!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

За четири дена над 250.000 нарачки на новиот „тесла модел 3“


Пало Алто, 3 април, 2016 - 17:10 (META) 

Елон Маск, основачот и шеф на американската компанија „Тесла моторос“, со седиште во Калифорнија, соопшти дека пред-нарачките на долгоочекуваниот електричен автомобил со ознака „модел 3“ ја надминале бројката од 250.000 возила, јавуваат светските медиуми.

Станува збор за целосно електрично возило со пет врати, кое својата светска промоција ја имаше во четвртокот оваа недела. „Модел 3“ на „Тесла“, за разлика од „модел с“ и „модел икс“, е со поприфатлива цена. Основниот модел чини 35.000 долари и со едно полнење на батериите може да помине околу 350 километри.

Автомобилот може да се нарача однапред во повеќе земји во светот, меѓу кои и во Велика Британија, Ирска, Бразил, Индија, Кина и Нов Зеланд.

Потенцијалните сопственици на автомобилот треба да платат депозит од 1.000 долари за резервација на возилото, чии први испораки ќе стартуваат кон крајот на 2017 година.

Пред-нарачките на „Модел 3“ не значат нужно дека толкав ќе биде и бројот на продадени возила.

Алудирајќи на големата заинтересираност за возилото, Маск на својот твитер-профил напиша дека „дефинитивно мора повторно да размисли околу планирањето на производството“.

Моменталниот план на Маск е да произведува 500.000 возила годишно, кога капацитетите на „Тесла“ ќе бидат подготвени за тоа.


Првиот сериски произведен електричен автомобил, од денеска и кај нас


Скопје, 18 јуни, 2015 - 16:55 (META) 

„Мицубиши i-MIEV“ е првиот сериски произведен електричен автомобил во светот, со првиот произведен модел во 2009 година, а од денеска „Мак аутостар“ го направи овој автомобил достапен и за македонските граѓани.

Станува збор за помало градско возило со иновативен и футуристички дизајн, кое благодарение на напредната технологија е забавно за возење и продуцира 0 проценти емисија на јагледод диоксид.

– На овој начин стануваме дел од глобалниот тренд за воведување нови, напредни возила, кои до пред некоја година се означуваа како футуристички, а денес се реалност – изјави директорот за маркетинг на „Мицубиши моторс – Мак аутостар“, Владица Кокаловиќ.

Меѓу првите кои имаа можност да го запознаат возилото беше и професорот од Машинскиот Факултет во Скопје, Игор Ѓурков.

– Возилото „мицубиши i-MiEV“ е одраз на рационалниот пристап во проектирањето на електричните возила: мала маса, голема просторност во кабината со одличен комфор за четири патници и повеќе од солидна автономија на движење. Доволни се само десетина километри возење за да стекнеме впечаток колку голем потенцијал за енергетска заштеда се крие во трансформацијата на кинетичката енергија со рекуперативно сопирање применето во ова возило. Со појавата на „i-MiEV“ на пазарот, со голема радост можеме да ѝ посакаме добредојде на иднината на чистиот и енергетски ефикасен индивидуален транспорт во градовите – изјави професорот Ѓурков.

Претходната година, „Мак аутостар“ во Македонија го претстави првиот електро-хибриден теренец во светот, „мицубиши аутлендер PHEV“, кој овозможува движење само на батерија или во комбинација со мотор со внатрешно согорување.