Се формираше телото за помирување, ќе го предводат Ременски и Александрова


Скопје, 6 ноември, 2018 - 14:11 (META) 

Во Собранието се формираше меѓупартиското парламентарно тело за помирување во кое ќе членуваат потпретседателите на Собранието, координаторите на пратеничките групи, како и пратеници кои не се во пратеничка група, а претставник треба да одредат поголемите пратенички групи, оние на СДСМ и ВМРО-ДПМНЕ со коалициите.

Со телото ќе претседаваат двајца копретседавачи, потпретседателката на Собранието Фросина Ременски и Емилија Александрова од независната пратеничка група на ВМРО-ДПМНЕ.

– На наредната седница ќе се одлучува за методологијата на работа, кои се надлежностите на телото и за темите за кои ќе се разговара. Немаше пречки јас да претседавам со телото, но поради моите обврски како претседател и како пратеник подобро е јас да не го водам телото – изјави Џафери по координацијата.

Прашан за уставните амандмани, Џафери рече дека ВМРО-ДПМНЕ не може да опструира бидејќи има строго определени процедури во собранискиот деловник.

Веднаш на почетокот средбата ја напушти Сурија Рашиди од Алијанса за Албанците, кој смета дека ова е отворање на мала врата за амнестијата за настаните во Собранието на 27 април минатата година. Координаторот на ВМРО-ДПМНЕ Никола Мицевски не присуствуваше на денешната координацијата, бидејќи партијата не го признава Џафери за претседател на Собранието.


Арнаудов: Никој не е предавник и ништо не е ветувано за случајот


Скопје, 22 октомври, 2018 - 11:24 (META) 

Пратеникот Љубен Арнаудов, обвинет за случувањата од 27 април во Собранието, денеска пред почетокот на рочиштето во Основен суд Скопје 1 изјави дека не смета оти некој е предавник и дека не знае кој стои зад завчерашното писмо, испратено до медиумите во име на пратениците од ВМРО-ДПМНЕ што во петокот гласаа за почнување со уставните измени. Истакна дека не е точно дека имале закани и дека примиле пари.

– Ништо не е ветувано за случајот 27 април и затоа не сакам да давам никакви информации. Доаѓаме тука да докажеме дека сме невини – изјави Арнаудов.

Пред него, реагираа и пет од осумтемина пратеници на ВМРО-ДПМНЕ, кои упатија иста порака – дека не добивале уцени или закани, ниту пак биле подмитени.

Помеѓу првите се огласи Нола Исмајлоска-Старова, а реагираа и Сашо Василевски, Зеќир Рамчиловиќ, и Емилија Александрова. Сите порачаа дека одлуката не била лесна, но сметале дека уставните измени се неопходниот чекор за да продолжат евроинтеграциите.

Во писмото упатено до медиумите во саботата, напишано во име на пратениците од опозицијата кои ги поддржаа уставните измени, се вели дека и посакуваат добро на Македонија и наведоа како сакаат да продолжи процедурата. Бараат гаранција дека ќе се поништат уставните измени ако Грција не го ратификува Договорот и ги попречува македонските евроатлантски интеграции, но и собраниско тело што ќе подготви план за национално помирување, според пораката на премиерот Заев од понеделникот, на првиот ден на седницата за уставните измени.

„Да се пристапи во наредната, но не и конечна фаза, на дискусија по уставните амандмани, само под следните услови од чие исполнување ќе зависат и нашите идни ставови и нашата конечна поддршка за Уставните измени:

1. Прифаќање на амандман на Уставот со кој ќе се гарантира македонскиот идентитет.
2.Прифаќање на одредба на Уставот со која ќе се гарантира дека доколку Република Грција не го ратификува договорот и повторно ги попречува евро-атлантските интеграции на Република Македонија, ќе има безусловно поништување на сите прифатени уставни амандмани кои произлегуваат од имплементацијата на договорот од Преспа.
3.Постепена промена на името за внатрешна употреба, следејќи го процесот што води кон полноправно членство на РМ во ЕУ.
4.Прифаќање на иницијативата на Претседателот на Владата на Република Македонија г. Зоран Заев искажана на 61-та седница на Собранието на Република Македонија на 15 октомври 2018 год., за простување во врска со настаните на 27 април 2017 год. во Собранието на Република Македонија и сеопфатно национално помирување, со формирање на собраниско тело составено од шефовите на пратеничките групи, тројца пратеници и Претседателот на Собранието на Република Македонија кои ќе изготват и предложат до Собранието план за национално помирување“, се вели во писмото.


Александрова: Заев ги вработи сите што го напаѓаа раководството на ВМРО-ДПМНЕ


Скопје, 5 јули, 2017 - 16:02 (META) 

Владата на СДС пред само една недела се жалеше дека има пренатрупаност во администрацијата, но затоа тоа не важи за целиот Сорос-сектор, за новинари блиски до СДС и за неговите партиски членови, кои добија работни места, изјави денеска на прес-конференција Емилија Александрова од ВМРО-ДПМНЕ.

– СДС и Заев ги вработија сите што во изминатиот период најдрско и најплукачки го напаѓаа раководството и владата на ВМРО-ДПМНЕ. Но, исто така, продолжува и практиката СДС во владата да вработува новинари кои се блиски до нив. Тоа што е уште полицемерно е новиот оглас за вработување на 13 посебни советници во Владата на Република Македонија со плата во висина од 36.873 денари. Ваквиот оглас доаѓа откако пред само една недела Рашковски и Манчевски тврдеа дека јавната администрација се соочувала со превработеност – вели Александрова.

Според неа, СДСМ изминатиот период во обид да ја манипулира јавноста, прикажувајќи ја претходната влада како неодговорна и расипничка, која создала превработеност, се фатил во сопствената лага.


Александрова: Власта на СДСМ незаконски назначува партиски кадри и луѓе што се фалат со пијанство


Скопје, 28 јуни, 2017 - 16:12 (META) 

„На незаконски и шверцерски начин, Владата на СДСМ сака да протурка партиски војници кои немаат доволно компетенции да управуваат со сериозни институции, но и луѓе што се фалат со пијанство. Тоа е и примерот со именувањето на директорите на „Службен весник“, Државниот завод за статистика, Агенцијата за млади и спорт, Државниот архив и предлогот на Владата до Собранието на Република Македонија за нов директор за Агенцијата за државни службеници“, реагираше пратеничката на ВМРО-ДПМНЕ, Емилија Александрова.

Таа посочи дека кандидатите не доставиле потврди за познавање јазик, а нивните претходници биле разрешени без да биде распишан оглас за пополнување на местата.

Александрова рече дека во случајот за Агенцијата за администрација, предложениот за директор, Спасе Глигоров, е член на партиско тело, што е незаконски, како и дека две од предложените лица направиле ексцеси во пијана состојба.

– Претседателот на општинската организација на СДСМ-Куманово, Мартин Костовски, кој во алкохолизирана состојба нападна двајца трактористи кои беа дел од протестите на граѓанската иницијатива „За заедничка Македонија“, вчера стана директор на „Службен весник“. Дарко Каевски, пак, потпретседателот на СДММ, кој се фалеше колку бил пијан, вчера стана директор на Агенцијата за млади и спорт – порача Александрова.


Александрова: СДСМ крши закони, назначува директори без потврда дека зборуваат англиски


Скопје, 27 јуни, 2017 - 16:29 (META) 

Владејачката партија се однесува крајно неодговорно, ги промовира непрофесионалноста и некомпетентноста и полека ја партизира државата, вработувајќи кадри за кои нема докази дека ги имаат бараните квалификации, обвини на прес-конференција Емилија Александрова, пратеничка на ВМРО-ДПМНЕ, посочувајќи на назначувањето нови директори.

– Новите директори на Управата за јавни приходи, на Бирото за јавна безбедност, на Агенцијата за храна и ветеринарство и на Управата за безбедност и контраразузнавање се поставени без да се испочитува законската обврска за познавање англиски јазик. Ова се кадри кои иако имале законска обврска, не доставиле доказ дека познаваат англиски јазик, а СДС ги профилира како врвни компетентни кадри – вели Александрова.

Таа на новиот директор на УЈП како „грев“ му го впиша учеството на протестите на „Шарена револуција“.

– Прво ја шараше и ја сквернавеше зградата на УЈП со боја, за денес да седне на директорското столче. Ова е само еден пример за какви професионалци станува збор – рече пратеничката и ги повика управниот инспекторат и трудовата инспекција „да реагираат за кршењето и непочитувањето на законите“.