Македонија и Словенија ќе ја унапредуваат економската соработка


Скопје, 4 април, 2018 - 13:06 (META) 

Македонија и Словенија се пријателски земји кои имаат добри традиционални врски во сите области. Економската соработка исто така е традиционална добра и има многу голем потенцијал да се унапреди.
Ова го порачаа на денешниот Македонско-словенечки бизнис форум премиерите Зоран Заев и Миро Церар, нагласувајќи дека размената меѓу двете земји до 2020 може да достигне до половина милијарда долари.

– Пријателството се гради полека и постојано и затоа е важно меѓу Словенија и Македонија да го градиме секој ден преку сите области преку кои добро соработуваме – порача Церар.

Оцени дека има големи можности за проширување на соработката на планот на енергетиката, туризмот, екологијата, прехранбената индустрија, металопреработувачката.

Премиерот Заев ги повика словенечките компании да ги искористат традиционалните врски кои можат да дадат придонес во развојот и унапредување на соработката.

Тој ги пвика да учествуваат во тендерите што ќе следат во делот на патната инфраструктура каде се обезбедени големи средства, потоа во делот на пречистителни станици, изградба на регионални депонии и во делот на енергетиката.

Словенија е петта земја по инвестиции во Република Македонија.

Соња Шмуц од словенечката Стопанска комора оцени дека Словенија е еден од најголемите инвеститори во Република Македонија и оти тие се стабилни, бидејќи доаѓаат и тука остануваат да работат.

За претседателот на Стопанската комора на Македонија Бранко Азески словенечките инвестиции се значајни во Македонија и тие придонесуваат за развој и раст на македонската економија.

Според него, Република Словенија е земјата која од осамостојувањето не ги напушти релациите со Македонија.


Сугарески и Гарет разговарале за економската соработка меѓу Македонија и Британија


Скопје, 2 февруари, 2018 - 12:11 (META) 

Министерот за транспорт и врски, Горан Сугарески денеска имал средба со амбасадорот на Велика Британија во земјава, Чарлс Гарет, на која го информирал за капиталените проекти што се реализираат во Македонија во делот на инфраструктурата.

„Амбасадорот беше запознаен со проектите што ќе се реализираат во следниот период во делот на патната инфраструктура, изградба на железницата на Коридорот 8, како и за проектите што ги реализира Министерството за транспорт и врски во комуналната инфраструктура и гасификацијата“, стои во соопштението од Министерството.

На средбата се разговарало и за актуелните состојби во соработката меѓу двете земји, при што акцентот бил ставен на зголемувањето на економската соработка меѓу Македонија и Велика Британија.


Меј договори економска соработка со Кина вредна 13 милијарди долари


Шангај, 2 февруари, 2018 - 11:01 (META) 

Британската премиерка, Тереза Меј договори економска соработка со Кина вредна 13 милијарди долари, јавуваат светските агенции.

Британија се обидува повторно да се наметне како глобален трговски играч, по одлуката да го напушти членството во Европската Унија, а Кина е на врвот на листата на држави со кои Лондон сака да има договор за слободна трговија, коментираат агенциите.

Говорејќи во Шангај, Меј рекла дека Британија сака да помогне во остварувањето на визијата на кинескиот претседател, Кси Џинпинг во поглед на глобализацијата, како и за поголема отвореност на кинеската економија.

– Додека излегуваме од ЕУ бараме шанса да станеме што повеќе свртени кон надворешната трговија и да ги продлабочиме трговските односи со светот, вклучително и со Кина – изјавила Меј.

Подготвеност за унапредување на односите меѓу двете земји изразил и кинескиот претседател, Кси Џинпинг.

Договорените бизниси и инвестиции во вредност од 13 милијарди долари ќе отворат повеќе од 2.500 нови работни места во Велика Британија.


Македонија и Кина ќе потпишат нов договор за економска соработка вреден 2,5 милиони евра


Скопје, 7 декември, 2017 - 18:36 (META) 

Владите на Македонија и на Кина до крајот на годината се очекува да потпишат нов договор за економска соработка со кој би се обезбедиле околу 2,5 милиони евра што би биле наменети за реновирање на училишта во земјава, но и за финансирање на други проекти што ќе се утврдат како приоритетни од македонската Влада.

Ова било констатирано на денешната средба меѓу вицепремиерот за европски прашања, Бујар Османи, и амбасадорката на Народна Република Кина во земјава, Јин Лисјен, на која било разговарано за билатералните односи и за соработката меѓу двете земји, кои, како што било оценето од двајцата соговорници, бележат нагорен тренд.

Новиот договор би бил дел од проектната соработка со Кина, која се реализира во рамки на договорите за економска и техничка соработка потпишани од 2007 година, кои, оттогаш наваму, се потпишуваат најчесто на годишно ниво, а се однесуваат на областите образование, здравство и комуникации.

„Османи изрази огромна благодарност за севкупната финансиска помош која НР Кина ѝ ја дава на нашата земја како во насока на финансирање на инфраструктурни проекти, така и во насока на финансирање проекти во областите кои се од витално значење за Република Македонија. Османи додаде дека и во иднина очекува засилување на оваа соработка, потенцирајќи дека финансиската помош, но и инвестициите кои доаѓаат од НР Кина се добредојдени во Македонија“, стои во соопштението за средбата.


Средба на координаторите од Западен Балкан во Брисел, за активности за регионална соработка


Брисел, 31 октомври, 2017 - 18:53 (META) 

Прв состанок на националните координатори на шест земји од Западен Балкан, меѓу кои и Македонија, за спроведување на Повеќегодишниот акциски план (ПАП) за регионален економски простор (РЕА), се одржа денеска во Брисел.

Повеќегодишниот акциски план беше усвоен на Самитот во Трст помеѓу Западен Балкан и ЕУ и се смета за клучен документ – патоказ за идната регионална соработка, а денешниот состанок беше во организација на Регионалниот совет за соработка (РСС) и на Коморскиот инвестициски форум на Западен Балкан.

Координаторите на планот, заедно со претставниците на РСС, на Европската Унија, на ЦЕФТА, на Светската банка и на ЕБРД, го разгледаа напредокот што е остварен во реализацијата на мерките кои се предвидени со планот, од самитот во Трст до денес.

Од страна на националните координатори, како што соопшти РСС, беа претставени и плановите за 2018 година, а воедно беше договорено преку контакт-лицата во секоја земја, извештаите да се испраќаат до секретаријатот на РСС, кој ќе биде одговорен за подготовка на извештаите за спроведување на планот.

Генералниот секретар на РСС, Горан Свилановиќ, истакна дека следните чекори на Советот предвидуваат олеснување на преговорите за меѓусебно признавање на стручните и академските квалификации, поттикнување на единствен роаминг-простор, организација на Дигиталниот самит заедно со Владата на Германија и со Европската комисија и други активности зацртани во планот, а кои се дел од регионалниот економски простор.

Бернард Брунет, шеф на оддел во Генералната дирекција за проширување во ЕК, ги поздрави претставниците на шесте земји и им порача дека може да очекуваат постојана поддршка од Европската Унија, како и поддршка од ЕК, РСС, ЦЕФТА и од други асоцијации кои ќе ги олеснуваат хоризонталните процеси поврзани со повеќегодишниот акциски план.


Заев: Заедничкиот настап на економски план ќе ги привлече инвеститорите во нашите земји


Драч, 26 август, 2017 - 14:38 (META) 

Еврокомесарот за проширување и добрососедска политика, Јоханес Хан денеска од албанскиот град Драч ја поздрави соработката меѓу земјите од Западен Балкан и порача дека очекува конкретизирање на активностите за реализација на Акцискиот план од Трст за олеснување на економската соработка меѓу државите.

– Сега клучен приоритет е да се изгради регионална економска област, да се зајакне економскиот раст и да се создадат работни места за граѓаните. Регионалната економска интеграција не е алтернатива на евроинтеграциите за земјите од Западен Балкан, туку само корисен додаток – оцени Хан.

Заменик претседателот на Светска банка за Европа и Централна Азија, Сирил Милер, ги поддржа напорите на земјите од Западен Балкан за зајакнување на економската соработка истакнувајќи дека тоа ќе придонесе кон подобрување на квалитетот на живот на граѓаните во државите.

Премиерот Зоран Заев истакна пораката од денешната неформална средба на премиерите на земјите од Западен Балкан е дека постои политичка посветеност за интензивирање и продлабочување на регионалната и економската соработка.

– Заедничкиот настап на економски план на државите од регионот пред Европа ќе значи создавање поголем пазар и поголем интерес за инвестирање во нашите држави, а со тоа и нови инвестиции и нови работни места на нашите граѓани – рече Заев.

Тој истакна дека земјите од Западен Балкан се насочени мир и заедничка иднина во евроатлантските интеграции.

– Нашите земји се пријателски и како пријатели мораме да си помагаме и заедно да градиме патишта кон ЕУ – рече Заев.

Неформалниот состанок во Драч се одвива во неколку работни сесии посветени на олеснување на движењето на луѓе и на стоки, транспортна ефикасност и предвидливост, трговската соработка, како и проекти кои треба да водат кон интеграција на Западен Балкан во ЕУ.


Заев и Ел Шинави разговарале за продлабочување на економската соработка


Скопје, 24 август, 2017 - 14:56 (META) 

Премиерот Зоран Заев, денеска се сретна со амбасадорката на Египет во Македонија во заминување, Манал Џеина ел Шинави.

На средбата разговарале за можностите и начините за продлабочување на економската и соработката во областа на туризмот помеѓу Македонија и Египет.

Двајцата соговорници договориле да се разгледаат законските можности и олеснувања, што би можеле да ги мотивираат бизнисмените за инвестиции во двете држави.

Ел Шинави денеска се сретна и со министерот за надворешни работи Никола Димитров кој и оддаде признание за придонесот во унапредувањето на билатералните односи за време на нејзиниот мандат.


Иванов – Иваниќ: Македонија и БИХ треба да ја интензивираат економската соработка


Скопје, 20 април, 2017 - 13:56 (META) 

Политичките односи меѓу Република Македонија и Босна и Херцеговина (БИХ) се одлични, но недостига поинтензивна економска соработка, на која мора да се работи во следниот период. Ова е задничката оценка на претседателот на Македонија, Ѓорге Иванов, и на претседавачот со Претседателството на Босна и Херцеговина, Младен Иваниќ, на денешниот бизнис-форум што се одржа во Скопје.

Иванов и Иваниќ посочија дека постои солидна основа за интензивирање на економската сораборка и изразија подготвеност за создавање правна рамка за зголемување на трговската размена меѓу двете држави.

Македонскиот претседател посочи дека статистичките податоци, кои покажуваат дека БИХ е дури 20-ти трговски партнер на Македонија, а трговската размена во 2016 година изнесувала 155,7 милиони долари, не соодветствуваат со високото ниво на политички, културни и општествени односи што постојат меѓу двете држави.

Во насока на продлабочување на економската соработка, Иваниќ изрази надеж дека наскоро ќе се овозможи патување од едната во другата држава со лична карта, отворање директна авионска линија меѓу Скопје и Сараево и заеднички настап на трети пазари на македонските и на компаниите од Босна и Херцеговина.

Во следниот период се очекува двете држави да потпишат договор за економска соработка и договор за соработка меѓу стопанските комори.

Во присуство на претседателот Иванов и на председавачот Иваниќ, денеска е потпишана и спогодба за соработка помеѓу Владата на Република Македонија и Советот на министрите на Босна и Херцеговина во процесот на пристапување во Европската Унија.


Иранскиот претседател во посета на Москва


Москва, 28 март, 2017 - 12:43 (META) 

Претседателот на Иран, Хасан Рохани, денеска во Москва ќе се сретне со рускиот претседател Владимир Путин, а глвна тема на разговорите, според најавите, треба да бидат војната во Сирија и економската соработка, јавуваат светските агенции.

Рохани, кој во својата прва посета на Москва пристигна вчеравечер, веќе имаше средба со рускиот премиер, Дмитриј Медведев. По состанокот тој изразил надеж дека неговата посета на Москва ќе биде пресвртница во билатераните односни меѓу двете земји.

Претседателите на Русија и на Иран, кои се главни сојузници на властите во Дамаск, ќе разговраат за регионалните прашања, особено за кризата во Сирија и за можните решенија за нејзино што брзо завршување, изјавил портпаролот на иранското министерство за надворешни работи, Бахрам Гасеми, во пресрет на посетата.

Тој истакнал дека Путин и Рохани ќе разговараат и за борбата против тероризмот и екстремизмот.

Претседателот на Иран, кој во Москва пристигнал со министерот за надворешни работи и министерот за нафта, ќе потпише десетина договори за економска соработка меѓу двете земји.


Ципрас утре во дводневна посета на Белград


Грчкиот премиер Алексис Ципрас утре ќе ја посети Србија и во фокусот на дводневната посета ќе биде зајакнување на билатералната, пред сè, економска соработка.

Ципрас во Белград ќе разговара со српскиот премиер, Александар Вучиќ, и со членовите на владата и ќе учествува на работен форум помеѓу Србија и Грција.

Пред посетата, тој изразил очекувања дека покрај интензивниот политички дијалог, ќе има и нов поттик за зајакнување на економската соработка, за што, како што оцени, има доста простор.

Покрај за економска соработка, грчкиот и српски премиер ќе разговараат и за приближување на Србија кон ЕУ и за ситуацијата во регионот.

Во интервју за денешна „Политика“, Ципрас изјави дека Грција ќе продолжи да ја поддржува Србија кон европскиот пат и ја гледа како клучна земја за Балканот.

Зборувајќи за соседите, изјави дека Грција има конкретни и цврсти надворешно-политички ставови при што активно се заложува за мир и за соработка, но истовремено непоколебливо ги чува своите суверени права врз основа на меѓународното право.

Една од темите на разговор би можеле да бидат и односите со Скопје.

За разлика од Грција, Србија ја призна Македонија под нејзино уставно име, но министерот за надворешни работи, Ивица Дачиќ, на почетокот на годината во интервју за агенцијата „Бета“ изјави дека Белград погрешил со таа одлука бидејќи ја налутил Грција, која, за разлика од Македонија, не ја признала независноста на Косово, а не го поддржала ниту влезот на Косово во УНЕСКО.

Ова е прва посета на Ципрас на Србија откако е избран за премиер, а во Белград бил во декември 2014 година како лидер на СИРИЗА, тогаш најголемата опозициска партија.

Грчки премиер кој последен ја посетил Србија беше Јоргос Папандреу на почетокот на јануари 2010 година.