунта, која достигна најниска вредност во изминативе три децении во однос на американскиот долар, нема особено да се одрази на економијата генерално – додаваат оттаму.

Македонските компании очекуваат дека по падот на вредноста на фунтата, состојбата ќе се нормализира и дека нема да има позначајни поместувања и негативни ефекти по македонското стопанство.

Според Сојузот на Стопански комори (ССК), за нашата економија е важно каков економски договор ќе постигне Британија со ЕУ по официјалното излегување.

– Ова посебно се однесува на трговските односи на Германија со Британија, која извезува околу 100 милијарди долари годишно во Британија, а е наш најголем трговски партнер каде што реализираме 44 проценти од нашиот извоз – велат од ССК.

Вкупната трговска размена на Македонија со Велика Британија во првите четири месеци од 2016 година достигна вредност од 254,2 милиони долари, што претставува пад од 8,17 проценти во однос на истиот период од претходната година.

При тоа, остварен е извоз во вредност од 20,4 милиони долари или зголемување од 23, 4 проценти, додека увозното салдо изнесува 233,8 милиони долари или пад од 10,1 процент споредбено со истиот период од 2015 година.


Јункер: Крај за шенген-зоната значи и крај за еврото


Брисел, 15 јануари, 2016 - 11:50 (META) 

Невработеноста во ЕУ ќе се зголеми ако се распадне шенгенската зона, предупреди денеска претседателот на Европската комисија, Жан Клод Јункер, додавајќи дека во тој случај би било бесмислено да се задржи еврото како единствена валута.

– Шенген-зоната е едно од најголемите достигнувања од процесот на европските интеграции. Без неа, без слободно движење на работниците, без слободата на европските граѓани да патуваат, еврото нема смисла – рече Јункер на прес-конефернција.

Тој укажа на поврзаноста на шенген-зоната, слобода на движење и на внатрешниот пазар.

– Ако некој сака да ја „убие“ шенген-зоната, на крај ќе го убие и единствениот пазар. Тоа ќе доведе до проблеми со невработеноста во Европа. Помала шенгенска зона значи помала вработеност и помал економски пораст – заклучи Јункер.


Еврозоната нема наскоро да прима нови членки


Брисел, 28 декември, 2015 - 13:07 (META) 

Еврозоната во наредните неколку години нема да се шири, односно да прима нови членки, изјави денеска потпретседателот на Европската комисија, Валдис Домбровскис.

– Во следните години не треба да се очекува проширување на еврозоната – изјави Домбровскис за германскиот весник „Ди велт“ (Die Welt), кој е европски комесар задолжен за еврото.

Од 28 членки на ЕУ, 19 се во еврозоната.

Домбровскис потсети дека пред некоја земја да го усвои еврото како валута, ќе го фиксира курсот по кој домашната валута ќе се менува за еврото. Курсот се фиксира во рамките на Механизмот за девизен курс на ЕУ, т.н. чекална, во која земјите поминуваат две години пред да преминат на употреба на еврото, за да се потврди стабилноста на девизниот курс.

– Тој механизам е чекална за еврозоната. Во овој момент ниту една членка не се наоѓа во таа фаза, со исклучок на Данска, која е посебен случај – изјави европскиот комесар за евро.

Данска во механизмот се наоѓа од 1999 година, а според Договорот за ЕУ, има можност да избере да остане надвор од еврозоната и во случај да ги исполни сите критериуми.

Меѓу деветте земји-членки на ЕУ кои се надвор од еврозоната се и Велика Британија и Шведска, кои никогаш не искажале намера да воведат ја единствената европска валута.