Екипите на „ЕВН Македонија“ ги санираат дефектите во дистрибутивната мрежа


Скопје, 14 февруари, 2018 - 14:32 (META) 

Големо невреме проследено со обилни врнежи од дожд и снег предизвика прекини во снабдувањето со електрична енергија во Југозападниот дел на Македонија. Без струја се дел од населените места во планинските региони околу Охрид, Струга, Гостивар, Кичево, Тетово, Маврово и Реканскиот крај.

„Екипите на ЕВН Македонија во текот на вчерашниот ден ги санираа дефектите во повеќе населени места, освен онаму каде што имаше проблеми со пристапот поради големи наноси од снег и одрони на патот. Од утринава, екипите се постојано на терен и како што ги санираат дефектите, така населените места се пуштаат под напон. ЕВН ги активираше сите расположливи ресурси, човечки и материјални, со цел побрзо справување со дефектите од невремето“, велат од компанијата.

Од таму додаваат дека зимските возила, моторните санки и целата опрема е во служба на екипите за пробивање на најкритичните и непристапни места.

„ЕВН Македонија е во постојана координација со другите енергетски компании кои го сочинуваат енергетскиот систем во земјава, со цел надминување на сите проблеми кои ги предизвика невремето“, се додава во соопштението.


Утре делови од Ѓорче Петров, Карпош и Центар ќе бидат без струја


Скопје, 17 декември, 2017 - 11:18 (META) 

Дел од жителите на Ѓорче Петров, Карпош и Центар утре по неколку часа ќе бидат без електрична енергија поради поради закажани технички зафати на ЕВН Македонија во дистрибутивната електро мрежа.

Од 09:00 до 10:30 часот без струја ќе бидат дел од корисниците на улиците „Црногорска“, „Кузман Шапкарев“, „Гостиварска“ и „Беаз Куле“ во Ѓорче Петров. Од 09:00 до 11:00 часот, корисниците од дел од бул. „Митрополит Теодосиј Гологанов“, поточно од бр. 98 до бр. 114 во Карпош, и од 10:00 до 14:00 часот, дел од корисниците на „Максим Горки“ и „Наум Наумовски – Борче“ во Центар.

Во вторник (19 декември) од 9:00 до 13:00 часот без струја ќе бидат корисниците од дел од ул. „Мирче Оровчанец“ во Центар, од 9:00 до 14:30 часот дел од корисниците од село „Сарај“ и од 10:00 до 14:00 часот дел од корисниците на улиците „Прашка“ и „Париска“ во скопски Карпош.


ЕВН заврши со имплементација на дневната евтина тарифа за сите достапни броила


Скопје, 26 октомври, 2017 - 13:49 (META) 

ЕВН го спроведе планот за прилагодување на броилата, односно заврши со имплементација на дневната евтина тарифа за сите достапни броила.

„Согласно планот, прилагодувањето на броилата се спроведуваше во период од четири отчитувачки недели, почнувајќи од 25 септември до 24 октомври. На екранот на секое прилагодено броило се покажува Т2-индикатор во периодот од 14 до 16 часот секој работен ден и во сабота“, информираат од компанијата.

Од таму додаваат дека и покрај тоа што нивните тимови ги посетиле сите мерни места, потребата од физички контакт на тимовите со броилата го оневозможила спроведувањето на дневната евтина тарифа за недостапните броила.

„Ова значи дека броилата до кои немавме пристап, сè уште не се прилагодени, а тие се најчесто викендички или домови на моментално иселени корисници. „ЕВН Македонија“ во наредните недели ќе продолжи со прилагодување на останатите броила кои беа недостапни, како дополнителен план за спроведување на дневната евтина тарифа“, додаваат од компанијата.


ЕЛЕМ ќе купува струја за грејната сезона


Скопје, 5 октомври, 2017 - 15:00 (META) 

ЕЛЕМ денеска ќе распише повик, а на 10 октомври ќе биде одржана аукција за купување на 29,7 гигават-часови електрична енергија.

„Електричната енергија што е планирана да се купи во октомври е наменета за ноември, кога ќе биде зголемена побарувачката поради грејната сезона. Производството на ЕЛЕМ во тој период ќе биде недоволно поради тоа што еден блок на РЕК Битола сè уште ќе биде во ремонт, во РЕК Осломеј сè уште траат подготвителните активности за почеток на производството и за дополнителен ископ на јаглен, кој досега не бил обезбеден, додека хидроелектраните не располагаат со доволно акумулации за потребите на производството во зимскиот период“, соопштуваат од ЕЛЕМ.

Во соопштението се додава дека дополнителното количество електрична енергија потребно за ноември, ЕЛЕМ го набавува еден месец порано за со навремениот повик до фирмите увозници да обезбеди подобра конкуренција и пониска цена.

„За увоз на електрична енергија за втората половина на 2017 година претходното раководство на компанијата предвидело осум милиони евра, сума која сегашното раководство планира да ја намали преку планско и навремено купување на потребните дополнителни количества по најповолни цени во следните два месеца, колку што ЕЛЕМ има обврска да купува електрична енергија при недоволно домашно производство“, објаснуваат од компанијата.

Од 1 јануари во 2018 година оваа обврска повторно ќе ја преземе ЕВН, бидејќи резултатите од оваа година покажуваат дека новопреземената обврска на ЕЛЕМ за купување електрична енергија не го намали увозот и цените, туку напротив, ги зголеми во споредба со годините наназад кога увозот го вршеше ЕВН, односно од 44,6 евра за мегават-час просечна цена за увоз во 2016 година, а во 2017 година просечната цена е зголемена на 74,1 евра за еден мегават-час.


ЕВН од утре ќе ги усогласува броилата во домаќинствата за да се воведе евтина струја


Охрид, 24 септември, 2017 - 16:46 (META) 

ЕВН од утре ќе почне со усогласување на броилата, за домаќинствата од 1 октомври да добијат евтина струја. Претседателот на управниот одбор на ЕВН, Штефан Петер, информираше дека тоа ќе се прави постепено.

Усогласувањето на броилата ќе почне како резултат на одлуката на Владата, од 1 октомври да се воведе евтина струја од 14 до 16 часот.

За цената на електричната енергија, Петер рече дека за оваа година може да се очекува намалување.

– На долгорочен план, тоа зависи од глобаниот пазар на електрична енергија. Мора да се одлучува година по година – изјави денеска Петер, кој во Охрид учествува на конференција за енергетика.

Министерот за информатичко општество и администрација, Дамјан Манчевски, најави инвестирање во соларни паркови и субвенционирање на уреди за домаќинства.

– Македонија мора да го зголеми сопственото производство на електрична енергија и да го намали увозот, притоа водејќи сметка за зачувување на чистата животна средина преку поголема експлоатација на обновливи извори на енергија – изјави Манчевски.


ЕВН: Уште вчера дадовме одговори на граѓаните


Скопје, 24 февруари, 2017 - 18:42 (META) 

Компанијата „ЕВН Македонија“ попладнево се обрати со информација за јавноста, велејќи дека одговорите што некои граѓани од Тетово ги поставиле, а денеска протестираа, се одговорени вчера.

„Уште вчера со претставници на советот на граѓани од Тетово имавме конструктивен состанок, на кој им доставивме писмени одговори. Во одговорите ги објаснивме сите отворени прашања, дадовме појаснувања и информации и за прашањата кои не се во надлежност на ЕВН, како цената, тарифи, либерализаци и слично. Детално ги образложивме темите за кои сме директно прозвани, како што се подобрување на напонот во критични точки кои се дел од нашата инвестициона програма, долговите на корисниците, приклучоците, подобрување на веќе воспоставените комуникациски услуги и др.“, се вели во соопштението од компанијата.

Во врска со барањата упатени од некои граѓани од општина Чаир, од ЕВН велат дека тие се доставени до Корисничкиот енерго-центар на ЕВН „Васил Главинов“, по што ќе бидат разгледани од службите и соодветно одговорени и доставени.

Протестот против ЕВН што се одржа од 13 часот денеска близу џамијата „Јаја-паша“ денеска беше малуброен, но предизвика голем сообраќаен хаос и огромен револт од жители на општините Чаир и Бутел кон десетината луѓе што го блокираа сообраќајот во знак на протест.


Протестите против ЕВН го задушија сообраќајот во Чаир


Скопје, 24 февруари, 2017 - 15:02 (META) 

Речиси два часа откако почнаа протестите против ЕВН и МЕПСО на неколку десетици граѓани кај комплексот „Чаирчанка“, во непосредна близина на џамијата „Јаја-паша“, сообраќајот полека се нормализира, откако Пластичарска улица, улицата Џон Кенеди и улиците во населбите Топанско Поле, Скопје Север и Чаир беа задушени од возилата кои беа пренасочувани по нив. Возилата беа пренасочувани на овие улици поради затворањето на  улицата Цветан Димов.

„Тргни-застани“ беше дури и на улицата Втора македонска бригада, помеѓу Чаир и Скопје Север, а по Пластичарска од надвозникот на булеварот Крсте Мисирков до семафорите кај Амбасадата на САД се возеше и повеќе од 40 минути.

Се пренасочуваа и линиите на јавниот автобуски превоз, а состојбата сега се нормализира.


Тетовци протестираа пред седиштето на ЕВН во Тетово


Тетово, 10 февруари, 2017 - 15:55 (META) 

Околу илјада граѓани протестираа попладнево пред седиштето на ЕВН во Тетово, незадоволни, како што велат, од цената што ЕВН им ја наплатува за потрошена електрична енергија. Тие упатија повеќе барања до компанијата ЕВН, меѓу кои и да се либерализира пазарот на дистрибуција на струја.

– Бараме ЕВН да ја намали цената на киловат-час електрична енергија, затоа што цената на отворена берза е многупати помала од таа што се фактурира на граѓаните на Македонија, да се отстрани индустриската тарифа, итно да се либерализира за сите потрошувачи пазарот на дистрибуција. Да ѝ се забрани на ЕВН основните средства за дистрибуција што ги плаќа потрошувачот да ги присвои како свои инвестиции. Да не наплатува такса за приклучок на потрошувачот од 500 евра, затоа што тоа е нешто кое е забрането со закон – рече Џемал Хасипи од организациониот одбор за протести против ЕВН.

Учесниците на протестот побараа од компанијата да ги пронајде крадците на струја, за да не се казнуваат сите потрошувачи и да се забрани поставување на броила на јавни површини.

Од организациониот одбор за протести против ЕВН, рекоа дека протестите ќе продолжат и понатаму, во зависност од тоа дали ЕВН ќе ги прифати нивните барања.


Државните службеници во подрачните одделенија во Тетово два дена се без греење


Тетово, 13 јануари, 2017 - 15:34 (META) 

Државните институции сместени во зградата на Општина Тетово, од вчера се без греење. Работи само една фаза од електричната мрежа, на која не можат да се приклучат грејни тела. Административците од подрачните одделенија во Тетово, на министерствата за правда, земјоделство, финансии, работат со јакни, капи, шалови.

– Па, нема никакакви услови, многу е студено, работиме на температура под нулата, а не е првпат ова да ни се случува – изјави еден вработен во тетовското подрачно одделение на Министерството за финансии.

Од ЕВН велат дека поради замена на електричен кабел, вчера не работела една фаза во тој дел од градот каде се лоцирани и државните институции.

Денеска, како што ни изјави портпарол на ЕВН, Атанас Ковачевски, бил прегорен осигурувач, па затоа не работеле двете фази во просториите каде се сместени државните институции.

Оваа грејна сезона, зградата на Општина Тетово нема централно греење. Во октомври минатата година целосно изгоре котларницата. Сега административците се греат на разни печки на струја и поради преоптовареност на мрежата, честопати се појавуваат прекини во напојувањето со струја.

Од Општина Тетово велат дека се работи на реконструкцијата на котларницата, но поради ниската температура десетина дена градежните активности биле во мирување. Деновиве се очекува целосно да се обнови котларницата и зградата на Општина Тетово повторно да добие централно греење.


ЦУК: Состојбата е стабилна, но ниската температура е нов ризик-фактор


Скопје, 7 јануари, 2017 - 17:31 (META) 

Управувачкиот комитет за кризи на денешната седница заклучи дека состојбата во Македонија со невремето предизвикано од неповолните метеоролошки услови е генерално стабилна, но оти сè уште простојат ризици за негативен развој на настаните, особено од ниската температура што може да предизвика проблеми во снабдувањето со електрична енергија и со вода, како и во сообраќајот.

Портпаролот на Владата, Александар Ѓорѓиев, рече дека надлежните служби прават сè што е во нивна моќ на централно и на локално ниво за да се надминат предизвиците со кои се соочува земјата. Тој рече дека од денеска во следните денови главен предизвик со кој ќе се справуваат е ниската температура, која создава проблеми со здравјето на населението, снабдувањето со електрична енергија и со водоснабдувањето, како и со движењето на лицата и со сообраќајот.

Ѓорѓиев рече дека институциите остануваат подготвени во секој момент да дејствуваат и на секој дел од теренот и да сторат сè што е во нивна моќ за да се сведат ризиците на минимум и последиците да бидат надминати во краток временски период. Тој истакна дека на сила остануваат препораките и законските обврски за движење во сообраќајот и нагласи граѓаните кои мора да патуваат, тоа да го прават во периодот од денот кога има повисока температура.

„ЕВН Македонија“, како што рече Ѓорѓиев, во текот на минатата вечер имале поголем број интервенции во западниот дел од земјава, а во моментов работат на санирање на проблемите во некои од планинските села во источниот дел од Македонија. Според податоците на „ЕВН Македонија“, потрошувачката на електрична енергија за разлика од вчера, кога беше повисока за 5 отсто од вообичаеното, денеска е зголемена за 10 отсто. Тоа, како што соопштиле од „ЕВН Македонија“, може да предизвика проблеми со снабдувањето, поради што се препорачува граѓаните рационално да ја користат електричната енергија.

Од Центарот за управување со кризи (ЦУК) истакнаа дека магистралните патишта во земјава и во најголем дел регионалните се проодни во зимски услови и отежнато. Авионскиот и железничкиот сообраќај се одвиваат редовно, освен на делот од пругата од Велес кон Кочани, каде од синоќа од 21 часот има наноси на снег.

– Меѓуградските линии се одвиваат редовно, со задоцнување од половина час до час, а забрани за сообраќај за тешки возила засега има на планинскиот превој Маврово, но забраните во текот на денот повторно може да стапат на сила, бидејќи од час на час состојбата се менува. На бесплатниот телефонскиот број на ЦУК за итни повици 195, во последното деноноќие имавме околу 60 повици, кои во најголем дел беа од инфромативен карактер – рече Надица Вчкова од ЦУК.