!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Уште двајца турски војници побарале азил во Грција


Атина, 23 февруари, 2017 - 20:54 (META) 

Грчката полиција денеска соопштила дека уште двајца турски војници, кои биле уапсени откако тајно влегле во Грција, побарале азил во земјата, пренесува балканскиот сервис на „Радио Слободна Европа“.

Од полицијата навеле дека двајцата офицери им се предале на грчките власти во североисточниот град Орестијада, минатата недела. Војниците пред грчката полиција изјавиле дека во земјата влегле преминувајќи ја реката Еврос, долж границата помеѓу Грција и Турција.

Тие официјално побарале азил во Грција во понеделникот оваа недела, информирале од полицијата, која не го соопштила идентитетот на војниците и не изнела други детали во врска со случајот.

Грчкиот суд на 26 јануари оваа година го отфрли барањето на властите во Анкара за екстрадиција на осумте турски војници кои побегнаа во Грција на 16 јули, неколку часа по неуспешниот обид за пуч во Турција, и веднаш побараа азил.

Одлуката на грчкиот суд, кој како причина за одбивањето на барањето за екстрадиција го наведе тоа што на офицерите не може да им биде гарантирана безбедноста во Турција, ги налути властите во Анкара, кои издадоа налог за нивно апсење и упатија ново барање до Грција за екстрадиција.


Одлуката на Грција да ги ослободи војниците е политички мотивирана, реагира турското МНР


Анкара, 26 јануари, 2017 - 17:55 (META) 

Министерството за надворешни работи на Турција денеска остро реагираше на одлуката на грчкиот Врховен суд да го отфрли барањето на Анкара за екстрадиција на осумте турски војници кои во јули, по обидот за пуч, со хеликоптер пребегаа во Грција и побараа азил и заштита, јавуваат медиумите.

Од турското МНР соопштиле дека Грција ги штити заговорниците и не придонесува во борбата против тероризмот.

Во сооопштението се наведува дека сите околности укажуваат на тоа дека одлуката на судот во Грција била политички мотивирана и спротивна со меѓународното право и дека со неа се кршат правата на жртвите од неуспешниот воен удар од 15 јули минатата година.

„Протестираме поради одлуката на судот, кој спречува овие лица да се појават пред турското правосудство. Грција, која е сојузник и сосед, не успеа во борбата против тероризмот“, било наведено во соопштението на турското министерство за надворешни работи, од каде додаваат дека Анкара ќе продолжи да вложува напори војниците да бидат екстрадирани и кривично гонети.


Грција го одби барањето на Анкара за екстрадиција на пребеганите турски војници


Атина, 26 јануари, 2017 - 14:57 (META) 

Грција го отфрли барањето на Турција за екстрадиција на осумте турски војници. Грчкиот Врховен суд денеска одлучи да ги ослободи војниците кои во јули, по обидот за пуч во Турција, со хеликоптер пребегаа во Грција и побараа азил и заштита.

Одлуката на Врховниот суд да се одбие барањето на Анкара и војниците да не се екстрадираат назад во Турција е конечна и неотповиклива.

Со ова, грчкиот суд ги прифати аргументите на војниците дека ако се вратат назад во Турција, нема да имаат право на фер судење и нивниот живот ќе биде загрозен.

Војниците ќе бидат пуштени на слобода, откако речиси шест месеци беа во притвор, прво во Александруполи, а потоа во Атина. Војниците слетаа во Александруполи веднаш по обидот за воен удар против претседателот Реџеп Таип Ердоган и побараа азил во Грција.

Се бранеа дека не знаеле дека се работи за воен удар и само извршувале наредби за пренесување повредени кога се нашле на мета на турската полиција. Нивните барања за азил сè уште се разгледуваат.

Случајот предизвика голема вознемиреност во Грција, бидејќи владата се најде растргната меѓу желбата да не дојде до нови тензии со турските власти, од една страна, и стравувањето за кршење на човековите права и заканите по живот за војниците доколку бидат вратени назад во Турција.

Грчката влада изрази солидарност со Турција и со Ердоган, но се обиде да се огради од ситуацијата со објаснување дека конечниот збор ќе го има грчкиот правен систем.


Асанж се согласи на екстрадиција во САД само ако му се гарантираат правата


Лондон, 18 јануари, 2017 - 19:20 (META) 

Основачот на „Викликс“, Џулијан Асанж, ќе патува во САД само ако му бидат гарантирани неговите права, објави денеска „Викиликс“ на официјалниот профил на „Твитер“.

– Асанж ќе дојде во САД само ако му се гарантираат неговите права иако Белата куќа вели дека помилувањето на Менинг не било за „трампа“ со Асанж“ – пишува „Викиликс“ на „Твитер“.

Ова е објавено откако претседателот на САД во заминување, Барак Обама, донесе одлука за помилување односно ослободување на повеќе од 200 затвореници меѓу кои е и Челси Менинг.

Менинг, чие вистинско име е Бредли, осудена беше во август 2013 година на 35 години затвор за шпионажа откако објави документи на „Викликс“. Според одлуката на Обама, Менинг од затвор ќе излезе во мај.


Рама ја поздрави одлуката за условно ослободување на Харадинај


Тирана, 12 јануари, 2017 - 20:42 (META) 

Премиерот на Албанија, Еди Рама, денеска ја поздрави одлуката на францускиот суд условно да го ослободи Рамуш Харадинај, кој на 4 јануари беше уапсен и притворен од француските власти врз основа на потерница од Србија поради воени злосторства, извршени во текот на 1998 и 1999 година.

Рама рече дека во моментот треба да се истакнат политичките и дипломатиските напори на властите во Тирана и во Приштина. Албанскиот премиер им заблагодари на сите граѓани кои дале придонес и го кренале гласот против „спектакуларната неправда“.

Лидерот на албанската опозиција, Лулзим Баша, побара правдата да биде што поскоро исполнета и Харадинај да се врати во Косово. Тој додаде дека потерниците на Србија не само што се неправедни кон Харадинај, туку и кон тие што се жртвувале за слободата на Косово.

„Овие потерници се напад на независноста на Косово и на нејзиниот политички интегритет“, рече Баша.

Рамуш Харадинај денеска беше условно ослободен од францускиот суд, а одлуката е донесена два дена откако српското министерство за правда побара негова екстрадиција.

Харадинај, според одлуката на судот, нема да може да ја напушти Франција и ќе мора двапати неделно да се јавува во француската полиција.


Владата на Србија без реакција за пуштањето на Харадинај, сè уште чека испорачување


Белград, 12 јануари, 2017 - 15:11 (META) 

Потпретседателот на српската влада и шеф на дипломатијата, Ивица Дачиќ, рече дека владата на Србија денеска нема да реагира на одлуката на францускиот суд да го пушти Рамуш Харадинај од притвор.

Апелациониот суд во Колмар денеска наложи пуштање на лидерот на Алијансата за иднина на Косово и еден од некогашните команданти на ОВК на условна слобода, со ставање под судски надзор сè до приемот на барањето за негова екстрадиција во Србија.

Се очекува владата на Србија за пуштањето на Харадинај од притвор да расправа на седница која е закажана за утре.

Во меѓувреме, српското министерство за правда соопшти дека постапката за екстрадиција и понатаму трае и дека францускиот суд денеска одлучувал само за мерките кои се однесуваат на притворот на Харадинај, што е целосно одвоена постапка. Од министерството наведуваат и дека Харадинај не мора да биде во затвор додека трае екстрадиционата постапка.

Адвокатот на Харадинај на новинарите во Приштина им рече дека Харадинај е должен двапати неделно да се јавува во француската полиција и дека не смее да ја напушти територијата на Франција.


Харадинај на условна слобода во Франција


Париз, 12 јануари, 2017 - 13:27 (META) 

Судот во Колмар одлучи условно да го ослободи Рамуш Харадинај, кого француските власти го притворија на 4 јануари на аеродромот во Базел, по потерница од Србија за воени злосторства, извршени во текот на 1998 и 1999 година, соопшти неговиот адвокат Арианит Кочи, кој присуствувал на денешното рочиште.

Харадинај нема да може да ја напушти Франција и ќе мора двапати неделно да се јавува во француската полиција.
Судот донел ваква одлука на барање на одбраната на Харадинај. Барањето следеше откако судот претходно одлучи Харадинај да остане во притвор до службеното барање на Србија.

Во меѓувреме, неговите адвокати побараа условно ослободување, а Србија и официјално поднесе барање за екстрадиција, заедно со документацијата врз основа на која Франција ќе одлучува за испорачувањето.

Во Косово претходно се одржаа протести, на кои граѓаните бараа ослободување на Харадинај.

Собранието на Косово, кое заседаваше на 10 јануари и кое на дневен ред имаше резолуција за Харадинај, по 11 часа расправа не донесе никаков заклучок.


Проширени обвинувањата против Харадинај


Белград, 11 јануари, 2017 - 12:47 (META) 

Обвинителството за воени злосторства на Србија ги прошири обвинувањата против еден од поранешните команданти на Ослободителната војска на Косово, Рамуш Харадинај, кој беше уапсен во Франција по налог на Србија која го товари за воени злосторства.

Одлуката е донесена затоа што обвинителството дошло до нови докази.

Се работи за собрани докази за одговорноста на Харадинај за воените злосторства на Косово, кои не биле предмет на разгледување во Хашкиот трибунал и претставување на дополнителни докази кои веќе се испратени во Франција.

Новата документација ќе биде испратена до надлежен суд во Франција откако ќе биде преведена на француски јазик. Се очекува дека тоа би можело да биде завршено пред крајот на оваа недела.

Министерството за правда на Србија вчера во Франција го проследи барањето за испорачување на Харадинај, кој беше уапсен на 4 јануари по налог на Србија поради сомневања дека во 1998 и 1999 година на Косово извршил воени злосторства над Србите и над други неалбански етникуми.

Судот во Франција одлучи на 5 јануари Харадинај да го задржи во притвор додека Србија не го достави барањето за екстрадиција.

Харадинај беше суден пред Хашкиот трибунал за воени злосторства, но во 2012 година беше ослободен од сите обвиненија.

Тој по налог на Србија беше уапсен и во 2015 година на аеродромот во Љубљана, но по неколку дена беше ослободен.


Србија достави барање до Франција за екстрадиција на Харадинај


Белград, 10 јануари, 2017 - 14:57 (META) 

Министерството за правда на Србија денеска им испратило на правосудните органи во Франција барање за екстрадиција на некогашниот лидер на Ослободителната војска на Косово и претседател на Алијанса за иднината на Косово, Рамуш Харадинај, кого Белград го товари за воени злосторства за време на вооружените судири во 1998 и 1999 година, јавуваат српските медиуми.

Со барањето за испорака испратена е и документација преведена на француски јазик, врз основа на која француското правосудство ќе одлучува за тоа дали се исполнети условите за екстрадиција на Харадинај во Србија.

Рамуш Храдинај е уапсен минатата среда по налог на Србија од 2004 година, поради сомневање дека во текот на 1998 и 1999 година извршил воени злосторства врз Срби и врз лица од други етникуми.

Судот во Франција одлучи да го задржи Харадинај во затвор додека го добие барањето од Белград за испорака.

Харадинај во 2015 година беше уапсен на аеродромот во Љубљана, но по неколку дена беше ослободен.

Тој беше суден во Хашкиот трибунал за воени злосторства и во 2012 година беше ослободен од сите обвиненија.


Вучиќ: Ќе бараме екстрадиција на Харадинај


Белград, 5 јануари, 2017 - 12:46 (META) 

Премиерот на Србија, Александар Вучиќ, денеска изјави дека Србија ќе бара екстрадиција на претседателот на Алијанса за иднината на Косово, Рамуш Харадинај, кој е уапсен во Франција, врз основа на меѓународна потерница распишана од српските власти.

Вучиќ пред новинарите во владата на Србија рече дека обвинителството има повеќе основи за кои го товари Харадинај и дека никој нема право да ги урива одлуките на обвинителството на Србија, како независен орган.

„Што има друго да правиме освен да бараме негова (на Рамуш Харадинај, н.з.) екстрадиција“, рече Вучиќ и додаде дека очекува оти Франција како правна држава ќе постапи во согласност со правото.

Француската полиција вчеравечер го уапси Харадинај врз основа на меѓународна потерница издадена од Србија. Потерницата против Харадинај, Србија ја распиша во 2006 година поради сомневања за извршени воени злосторства во 1998 и во 1999 година, во времето кога беше еден од командантите на Ослободителната војска на Косово (ОВК).

Обвинителството за воени злостроства на Србија денеска соопшти дека се собрани нови докази што го дополнуваат обвинението против Харадинај.

На Харадинај му се судеше и во Хашкиот трибунал за воени злосторства, но во 2012 година тој беше ослободен од сите обвиненија.