!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Поради поплави, евакуирани повеќе од 100 семејства во Албанија


Тирана, 2 декември, 2017 - 17:06 (META) 

Врнежите во Албанија предизвикаа излевање на реките и поради тоа евакуирани се повеќе од 100 семејства, 120 километри југозападно од Тирана, соопшти Министерството за одбрана на Албанија.

Официјалните лица наведоа дека поплавени се 3.334 куќи, како и 3.016 хектари земјоделско земјиште. Невремето остави 23.000 луѓе без струја, а летовите од аеродромот во Тирана се откажани.

Албанскиот премиер Еди Рама изјави дека 6.400 специјалци, полицајци и војници се борат со оваа критична ситуација.

Во поплавите, едно лице го загуби животот.


Евакуиран шкотскиот парламент поради сомнителен пакет


Единбург, 7 ноември, 2017 - 15:18 (META) 

Дел од шкотскиот парламент денеска е евакуиран откако во зградата е пронајден сомнителен пакет, јавуваат британските медиуми.

Како што соопшти портпаролот на шкотскиот парламент, пакетот е пронајден на кат каде што се наоѓаат канцелариите на Ториевците.

Истражувачот на „Би-би-си“ на својот профил на „Твитер“ напиша дека во пакетот имало бел прав и дека бил испратен до еден од пратениците.


Сè поголем бројот на загинати во пожарите на северот на Калифорнија


Сакраменто, 11 октомври, 2017 - 15:37 (META) 

Најмалку 17 лица загинале, а 150 се водат како исчезнати во пожарите што беснеат во северните делови на американската сојузна држава Калифорнија, јавуваат светските медиуми.

Стотици пожарникари се обидуваат да ја стават под контрола огнената стихија во која досега изгореа 1.500 куќи, а десетици илјади лица се евакуирани. Работата на пожарникарите им ја отежнува ветерот, кој на моменти дува со брзина поголема од 80 километри на час.

Според медиумите, пожарите на северот на Калифорнија ќе остават тешки последици за економијата на тоа подрачје, кое е познато по одгледувањето винова лоза.

Од противпожарната служба соопштија дека во пожарите изгореле 46.000 хектари насади во Северна Калифорнија.


Еруптира вулканот Шинмоедаке во Јапонија, наредена евакуација на населението


Мијазаки, 11 октомври, 2017 - 11:42 (META) 

Вулканот Шинмоедаке во јужниот дел на Јапонија еруптираше првпат во последните шест години, исфрлајќи облаци пепел во висина од неколку стотина метри, јавуваат светските агенции.

Јапонските власти веднаш издале предупредување и го повикале населението во близина на вулканот на евакуација.

Вулканската пепел достигнала висина од 300 метри кога почнала ерупцијата, која најверојатно ќе продолжи и ќе стане поинтензивна, навеле од јапонската метеоролошка агенција.

Пепелта била распослана во круг од повеќе од два километри околу кратерот на вулканот. Нивото на предупредување е подигнато на трет степен, што значи забрана за приближување до вулканот.

Јапонија лежи на познатиот Пацифички огнен појас и има неколку активни вулакни кои неретко предизвикуваат и земјотреси. Во септември 2014 година вулканот Онтаке по 90 години ненадејно еруптиташе, при што загинаа 63 лица.


Поради 130 лажни дојави за бомби, евакурани 100.000 жители на Москва


Москва, 6 октомври, 2017 - 21:01 (META) 

Во Москва денеска се создала огромна загриженост откако поради вкупно 130 дојави за подметнати бомби, биле евакуирани околу 100.000 луѓе од четирите московски аеродроми, од 15 трговски центри, повеќе од 20 училишта, пет железнички станици, неколку хотели и други објекти. Истрагите потоа утврдиле дека дојавите се лажни, односно не биле подметнати бомби.

– Од почетот на денот, безбедносните служби добија повеќе од 130 дојави за подметнати бомби. Од сите објекти беа евакуирани повеќе од 100.000 луѓе – вели за руските медиуми претставник на раководните структури во безбедносните служби.

Ова е досега најголемата серија лажни дојави, што е феномен што се случува од почетокот на септември годинава во неколку градови во Русија.

Најверојатно виновни за лажните дојави се руски државјани кои живеат во странство. Дојавите биле преку интернет и затоа било тешко да се идентификуваат.


Илјадници луѓе евакуирани во Москва поради дојави за подметнати бомби


Москва, 13 септември, 2017 - 18:26 (META) 

Повеќе од 20.000 лица денеска биле евакуирани од трговските центри, железничките станици, театри и од универзитети во Москва поради речиси симултани дојави дека на повеќе места во градот е поставен експлозив, јавуваат светските агенции.

Иако се претпоставува дека станува збор за лажни дојави, полициски специјалци со кучиња трагачи ги пребаруваат местата. Според информациите на агенциите, досега биле пребарани пет локации, но не бил најден експлозив.

Слични дојави за поставен експлозив изминатите денови имаше и во неколку други градови во Русија.

Првата дојава и евакуација се случи на 10 септември, во канцеларијата на градоначалникот на Омск, кога непознато лице се јавило на телефон и пријавило дека во зградата има бомба.

Зградата беше евакуирана и пребарана, но не беше најден никаков експлозив.

Вчера повеќе од 5.700 ученици и наставен кадар во седум училишта во уралскиот град Перм во Русија беа евакуирани поради дојава и закана со подметната бомба.


Евакуирани седум училишта во Русија поради дојави за подматнати бомби


Москва, 12 септември, 2017 - 15:39 (META) 

Повеќе од 5.700 ученици и наставен кадар во седум училишта во уралскиот град Перм во Русија се евакуирани поради дојава и закана со подметната бомба, соопшти локалното министерство за безбедност.

Седум училишта и административни згради во градот, кој е 13. по населеност во Русија, добиле анонимни дојави дека во нив е поставен експлозив.

„Половина час по информацијата, учениците и вработените се евакуирани од овие образовни институции. Евакуирани се 5.706 лица“, наведе министерството.

Припадниците на полицијата и на Националната гарда ги пребаруваат зградите со кучиња трагачи.

Локалните медиуми јавуваат дека поради дојава за бомба се евакуирани и студентите од Националниот универзитет за истражување во Перм, како и минувачи и граѓани на една автобуска станица.


Ураганот Ирма ја погоди Куба и оди кон Флорида


Мајами, 9 септември, 2017 - 12:30 (META) 

Ураганот Ирма денеска, откако зајакна до бура од петти степен, сe насочи кон Флорида, оставајќи зад себе уништување и многу загинати луѓе на Карибите. Ирма претходно ја погоди Куба, а во подрачјето на Карибите и на Флорида предизвика можеби најголема евакуација во историјата на тој предел.

Бројката на жртви на Ирма се искачи до 21 лице, откако ураганот го погоди крајбрежјето на Куба со ветрови со максимална брзина од 260 километри на час, соопшти Националниот центар за урагани на САД.

Ирма е на околу 485 километри од Мајами и се движи на запад со околу 20 километри на час. Се очекува ураганот попладнево по локално време да стигне до Флорида.

Властите во Флорида повикаа 5,6 милиони лица, повеќе од една четвртина од населението да се евакуираат пред налетот на Ирма. Гувернерот на Флорида Рик Скот веќе неколку дена ги повикува жителите на државата, особено оние кои живеат во крајбрежните региони. да се евакуираат.

Две нуклеарни централи во Флорида ќе бидат затворени поради Ирма. Компанијата оператор „Флорида пауер енд лајт“ соопшти дека ќе ги затвори централите „Тарки поинт“ и „Сент Луси“ пред ураганот да стигне на копното.

Ирма ги погоди Куба и Бахамите, како и источниот дел на Карипскиот Регион, нанесувајќи катастрофални штети. Биланост на жртвите изнесува 21, но постои можност тој да се зголемува.

Истовремено, ураганот Катја го достигна мексиканското крајбрежје кај градот Теколутла. Бурата е од прва категорија и е проследена со ветрови од 120 километри на час.

Во Атлантскиот Океан ураганот Хозе се зајакна речиси до бура од петта категорија со ветрови со брзина од 250 километри на час. Хозе речиси во чекор го следи ураганот Ирма.


МНР: Нема пријавени македонски државјани погодени од ураганот Ирма


Скопје, 9 септември, 2017 - 10:15 (META) 

Министерството за надворешни работи (МНР) претпладнево соопшти дека до амбасадата на Република Македонија во Вашингтон не се обратиле за помош македонски државјани погодени од ураганот Ирма, кој ги зафати Карибите и брегот на САД.

Од министерството велат дека од социјалните служби дознале за еден македонски државјанин на островот Сент Мартин.

„Воедно, во комуникација сме и со Канцеларијата на странски мисии во Вашингтон и до денеска немаме добиено информација за пријавени македонски државјани од погодените подрачја. Од социјалните мрежи дознавме дека има еден македонски државјанин на островот Ст. Мартин. Иако островот територијално припаѓа под јурисдикција на Франција и Кралството Холадија, поради географската близина сепак пробавме да стапиме во контакт уште во текот на вчерашниот ден (преку социјалните мрежи) но сè уште немаме добиено одговор“, се вели во соопштението.

Телефонските броеви за контакт со македонската амбасада во Вашингтон на кои може да се обратат македонските граѓани во секое време се 202-390-7418 и 202-667-0501.

Министерството за надворешни работи пренесува дека според локалните власти, иако ураганот паднал на четвртиот степен од Сафир-Симпсон скалата, тој се уште претставува опасност за жителите на Флорида.
Затоа се препорачува постојано да се информирате за ситуацијата, да ги следите упатствата на локалните власти.

Според податоците од Националниот центар за урагани во Вашингтон, ураганот Ирма ќе стигне до брегот на Флорида во недела.


Вонредна состојба во Лос Анџелес поради големиот пожар


Лос Анџелес, 4 септември, 2017 - 10:08 (META) 

Поради големиот пожар кој го зафати поголемиот дел на Лос Анџелес, гувернерот на Калифорнија прогласи вонредна состојба.

Околу илјада пожарникари, со стотина противпожарни возила, како и девет специјализирани хеликоптери се вклучени во гаснењето на пожарот, кој досега уништи неколку станбени згради, куќи, а се приближува и до реонот на Бурбенк.

Досега на реонот на Бурбенк се евакуирани повеќе од 300 куќи, а во другиот дел од градот уште 180 поради пожарот што во саботата избувна на падините на планината Вердуго и за кратко време се рашири на повеќе од 2.000 хектари шума.