Претседателот на ЕП, Тајани, против предлогот за Нобелова награда за Ципрас и Заев


Атина, 8 февруари, 2019 - 12:08 (META) 

Претседателот на Европскиот парламент Антонио Тајани и заменик – претседател на Европскaта народна партија (ЕПП) во која членуваат партиите на европската деница –  не ја поддржува кандидатурата на Алексис Ципрас и Зоран Заев за Нобелова награда за мир, јави грчка „иЕфимерида“.

Тој на седница на Бирото на ЕПП во Атина објасни дека како заменик – претседател на ЕПП не може да ја потпише кандидатурата, како што тоа го направија претседателите на Социјалдемократите, Уду Булман и Грен Скелер, и на Левицата, Гиби Цимер, бидејќи на Ципрас му претстојат избори во Грција.

– Нема да потпишам кандидатура за Нобелова награда за премиер пред избори – рече Тајани.

Номинацијата на Заев и Ципрас на 18 декември минатата година во Скопје ја објави добитничката на Нобеловата награда за мир во 2015 година, Уидед Бушамауи на церемонијата што се одржа на Универзитетот ФОН. Бушамауи рече дека Договорот од Преспа покажува дека две држави заедно се способни да седнат, да преговараат и да постигнат договор.


Тодоров: Со Хан зборував за потребата од демократизација во ВМРО-ДПМНЕ


Хелсинки, 8 ноември, 2018 - 11:23 (META) 

Поранешниот министер за здравство, Никола Тодоров, кој беше исклучен од ВМРО-ДПМНЕ, се сретна со еврокомесарот за проширување и соседска политика, Јоханес Хан на маргините на самитот на Европската народна партија кој се случува во Хелсинки.

Тодоров на неговиот профил на „Фејсбук“ објави фотографии од средбата со Хан и напиша дека двајцата разговарале за евро-перспективите на Македонија и ВМРО-ДПМНЕ, како и за заканите кон оние кои мислат поинаку од актуелното партиско раководство.

„Од двете страни беше изразена силна поддршка за евро-интегративните процеси на Македонија и потребата од имплементација на реформите неопходни за интеграција на Македонија во ЕУ. Беше истакната и неопходноста од демократизација преку измена на статутот на партијата со цел ВМРО-ДПМНЕ да продолжи да дејствува како европска, модерна центар-десна партија“, напиша Тодоров.

Тој додаде дека од страна на Хан било потенцирано дека заканите и притисоците мора да запрат и била изразена јасна поддршка за одлучните и храбри чекори кои се во правец на интеграцијата на Македонија во Европската Унија.

На Конгресот на ЕПП покрај претседателот Христијан Мицкоски, потпретседателот Александар Николоски, секретарот за меѓународна политика Влатко Ѓорчев и советникот за меѓународна политика Тимчо Муцунски, за првпат беше поканета и втора партиска делегација, односно членовите кои ВМРО-ДПМНЕ ги исклучи од партиските функции. Поканети биле разрешниот заменик-генерален секретар Петар Богојески и разрешениот член на Извршниот Комитет, Костадин Богданов, разрешениот потпретседател на партијата Митко Јанчев и исклучените Никола Тодоров и пратеничката Емилија Александрова.

Јанчев и Богданов ја одбија поканата, додека за Хелсинки заминаа Богојески, Тодоров и Александрова.


Хан: На Мицкоски му кажав дека Договорот од Преспа мора да се реализира


Хелсинки, 8 ноември, 2018 - 9:38 (META) 

Еврокомесарот Јоханес Хан вчера на конгресот на Европските народни партии (ЕПП) во Хелсинки се сретнал со лидерот на ВМРО-ДПМНЕ, Христијан Мицкоски, а по средбата на „Твитер“ напиша дека му нагласил на Мицкоски дека Договорот од Преспа мора да се реализира. Тој рече и дека Мицкоски ветил дека нема да ја попречува постапката во Собранието.

„Корисен разговор со лидерот на ВМРО-ДПМНЕ Христијан Мицкоски на конгресот на ЕПП во Хелсинки. Бев кристално јасен дека ратификацијата на Преспанскиот договор мора сега брзо да се заврши, без никакви пречки. Ја поздравувам неговата посветеност да не ја попречува постапката во Парламентот. За евроинтеграцијата треба лојална опозиција“, напиша Хан на својот „Твитер“ профил.

Мицкоски по средбата со Хан на својот „Фејсбук“ профил напиша дека го информирал еврокомесарот за политичкиот прогон и злоупотребата на правосудството против ВМРО-ДПМНЕ, и како што вели посочил дека членството на Република Македонија во Европската Унија преставува стратешки интерес за ВМРО-ДПМНЕ.

Хан исто така се сретна и со исклучените членови на ВМРО-ДПМНЕ, Петар Богојевски кој беше дел од реформското кривло, Емилија Александрова, пратеничката која гласаше за потребата од уставни измени и поранешниот министер за здравство, Никола Тодоров.

„Им честитав на нивната смелост и храброст во гласањето за Преспанскиот Договор. Сите закани кон нив мора да запрат. Сите партии треба да работат за ЕУ агендата бидејќи тоа е она што го сакаат мнозинството граѓани“, напиша Хан.

 


Советот на честа реагира на барањата на ВМРО-ДПМНЕ агенцијата МИА да го открие изворот


Скопје, 19 октомври, 2018 - 12:11 (META) 

Советот за етика во медиумите на Македонија (СЕММ) остро реагира на барањата на ВМРО-ДПМНЕ, државната агенција МИА да ги открие своите извори, во однос на текстот дека Европската народна партија (ЕПП) сака да ги исклучи од своите редови.

„СЕММ потсетува дека едно од основните права, а понекогаш дури и обврска на новинарот е да го заштити својот извор. Упатуваме на Членот 4 од Кодексот на новинарите на Македонија каде што стои: „Новинарот ќе го назначи изворот на информациите, но ако изворот бара да остане анонимен, новинарот ќе го заштити.“ Македонија е потписник на сите релевантни резолуции на Советот на Европа за заштита на извори во рамките на слободата на медиумите. Улогата на политичките партии во една демократија во ниеден случај не смее да значи нивно мешање во работата на новинарите, а ваквите барања подразбираат отворен притисок и обиди за јавно дискредитирање на медиумот“, се вели во соопштенитео на СЕММ.

ВМРО-ДПМНЕ ова го побара откако претседателот на ЕПП, Жозеф Дол, на прес-конференција рече дека ЕПП размислува партијата на Виктор Орбан да ја исклучи од своите редови, а ВМРО-ДПМНЕ не ги спомна. Тој имаше „твит“ за ВМРО-ДПМНЕ, во кој повика на конструктивност, наместо бојкот.

Македонската информативна агенција (МИА) појасни дека нивната дописничка од Брисел, имала свои извори во однос на текстот, кој тие го објавија за исклучување на ВМРО-ДПМНЕ од ЕПП, по што следуваше притисокот од страна на оваа партија за откривање на изворот.

„Твитот на Жозеф Дол во ниеден случај не може да се протолкува како демант на информациите објавени на МИА пред една недела, кои впрочем се проверени и снимени. Значи, станува збор за два сосема различни настани, наменети за две различни партии – Фидес, на Виктор Орбан и ВМРО-ДПМНЕ, но за иста тема. Што значи дека едната изјава не ја демантира другата. За двата настани, МИА располага со снимени изјави“, реагираа од МИА.


Мицкоски на средба со Борисов и Дол: Владата не го исполнува планот 3-6-9


Софија, 9 март, 2018 - 11:53 (META) 

Претседателот на ВМРО-ДПМНЕ, Христијан Мицкоски на покана на бугарскиот премиер Бојко Борисов во Софија се сретнал и со претседателот на Европската народна партија, Жозеф Дол, информираат од партијата.

На средбата се разговарало за европската агенда на регионот и за зајакнување на соработката во рамките на Европската народна партија, чиј составен дел е и ВМРО-ДПМНЕ.

Мицкоски нагласил дека стратешки приоритет преставува членството во ЕУ како суштинска ориентација преку која треба да се овозможи унапредување на стандардите и овозможување на шанси за напредок. Тој посочил дека Македонија за жал има реформски процес кој се одвива под посакуваното ниво и планот на владата 3-6-9 останува неисполнето слово на хартија.

– Потребни се клучни подобрувања, пред сè реформа на судскиот систем, поддршка на економијата и стопанството и нејзин суштински развој, каде за жал досега имаме еден од најслабите економски резултати како држава, како и мерки за овозможување на квалитетно образование како клучен столб за развој на едно општество – истакнал лидерот на ВМРО-ДПМНЕ.

Мицкоски во разговорот со Борисов посочил дека ВМРО-ДПМНЕ е за развивање на добрососедски односи, базирани на принципиелност и меѓусебно почитување.


Кукан: Ратификацијата на Договорот со Бугарија е позитивен чекор напред


Брисел, 16 јануари, 2018 - 10:32 (META) 

Европратеникот Едвард Кукан денеска ја поздрави ратификацијата на Договорот за добрососедство со Бугарија оценувајќи ја како позитивен чекор напред во регионалната соработка.

„Добри вести од македонското Собрание каде е ратификуван Договорот за пријателство со Бугарија. Позитивен чекор напред, кој се надевам дополнително ќе ја зајакне регионалната соработка“, напиша Кукан на „Твитер“.

Инаку, Кукан е дел од европратеничката тројка, заедно со Иво Вајгл и Кнут Флекенштајн, која беше посредник во постигнувањето на Договорот од Пржино во 2015 година.

Кукан во Европскиот парламент е член од групата на Европската народна партија (ЕПП), која е сестринска партија на ВМРО-ДПМНЕ.

Вчера ратификувањето на Договорот за пријателство, добрососедство и соработка помеѓу Македонија и Бугарија, го поздрави и еврокомесарот за проширување и соседска политика Јоханес Хан.


ЕПП му го честиташе на Мицкоски изборот за претседател на ВМРО-ДПМНЕ


Брисел, 24 декември, 2017 - 13:13 (META) 

Европската народна партија (ЕПП) на својот официјален „Твитер“ профил му го честиташе изборот на Христијан Мицкоски за нов претседател на ВМРО-ДПМНЕ.

„Честитки до Христијан Мицкоски за неговиот избор за претседател на ВМРО-ДПМНЕ. На Македонија и треба силна опозицијата во парламентот за заеднички да се преземат неопходните реформи и да се решат проблемите кон евроатлантскиот пат“, велат од ЕПП.

Мицкоски вчера на партискиот конгрес во Валандово беше избран за нов лидер на најголемата опозициска партија ВМРО-ДПМНЕ и доаѓа на местото на Никола Груевски кој беше на чело на партијата од 2003 година. Од 438 пријавени делегати на конгресот, 376 гласаа за изборот на Мицкоски, додека 52 ливчиња беа неважечки.


Груевски – Волер: 150 лица по различни основи се под директен атак на политички прогон


Скопје, 16 декември, 2017 - 14:41 (META) 

Лидерот на ВМРО-ДПМНЕ Никола Груевски, заедно со членовите на Извршниот комитет на ВМРО-ДПМНЕ Влатко Ѓорчев и Александар Николоски денеска со меѓународниот секретар на Европската народна партија (ЕПП), Патрик Волер разговараа за за соработката на партијата со семејството на Европската народна партија како и за актуелните случувања во државата.

Груевски на средбата истакнал дека ВМРО-ДПМНЕ е за продлабочена соработка со Европската народна партија и изразил задоволство од досегашните односи кои го покажуваат потенцијалот за развивање на понатамошните односи, а со тоа и ползување на таквата соработка за интересите на Република Македонија во остварување на нејзините стратешки приоритети како што е членството во ЕУ.

Лидерот на опозициската партија исто така го запозна соговорникот со актуелните случувања на политички и економски план. Тој посочи дека во Македонија има газење на правната држава и демократијата.

– Се врши класичен политички прогон и реваншизам на партиска основа. Се притвораат уметници само поради изразено мислење а притоа се товарат за непостоечки дела како што е тероризам. За жал стануваме држава каде наместо со демократија се владее со страв и кршење на основните човекови права, спротивно на основните европски и универзални вредности. Македонија е земја каде се прогонуваат актери, уметници, режисери, инженери и каде власта уапси 12 отсто од пратеничката група на водечката опозициска партија или 5 отсто од вкупниот пратенички состав – рече Груевски.

Тој истакнал дека Македонија станува заробена држава, а главната цел на таквиот напад е токму ВМРО-ДПМНЕ каде повеќе од 150 лица по различни основи се под директен атак на таквиот политички прогон.


Груевски во Брисел на самит на ЕПП


Брисел, 21 јуни, 2017 - 13:18 (META) 

Претседателот на опозициската ВМРО-ДПМНЕ Никола Груевски заедно со пратениците Никола Попоски и Владимир Ѓорчев од денеска ќе присуствува во тридневна работна посета на Брисел, каде се предвидени средби со претставници на Европската Унија како и учество на Самитот на Европската народна партија (ЕПП).

Груевски попладнево треба да оствари билатерална средба со претседателот на Комитетот за надворешни работи на Европскиот парламент Дејвид Мекалистер, а вечер ќе се сретне и со претседателот на Европскиот совет, Доналд Туск.

Во текот на утрешниот ден делегацијата на ВМРО-ДПМНЕ предвидено е да се сретне и со високата претставничка за надворешна и безбедносна политика на ЕУ, Федерика Могерини.

 


Карл Билт денеска е во Скопје


Скопје, 17 април, 2017 - 12:58 (META) 

Поранешниот шеф на шведската дипломатија, Карл Билт, преку својот твитер-профил најави дека денеска ќе дојде во Скопје. Иако нема објавено детали за посетата, тој на својот твитер-профил исто така напиша: „Нема изгледи за крај на уставната криза во Скопје. Разликите во ставовите помеѓу политичките партии се се подлабоки. Ситуацијата е мошне сериозна.“

Неофицијално, Билт ќе се сретне со лидерите на политичките партии за да даде свои препораки за излез од политичката криза.

Билт пред повеќе од еден месец, исто така преку својот твитер-профил, праша дали Европската народна партија (ЕПП) ќе реагира на политичката криза во Македонија, споделувајќи анализа за политичката ситуација во државата.

„Македонската владејачка партија си игра со оган во регион со сè поголема нестабилност. Дали ЕПП ќе реагира?“, праша Билт.