Радев: Бугарија е загрижена од ескалацијата во Македонија за договорот со името


Софија, 14 јуни, 2018 - 13:36 (META) 

Бугарија е многу загрижена од ескалацијата во Македонија во врска со договорот за новото име на државата, рече бугарскиот претседател Румен Радев на денешната прес-конференција во Софија, по средбата со македонскиот претседател Ѓорге Иванов.

Радев го повика Иванов да не биде само учесник, туку и водач во дијалогот меѓу институциите во Република Македонија, бидејќи, како што истакна, тоа е важен услов за постигнување на стратешките приоритети – членство во ЕУ и НАТО.

– Бугарија го прифаќа договорот меѓу Македонија и Грција за името, особено заради тоа што ќе ги отстрани пречките на патот на Македонија кон ЕУ и НАТО – рече Радев.

Бугарската поддршка на договорот за името, како што истакна, е поврзана со стриктно почитување на договорите што Скопје и Атина ги имаат со Софија.

Иванов во Софија требаше да се сретне и со бугарскиот премиер Бојко Борисов и бугарската министерката за надворешни работи Екатерина Захариева, но средбите во последен момент беа откажани. 


Курц и Заниер најостро ги осудија упадот во Собранието и нападот на пратениците


Виена, 28 април, 2017 - 10:09 (META) 

Претседавачот на ОБСЕ и австриски министер за надворешни работи, Себастијан Курц, и генералниот секретар на ОБСЕ, Лaмберто Заниер, најостро го осудуваат вчерашниот упад во Собранието на Македонија во Скопје.

Тие сметаат дека насилството не може да биде замена за политичките решенија и дека таквите решенија треба да се бараат во рамките на демократските процеси на одговорен начин.

„Нападите на неколку членови на Собранието, упадот во зградата на парламентот – срцето на демократијата на земјата, се шокантни. Ова е акт на заплашување, напад на претставниците на народот, кој јас категорично го осудувам. Смиреноста и редот мора веднаш повторно да се воспостават. Ги повикувам сите страни да се воздржат од понатамошна ескалација на тензии или насилство“, рече Курц.

Генералниот секретар Заниер рече дека за насилството нема место во политичкиот процес.

„Насилството мора веднаш да престане. Органите за спроведување на законот мора да обезбедат безбедност на пратениците и да ги изведат сторителите пред лицето на правдата“, изјави Заниер.

Претседавачот на ОБСЕ и генералниот секретар ги повикуваат политичките чинители повторно да го воспостават дијалогот во Собранието и да ги почитуваат демократските принципи, како и резултатите од декемвриските избори.


Најмалку 30 загинати војници во Нагорно-Карабах – ситуацијата и натаму тензична


Степанакерт, 3 април, 2016 - 11:25 (META) 

Нови борби меѓу вооружените сили на Ерменија и Азербејџан се одвивале ноќеска во регионот на Нагорно-Карабах, долж линија за контакт, јавува „Би-би-си“.

Извештаите од теренот, на кои се повикува британскиот национален сервис, велат дека од двете страни било користено тешко вооружување, минофрлачи и артилерија.

Во вчерашните борби, според информациите, загинале најмалку 30 војници, а има информации и за цивилни жртви.

Министерствата за одбрана на Азербејџан и на непризнаената република на Нагорно-Карабах соопштиле дека ситуацијата дожл линијата за контакт и натаму е тензична.

Властите во Ереван и Баку вчера меѓусебно се обвинија за поттикнување на насилствата.

Рускиот претседател Владимир Путин вчера ги повика властите на Ерменија и на Азербејџан да ги запрат воените дејствија кои избувнаа ноќта меѓу петокот и саботата.

Судирот меѓу Ерменија и Азербејџан почна во 1988 година, откако автономниот регион Нагорно-Карабах, со мнозинско ерменско население најави отцепување од Азербејџан.

Нагорно-Карабах прогласи независност во 1991 година, што предизвика војна меѓу двете земји, која траеше до 1994 година.


Путин ги повика Ерменија и Азербејџан да ги запрат борбите во Нагорно-Карабах


Москва, 2 април, 2016 - 15:44 (META) 

Рускиот претседател Владимир Путин денеска ги повика властите на Ерменија и на Азербејџан да ги запрат воените дејствија во регионот на Нагорно-Карабах кој избувнаа ноќеска, јавува „Би-би-си“.

Министерот за одбрана на Русија, Сергеј Шојгу, како што пренесуваат агенциите, во текот на денов имал телефонски разговори со своите колеги, министрите за одбрана на Ерменија и на Азербејџан, Сејран Оханјан и Закир Хасанов.

Ноќеска дошло до ескалација на судирот меѓу Ерменија и Азербејџан во Нагорно-Карабах, а медиумите јавуваат дека имало употреба на тешки митралези и минофрлачи долж граничната линија.

Министерствата за одбрана на двете земји си ја префрлаат вината, обвинувајќи се меѓусебе за ескалацијата на судирот.

Портпаролот на ерменското министерство за одбрана изјави дека во синоќешните судири имало жртви од двете страни.

Судирот меѓу Ерменија и Азербејџан почна во 1988 година, откако автономниот регион Нагорно-Карабах, со мнозинско ерменско население најави отцепување од Азербејџан.

Нагорно-Карабах прогласи независност во 1991 година, што предизвика војна меѓу двете земји, која траеше до 1994 година.


Ескалација на судирот меѓу Ерменија и Азербејџан околу Нагорно-Карабах


Ереван/Баку, 2 април, 2016 - 12:09 (META) 

Ноќеска дошло до ескалација на судирот меѓу Ерменија и Азербејџан во Нагорно-Карабах, а медиумите јавуваат за употреба на тешки митралези и минофрлачи долж граничната линија.

Министерствата за одбрана на двете земји си ја префрлаат вината, обвинувајќи се меѓусебе за ескалацијата на судирот.

Министерството за одбрана на Азербејџан денеска соопшти дека вооружените сили на Ерменија го прекршиле примирјето долж линијата за контакт и отвориле оган 127 пати во последните 24 часа. Во соопштението било наведено дека ерменската војска употребила минофрлачи и тешка артилерија.

Ерменското министерство за одбрана, пак соопшти дека на линијата за контакт дошло до „офанзива од другата страна“, во која биле употребени тенкови, артилерија и борбени авиони.

„Во тек се судири. Ерменската војска одговори со контранапад. Има жртви на двете страни, но, другата страна претрпе големи загуби во луѓе и техника, а еден азербејџански хеликоптер е соборен“, изјавил портпаролот на ерменското министерство за одбрана, пренесува „Спутник“.

Судирот меѓу Ерменија и Азербејџан почна во 1988 година, откако автономниот регион Нагорно-Карабах, со мнозинско ерменско население најави отцепување од Азербејџан.

Нагорно-Карабах прогласи независност во 1991 година, што предизвика војна меѓу двете земји, која траеше до 1994 година.


Мигрантската криза може да ескалира пред 8 март, предупреди Попоски во Женева


Женева, 29 февруари, 2016 - 17:03 (META) 

Има основа за загриженост дека мигрантската криза може да ескалира или, во најмала рака, да се компликува порано од 8 март, изјавил меѓу другото министерот за надворешни работи, Никола Попоски, во своето обраќање на 31. сесија на Советот за човекови права на Обединетите нации, што се одржа денеска во Женева.

„Сите очекуваме справување со мигрантската криза од хуман и од безбедносен аспект. Околу хуманоста кон мигрантите, Македонија и Грција се на иста гранка и затоа е потребна прекугранична соработка. За безбедно справување со мигрантскиот бран, сите очи се свртени кон следниот самит на Европската Унија. Има основа за загриженост дека кризата може да ескалира или, во најмала рака, да се компликува порано од 8 март“, нагласил Попоски.

Во своето обраќање, шефот на македонската дипломатија се осврнал на позначајните прашања на агендата на Советот за човекови права и на актуелните глобални проблеми, со посебен акцент на состојбите во Сирија и на масовните бранови на бегалци и на мигранти.

Попоски истакнал дека е неопходно „итно наоѓање на заедничка стратегија за решавање на мигрантската и бегалската криза на начин кој истовремено би ги зел предвид хуманитарните и безбедносните аспекти“.

Од 5 до 7 март треба да се одржи специјалниот самит на ЕУ и на Турција, на кој, според очекувањата, треба да се договори стратегијата за запирање на бранот бегалци.