Бизнис-форумот на Копаоник ќе се одржи од 4 до 7 март


Белград, 19 февруари, 2018 - 11:37 (META) 

Јубилејниот 25. бизнис-форум на Копаоник ќе се одржи од 4 до 7 март во хотелот „Гранд“. До сега присуството на овој форум го потврдиле преку 1.000 учесници, меѓу кои повеќе министри од владата на Србија, гувернерот на Народна банка на Србија, како и српската премиерка Ана Брнабиќ.

Од Македонија, за сега е познато учеството на бизнисменот Светозар Јаневски, кој ќе биде говорник на вториот ден од форумот, на тема „Западен Балкан – предизвици: Регионална економска област“.

Тема на годинашниот форум е „Што по фискална консолидација: Како да се претвори фискалната стабилност преку мерки на економска политика во одржлив раст и развој?“

Меѓу останатите, ќе учествуваат и Линда ван Гелдер, регионалната директорка на Светска банка за Западен Балкан, Питер Санфи, заменик директор за економија и политика за земјите при Европска банка за обнова и развој, Пол Томсен, директор на канцеларијата на Меѓународниот монетарен фонд (ММФ) за Европа и Шарлот Рух, директор на Европска банка за обнова и развој (ЕБРД) за Централна и Источна Европа.


НБРМ: Економијата закрепнува по падот во првата половина од 2017 година


Скопје, 14 февруари, 2018 - 18:08 (META) 

Економијата во четвртиот квартал од 2017 година закрепнала со подобро темпо во однос третиот, било заклучено на редовната седница на Комитетот за оперативна монетарна политика на Народна банка.

„Во однос на активноста во економијата, по падот во првата половина на 2017 година и умереното закрепнување во третиот квартал, во четвртиот има закрепнување со нешто подобро темпо. На ваква констатација посочуваат податоците за најновите остварувања во индустријата и трговијата, додека градежната активност продолжи да се намалува. Анкетните истражувања укажуваат на натамошно задржување на довербата на економските субјекти“, се вели во соопштението на Народна банка.

Во него се додава дека инфлацијата е во рамки на проекциите.


Бектеши – Бечај: Инвестициите се важни за економската соработка со Косово


Скопје, 14 февруари, 2018 - 15:58 (META) 

Министерот за економија, Крешник Бектеши денеска се сретна со министерот за иновации и претприемништво на Република Косово, Бесим Бечај. На средбата, министрите разговарале за економската соработка помеѓу двете земји, трговската размена и соработката на полето на инвестициите.

„Со мерките од Планот за економски раст на Владата, за соработката со Косово посебно очекуваме ефекти во делот на инвестиции што ќе биде од корист за двете земји“, изјави министерот Бектеши по средбата.

Тој го информираше својот косовски колега за проектот за изградба на автопатот Скопје – Блаце, за кој на последната владина седница бил презентиран Акционен план со утврдени термини за реализација.

Според проекциите активностите на оваа делница долга 12 километри треба да започнат во 2019 година, а да бидат финализирани до крајот на 2022 година. Бектеши додаде дека билатералната трговска соработка со Косово, минатата година била зголемена за 11,4 отсто.


Ердоган – Заев: Поддршка за добрососедските политики и за решавање на спорот со Грција


Анкара, 12 февруари, 2018 - 18:23 (META) 

Премиерот Зоран Заев и претседателот на Турција, Реџеп Таип Ердоган, на денешната средба во Анкара констатирале дека двете земји имаат потенцијал за унапредување на економската соработка преку зголемување на турските инвестиции како и преку нови иницијативи од страна на Македонија.

Ердоган ја поддржал иницијативата на Заев за зголемување на квотите за извоз на телешко и јагнешко месо во Турција и најавил дека овој став ќе го пренесе на Владата на Република Турција.

Од владата информираат дека Ердоган изразил поддршка и охрабрување на турските бизнисмени за инвестирање во Македонија.

„Претседателот на Турција Ердоган даде поддршка на добрососедските политики што ги води Македонија, го поддржа процесот за решавање на спорот со Грција и оцени дека е тоа добро за Балканот и за евро-атлантските перспективи на Република Македонија“, стои во владиното соопштение.

Претходно, Заев имаше средба со претседателот на турскиот парламент Исмаил Кахраман, со кој се согласил дека парламентарната соработка меѓу двете држави е важна и дека ќе придонесе кон определбата за зголемување на трговската размена меѓу Македонија и Турција на една милијарда евра.


Богов: Македонската економија подготвена за поголеми светски финансиски потреси


Скопје, 12 февруари, 2018 - 13:50 (META) 

Гувернерот на Народна банка, Димитар Богов, очекува намалување на буџетскиот дефицит, стабилизирање на јавниот долг и економијата во следниот период подготвено да ги дочека евентуалните турбуленции на светскиот пазар.

– Со искористувањето на поволниот амбиент за издавање на еврообврзницата се обезбедија финансиски средства до средината на следната година и на тој начин ќе се избегне периодот на нестабилност. Изминатите десет години работевме на зајакнување на инфраструктурата на банките и на финансискиот сектор – изјави Богов.

Според него, фактот што Европската централна банка (ЕЦБ) нема да ја зголеми референтната каматна стапка уверува дека ниту Народната банка нема да ја зголеми оваа стапка.

– Водиме сметка за случувањата во платниот биланс, фискалната политика и другите случувања во економијата и во зависност од ризиците ќе се знае дали оваа стапка ќе се намали, зголеми или ќе остане иста – додаде Богов.

Тој објасни дека светските финансиски пазари се пред нови предизвици поради нестабилната монетарна политика. Според Богов, Американската централна банка (ФЕД) и Европската централна банка (ЕЦБ), минатите години вбризгале огромно количество пари, за да се избегнат импликациите од светската економска криза.

Но, со стабилизирање на светската економија и со нејзиниот пораст во последните две години, најавеното повлекување на тие средства предизвикало реакција на светските финансиски пазари, како што беше падот на американската берза. А, токму ова е предизвикот со кој ќе се соочува светската економија следните години, смета Богов.


20 компании добија 80 милиони денари за иновативни проекти


Скопје, 8 февруари, 2018 - 18:20 (META) 

Дваесет домашни микро, мали и средни претпријатија кои аплицираа на два јавни повици од страна на Фондот за иновации и технолошки развој, денеска потпишаа договори во Владата за финансирање на иновативни проекти.

Вкупната вредност на овие договори изнесува 80 милиони денари, од кои 58 милиони денари се обезбедени од Владата во соработка со Светска банка.

„Иновациите и технолошкиот развој на компаниите ги поставивме како суштина на новите економски политики. Цврсто сме уверени дека токму иновациите и технолошкиот развој ќе бидат еден од генераторите на економскиот развој на земјата и причина поради која младите луѓе ќе ги задржиме да живеат и работат тука“, рече премиерот Зоран Заев.

Тој додаде дека од буџетот се обезбедени пари за финансирање иновативни проекти и решенија кои што ќе придонесат за намалување на загаденоста на воздухот во урбаните средини.


ВМРО-ДПМНЕ: Стандардот на граѓаните е загрозен, економскиот развој стагнира


Скопје, 4 февруари, 2018 - 15:51 (META) 

Претседателот на ВМРО-ДПМНЕ, Христијан Мицкоски заедно со потпретседателот, Владо Мисајловски и генералниот секретар, Игор Јанушев денеска се сретнале со претседателите на општинските комитети на ВМРО-ДПМНЕ. На состанокот, како што информираат од партијата, била разгледувана политичката состојба во државата, внатрепартиските состојби и активности, како и размена на мислења и сугестии за понатамошното делување.

Мицкоски посочил дека „стандардот на граѓаните е загрозен и дека владата демонстрира неспособност со справување на економските предизвици.“

„Нема никакви странски ниту поголеми домашни инвестиции, а економскиот развој целосно стагнира, што негативно се одразува врз економската моќ на граѓаните која е во надолен тренд“, се вели во соопштението на ВМРО-ДПМНЕ.

На состанокот било посочено дека „очекувањата на граѓаните се изневерени и дека постојат сериозни предизвици во повеќе сфери и области, вклучително и здравството, образованието, земјоделието.“

„Политичкиот прогон продолжува, а партискиот реваншизам по институциите станува основно средство за дејствување на власта“, со додава во соопштението.

Било истакното и дека „државата бележи застој и во реформските чекори врзани за евроатланските интеграции во клучните области: судството, борбата против корупцијата, медиумската сфера, економскиот сектор.“


Учеството во Давос беше плодотворно и успешно, оцени Заев


Давос, 26 јануари, 2018 - 16:39 (META) 

Премиерот Зоран Заев, учеството на македонската делегација на Светскиот економски форум во Давос го оцени како плодотворно и успешно, информираат од Владата.

„Политичките пријатели на Македонија и потенцијалните бизнис-инвеститори ни упатија јасна порака дека реформите се клучни за економски просперитет. Како што истакнуваат светските лидери, мораме да внимаваме на развојот на локалните заедници. Мораме да вложуваме во вештините на луѓето и да гарантираме безбедна работа дома. За тоа се зборува овде во Давос. За тоа ќе работиме и кај нас дома“, изјави Заев по завршување на Самитот во Давос денеска.

Тој додаде дека Форумот е од особено значење за државата, бидејќи по повеќегодишна изолација, политичките лидери на Македонија и на регионот повторно присуствуваа на глобалната економска и политичка сцена.

„Нашиот став тука е слушнат, Западен Балкан создава сплотена иднина во ЕУ и НАТО. Овде во Давос, земјите кои се во развој имаат уникатна можност да учат и да добијат инспирација од светските економски лидери, односно од оние кои го трасираат патот на развојот на светот. Интеграцијата на Македонија надвор, реформите и економските мерки дома, се клучни за развој и за внатрешен напредок на нашата држава“, додаде Заев.

Во рамките на Светскиот економски форум во Давос, тој се сретна со премиерите на државите од регионот како и со претставници од Европската банка за обнова и развој, Светска банка, „Мајкрософт“, „Филипс“ и со еврокомесарот, Јоханес Хан.


Стопанска комора на конференција во Тирана за иднината на Балканот во глобалната економија


Тирана, 24 јануари, 2018 - 10:11 (META) 

Претставници на Стопанската комора на Македонија ќе учествуваат на конференцијата „Иднината на Балканот – кон глобална вклученост“, која ќе се одржи денеска во Тирана.

На конференцијата, како што информираат од Комора, ќе се разговара за перспективите на институциите за глобална вклученост на земјите од Западен Балкан, за состојбите на пазарот на капитал во овие земји, но и за можностите за унапредување на прекуграничната соработка.

„Во рамките на последниот панел, кој ќе биде посветен на ктивностите на Коморскиот инвестициски форум, унапредување на деловниот амбиент во регионот и активно вклучување на бизнис-заедницата во Берлинскиот процес ќе учествува и националниот национален координатор на Коморскиот инвестициски форум во рамките на Стопанската комора на Македонија, Татјана Штерјова“, се вели во соопштението на Стопанска комора.

На конференцијата ќе учествуваат и претседателот на Албанија, Илир Мета, заменик-претседателот на Владата на Албанија, Сенида Меси, директорите на берзите од регионот, како и претставници на коморите од земјите од Западен Балкан.


Светска банка предвидува пораст на економијата од 3,2 проценти


Скопје, 10 јануари, 2018 - 17:52 (META) 

Светска банка предвидува пораст на економијата во Македонија од 3,2 проценти, во најновиот извештај Глобални економски перспективи за земјите од Европа и Централна Азија.

„По надминувањето на политичката криза, која имаше влијание врз економијата, главни проблеми остануваат невработеноста, фискалната консолидација и можноста за зголемување на фискалниот дефицит, поради најавените трошоци за инфрструктурни проекти“, се вели во извештајот на Светска банка.

Светска банка за 2019 година ни предвидува пораст од 3,9 проценти, а во 2020 од 4 проценти.