!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Бошњаковски: Јавноста со право реагира, но Владата не може да се меша во буџетот на ДИК


Скопје, 6 декември, 2017 - 12:32 (META) 

„Државната изборна комисија (ДИК) е независна институција и Владата не може да се меша во тоа како комисијата си го распределува буџетот. Свесни сме дека и медиумите и јавноста бурно реагираа на одлуките на членовите на ДИК да си доделат бонуси, но што се однесува до Владата, таа нема ингеренции да интервенира. За тоа треба да ги прашате во ДИК“, рече портпаролот на Владата, Миле Бошњаковски, на денешниот брифинг со новинарите, прашан дали Владата во некоја форма дискутирала за случајот што ја возбуди јавноста.

Тој посочи дека проблемот е ист како проблемот со патните трошоци на пратениците во Собранието на Република Македонија.

– Таму е слична ситуацијата, и јавноста со право реагираше, но Владата не може да наложи да се измени деловникот на Собранието. Тоа е нешто што самите пратеници треба да го направат и да отстранат нешто што ја разлутува јавноста – рече Бошњаковски.

Во врска со измената на законот за продажба на алкохол, како што појасни владиниот портпарол, на вчерашната 41. седница на Владата е побарано од Министерството за економија за два месеци да подготви предлог-закон со кој ќе се изменат сегашните одредби. Министерството се консултирало со бизнис-заедницата, односно малопродажната мрежа, и добиени се неколку предлози.

– Министерството за економија ќе треба во рок од два месеци да достави предлог како ќе се продава алкохол – дали само до 23 часот или целосно ќе се отстрани ограничувањето. Се очекува и предлог како да се дефинира продажбата на алкохол и во киосците и на бензинските пумпи, на пример – рече Бошњаковски.

Како што објасни тој, на вчерашната владина седница меѓу 90-те точки на дневниот ред, на АД ЕЛЕМ Владата му наложила да не почнува нови инвестиции и проекти надвор од основната дејност, како што се претходно планираните за жичница до Попова Шапка, потоа ски-центарот на Водно, автокампот Ливадиште…

– Сите тие прекинуваат, а во однос на проектите за кои веќе се почнати некакви активности, ЕЛЕМ треба да изработи анализа за склучените договори, за тоа дали и како некои проекти за кои е почната реализација може да се прекинат, односно да се раскинат договорите – појасни портпаролот на Владата.

Тој појасни и дека претстои голем и комплициран зафат за да се решат проблемите со исплата на прекувремената работа и други трошоци за вработените во јавните институции. Сепак, како што рече, ќе треба многу време за да се регулира таа област, оти станува збор за многу различни специфични случаи и не може да се донесе генерална одлука, но Владата ќе се обиде да ја регулира таа сфера за да се избегнуваат непотребни трошоци.


Судењето за случајот „Тарифа“ на СЈО закажано за 19 декември


Скопје, 28 ноември, 2017 - 10:35 (META) 

Почетокот на судскиот процес за случајот „Тарифа“ на Специјалното јавно обвинителство, Кривичниот суд во Скопје го закажа за 19 декември, соопштија од судот.

Предметот ќе го суди судијката Верка Петковска, која го судеше случајот за настаните од кумановско Диво Насеље, од 9 и 10 мај 2015 година.

„Предметот со КОК бр. 51/17 оформен по одобрување на обвинителниот акт на Јавното обвинителство за гонење кривични дела поврзани и кои произлегуваат од незаконското следење на комуникациите, означен како „Тарифа“, согласно електронскиот систем е распределен кај судија Верка Петковска, а главната расправа е закажана за 19 декември 2017 година во 9.30 часот, за кога се испратени и покани до странките“, стои во соопштението на судот.

Во предметот „Тарифа“ обвинети се три лица кои се товарат дека преку злоупотреба на службената положба и овластување набавиле софтверски систем за потребите на државната компанија „Електрани на Македонија“ (ЕЛЕМ), кој не бил имплементиран.


Балканските земји бараат СБ и ЕИБ повеќе да финансираат во новите хидроелектрани


Подгорица, 26 ноември, 2017 - 15:16 (META) 

Државните електростопанства на земјите од Балканот бараат од меѓународните финансиски институции, како Светската банка (СБ) и Европската инвестициска банка (ЕИБ) повеќе да ги финансираат новите проекти за изградба на хидроелектрани на Балканот.

Ова било истакнато на дебатата на конференцијата „Хидроенергија Балкан 2017“ (Hydro Power Balkans 2017) која се одржа во Подгорица, Црна Гора, на која се дискутирало за проблемите во планирањето и изградбата на нови хидроелектрани, соопштија од „Електрани на Македонија“ (ЕЛЕМ), чии претставници учествувале на конференцијата.

„Учесниците од земјите од регионот се согласија дека е потребно забрзување на сложениот процес на усогласување на дел од локалните закони со законите на Европската Унија, во делот на заштитата на животната средина, бидејќи меѓународните финансиски институции влегуваат во финансирање само на проекти за нови хидроелектрани кои ги запазуваат високите стандарди на ЕУ за заштита на околината“, стои во соопштението.

Претставниците на ЕЛЕМ на конференцијата ја истакнале нужноста од инвестирање во производството на овој вид електрична енергија, како чиста и долгорочно најисплатлива, и во таа насока ги презентирале идните развојни проекти, хидроелектраните „Чебрен“ и „Галиште“ и дел од Вардарска Долина.

„Со оглед на тоа што овие проекти не се наоѓаат во заштитени подрачја за кои важат посебни одредби, истите предизвикаа интерес кај меѓународните инвеститори, како и кај производителите на опрема, присутни на конференцијата“, велат од ЕЛЕМ.


Кочан не се чувстува виновен за „Труст“, СЈО најави дека ќе го докаже спротивното


Скопје, 14 ноември, 2017 - 13:18 (META) 

Не се чувстувам виновен, изјави бизнисменот Сеад Кочан на главната расправа од судењето за случајот „Труст“ на Специјалното јавно обвинителство, кое почна денеска во Кривичниот суд во Скопје.

Кочан, Василие Авировиќ и Сафет Ватиќ, како и фирмите „Трансмет“, „Силекс Неметали“ и „Вато“, СЈО ги товари дека со невистинити и фалсификувани документи добиле тендер на „Електрани на Македонија“ (ЕЛЕМ) вреден 17 милиони евра.

Адвокатите на обвинетите побараа од судот одложување на рочиштето, бидејќи не им биле дадени сите докази на увид, но судијката Лидија Зимбовска го одби нивното барање и одлучи да почне главната расправа од судењето.

Обвинителот на СЈО, Гаврил Бубевски во воведните зборови истакна дека со доказите што ќе ги презентираат, ќе докажат дека обвинетите биле водени од убедувањето дека криминалот се исплати и дека трупањето пари и збогатувањето на штета на граѓаните е активност што поминува во Македонија. Тој рече оти ќе докажат дека со куп невистинити документи, во случајот биле погазени принципите на здравата конкуренција и дека биле изиграни правилата на јавните набавки.

– Пред лицето на правдата денеска стои криминално здружение кому единствен и главен сврзувачки елемент му е незаконскиот профит. Предметот го формиравме под името „Труст“, иако не се работи за здружување согласно на економската и финансиска моќ, туку за да алармираме дека станува збор за обединување кое е мотивирано заради црпење на незаконски профит и елиминирање на конкуренцијата – рече Бубевски и побара од судот обвинетите врз основа на доказите да бидат прогласени за виновни за кривичните дела кои им се ставаат на товар.


МРТ: Ние должиме многу, ама и УЈП ни должи 34 милиони евра


Скопје, 3 ноември, 2017 - 19:01 (META) 

„Македонската радио-телевизија“ (МРТ) попладнево испрати соопштение во кое ги наведе своите долгови кон различни доверители, кои изнесуваат 19,5 милиони евра, но порача и дека враќањето на долговите и нормалното работење на куќата се попречени од долгот на Управата за јавни приходи (УЈП) кон МРТ кој изнесува 34 милиони евра.

Во соопштението се вели дека од назначувањето на сегашниот менаџмент во март 2012 година, МРТ платила стари обврски, направени пред тој датум, во висина од 13,2 милиони евра.

„И покрај плаќањето на олку голема сума, поради лошиот систем на финансирање и системско нерешавање на овој проблем МРТ има сè уште голем долг кој е создаван во изминатите 25 години. Во структурата на актуелниот долг во најголем дел влегуваат Париски и Лондонски клуб на доверители, УЈП, Аеродроми на Македонија, ТСЕ, ЕЛЕМ“, стои во соопштението.

Обврската кон доверителите од Париски и од Лондонски клуб била преземена од 1998 година и таа сега изнесува 3,034 милиони евра.

Во поглед на долгот кон УЈП, кој изнесува 3,1 милиони евра, од МРТ велат дека во поголем дел станува збор за неплатен данок на добивка и ДДВ, а дел од долгот бил обврска преземена од 2006 година.

На ЕЛЕМ, МРТ му должи 7,8 милиони евра, за периодот до 31 октомври 2010 година.

Во поглед на долгот и проблемите со Европската радиодифузна унија (ЕБУ), МРТ сега должи малку повеќе од еден милион евра, но според соопштението, била одржана средба меѓу двете тела при што било решено да се укинат сите санкции за МРТ и сите услуги на ЕБУ се сега достапни на македонскиот јавен радиодифузер.

Според образложението од националната куќа, долгот во 2012 година изнесувал 3,165 милиони евра, а од 1 март 2012 година до 26 октомври годинава на Европската радиодифузна унија ѝ биле платени 6,146 милиони евра. Од моменталниот долг од милион и 27 илјади евра, 434.032 евра се доспеани обврски за откупени спортски права и тоа: ФИФА Светски фудбалски куп 2018, УЕФА Европски квалификации 2016-2018, Атлетика ИААЕФ 2017 и други настани.

„Сакаме да ја информираме јавноста дека од почеток на политичката криза досега УЈП по основа на радиодифузна такса има наплатено помалку средства од претходните години во висина повеќе од 200 милиони денари. Имено, „Македонската радио-телевизија“ по основа на радиодифузна такса има побарувања од УЈП во висина 33,947 милиони евра. Нагласуваме, доколку овие средства биле навремено наплатени од УЈП, ЈРП МРТ би било во можност да ги сервисира преземените и доспеаните тековни обврски и истовремено јавниот сервис би бил во можност да располага со средства за реализација на нови програмски содржини“, се вели во соопштението.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Поранешниот директор на ЕЛЕМ, Дејан Бошковски, доби кривична за злоупотреба


Скопје, 13 октомври, 2017 - 13:45 (META) 

Дејан Бошкоски, поранешниот директор на државното претпријатие АД ЕЛЕМ, како и С.П., внатрешна ревизорка во ЕЛЕМ, добија кривични пријави од Министерството за внатрешни работи (МВР), за злоупотреби на службената положба, поради погрешно евидентирање и исплаќање на прекувремена работа.

Како што е наведено во полицискиот билтен, Д.Б. (44) од Скопје и С.П. (45) од Битола ги сториле злоупотребите во периодот од јануари 2014 година до октомври 2015 година.

Според полицијата, Дејан Бошкоски писмено ја овластил С.П., како внатрешен ревизор за економски работи во службата за внатрешна ревизија при АД ЕЛЕМ – Скопје, да врши работи за време на неработни денови или во празници, но таа не подготвувала ревизорски извештаи и такви документи не биле доставени до дирекцијата на државното претпријатие за производство на струја.

„И покрај тоа, Д.Б. за наведениот период одобрил исплата на надоместоци за плата, за ноќна работа и за работа на државен празник, со што ѝ овозможил на С.П. да стекне противправна имотна корист во износ од 140.226 денари, на штета на АД ЕЛЕМ – Скопје“, стои во полицискиот билтен.


„ЕЛЕМ – Енергетика“ од утре ќе вклучи парно греење


Скопје, 6 октомври, 2017 - 10:21 (META) 

ЕЛЕМ утре ќе почне со испорака на топлинска енергија за потрошувачите приклучени на мрежата на „ЕЛЕМ – Енергетика“.

„Парно греење ќе добијат 3.546 домаќинства, 17 основни и средни училишта и детски градинки и 75 деловни субјекти во скопските населбите Железара, Автокоманда, Триангла, Маџари и Хиподром“, се вели во соопштението на ЕЛЕМ.

Од компанијата додаваат дека испораката почнува осум дена пред официјалниот почеток на грејната сезона поради најавениот пад на дневната температура.

Со почетокот на грејната сезона, потрошувачите ќе може да ги добијат сите потребни информации во канцеларијата за односи со јавноста, лоцирана во управната зграда на „ЕЛЕМ –  Енергетика“, а за дефекти или рекламации, може да ги користат телефонски броеви 3104-816 и 3104-872.


ЕЛЕМ ќе купува струја за грејната сезона


Скопје, 5 октомври, 2017 - 15:00 (META) 

ЕЛЕМ денеска ќе распише повик, а на 10 октомври ќе биде одржана аукција за купување на 29,7 гигават-часови електрична енергија.

„Електричната енергија што е планирана да се купи во октомври е наменета за ноември, кога ќе биде зголемена побарувачката поради грејната сезона. Производството на ЕЛЕМ во тој период ќе биде недоволно поради тоа што еден блок на РЕК Битола сè уште ќе биде во ремонт, во РЕК Осломеј сè уште траат подготвителните активности за почеток на производството и за дополнителен ископ на јаглен, кој досега не бил обезбеден, додека хидроелектраните не располагаат со доволно акумулации за потребите на производството во зимскиот период“, соопштуваат од ЕЛЕМ.

Во соопштението се додава дека дополнителното количество електрична енергија потребно за ноември, ЕЛЕМ го набавува еден месец порано за со навремениот повик до фирмите увозници да обезбеди подобра конкуренција и пониска цена.

„За увоз на електрична енергија за втората половина на 2017 година претходното раководство на компанијата предвидело осум милиони евра, сума која сегашното раководство планира да ја намали преку планско и навремено купување на потребните дополнителни количества по најповолни цени во следните два месеца, колку што ЕЛЕМ има обврска да купува електрична енергија при недоволно домашно производство“, објаснуваат од компанијата.

Од 1 јануари во 2018 година оваа обврска повторно ќе ја преземе ЕВН, бидејќи резултатите од оваа година покажуваат дека новопреземената обврска на ЕЛЕМ за купување електрична енергија не го намали увозот и цените, туку напротив, ги зголеми во споредба со годините наназад кога увозот го вршеше ЕВН, односно од 44,6 евра за мегават-час просечна цена за увоз во 2016 година, а во 2017 година просечната цена е зголемена на 74,1 евра за еден мегават-час.


ЕЛЕМ секојдневно на интернет ќе објавува податоци за нивото на Охридско Езеро


Скопје, 27 септември, 2017 - 14:47 (META) 

ЕЛЕМ на својата официјална веб-страница почна да ги објавува податоците за нивото на Охридско Езеро, информираат од компанијата.

„На линкот http://www.elem.com.mk/?p=6755 посетителите ќе можат секојдневно да го следат нивото на езерото, а покрај моменталната состојба, се поставени и податоци за минималната и за максималната кота. Објавените податоци се според сопствените мерења на компанијата, што АД ЕЛЕМ, подружница ХЕС „Црн Дрим“ ги врши со водомерна летва во близина на градското пливалиште во Струга – велат од ЕЛЕМ.

Од компанијата додаваат дека новите содржини на веб-страницата се за да обезбедат поголема транспарентност во работењето, како и во интерес на засегнатата јавност.

Директорот на ЕЛЕМ, Драган Миновски, при посетата на Охрид викендов изјави дека производството на електрична енергија од акумулациите „Глобочица“ и „Шпилје“ не смее да влијае негативно врз водостојот на Охридското Езеро, а со тоа и врз езерскиот еко-систем.


ЕЛЕМ го поништи тендерот за РЕК Битола, „Фероинвест“ пак понудил повисока цена


Скопје, 26 септември, 2017 - 13:38 (META) 

Електрани на Македонија (ЕЛЕМ) повторно го поништи тендерот за набавка на гумени ленти за РЕК Битола, откако и на последната, трета аукција, понудените цени биле повисоки од планираниот буџет на компанијата.

Од ЕЛЕМ велат доколку нема жалби од компаниите на одлуката, компанијата веднаш ќе распише нов тендер за набавка на гумени ленти.

„Доколку на оваа одлука нема жалби од учесниците на тендерот и доколку одлуката за поништување стапи на сила, АД ЕЛЕМ веднаш ќе пристапи кон распишување нов тендер, од причина што предметот на оваа јавна набавка, гумените ленти потребни за транспорт на материјалот, се неопходни за да може РЕК Битола непречено да работи“, стои во соопштението на ЕЛЕМ.

Вкупен планиран буџет на ЕЛЕМ за сите пет пакети е 4.200.000 евра.

Овој тендер предизвика големо внимание во јавноста бидејќи компанијата „Фероинвест“, која е еден од понудувачите на тендерот, е во сопственост на вицепремиерот Кочо Анѓушев. Тој рече дека не гледа ништо спорно фирмата да учествува на тендери, бидејќи се запазени сите законски процедури, а потоа во гостување во емисијата „Топ-тема“ на телевизија „Телма“, рече дека „Фероинвест“ и другите компании кои се во негова сопственост, нема веќе да учествуваат на државни тендери.

Инаку, и на третата аукција за набавка на гумени транспортни ленти од 1.800 до 2.400 милиметри со платно, „Фероинвест“, како единствен понудувач, повторно лицитирал со истата сума, како на првата аукција, односно понудил 383.663 евра, а планираната максимална цена од ЕЛЕМ е 372.580 евра.