Едно лице загина во експлозија во близина на метро-станица во Стокхолм


Стокхолм, 7 јануари, 2018 - 16:44 (META) 

Едно лице загина во експлозија во близина на метро-станица во Стокхолм, соопшти полицијата. Во експлозијата, која се случила во јужниот дел на градот, повредена е уште една жена.

Засега не се знае дали се работи за терористички напад, бидејќи полицијата се уште го истражува случајот.

Метро-станицата е затворена, а истражен тим го проверува местото за да утврди, дали се поставени и други експлозивни направи.


Експлозија во Авганистан, загинаа седум цивили


Кабул, 24 декември, 2017 - 15:27 (META) 

Во експлозија на бомба покрај пат во провинцијата Хелманд на југот на Авганистан загинаа седум цивили, а три лица се ранети, соопштија авганистанските власти.

За сега никој не презема одговорност за нападот.

Талибанците изминатите години се проширија во оваа област, по завршувањето на борбените мисии на меѓународните сили.


Експлозија пред судот во Атина


Атина, 22 декември, 2017 - 12:19 (META) 

Силна експлозија утринава го оштети судскиот комплекс во центарот на Атина, неколку часа откако Парламентот усвои поостри мерки против демонстрантите, соопшти полицијата, додавајќи дека нема жртви.

Експлозијата се случила пред зори, по анонимна телефонска дојава во еден грчки дневен весник и портал.Полицијата соопшти дека припадници на обезбедувањето забележале двајца мажи, за кои постои сомнение дека се напаѓачи, како оставаат торба пред зградата на Парламентот.

Како што се наведува во соопштението, ваквите напади се чести и имаат „симболичко значење“. Новите мерки усвоени од Парламентот, предвидуваат минимални казни затвор од три до шест месеци за активистите кои редовно се собираат пред судовите, протестирајќи против заплената на недвижности кои се под хипотека.

Помалку од половина од Грците можат да ги исплатат кредитите после рецесијата и финансиската криза, што е најголема стапка во Европа. За сега, ниту една група не ја презеде одговорноста за нападот.


Силна експлозија во кинескиот град Нингбо, најмалку двајца загинати


Нингбо, 26 ноември, 2017 - 10:47 (META) 

Две лица загинале, а десетици се повредени во силна експлозија во близина на пристанишниот град Нингбо, во источниот дел на Кина, јавуваат светските медиуми.

Експлозијата се случила денеска во 9 часот по локално време, во ненаселена зона на градот, соопштиле локалните власти и додале дека две лица загинале, а две се тешко повредени. Медиумите пренесуваат дека во експлозијата се повредени 30 лица кои биле префрлени во болница.

Новинската агенција „Синхуа“ јавува дека експлозијата се случила во близина на фабрика, а од полицијата соопштиле дека е отворена истрага која треба да ги утврди причините за експлозијата, кои сè уште се непознати.

Медиумите наведуваат дека во Кина се чести експлозиите во индустриските зони, поради непочитување на правилата за безбедност.


Поради уцена притворен државниот секретар за транспорт на Романија


Букурешт, 14 ноември, 2017 - 10:08 (META) 

Обвинителите од Националната антикорупциска управа на Романија, вчера под обвинување за уцена го притворија Нинел Церцел, државен секретар во Министерството за транспорт на Романија.

Случајот на антикорупционерите е поврзан со  инцидент од 31 октомври годинава, кога во еден од вагоните на воз натоварен со амониум нитрат избил мал пожар, а Министерството за транспорт и националната компанија ЦФР Марфа не го третирале случајот како сериозен инцидент, велат обвинителите.

Следниот ден Церцел побарал од менаџерот на Центарот за транспорт за зоната Брашов да си даде оставка ако не сака да биде отпуштен, иако инцидентот со возот не се случил на територија под негова надлежност. Државниот секретар за транспорт на менаџерот му рекол и дека ако си даде оставка, нема да се поведе дисциплинска постапка против него, а ќе стане советник во Советот на општина Брашов и подоцна пак ќе добие работно место во компанијата ЦФР Марфа. Но, менаџерот не го прифатил тоа и пријавил.

Церцел сега е во 30-дневен притвор, а премиерот Михај Тудосе го разреши од функцијата.


Двајца повредени при експлозија на неисправна плинска инсталација на автомобил


Куманово, 12 ноември, 2017 - 13:24 (META) 

Две лица се повредени ори експлозија на плин, соопшти МВР. Експлозијата настанала поради невнимание при замена на цевка за плин, монтирање и демонтирање на плинска боца на патничко возлило.

Повредените биле во каналот под возилото кога дошло до експлозијата од која што внатрешноста на возилото целосна изгорела, а двајцата се здобиле со изгореници од втор степен во пределот на рацете и лицето. Од експлозијата опожарена била и гаражата.

Повредените со возило на итната медицинска помош биле пренесени во медицинскиот центар во Куманово, а пожарот бил изгаснат од противпожарната единица во Куманово.


Пет загинати и 16 повредени во експлозија во фабрика во Турција


Анкара, 8 ноември, 2017 - 14:31 (META) 

Во експлозија во фабрика за текстил во Турција загинаа пет лица, а ранети се 16, соопшти турската министерка за труд, Жулиде Сариероглу.

Од јачината на експлозијата, која веројатно е предизвикана од бојлер, во делот од фабриката каде што се продаваат бои се урнал покрив, а оштетени се и возила што биле паркирани во близина.

– Иницијалниот извештај од таа област покажува дека пет работници загинаа, а 16, меѓу кои и граѓани кои во моментот се нашле во фабриката, се повредени – вели Сариероглу.
Повредените се хоспитализирани, но ниту еден од нив не е во критична состојба.


Експлозија на танкер и на бензинска пумпа во Гана


Акра, 8 октомври, 2017 - 10:32 (META) 

Неколку лица загинаа, а има и повеќе повредени при експлозија на течен природен гас во главниот град на Гана, Акра, соопшти заменик министерот за информации на Гана, Коџо Опонг Нкрума.

– За жал, има неколку смртни случаи и ние работиме за да го утврдиме нивниот број – рече Нкрума, додавајќи дека бројот на повредените е голем, но дека пожарот е ставен под контрола.

Според очевидци, четири или пет лица загинале во експлозијата.

Портпаролот на пожарникарска служба во Гана, Били Енглејт, изјави дека пожар на танкер предизвикал експлозија на бензинска станица и оти сè уште се истражува причината за пожарот.


Осум загинати во експлозија на бомба во близина на Мосул


Мосул, 17 септември, 2017 - 17:21 (META) 

Осум припадници на ирачките паравоени единици загинале во експлозија на бомба, подметната во училиште во регионот на Мосул, кој на почетокот на јули беше преземен од џихадистите на Исламска државата (ИД), јавуваат светските агенции.

Училиштето се наоѓа на околу 20 километри од Мосул, а борците на ИД го минирале додека кон крајот на август се повлекувале од Мосул и од Тал Афар.

Во борбите за ослободување на провинцијата Нинива од Исламска држава, владините сили имаа помош и од шиитската племенска единица Хачд ал-Чаби.


Бомбата во Лондон не експлодирала целосно


Лондон, 15 септември, 2017 - 14:19 (META) 

Експлозивната направа што го предизвика утринскиот инцидент во воз во лондонската метро-станица Парсон грин, не експлодирала целосно, а пронајден е и тајмер.

Лондонската итна помош соопшти дека 22 патници се примени во болница по експлозијата, но дека никој од нив не е посериозно повреден. Безбедносните претставници за „Си-ен-ен“ рекле дека е пронајден тајмер на експлозивна направа и оти се претпоставува дека напаѓачите планирале напад од поголеми размери.

Британската премиерка, Тереза Меј се враќа во Даунинг стрит бидејќи за време на нападот била надвор од Лондон, во својата изборна единица.

Лондонската полиција и официјално ја прогласи утринската експлозија за терористички напад и соопшти дека голем број луѓе се повредени и дека полициските сили задолжени за борбата против тероризмот водат истрага. Скотланд јард сè уште нема извештај за постоење на друга експлозивна направа, ниту за човек со нож.

Најавено е дека попладне ќе се одржи состанок на комитетот за итно дејствување, со кој ќе раководи британската премиерка.

Шефот на британската дипломатија, Борис Џонсон, за „Скај њуз“ рече дека особено е важно во моментов да не се изнесуваат шпекулации.

– Очигледно, сите треба да останеме мирни и да продолжиме да водиме живот на нормален начин, колку што е тоа можно – рече Џонсон.