!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Макрон: Британија би можела да има посебен договор со ЕУ


Лондон, 20 јануари, 2018 - 16:03 (META) 

Францускиот претседател Емануел Макрон изјави дека Велика Британија би можела да постигне посебен трговски договор со Европската Унија после Брексит.

Сепак, Британија нема да има целосен пристап до поединечни пазари без прифаќање на нивните правила.

-Кога ќе одлучите да не пристапите со заеднички ЕУ предуслови, немате полн пристап. Британија би можела да има длабоки односи со ЕУ, како Норвешка, но го исклучи целосниот пристап на пазарот кога одлучи да ја напушти Унијата – изјави Макрон.


Европската Унија почна борба против лажните вести


Брисел, 15 јануари, 2018 - 18:08 (META) 

Во Европската Унија се формираше работна група која треба да придонесе во идентификување на лажните вести и која ќе предложи начини за решавање на тој проблем. Тие се загрижени дека, лажните информации би можеле да влијаат на изборот на членки на Унијата.

Тимот од 39 луѓе, кои денеска го имаа првиот состанок, треба да утврди колкав е проблемот со лажните вести и на кој начин, државите треба да се борат.

Европската комесарка за дигитална политика, Марија Габриел изјави дека „лажните вести се шират со загрижувачка брзина“ и додаде дека „ја загрозуваат репутацијата на медиумите и напредокот на демократијата.“

Состанокот беше одржан, бидејќи претседателот на Франција, Емануел Макрон најави закон за сузбивање на лажните вести на интернет, за време на предизборните периоди.

Тим од стручњаци, новинари и професори ќе дадат препораки до Европската комисија до крајот на април.


Трамп го призна Ерусалим за главен град на Израел


Вашингтон, 6 декември, 2017 - 21:39 (META) 

Американскиот претседател, Доналд Трамп, објави дека дошол моментот кога Ерусалим треба официјално да биде признат како претстолнина на Израел.

„Одлучен сум дека дојде време официјално да се признае Ерусалим како претстолнина на Израел. Тоа е најдобро и е во интерес на САД во процесот на решавање на ситуацијата на Блискиот Исток“, изјави Трамп.

Тој рече дека САД се решителни во определбата да помогнат да се постигне мировен договор, прифатлив за Израелците и за Палестинците.

„Ќе направам сè за да помогнам да се испочитува тој договор. Не можеме да оствариме напредок ако постојано ги повторуваме истите грешки и неуспеси од минатото. Новите предизвици бараат нови пристапи“, рече Трамп и нагласи дека ова е нов пристап во решавање на судирите на Блискиот Исток.

Американскиот претседател додаде дека досегашното непризнавање на Ерусалим како главен град на Израел, не придонесе за тоа да се постигне мир. Тој го задолжи Стејт департментот да направи план за релокација на американската амбасада од Тел Авив во Ерусалим.

Израелскиот премиер Бенјамин Нетанјаху ја поздрави оваа, како што рече, историска одлука на американскиот претседател и ги повика и другите држави да ја следат постапката на САД, односно да ги преместат своите амбасади во Ерусалим.

Стотина Палестинци, пак, протестираа денеска во Појасот Газа, против одлуката на Трамп, при што ги запалија американското и израелското знаме.

Франција не ја поддржува одлуката на САД да го признае Ерусалим за претстолнина на Израел, а францускиот претседател Емануел Макрон повика на мир во целиот регион.

„Оваа одлука Франција не ја одобрува, бидејќи е против меѓународните права и сите резолуции на Советот за безбедност на ОН“, изјави Макрон.


Макрон не го покани Трамп на климатскиот самит во Париз


Париз, 7 ноември, 2017 - 19:25 (META) 

Француските власти соопштија дека претседателот на САД, Доналд Трамп, не е меѓу стоте светски лидери поканети да присуствуваат на климатскиот самит во Париз, закажан за следниот месец.

Претседателот на Франција, Емануел Макрон, планира на самитот да форсира своја агенда под мотото „Да ја направиме нашата планета повторно голема“. Тоа е алузија на слоганот на Трамп за време на претседателските избори во САД во 2016 година, кој гласеше „Да ја направиме Америка повторно голема“.

Самиот има цел да промовира таканаречени зелени проекти и да даде нови извори за финансирање.
Висок француски претставник, кој побарал да остане анонимен, изјавил дека покани се испратени до шефовите на тие држави кои се „особено посветени“ на Парискиот климатски договор од 2015 година и оти за САД ќе биде испратена покана на „дипломатско ниво“.

Трамп во јуни годинава соопшти дека САД ќе се повлечат од Парискиот климатски договор, доколку не успеат да обезбедат подобар договор.

На собирот во Париз, наречен „Самит една планета“, Макрон би требало да ги објави имињата на американските научници, експерти за климатски промени, кои ќе добијат стипендии за своите истражувања да ги продолжат во Франција.


Макрон најави историска посета на Иран


Париз, 14 октомври, 2017 - 17:16 (META) 

Францускиот претседател Емануел Макрон планира да го посети Иран, што ќе биде прва посета на шеф на француска држава или влада на Техеран од 1971 година.

Макрон во телефонски разговор со иранскиот претседател Хасан Рохани потврдил дека Франција останува посветена на нуклеарниот договор и покрај одлуката на американскиот претседател Доналд Трамп.

Макрон би можел да го посети Техеран следната година.

Иран и шесте светски сили – САД, Русија, Кина, Велика Британија, Франција и Германија –  на 14 јули 2015 година постигнаа договор со кој се ограничува иранската нуклеарна програма во замена за укинување на меѓународните санкции кон таа земја.


Макрон: Турција останува важен партнер на Европската Унија


Атина, 7 септември, 2017 - 12:32 (META) 

Францускиот претседател, Емануел Макрон, изјави дека Турција останува важен партнер на Европската Унија и оти врските треба да бидат сочувани и покрај тоа што земјата во последно време се движи во непосакуван правец.

– Реално гледано, Турција се оддалечува од Европската Унија во текот на последните месеци и ја премина границата, на начини кои не можат да се игнорираат, особено во поглед на царинската унија – вели францускиот претседател во интервју за денешното издание на грчкиот весник „Катимерини“.

Тој истакнува дека Турција е клучен партнер во многу кризи пред кои Европа е исправена, особено предизвиците кои произлегуваат од миграциските бранови и од терористичката закана.

Изјавата на Макрон доаѓа откако германската канцеларка Ангела Меркел во неделата рече дека треба да се прекинат преговорите на Турција за членство во ЕУ.


„Викиликс“ објави 21.075 мејлови од кампањата на Макрон


Париз, 31 јули, 2017 - 13:52 (META) 

„Викиликс“ објави 21.075 мејлови од претседателската кампања на францускиот претседател Емануел Макрон.

Како што е соопштено на интернет-страницата на „Викиликс“, чиј основач е Џулијан Асанж, станува збор за архива која може да се пребарува и во која има 21.075 верификувани мејлови кои се однесуваат на претседателската кампања. Мејловите датираат од април 2009 до 24 април 2017 година.

Се наведува дека нивната автентичност е потврдена низ системот на „Викиликс“.

Целата архива што ја поседува „Викиликс“ содржи 71.848 мејлови со 26.506 закачени документи од 4.493 единствени испраќачи. Сепак, низ системот на „Викиликс“ се верификувани 21.075 мејлови. Врз основа на проверките, се тврди дека најголем дел од остатокот од мејловите исто така се автентични.

Неодамна беше објавена веста дека Руси се обиделе да го хакираат Макрон, преку инфилтрирање во неговата предизборна кампања и креирање лажни профили на „Фејсбук“.


Путин, Порошенко, Макрон и Меркел телефонски разговарале за Украина


Киев, 24 јули, 2017 - 18:54 (META) 

Лидерите на Русија, Украина, Франција и на Германија разговарале телефонски околу решение за конфликтот на истокот на Украина.

Владимир Путин, Петро Порошенко, Емануел Макрон и германската канцеларка Ангела Меркел прво го слушнале извештајот на претставникот на набљудувачката мисија на Организацијата за европска безбедност и соработка во Украина за почитување на прекинот на оган.

„Лидерите потоа разменија идеи околу ситуацијата на југоистокот на Украина, земјаќи ги предивид сериозните препораки за примена на мировниот договор од Минск од февруари 2015 година“, се наведува во соопштението од Кремљ.

Ова е прв телефонски разговор во таканаречениот Нормандиски формат од почетокот на мандатот на францускиот претседател Емануел Макрон, кој на крајот на мај побара тој состанок да се одржи што побргу.

Лидерите се договориле да ги продолжат контактите, вклучувајќи ги и оние на највисоко ниво.

Во тригодишниот конфликт кој ја подели Украина, досега загинаа повеќе од 10.000 луѓе. Киев и Западот ја обвинуваат Русија дека финансиски и воено ги поддржува бунтовниците, што Москва го демантира.


Франција предлага подобра контрола на муницијата на Балканот


Трст, 20 јули, 2017 - 12:00 (META) 

Франција на неодамнешниот самит за Западен Балкан во Трст предложила иницијатива што треба да овозможи подобра контрола на муницијата и на лесното вооружување во балканските земји.

– Предложивме подобра соработка кога станува збор за складирање оружје и подобра контрола на лесното вооружување, што е водечки проблем во регионот. Сметам дека тоа е чекор напред во поглед на безбедноста. Слично на тоа, имавме можност да поведеме иницијатива во борбата против криминалот и борбата против радикализацијата, што е исто така еден од проблемите во регионот. Постои насилен фундаментализам што се развива таму – изјави францускиот претседател Емануел Макрон.

Во Трст на 12 јули, во рамки на Берлинскиот процес, се одржа самитот ЕУ – Западен Балкан, на кој присуствуваа високи претставници на Европската Унија, на земји членки на Унијата и лидерите на Македонија, Србија, Црна Гора, Босна и Херцеговина, Албанија и на Косово.


Третото ракување на Трамп и на Макрон – „најчеличното“ досега


Париз, 15 јули, 2017 - 18:05 (META) 

На нивната прва средба, на 25 мај годинава на самитот на НАТО во Брисел, претседателите на САД и на Франција, Доналд Трамп и Емануел Макрон, имаа „двобој“ со две невообичаено долги ракувања.

Во првото, Трамп грубо ја повлече раката на Макрон кон него. Второто, пак, беше цврст стисок од кој побелуваат зглобовите. Ни едниот ни другиот не сакаа да ја отпуштат раката прв.

Но кулминацијата се случи во Париз вчера, кога нивното ракување при заминувањето на Трамп од прославата на Националниот ден на Франција потраја речиси половина минута. Двајцата претседатели ги мафтаа рацете, ги вртеа, цело време држејќи ја дланката на другиот.

И откако Макрон првично „победи“ со тоа што ја постави својата дланка горе, Трамп возврати со познатото „влечење“, кога на кратко го исфрли од рамнотежа својот француски колега. Веднаш потоа, не пуштајќи ја неговата рака, ги изненади сите кога ја гушна и ја бакна првата дама на Франција.