!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ердоган ќе бара поништување на одлуката на Трамп за Ерусалим во ОН


Турскиот претседател Реџеп Таип Ердоган најави дека ќе покрене иницијатива во ОН да се поништи одлуката на Доналд Трамп да го признае Ерусалим како израелска престолнина.

Ердоган рече дека Турција најпрво ќе побара поништување на одлуката на Советот за безбедност на ОН и оти ако тој обид не успее прашањето ќе го покрене пред Генералното собрание на ОН.

Лидерите на муслиманските земји на конференција во Истанбул, која се одржа во средата ја осудија одлуката на Трамп за Ерусалим и го повикаа светот да реагира така што ќе го признае источен Ерусалим за престолнина на Палестина.


Хамас повика на нови протести против одлуката на Трамп за Ерусалим


Газа, 14 декември, 2017 - 18:24 (META) 

Лидерот на радикалното палестинско движење – Хамас, Исмаил Ханија денеска повика на нови протести ширум светот против одлуката на претседателот на САД, Доналд Трамп да го признае Ерусалим за главен град на Израел, јавуваат светските агенции.

Ханија рекол дека Хамас бара секој петок да биде ден на револт и револуција во сите престолнини и другите градови во муслиманските земји, се додека не се „собори“ одлуката на Трамп.

– Ја молиме црквата, папата и нашите христијански браќа своите молитви во недела да ги посветат на Ерусалим – додал Ханија.

Говорејќи пред повеќе десетици илјади насобрани поддржувачи во Газа, тој ветил дека „еднаш засекогаш ќе ја поништи“, одлуката на Трамп.

Поддржувачите на Хамас денеска се собраа во Газа за да ја одбележат 30-годишнината од основањето на ова движење. На свеченоста присуствувале високи претставници на Хамас и функционери на други политички партии, меѓу кои и челниците на долгогодишниот ривал – Фатах.

Откако Трамп минатата недела ја донесе одлуката за Ерусалим, најмалку 12 проектили беа истрелани од Газа кон Израел, додека пак израелската војска погоди најмалку 10 цели во Газа, од кои најголем дел беа позиции на Хамас.


Светот да го признае Ерусалим за престолнина на Палестина, порача Ердоган


Истанбул, 13 декември, 2017 - 11:25 (META) 

Турскиот претседател Реџеп Тајип Ердоган денеска на вонредниот самит на Организацијата за исламска соработка (ОИС) во Истанбул ги повика сите земји во светот да го признаат Ерусалим за престолнина на Палестина.

– Ерусалим е нашата црвена линија. Израел е окупаторска и терористичка држава – изјави Ердоган на почетокот на самитот посветен на прашањето за Ерусалим.

Ердоган, покажувајќи фотографија од палестинско момче со затворени очи и опколено од израелски војници, рече дека израелската Влада ги малтретирала беспомошните луѓе. Тој ги повика САД да се откажат од „незаконската и провокативна одлука “ за Ерусалим, додавајќи дека со ваквиот потег САД ги наградува „терористичките активности“ на Израел.


Вонредна седница на Советот за безбедност на ОН поради одлуката на Трамп за Ерусалим


Њујорк, 7 декември, 2017 - 12:53 (META) 

Советот за безбедност на Обединетите нации утре ќе одржи вонредна седница поради одлуката на американскиот претседател, Доналд Трамп, да го признае Ерусалим за главен град на Израел.

Како што пренесува „Си-би-ес њуз“, итна седница побарале осум од 15 членки на Советот за безбедност, односно Боливија, Египет, Франција, Италија, Сенегал, Шведска, Велика Британија и Уругвај.

Арапскиот свет ја осуди одлуката на Трамп и побара нејзино повлекување пред да предизвика ескалација на ситуацијата во регионот.

Палестинскиот лидер Махмуд Абас ја оцени како „жална“ и додаде дека Ерусалим ќе остане „вечна престолнина на Палестина“.

Илјадници Палестинци од синоќа протестираат во Појасот Газа, палејќи слики од Трамп и американски и израелски знамиња.


Арапите бесни на Трамп, а Палестинците палат негови слики и американски знамиња


Ерусалим, 7 декември, 2017 - 11:16 (META) 

Телевизиската мрежа „Си-ен-ен“ на својот профил на „Твитер“ објави дека илјадници Палестинци во Појасот Газа од синоќа палат американски знамиња и слики од претседателот Доналд Трамп. Арапскиот свет негодува.

Сите светски агенции ја пренесоа веста дека одлуката на Трамп да го признае Ерусалим за главен град на Израел предизвика осуда и жестоки реакции во муслиманските земји на Блискиот Исток.
Претседателот на Индонезија, Јоко Видодо, лидер на најголемата муслиманска земја, ја осуди одлуката на САД да го признаат Ерусалим за престолнина на Израел.

– Индонезија најостро ја осудува одлуката на САД еднострано да го признаат Ерусалим за престолнина на Израел и бара оваа земја да ја преиспита својата одлука. Тој потег може да ја разниша општата безбедност и стабилност – рече Видодо.

Премиерот на Малезија, Наџиб Разак, ги повика муслиманите во светот да се спротивстават на признавањето на Ерусалим за главен град.

– Ги повикувам сите муслимани во светот да се слушне нивниот глас и јасно да стават до знаење дека се против признавање на Ерусалим за престолнина – рече Наџиб.

Портпаролот на владата на Јордан, Мохамед ел Мимани, соопшти дека официјален Амам ја отфрла едностраната одлука на САД, нарекувајќи ја ништовна затоа што ја консолидира окупацијата на Израел во источниот дел на спорниот град.

Јорданскиот крал, Абдула Втори, изразил загриженост во телефонскиот разговор со Трамп, истакнувајќи дека игнорирањето на правата на Палестинците, муслиманите и на христијаните во Ерусалим може да предизвика ширење на екстремизмот.

Турското министерство за надворешни работи го оцени потегот на Трамп за „неодговорен“ и го повика Вашингтон да ја преиспита одлуката.

Истовремено, ирачката влада побара од САД да ја повлече одлуката за признавање на Ерусалим за престолнина на Израел за да се избегне распламтување на тероризмот.

„Предупредуваме на опасните последици од оваа одлука за стабилноста на регионот и на светот. Американската администрација мора да ја повлече одлуката за да се спречи опасната ескалација која би поттикнала екстремизам и би создала поволни услови за тероризам“, порача владата на Ирак.

И Египет ја отфрли одлуката на САД за преместување на амбасадата во Ерусалим, соопшти египетското министерство за надворешни работи и додаде дека одлуката на Трамп да го признае Ерусалим за главен град на Израел не го менува правниот статус на градот.

Министерството за надворешни работи на Иран соопшти дека Техеран сериозно ја осудува одлуката на САД, која, како што се наведува, ја крши меѓународната резолуција.

Саудиска Арабија исто така изрази противење на одлуката на Трамп, притоа истакнувајќи дека тој „ги провоцира чувствата на муслиманите“.

И Катар оцени дека одлуката за преместување на американската амбасада во Ерусалим претставува „опасна ескалација и смртна казна за сите кои сакаат мир“. Либан предупреди дека одлуката на Трамп претставува закана за мировниот процес и за стабилноста во регионот.


И Чешка го призна Ерусалим за главен град на Израел


Прага, 7 декември, 2017 - 10:45 (META) 

Чешка синоќа соопшти дека го прознава западен Ерусалим за главен град на Израел, но оти нема да ја премести својата амбасада од Тел Авив.

Соопштението следеше откако претседателот на САД, Доналнд Трамп, соопшти дека неговата администрација го признава Ерусалим за израелски главен град и дека Стејт департментот добил инструкции да ја пресели американската амбасада од Тел Авив.

Трамп не направи разлика меѓу западен и источен Ерусалим, кој Израел го освои во Шестдневната војна во 1967 година и подоцна го анектираше, што меѓународната заедница никогаш не го призна.

„Чешка Република во моментов, пред да биде потпишан мир меѓу Израел и Палестина, го признава Ерусалим за вистински главен град на Израел во граници на линијата за демаркација од 1967 година“, стои во соопштението на чешкото Министерство за надворешни работи.

Сепак, министерството додаде дека „Чешка заедно со другите земји членки на ЕУ, врз основа на одлуката на Советот за меѓународни односи на ЕУ, смета дека Ерусалим ќе биде иден главен град на двете држави, а тоа значи на државата Израел и на идната држава Палестина“.

„Министерството може да почне да го разгледува преместувањето на чешката амбасада од Тел Авив во Ерусалим само врз основа од резултатите од преговорите со клучните партнери во регионот и во светот“, стои во соопштението.

Русија во 2012 година го призна западен Ерусалим, дел од градот пред војната од 1967 година, за главен град на Израел.

Трамп се откажа од децениската американска политика во однос на Ерусалим, прогласувајќи го длабоко поделениот Ерусалим за престолнина на Израел. Одговарајќи на предупредувањата од целиот свет дека тоа е опсен потег, американскиот лидер тврдеше дека по повторниот неуспешен обид да се постигне мир, дошло време за нов пристап. Тој, исто така, првпат го поддржа концептот за решавање на деценискиот судир по моделот две држави за Израелците и за Палестинците, доколку двете страни постигнат договор за тоа.


Трамп го призна Ерусалим за главен град на Израел


Вашингтон, 6 декември, 2017 - 21:39 (META) 

Американскиот претседател, Доналд Трамп, објави дека дошол моментот кога Ерусалим треба официјално да биде признат како претстолнина на Израел.

„Одлучен сум дека дојде време официјално да се признае Ерусалим како претстолнина на Израел. Тоа е најдобро и е во интерес на САД во процесот на решавање на ситуацијата на Блискиот Исток“, изјави Трамп.

Тој рече дека САД се решителни во определбата да помогнат да се постигне мировен договор, прифатлив за Израелците и за Палестинците.

„Ќе направам сè за да помогнам да се испочитува тој договор. Не можеме да оствариме напредок ако постојано ги повторуваме истите грешки и неуспеси од минатото. Новите предизвици бараат нови пристапи“, рече Трамп и нагласи дека ова е нов пристап во решавање на судирите на Блискиот Исток.

Американскиот претседател додаде дека досегашното непризнавање на Ерусалим како главен град на Израел, не придонесе за тоа да се постигне мир. Тој го задолжи Стејт департментот да направи план за релокација на американската амбасада од Тел Авив во Ерусалим.

Израелскиот премиер Бенјамин Нетанјаху ја поздрави оваа, како што рече, историска одлука на американскиот претседател и ги повика и другите држави да ја следат постапката на САД, односно да ги преместат своите амбасади во Ерусалим.

Стотина Палестинци, пак, протестираа денеска во Појасот Газа, против одлуката на Трамп, при што ги запалија американското и израелското знаме.

Франција не ја поддржува одлуката на САД да го признае Ерусалим за претстолнина на Израел, а францускиот претседател Емануел Макрон повика на мир во целиот регион.

„Оваа одлука Франција не ја одобрува, бидејќи е против меѓународните права и сите резолуции на Советот за безбедност на ОН“, изјави Макрон.


Отстранети сите дополнителни безбедносни мерки во Ерусалим


Ерусалим, 27 јули, 2017 - 11:45 (META) 

Израелската полиција соопшти дека се отстранети сите неодамна воведени безбедносни мерки на влезот на светото место во Стариот град во Ерусалим.

– Полицијата ги врати безбедносните мерки на нивото на кое беа пред нападите на Харам ел-шариф, извршен на 14 јули – соопшти портпаролката на израелската полиција, Луба Самри.

Израелската влада пред три дена одлучи да ги отстрани детекторите за метал кои се поставени на влезот на светото место во Стариот град во Ерусалим.

Израелскиот кабинет за безбедност ги прифати препораките на сите органи за безбедност да се смени проверката со помош на детектори за метал со напредни технологии и други средства, соопшти канцеларијата на израелскиот премиер Бенјамин Нетанјаху.

Израел постави детектори за метал по нападот од 14 јули, во кој беа убиени двајца полицајци. Ваквата одлука на официјален Тел Авив ги разбесни Палестинците.


Едно лице убиено и три повредени при напад со нож во Ерусалим


Ерусалим, 14 април, 2017 - 14:35 (META) 

Британска туристка денеска е убиена во напад со нож извршен во ерусалимскиот стар град.

Жената повеќепати била избодена додека се возела со трамвај. Таа била веднаш хоспитализирана, но подоцна им подлегнала на раните.

Израелските медиуми јавуваат дека уште една трудна жена е повредена, како и еден маж.

Локалните медиуми јавуваат дека полицијата го уапсила осомничениот напаѓач. Израелските медиуми јавуваат дека уапсен е осомничениот напаѓач. Наводно станува збор за ментално болно лица од Источен Ерусалим, на возраст од 57 години.

Нападот се случи еден ден пред церемонијата Свет оган во Ерусалим, кога се очекува илјадници христијани да го посетат светиот град.


Тројца загинати и десетина повредени во напад со камион во Ерусалим


Ерусалим, 8 јануари, 2017 - 13:32 (META) 

Камион удри во пешаци во Ерусалим, при што загинаа три лица, а беа повредени десетина, објавија израелските медиуми. Возачот на камионот веднаш е застрелан и убиен.

Полицијата засега смета дека станува збор за планиран напад.

– Ова е терористички напад, напад со прегазување – изјави портпаролката на полицијата за радио „Израел“.

Полицијата на „Твитер“ напиша дека мета на камионџијата биле израелските војници, кои штотуку се симнале од автобус.

Инцидентот се случил на популарното шеталиште во Стар Град во Ерусалим, соопштија медиумите, наведувајќи дека најмалку двајца од повредените се во тешка здравствена состојба.