Спречен терористички напад во Франција


Париз, 21 јануари, 2018 - 12:46 (META) 

Во Франција минатата недела бил спречен можен терористички напад. Уапсен бил 33 годишен маж од Париз, за кого има сомнение дека се подготвувал да изврши терористички напад.

Тој е уапсен во вторникот во јужниот град Ним, а во неговиот дом е откриен арсенал од експлозивни материјали.

Станува збор за прво вакво сомнение во Франција од почетокот на новата годината. Во минатата 2017 година беа спречени вкупно 20 терористички дејства.


Грчките служби фатиле 410 тони експлозив наменети за Либија


Атина, 11 јануари, 2018 - 9:51 (META) 

Грчката крајбрежна стража спречила транспорт на 410 тони експлозив во брод што го пресретнале кај островот Крит.

Сандаците со експлозив се пронајдени на брод што пловел кон Либија под танзаниско знаме, а биле натоварени во турското пристаниште Мерсин, јавија грчките медиуми.

Приведени се 8 членови на екипажот. Бродот пловел кон Мисрата.


Маж со експлозив држи 11 заложници во пошта во Харков


Харков, 30 декември, 2017 - 18:50 (META) 

Маж за кого се верува дека е вооружен со експлозив држи девет возрасни лица и две деца како заложници во пошта во градот Харков, во североисточниот дел на Украина, соопшти полицијата, јавуваат светските агенции.

Неидентификуваниот маж не изнел некакви барања. Тој, како што пренесуваат агенциите, се однесува мирно и комуницира со полицијата, која го блокираше подрачјето околу поштата.

„Мажот во поштата изрази загриженост околу неодамнешната размена на заробеници меѓу украинските власти и проруските сепаратисти и смета дека треба да се разменат уште заробеници“, изјавил началникот на регионалната полиција, Олег Бех, додавајќи дека полицијата сè уште не знае што тој бара.

Украина и проруските сепаратисти во средата, оваа недела, разменија стотици заробеници, што е најголема размена од избувнувањето на судирите во источен Донбас, во кои досега се убиени повеќе од 10.000 лица.


Арачиновец уапсен пред Врховниот суд, околу појасот носел прачки налик на експлозив


Скопје, 2 ноември, 2017 - 17:39 (META) 

Припадниците на полицијата што денеска го обезбедуваа судскиот комплекс додека траеше изрекувањето на пресудите за случајот „Диво Насеље“, уапсија педесет и седумгодишен жител на Арачиново со иницијали И.И., кој околу појасот имал четири прачки кои личеле на експлозив.

Како што потврдуваат од МВР, осомничениот е одведен во полициската станица во Центaр, каде со него се разговара.

Прачките ќе бидат предадени на вештачење за да се утврди за што точно станува збор.

На видеоснимка од инцидентот што ја објави „А1 он“ се гледа машко лице со тобра како му приоѓа на полицаец пред судот, кратко му се обраќа, по што веднаш следи интервениција на полицаецот и на повеќемина негови колеги кои го приведуваат лицето.


Илјадници луѓе евакуирани во Москва поради дојави за подметнати бомби


Москва, 13 септември, 2017 - 18:26 (META) 

Повеќе од 20.000 лица денеска биле евакуирани од трговските центри, железничките станици, театри и од универзитети во Москва поради речиси симултани дојави дека на повеќе места во градот е поставен експлозив, јавуваат светските агенции.

Иако се претпоставува дека станува збор за лажни дојави, полициски специјалци со кучиња трагачи ги пребаруваат местата. Според информациите на агенциите, досега биле пребарани пет локации, но не бил најден експлозив.

Слични дојави за поставен експлозив изминатите денови имаше и во неколку други градови во Русија.

Првата дојава и евакуација се случи на 10 септември, во канцеларијата на градоначалникот на Омск, кога непознато лице се јавило на телефон и пријавило дека во зградата има бомба.

Зградата беше евакуирана и пребарана, но не беше најден никаков експлозив.

Вчера повеќе од 5.700 ученици и наставен кадар во седум училишта во уралскиот град Перм во Русија беа евакуирани поради дојава и закана со подметната бомба.


Појасите со експлозиви на петтемина терористи од Камбрилс биле лажни


Камбрилс, 18 август, 2017 - 18:58 (META) 

Појасите, што ги носеа петтемина ликвидирани терористи во Камбрилс биле лажни, изјави каталонскиот премиер Карлес Пуџдемон за локалното радио.

Синоќа пет лица со автомобил ауди прегазија луѓе во летувалиштето Камбрилс во обид да го повторат нападот од Барселона од вчера попладне.

Полицијата ги ликвидира терористите во Камбрилс, кои повредија петмина граѓани и еден полицаец.


Пукање и полициска потера по возило со експлозив во Брисел


Брисел, 8 август, 2017 - 19:50 (META) 

Бриселската полиција пукала во возило во квартот Моленбек и повикала единица за деминирање откако возач им соопштил дека во автомобилот има експлозив.

Белгиското федерално обвинителство и локалната полиција засега не се достапни за коментар.

Локалните медиуми јавуваат дека полициската потера по возилото завршила откако возачот заглавил во сообраќајниот метеж во Брисел. Дел од медиумите јавуваат дека станува збор за возило со германски регистарски таблички.

– Го извлековме возачот, а тој веднаш ни рече дека во автомобилот има експлозив – изјавил портпаролот на полицијата за белгиската телевизија „Ер-те-ел“.

Моленбек е сиромашен кварт со голем број жители по потекло од Мароко. Овој дел од Брисел стана озлогласен откако ќелија на Исламска држава со седиште во овој дел на градот ги организираше самоубиствените напади во Париз во ноември 2015 година.

За време на минатогодишните терористички напади во Брисел загинаа 32 лица.


Напаѓач со автомобил полн со експлозив удрил во полициско возило во Париз


Париз, 19 јуни, 2017 - 18:58 (META) 

Француската полиција ја евакуираше познатата париска авенија Елисејски полиња откако напаѓач со автомобил удри во полициско возило.

Автомобилот на напаѓачот потоа се запалил, а тој починал од повредите, потврди министерот за внатрешни работи на Франција.

Антитерористичка единица ја презеде истрагата, а инцидентот се третира како терористички чин. Во автомобилот е пронајден „калашников“, пиштол и димни бомби. Во автомобилот имало и поголемо количество експлозив.

Полицијата на „Твитер“ ги советуваше граѓаните да ја избегнуваат областа каде што се случи инцидентот.


Во Германија уапсени две лица со 155 килограми експлозив


Берлин, 14 јануари, 2017 - 12:24 (META) 

Германската полиција во местото Лаутеркен пронашла 155 килограми експлозив, поради што уапсила две лица. Против двете лица на возраст од 18 и 24 години ќе бидат поднесени обвиненија поради поседување експлозив и поради подготвување терористички напад.

Државното обвинителство ги проверува информациите според кои осомничените имаат врска со терористичката група „Олд скул сосајети“.

Се смета дека таа терористичка организација е разбиена откако во мај 2015 година повеќето од членовите биле уапсени.

За време на сослушувањето, двајцата уапсени негирале дека планирале терористички напад и дека пронајдениот експлозив бил наменет за приватна употреба.

За време на претресот на семејниот стан на 18-годишникот, полицијата пронашла експлозивна направа која тој самиот ја направил, повеќе од 150 килограми илегални пиротехнички средства и експлозиви, како и неонацистички симболи.


Четири лица уапсени во Русија поради планирање терористички напади


Москва, 15 декември, 2016 - 16:13 (META) 

Руската федерална служба за безбедност (ФСБ) денеска соопшти дека уапсила четири лица, осомничени за планирање терористички напади во Москва, јавуваат светските агенции.

Уапсените, како што било наведено во соопштението, се државјани на Молдавија и на Таџикистан. Тие планирале со импровизирани експлозивни направи да изведат серија напади, со кои, според ФСБ, требало да управува еден од водачите на Исламска држава, чија база била во Турција.

Од ФСБ додаваат дека по организаторот на нападите, чие име не е наведено, властите во Таџикистан веќе имале распишано потерница за повеќе кривични дела.

Молдавските и таџикистанските државјани биле уапсени во Москва и во околината и кај нив биле пронајдени автоматско оружје и експлозив.