Францускиот амбасадор им се извини на српскиот народ и на претседателот Вучиќ


Белград, 12 ноември, 2018 - 15:19 (META) 

Амбасадорот на Франција во Белград, Федерик Мондолони,  денеска порача дека распоредот на седење на вчерашното одбележување во Париз на 100-годишнината од примирјето со кое заврши Првата светска војна е „голема несмасност поради која што жали“ и ги замоли претседателот на Србија, Александар Вучиќ, и српскиот народ да го прифатат неговото извинување.

Распоредот на седење на околу 80 државници на вчерашната централна церемонија во Париз предизвика бурни реакции во Србија и го поттурна во втор план самото одбележување.

Вучиќ за новинарите по одбележувањето им рече дека косовскиот претседател Хашим Тачи, кој седеше веднаш зад претседателите на Франција и Русија, Емануел Макрон и Владимир Путин, „имал подобра позиција од сите“ во регионот, но и дека не знае како се определувал распоредот и дека не било ни време ни место да прави скандал.

Францускиот амбасадор во Србија утринава за телевизијата „Прва“ рече дека е малку комплицирано тој од Белград да го коментира тоа што претседателот на Косово во Париз седел поблиску до Макрон и Путин, како и до другите лидери на земјите – победнички од Вучиќ. Додаде дека многу жали за таквиот распоред на седење и истакна дека Франција е многу блиска со Србија, како и дека Србија во Првата светска војна загубила речиси третина од своето население, што Французите не го забораваат.

Во врска со написите во српските медиуми дека „Хашим Тачи си го купил местото покрај Путин, Мондолони одговори дека сака да зборува за сериозни работи и дека никој во Србија не верува во таквите тврдења.
Српскиот претседател Вучиќ на Твитер се заблагодари на амбасадорот на Франција за извинувањето и напиша дека Србија на величествен начин ќе го дочека францускиот претседател Емануел Макрон на почетокот на декември.


Макрон: Потполно и силно го поддржувам договорот со Грција


Париз, 22 септември, 2018 - 20:28 (META) 

Претседателот на Франција, Емануел Макрон, испрати видео порака во која им се обрати на граѓаните во Македонија околу референдумот. Во пораката Макрон Преспанскиот договор го оценува како „срце“ на нашата иднина, нагласувајќи дека на него се чекало 27 години и дека тој е резултат на храброста на лидерите на двете земји.

„Веќе 25 години нашите две земји негуваат дипломатски односи. 25 години заедничко минато и поврзани судбини меѓу нашите народи, чии корени се длабоко вкоренети низ вековите.

Во тој поглед, во последните години беа направени многу нешта, но на 17 јуни 2018 година се направи голем исчекор.

Исчекорот беше направен со храброста на вашите лидери, меѓу вашата земја и Грција, со кој се стави крај на 27-годишниот спор.

Таа т.н. „Спогодба од Преспа“ од 17 јуни 2018 година, овозможува напредок и подготовка на иднината. Референдумското прашање на 30 септември оваа година се однесува токму на таа спогодба“, нагласува Макрон и вели дека тој го поддржува договорот „потполно и силно“.

Макрон вели дека е „одлучно ЗА и цврсто верува дека овој договор е добар“, како што вели „за вас, за целиот регион и за Европа“.

 


Заев: Референдумот е процес за кој државата треба да донесе усогласена одлука


Крива Паланка, 22 јуни, 2018 - 14:49 (META) 

Премиерот Зоран Заев се надева дека никој во ЕУ, вклучително и францускиот претседател Емануел Макрон, нема да остане рамнодушен на решението на спорот со Грција, и следната недела земјава ќе добие датум за почеток на преговорите.

– Знам дека вчера холандскиот Парламент донесе позитивна одлука за нашата земја. Се надевам дека и Франција и другите земји ако имаат резерва, ќе го направат преломот заради тоа што реформи се прават и во ЕУ, но можат паралелно да се прават додека Македонија преговара за членство. Поглавјата и преговорите ќе траат со години, а унапредувајќи се како држава Македонија може да помогне и во унапредувањето на Европа паралелно терајќи ги преговарачките процеси. Јас се надевам дека ќе омекне и срцето на претседателот на Франција, Макрон, ги разбирам внатрешните дебати кои се отвораат во Франција, но Франција е наш голем пријател – додаде Заев.

Премиерот изјави дека референдумот за промената на името е исклучително важно прашање и дека за тој процес државата треба да донесе заедничка одлука.

-Сите имаат право на дебата, државата треба заеднички да донесе одлука и обидите треба да ги правиме заедно усогласувајќи се со коалициските партнери во однос на едно вакво исклучително важно прашање како референдумското. Се согласувам со опозицијата дека референдумот треба да биде задолжителен, а заедно треба да утврдиме дали ќе биде консултативен или обврзувачки- изјави Заев на одбележувањето на почетокот на градбата на експресниот пат Ранковце – Крива Паланка.

Рече дека ова се историски чекори и решенија.

– Убеден сум дека Македонија ќе смогне сили и мудрост и за решенијата, но мудрост и сила да застанеме заедно по вака важни прашања кои навистина отвораат блескава перспектива за генерациите денес и генерациите кои доаѓаат после нас – рече Заев.


Земјите погодени од одлуката на Трамп за оданочување на челикот, најавија контрамерки


Вашингтон, 1 јуни, 2018 - 10:55 (META) 

Европските лидери реагираа остро на одлуката на американскиот претседател Доналд Трамп, за воведувањето на данок на увоз на челик и алуминиум од земјите-членки на Европска унија, Канада и Мексико.

Земјите кои се погодени од оваа одлука, која денеска стапува на сила, најавија контра-мерки. Францускиот претседател Емануел Макрон во телефонски разговор со Трамп, овие даноци ги опшал како „илегални“. Макрон исто така рекол дека ЕУ ќе реагира на цврст и соодветен начин.

Воведувањето на новите царини, кои стапија на сила на полноќ, Трамп ги оправда со тврдењето дека американските производители на челик и алуминиум се од витално значење за националната сигурност, но се загрозени од глобалното снабдување.

Владата на САД преговара и за Северноамерикански договор за слободна трговија.Трамп му упатил порака на канадскиот премиер Џастин Трудо дека „САД ќе прифатат фер договор или воопшто нема да има договор.“

Трудо, пак, царините ги нарече „потполно неприфатливи“ и најави дека тие би можеле да ги променат односите на двете земји. Тој објави план за воведување на царина на 12,8 милијарди долари, американски извоз.


Набиена агенда на Заев во Софија, ќе се сретне со Ципрас, Макрон, Меркел, Курц, Руте


Скопје, 15 мај, 2018 - 10:44 (META) 

Премиерот Зоран Заев на 17 мај ќе учествува на Самитот на Европската унија за Западен Балкан што ќе се одржи во Бугарија, земја претседавач на Европскиот Совет. За време на Самитот, предвидена е и средба со премиерот на Грција, Алексис Ципрас.

„Премиерот ќе учествува во работната пленарна сесија на тема „Поврзување“ (Connectivity), а за време на работниот ручек на шефовите на владите и на држави, со највисоките претставници на телата на Европската унија, ќе зборува на темата „Заедничко справување со заканите“. Заев ќе има билатерални средби со повеќе премиери и шефови на држави. Планирани се билатерални средби со претседателот на Франција, Емануел Макрон, со канцеларката Ангела Меркел, како и со премиерот на Холандија, Марк Руте“, информираат од Владата.

Во агендата на премиерот Заев се испланирани и билатералните средби со премиерите на Австрија, Шведска и Естонија, Себастијан Курц, Стефан Лофвен и Јури Ратас.

Заев е поканет да учествува и да говори на конференции кои се одржуваат паралелно со Самитот на ЕУ во Софија.

На Самитот во Софија ќе учествуваат и вицепремиерот задолжен за европски прашања, Бујар Османи и министерот за надворешни работи, Никола Димитров.


Германија и Франција ќе го зајакнуваат еврото


Берлин, 20 април, 2018 - 10:06 (META) 

Германија и Франција се договорија за заедничка позиција за реформи на еврото најдоцна до јуни, и покрај германската колебливост во врска со поголема монетарна унија. Ваквиот став е договорен при вчерашната посета на францускиот претседател Емануел Макрон на Берлин. Макрон претходно ги прифати идеите на Европската Комисија (ЕК) за создавање заеднички систем за гарантирање на депозитите, ЕУ фонд за спасување, како и буџет на Еврозоната и министерство за финансии.

Реформите се чекори кои треба да покажат дека ЕУ може да живее политички и без Обединетото Кралство и да спречи повторување на финансиска криза како таа од 2008 година.

Сепак, Германија е сè уште колеблива во поглед на финансирање од својот буџет на ваквите крупни зафати. И покрај ентузијазмот на францускиот претседател, кој повика на финансиска стабилност и опсежно зборуваше за реформите, Меркел беше поповлечена.

– Секогаш има различни појдовни точки кога станува збор за ставовите на Германија и Франција. Потребни ни се отворени дебати и ни треба подготвеност за компромис – рече таа.


Макрон: ЕУ мора да спроведе реформи за да се натпреварува со САД и Кина


Давос, 25 јануари, 2018 - 9:37 (META) 

Европската Унија мора годинава да спроведе реформи за да може да се натпреварува со светските сили како што се Кина и САД, изјави францускиот претседател Емануел Макрон за време на говорот на Светскиот економски форум во Давос.

Тој додаде дека на амбициозните земји, ЕУ мора да им овозможи напредок кон европската интеграција, дури и ако другите земји не сакаат да се придружат.

„Помалку амбициозните не треба да ги блокираат амбициозните“ изјави Макрон.

Тој додаде дека земјите на ЕУ треба да ја контролираат даночната политика и додаде дека Франција ќе издвои 10 милијарди евра за финансирање на иновации и истражувања.

Макрон повика на поголема европска и меѓународна соработка поврзана со воведување на данок на компаниите во земјите во кои заработуваат.

Тој повика и на соработка во борбата против тероризмот ширум светот.


Макрон: ЕУ мора да се промени за да може да се натпреварува


Давос, 24 јануари, 2018 - 21:15 (META) 

Францускиот претседател Еумануел Макрон на Светскиот економски форум во Давос рече дека Европската Унија оваа година мора да се реформира.

Како што вели тој, само така ќе може да се натпреварува со големите сили како Кина и САД.
Макрон рече дека „амбициозните“ членки на ЕУ треба да овозможат брзо движење кон поголема интеграција, дури и ако другите членки не сакаат да се придружат.

-Помалку амбициозните не треба да ги блокираат амбициозните во просторијата – рече Маркон.

Тој додаде дека земјите кои го користат еврото мора да се договорат за „посилен и поправеден систем“, а дека членките на ЕУ треба ги координираат своите даночни политики.


Макрон: Британија би можела да има посебен договор со ЕУ


Лондон, 20 јануари, 2018 - 16:03 (META) 

Францускиот претседател Емануел Макрон изјави дека Велика Британија би можела да постигне посебен трговски договор со Европската Унија после Брексит.

Сепак, Британија нема да има целосен пристап до поединечни пазари без прифаќање на нивните правила.

-Кога ќе одлучите да не пристапите со заеднички ЕУ предуслови, немате полн пристап. Британија би можела да има длабоки односи со ЕУ, како Норвешка, но го исклучи целосниот пристап на пазарот кога одлучи да ја напушти Унијата – изјави Макрон.


Европската Унија почна борба против лажните вести


Брисел, 15 јануари, 2018 - 18:08 (META) 

Во Европската Унија се формираше работна група која треба да придонесе во идентификување на лажните вести и која ќе предложи начини за решавање на тој проблем. Тие се загрижени дека, лажните информации би можеле да влијаат на изборот на членки на Унијата.

Тимот од 39 луѓе, кои денеска го имаа првиот состанок, треба да утврди колкав е проблемот со лажните вести и на кој начин, државите треба да се борат.

Европската комесарка за дигитална политика, Марија Габриел изјави дека „лажните вести се шират со загрижувачка брзина“ и додаде дека „ја загрозуваат репутацијата на медиумите и напредокот на демократијата.“

Состанокот беше одржан, бидејќи претседателот на Франција, Емануел Макрон најави закон за сузбивање на лажните вести на интернет, за време на предизборните периоди.

Тим од стручњаци, новинари и професори ќе дадат препораки до Европската комисија до крајот на април.