Европската комисија во март ќе одлучува за земјите-членки со загаден воздух


Брисел, 13 февруари, 2018 - 10:43 (META) 

Европската комисија соопшти дека, од средината на март ќе се разгледува случајот со девет земји во кои состојбата со загадениот воздух се смета за најлоша во Европска Унија, и на кои, им се заканува судска постапка, пренесуваат светските медиуми.

Комисијата која е задолжена да обезбеди докази дека земјите-членки ги почитуваат заедничките правила за емисија на штетните гасови, им даде последна шанса на Германија, Шанија, Франција, Унгарија, Италија, Чешка, Романија, Велика Британија и Словачка на кои во петокот им истече рокот за доставување на дополнителни информации.

Тие земји, според извештаите на Европска комисија, редовно ја надминуваат границата на емисија на гасови, кои биле поставени со цел да се заштити здравјето на Европјаните од ПМ-10 честичките и азот диоксид.

И покрај постојаните предупредувања од Комисијата, наведените земји не ги ограничиле емисиите во согласност со прописите.

Комисијата одлучила против нив да покрене последна фаза постапка пред Европскиот суд на правдата, освен ако земјите не достават дополнителни ефикасни мерки.

Загадениот воздух се смета за причинител на повеќе од 400.000 предвремено починати во ЕУ. Во оваа статистика не влегуваат Европјаните кои добиле респираторни и кардиоваскуларни болести.


ЕЛЕМ ќе ги реконструира филтрите на РЕК Битола за да се намали загадувањето


Скопје, 24 јануари, 2018 - 14:20 (META) 

ЕЛЕМ годинава ќе изврши реконструкција на електростатските филтри на РЕК Битола, за да се намали емисијата на парашина, а со тоа и загадувањето на околината, информираа од Владата.

– Сметаме дека сумата која е издвоена е крајно сериозна и ќе придонесе кон подобрување на состојбите со аерозагадувањето во Битола и околината –  изјави денеска портпаролот на Владата, Миле Бошњаковски.

ЕЛЕМ во својата годишна инвестициска програма предвидува 20 милиони евра за еколошки проекти со кои ќе придонесе во заштитата на животната средина.


Иванов: Ако можеле да се амнестираат воени злосторници, зошто не и луѓе заведени од толпа


Скопје, 17 мај, 2017 - 20:34 (META) 

„Ако имаат доблест новите пратеници во новиот состав на Собранието, ако сакаат да влијаат на смирување на општеството и да покажат акт на добра волја и на помирување, нека го направат тоа што беше направено по конфликтот во 2001 година. Тогаш знаеме дека Собранието амнестираше воени злосторници. Ако можеле воени злосторници да се амнестираат, зошто да не им се помогне на луѓе кои ги завела толпа или луѓе кои учествувале во нешто што е повеќе израз на емоции“, рече претседателот Ѓорге Иванов во интервјуто во емисијата „Само вистина“ на телевизија „Канал 5“.

Во однос на доделувањето на мандатот, Иванов изјави дека е чекор кон надминување на длабоката политичка криза која трае повеќе од две години.

„Со денешниот ден, создаваме преседан за идните мандатари да не бидат уценувани, да не бидат условувани, да не бидат под притисок за прашања за кои не може да се разговара, а тоа се унитарноста и независноста на државата, територијалниот интегритет и суверенитет. Ниеден акт не може да ја доведе државата во подредена состојба и зависност од друга држава. Тоа се состои во денешната изјава на господинот Зоран Заев. Тоа ќе биде позитивен случај за сите идни мандатари, да не бидат доведени во позиција некој друг да ги уценува“, рече претседателот Иванов, меѓу другото, во интервјуто.


Кула: ДУИ не коалицираше со ВМРО-ДПМНЕ поради медиумите на Сорос


Тирана, 8 февруари, 2017 - 18:57 (META) 

Албанскиот експерт за регионални прашања, Илир Кула, во емисијата „Комитети“ зборувал за влијанието на фондациите на Џорџ Сорос во Албанија и во Македонија, јавува дописничката на „Мета“ од Тирана.

Во однос на Македонија, тој истакнал дека поради влијанието на Сорос, ДУИ не можела да постигне договор со ВМРО-ДПМНЕ.

Кула изјавил дека „Сорос преку медиумите ја предупредил ДУИ дека ќе си изврши политичко самоубиство во случај да коалицира со Груевски“.

За Албанија, пак, Кула го споменал влијанието на Сорос врз судските реформи.

Кула во емисијата потсетил и на случајот со разрешувањето на Или Мањани од функцијата министер за правда, кој пред две недели на телевизија кажал дека предлогот за судските реформи бил на Сорос.

Тој ги истакнал и проблемите што, според него, ги создале американските амбасадори во врска со присуството и со влијанието на Сорос во двете балкански земји.


Технологијата помага да се урне медиумската цензура


Тирана, 12 октомври, 2016 - 16:16 (META) 

Емисијата за истражувачко новинарство „Публикус“ која беше цензурирана од албанскиот телевизиски канал „Визион плус“, синоќа беше објавена на видеосервисот „Јутуб“. Според авторите на емисијата, „технологијата во овој случај помогнала да се урне цензурата“.

Епизодата „Смртоносните ридови“ беше посветена на смртта на 17-годишниот Ардит Ѓоклај, кој беше пронајден мртов во депонијата Шара.

Емисијата, исто така, дава светло на нивото на информациите во индустријата за рециклирање, недостигот од мерки за безбедност, фактот дека биле вработени деца и молкот на институциите за оваа трагедија.

Во емисијата се објавени докази за договорот потпишан меѓу Општина Тирана и компанијата за рециклирање „3Р“, која била ангажирана да работи во депонијата Шара без јавен конкурс, како и за одбивањето на Општината Тирана да одговори на барањата за информации на новинарите.

Емисијата може да се погледне овде.


Бан Ки-мун ги повика светските лидери да го потпишат договорот за климата на 22 април


Њујорк, 18 февруари, 2016 - 10:01 (META) 

Генералниот секретар на Обединетите нации (ОН), Бан Ки-мун, ги повика светските лидери да го потпишат договорот за климатски промени, постигнат во Париз во декември, на церемонија во седиштето на ОН на 22 април.

Ки-мун изјави дека таа церемонија ќе биде клучен чекор кон ратификација на договорот.

Договорот за климата, за да стапи на сила, треба да го ратификуваат 55 земји кои сочинуваат најмалку 55 отсто од светската емисија на гасови со ефект на стаклена градина.

Тој нагласи дека присуството на сите лидери ќе го задржи вниманието на светот на прашањата повзрани со климатските промени.

Во Париз беше постигнат договор кој предвидува зголемувањето на температурата во светот до крајот на векот да не надмине два Целзиусови степени, со можност за ограничување на порастот и на еден и пол степен.


Музалас: ЕУ може да ја затвори границата за бегалците


Атина, 9 февруари, 2016 - 11:22 (META) 

Грција е свесна дека постои реална можност Европа да издејствува привремено затворање на македонско-грчката граница за мигрантите. Грчкиот министер за миграциски прашања, Јанис Музалас, стравува дека можно е Европската унија да донесе одлуки на идниот самит за бегалското прашање кои ќе бидат негативни за државата.

– Можно е ЕУ на следниот самит во Брисел да одлучи и да ги затвори границите, иако Грција ќе ги има исполнето своите обврски – истакна Музалас во интервју за емисијата „Еникос“ на грчката телевизија „Стар“.

Според Музалас, ова нема да биде трагично за Грција, меѓутоа ќе биде исклучително тешка тема со која државата, сепак, ќе мора и ќе може да се справи. Работата, како што истакна, е колку може повеќе да се ублажат потенцијалните негативни работи кои ЕУ би можела да ѝ ги наметне на Грција.

Грчкиот министер забележа дека можното затворање на границите веројатно ќе го намали и бранот на бегалци кои се обидуваат преку Грција да стигнат во ЕУ. Иако ги призна и грчките грешки, како доцнењето со изградбата на прифатните центри и немањето соодветна придружба за малолетните бегалци, сепак посочи дека главниот начин да се контролираат бегалците што преминуваат кон ЕУ е со поголема контрола од турска страна.

Еврокомесарот за миграциски прашања, Димитрис Аврамопулос, кој исто така учествуваше во емисијата, демантираше дека во европски рамки има официјални разговори за идејата за исклучување на Грција од шенген-зоната. Аврамопулос беше дециден и дека ЕУ не планира со војска да ја засили македонската граница за да се блокираат бегалците во Грција.

– БЈРМ не е дел од ЕУ, Грција нема заеднички граници со држава која е дел од ЕУ и од шенген-зоната истовремено. Во ЕУ никогаш не била поставената темата за испраќање војска за засилување на границата на БЈРМ. Фронтекс не е воена сила и Европа не се обидува да ги заглави бегалците во Грција – истакна Аврамопулос.

Грчката влада е во трка со времето да ги доврши до идната недела петте прифатни центри каде ќе има подобри услови за регистрација и за сместување на бегалците.


(ФОТОГРАФИИ) Падна првата клапа од детската серија „5+фамилија“


На 11 ноември 2014 година во студиото на телевизија „Телма“, падна првата клапа на новата детска ТВ-серија „5+фамилија“.
Детската ТВ серија „5+фамилија“ е во продукција на ОХО, а се реализира во соработка со ТВ „Телма“ и со поддршка на Министерството за информатичко општество. На првата клапа од снимањето на серијата, покрај дел од екипата, присуствуваше и министерот за информатичко општество, Иво Ивановски.
„5+фамилија“ е детска играна ТВ-серија, која е инспирирана од познатата детска емисија „5+“. Концептот е базиран на познатиот детски лик Петко, неговите пријатели, детективот Цветко и Комшо, и сите случки низ кои тие поминуваат.
Креативен директор на серијата е Пеце Талески, режисер е Игор Иванов – Изи, продуцент – Илија Тирицовски, директор на фотографија – Наум Доксевски, сценографијата е на Снежана Поњавиќ – Муча, костимографија на Андреј Ѓорѓиевски и монтажата –  на Шенол Мехмед.
Актерската екипа ја сочинуваат: Билјана Драгичевиќ – Пројковска, Игор Ангелов, Сања Арсовска и Зоран Љутков. Во најголем број епизоди со конкретни улоги ќе гостуваат и познати личности, кои ќе служат како пример за децата со својата професија и успех кој го постигнале.
Музичката подлошка во серијата e збогатена со старите хитови на „5+“ продуцирани од Игор Поповски – Аудиохаус, како и со преработки на антологиски македонски песни од седумдесетите и од осумдесетите години на минатиот век, продуцирани од Мите Димовски, „Студио Тралала“, сѐ со цел да се пренесе вредното македонско музичко наследство на децата во Македонија.