Бизнис-заедницата со идеи за намалување на загадувањето


Скопје, 7 февруари, 2019 - 12:12 (META) 

Здружена акција на приватниот и јавниот сектор за побрза транзиција и замена на старите возила со електричини чија мисија на јаглерод диоксид е нула проценти, итно справување со нелегалните бизниси за отпад, како и промовирање на стандардот за пасивни куќи кој претставува највисок енергетски стандард и ја намалува потрошувачката на енергија за греење до неверојатни 90 проценти, се трите аспекти кои, согласно анализите ќе влијаат долгорочно на намалување на  загаденоста на воздухот, беше истакнато на денешната прес конференција на Сојуз на стопански комори на Македонија (ССК).

Потпретседателот на Сојузот, Александар Милошевски изјави дека согласно податоците на Меѓународната агенција за енергетика објавени лани, за една година бројот на електрични превозни средства на светско ниво пораснал рекордно на 3,1 милиони возила, а се предвидува до 2030 година да има раст од 125 до 220 милиони електрични возила во светот.

„Во нашата земја, интересот за ваков тип на автомобили е мал. Согласно податоците на Министерството за внатрешни работи до октомври 2018, на подрачјето на Скопје се регистрирани вкупно 48 електрични возила.Причините се повeќе но генерално, се цените на автомобилите кои не секој граѓанин може да си го дозволи, но и не доволно развиена инфраструктура и инсталирани полначи за овој тип автомобили, кои без станици за полнење можат да издржат околу 100 километри. За таа цел, потребна е заедничка акција на приватниот и јавниот сектор за стимулирање на набавка на ваков тип автомобили“, изјави Милошевски.

Тој додаде дека со новите измени во Законот за возила предвидено е воведување на субвенции за електрични и хибридни возила, дополнително се предлага по примерот на западно европските земји каде е зголемена нивната употреба, да се имплементира поддршка во субвенционирани батерии и делови за електричните возила како и да се разгледа можноста за бесплатна регистрација, бесплатни патарини и паркинзи кои би биле дпоплнителен стимул и поволност за секој оној кој ке се одлучи за ваква опција.

Дополнително направена е студија за оваа намена во Македонската академија на науките и уметностите (МАНУ) во која се предвидува до 2035 година, 40 проценти од возилата да бидат електрични и за 35 отсто да се намали емисијата на јаглероден двооксид од транспортот, преку стимулирање на ваквиот тип автомобили.

Според Милошовски, вториот аспект кој во голема мера ќе го намали загадувањето е итно справување со нелеганите бизниси за отпад, каде без дозвола се гори, не се следат никакви стандарди и не се знае каде се испуштаат непознати материи во воздухот и во почвата.

„Со употребата на новите технолигии особено со снимањето на теренот со помош на дронови институционално треба точно да се лоцираат можните диви отпади кои се големи загадувачи и кои на отворено неконтролирано палат отпад за понатаму да се превземат радикални чекори за нивно спречување. На тој начин лесно ќе се снимаат критичните точки и ќе се лоцира од каде доаѓа енормното загадување на воздухот. Дополнително потребно е итно постапување по дојави, бидејќи сето ова е и резултат на горење неразградливи и опасни материи по здравјето на граѓаните. Диви депонии и горење на штетни материи е заедничко за петте најзагадени градови во целиот свет, меѓу кои е и Скопје“, изјави Милошевки.


Анѓушев на „Самит 100“: Треба да се поттикнат граѓаните да користат електрични автомобили


Скопје, 16 октомври, 2017 - 19:50 (META) 

Вицепремиерот за економски прашања, Кочо Анѓушев, обраќајќи се на „Самитот 100“, на панел-дискусијата „Е-концепт за забрзување на порастот базиран на поврзувањето“, рече дека земјите во Југоисточна Европа може во Македонија да гледаат сигурен партнер и добар сосед и нагласи дека Владата ќе прави напори да одржува одлична соработка на сите полиња со соседните земји, како и со пошироката меѓународна заедница.

– Е-мобилноста е последната лекција која Република Македонија треба да ја научи и затоа сметам дека треба да се вратиме на основата. Нашите земји треба да бидат подобро поврзани и ние, како Влада, ќе работиме на изградба на подобра инфраструктура, да го завршиме нашиот дел од работата за да создадеме подобри услови за компаниите и побрз, поефикасен и побезбеден транспорт на луѓе и на стоки – рече Анѓушев.

Вицепремиерот истакна дека Владата работи на креирање поволни економски политики, на градење квалитетна инфраструктура и на одржување енергетска стабилност во земјата.

Според Анѓушев, поттикнувањето на граѓаните да користат електрични автомобили ќе има повеќекратни придобивки, како заштита на животната средина, помали трошоци за граѓаните и стабилност на енергетскиот систем.

– Граѓаните треба да имаат интерес за електрични возила, но треба да бидат подостапни така што ќе бидат ослободени од царина и од акциза – рече Анѓушев.


Груевски – лидер и експерт за електрични автомобили, двоседи, акумулатори и полначи


Скопје, 26 септември, 2016 - 17:34 (META) 

Лидерот на ВМРО-ДПМНЕ, Никола Груевски, во Музејот на македонската борба за државност и самостојност, објави нови мерки од областа на автомобилизмот и на заштита на животна средина и во детали говореше за карактеристиките на електричните автомобили.

Груевски за автомобилите:

– Постојат различни видови на електрични автомобили, а тенденцијата е зголемување на нивниот капацитет, односно капацитетот на батериите кои се главниот сегмент во автомобилот. Енергенсот кој што го употребуваат е електричната енергија, а полнењето се одвива преку специјализирани полначи кои генерално се со различен капацитет.

Груевски за полначите:

– Постојат брзи полначи кој целосно ја полнат батеријата на автомобилот за дваесетина минути и чинат околу 15.000 евра и бавни полначи кои за целосно полнење на батеријата во зависност на моќноста на автомобилот ја полнат до крај до 4 часа и чинат околу 1.000 евра.

Груевски за приклучниците (штекерите):

– Постои и трет начин на полнење, а тоа е најбавно, во обичен трофазен штекер, со кој полнењето до крај е околу 8 часа и најчесто се користи во сопствени гаражи или гаражни места. Многу од европските држави нудат различни пакети на поволности со кои се стимулира користењето на електричните возила. Нашата цел е следење на трендот електричните возила да станат наше секојдневие и во приватниот и во јавниот превоз. Наполнетата батерија, во зависност од капацитетот на возилото, може да вози без ново полнење од 300 до 400 километри.

Груевски за батериите (акумулаторите?):

– Секоја година овие перформанси се подобруваат. Имено, секоја година индустријата вади поевтини, а истовремено побрзи полначи, батерии кои подолго може да се користат и кои се сè полесни. За оние кои не се доволно упатени, да подвлечам дека полнењето не преставува големо трошење на струја и трошок. И уште нешто: оваа индустрија почна со производство на поскапи вакви автомобили, сега произведува и поевтини и помали, а на последната годишна конференција за електрични автомобили во Барселона, пред десетина дена, се констатира дека иднината е производство и на мали и евтини електрични автомобили, вклучувајќи и двоседи.


Манчевски: Груевски прв да го замени „мерцедесот“ од 600.000 евра со електричен автомобил


Скопје, 26 септември, 2016 - 17:26 (META) 

Ако обвинетиот Груевски навистина веруваше во електрични автомобили и самиот ќе нарачаше еден наместо да нарачува луксузни „мерцедеси“ од 600.000 евра, вели потпретседателот на СДСМ, Дамјан Манчевски, како реакција на најавата на лидерот на ВМРО-ДПМНЕ, Никола Груевски, за нови мерки во областа на автомобилизмот и заштита на животната средина.

– Доцна е Груевски да ветува мерки со кои покажува лажна грижа за животната средина. Изминатите години Груевски и Коце Трајановски целосно го уништија зеленилото во главниот град и секаде каде што стигнаа, направија Скопје, заедно со Тетово и со Битола, да биде меѓу најзагадените градови во Европа. Впрочем, и во делот на гасификација на Македонија, само Струмица и Куманово се единствените два гасифицирани града во Македонија каде што СДСМ има градоначалници од своите редови. Вистинската гасификација на Македонија ќе се случи по изборите на 11 декември од владата предводена од СДСМ – вели Манчевски.

Манчевски рече дека Груевски знаел само да спроведува пропаднати проекти чијашто единствена цел е неговата јавна промоција и сликање.