Потпишани договори во вредност од 5 милиони евра за прекугранична соработка со Грција


Скопје, 21 септември, 2018 - 16:54 (META) 

Министерот за локална самоуправа Сухејл Фазлиу денеска во Владата изјави дека до 2020 година, за проекти за прекугранична соработка помеѓу Македонија и Грција, од страна на Европската унија се обезбедени вкупно 45,5 милиони евра, од кои 50 отсто за проекти кои што ќе бидат имплементирани во Македонија.

Средствата за национално кофинансирање ги обезбедува Министерството за локална самоуправа од буџетот на државата.

Денеска во Владата, Фазлиу и подносителите на проекти потпишаа договори за кофинансирање. Меѓу носителите на проектите се и јавни здравствени установи, Царинската управа, Центарот за управување со кризи, општини, Центарот за развој на југоисточниот плански регион, граѓански организации. Индиректни корисници се граѓаните од четири плански региони во Македонија и од пет региони од Грција.

– Во овој повик имаме на располагање 15 милиoни евра од Европската унија и 2,4 милиони евра, обезбедени од буџетот на државата, преку Министерството за локална самоуправа, за национално кофинансирање. На овој начин државата им помага и ги охрабрува потенцијалните апликанти: општини, граѓански организации, училишта, детски градинки, универзитети, болници, асоцијации и други непрофитни субјекти, да подготват проекти, да влезат во конкуренција и да обезбедат средства од Европската унија. Сите апликанти што обезбедија средства за финансирање на проектите, си помагаат на себе и на локалната заедница. Во исто време се реализираат приоритетни прашања, без да се трошат средства од општинските буџети – изјави Фазлиу.

Градоначалникот на Гевгелија, Сашо Поцков, изјави дека Општина Гевгелија досега има реализирано 10 проекти од Програмата за прекугранична соработка со Грција, во вкупна вредност од два милиони евра.

Со реализација на проектите, Царинската управа ќе добие нова опрема, со која ќе ја подобрува функционалноста и ефикасноста на граничните премини, а ќе се обезбеди енергетска ефикасност во училиштето во Валандово, во детската градинка во Радовиш.


Хан: Ако сега не ја искористите приликата, вратата на ЕУ ќе остане затворена со децении


Брисел, 14 септември, 2018 - 10:42 (META) 

Европскиот комесар за проширување и соседска политика Јоханес Хан во интервју за МИА вели дека ако референдумот не помине, ако нема договор со Грција, Македонија ќе биде блокирана, има ризик од изолација и која дефинитивно ќе го забави економскиот и социјалниот развој на земјата.

„Работиме на тоа земјата да стане полноправна членка на ЕУ, но не се работи за зачленување во ЕУ туку за подобрување на условите за живот на граѓаните, да се има перспектива да се остане во земјата, да не мора да заминуваат од земјата. Не би требало во 21 век целта на една земја да зависи од дознаки и слично. Идејата е да се создаде нешто повеќе ако има европска перспектива, членство, тоа ќе привлече меѓународни компании, компании кои ќе создаваат работни места, ако има повеќе индустрии во земјата тоа влијае врз мали и средни претпријатија бидејќи тие се  добавувачи, и се заедно е стимулирачки за економијата. Ако економијата е меѓународно ориентирана, тоа влијае врз квалитетот на владеењето на правото, независноста на судството и за крај мислам дека е нешто што го бараат луѓето“, вели Хан кој во понеделник ќе ја посети Македонија.

Тој исто така вели дека „разбира дека никој не е задоволен, ниту кај нас ниту во Грција, но треба да се премери што значи да се стане членка на ЕУ и кои се последиците ако тоа не е возможно.“

„Бидејќи ако сега не се искористи оваа прилика, прилично сум сигурен дека вратата ќе биде затворена со децении, ако не засекогаш. Во политика треба да се биде внимателен, но во догледна иднина, ќе биде затворена и тоа ќе биде штетно за граѓаните во земјата“, додава Хан.


Бизнис-заедницата смета дека е добро што ќе се одложи прогресивното оданочување


Скопје, 13 септември, 2018 - 12:18 (META) 

Денеска, четирите стопански комори, потписници на Платформата за јавно-приватен дијалог: Стопанска комора на Македонија, Стопанска комора за информатички и комуникациски технологии – МАСИТ, Стопанска комора на северозападна Македонија и Сојуз на стопански комори на Македонија испратија официјален допис до Министерството за финансии со што го поздравија одложувањето на најавената даночна реформа за прогресивно оданочување.

„Во текот на изминатите неколку месеци членовите на Платформата спроведоа заедничко истражување на 546 домашните претпријатија и организираа две фокус групи по однос на ставот за прогресивното оданочување и последиците кои истиот ќе ги донесе врз развојот на македонската економија. Анализата на резултатите јасно го истакна ставот на бизнис заедницата дека доколку прогресивното оданочување се реализира, во моментов истото би имало негативни последици врз целата бизнис заедница. Согласно направеното истражување, при изработката на официјалниот позиционен документ стопанските комори вертикално се усогласија во сите структури и го изразија својот став по однос на ова прашање“, велат од таму.

Тие бараат одложување на оваа даночна реформа за пет години. Од таму сметаат дека прагот за кој даночните обврзници се спремни да ги плаќаат даноците е прилично низок и зголемување на стапките ќе предизвика дестимулирачки ефект во економијата или со други зборови ќе ја поттикне даночната евазија.

„Подобро е со постоечките механизми да се поттикнат економските оператори да не прават затајување на данок, односно да ги плаќаат сите даноци, наместо да манипулираат со средствата“, се вели во Позициониот документ изработен од страна на коморите.

Оваа активност е дел од Проектот  „Партнерство за подобра бизнис регулатива“ финансиран од страна на УСАИД а имплементиран од Епи центар Интернационал во партнерство со четирите стопански комори.


Ангеловска-Бежоска: Очекувам заживување на економијата и на кредитната активност


Скопје, 7 септември, 2018 - 13:30 (META) 

Гувернерката на Народна банка, Анита Ангеловска-Бежоска оцени дека по забавените банкарски активности во претходните две години, оваа година се гледа забрзување на активноста на банкарскиот систем, што може да се согледа преку порастот на депозитната база, но и преку кредитната активност.

–  Во минатите две години бевме сведоци на прилично забавена кредитна активност која не беше одраз на економски фундаменти, туку на неизвесност. Со постепено стабилизирање на состојбите, се гледа заживување и ние очекуваме преку мерките да се обезбеди стимул и интензивирање на кредитната активност до крајот на годината – рече Ангеловска Бежоска.

Во врска со порастот на домашниот бруто-производ од 3,1 процент, гувернерката рече дека тоа е под проекцијата на Народна банка на пораст од 4,1 процент во вториот квартал, но сепак укажува на позначајни поместувања кај економската активност.

За остварување на растот од 3,2 проценти на годишно ниво, Ангеловска-Бежоска потенцираше дека зависи што ќе се случува следниот период. Таа додаде дека имало потфрлање во сегментот на инвестициите и клучна точка понатаму ќе биде ревитализација на инвестициониот циклус во економијата.

Министерот за финансии Драган Тевдовски рече дека добрите движења во финансискиот се пресликани и во реалниот сектор.

– Одлично е што економијата се движи во позитивна насока. Сите макроекономски индикатори тоа го укажуваат. Во првата половина индустриското производство има пораст пет проценти. Кај извозот имаме сериозно позитивно движење од 14 проценти. Странските директни инвестиции во првата половина се 325 милиони евра, двојно повисоко од просекот од претходните три години. Стапката на невработеноста е намалена од 21,6 на 21, 1 проценти. Имаме пораст на платите од 5,6 проценти. Приходите во буџетот се согласно нашите проекции, имаме ликвидност и обврските ги извршуваме во најкус можен рок. Повратот на ДДВ на фирмите е рекорден во август, најголемо враќање на месечно ниво во последните пет години, и изнесува 2,7 милијарди денари – рече Тевдовски.

На новинарско прашање во врска со падот на бруто-инвестициите и градежништвото Тевдовски додаде дека има простор за подобрување, за во наредните квартали да се обезбеди раст и во тие сектори.

За бавната реализација на капиталните инвестиции над 300 милиони евра, министерот за финансии подвлече дека во втората половина ќе дојде до забрзување на реализацијата.

Тевдовски рече дека не се очекува ребаланс на буџетот и дека државата има капацитет да се достигне проектираниот пораст од 3,2 проценти.

Комитетот за финансиска стабилност констатирал дека лани финансиската стабилност на целиот систем се одржувала во адекватни рамки.


„Фич“: Референдумот е голем тест за Владата и кредитниот рејтинг на Македонија


Њујорк, 7 септември, 2018 - 12:48 (META) 

Македонија одамна е влезена во цикличен процес на задолжување за раздолжување бидејќи без нови кредити односно издавање обврзници буџетот на државата би бил неликвиден и би немало доволно пари за исплата на законски задолжителните расходи какви што се пензиите, платите во администрацијата и социјалните бенефиции. Затоа, битна улога за финансиската кондиција на државната каса има кредитниот рејтинг на државата и остварувањата на критериумите по кои меѓународните кредитни агенции го одредуваат рејтингот од кој пак зависи која цена односно камата ќе ја плаќаат македонските граѓани за новите задолжувања на Владата на меѓународниот пазар.

Еден од најважните критериуми кој го користат рејтинг агенциите е политичката стабилност. Тоа го потенцираат и од една од најголемите меѓународни рејтинг агенции „Фич“. На прашањата какво влијание имаат евринтегративните процеси врз кредитниот рејтинг на една земја и дали може се очекува позитивен инпакт врз македонскиот кредитен рејтинг доколку граѓаните на претстојниот рефрендум изгласаат промена на името во Северна Македонија и зачленување во НАТО и ЕУ, од „Фич“ упатуваат на последниот извештај за Македонија објавен во јули, годинава каде што се одредени и клучните фактори за рејтингот на земјата. Тогаш, „Фич” го потврди рејтингот на Македонија ББ, со позитивен изглед.

Dolg_bdp_0

„Позитивниот изглед го одразува постабилното политичко окружување, кое резултира со повисока економска доверба, пренасочувањето на политиките кон членство во ЕУ и подобрените меѓународни односи“, се вели во извештајот на Фич.

Во него се укажува дека напредок е нотиран и кај фискалната транспарентост, чекорите за подобрување на деловниот амбиент за малите и средните претпријатија, прашањето околу името, одлуката на Советот на ЕУ за преговори за членство во јуни 2019, како и формалната покана од НАТО за зачленувањето на Македонија по решавањето на спорот. Во агенцијата нагласуваат дека успешно решение на спорот за името бара и промена на македонскиот устав за што ќе се одржи референдум.

„По мислењето на „Фич“, резултатите од референдумот носат несигурен политички исход. Ова ќе биде голем тест за Владата на СДСМ која се соочува со силна опозиција од поранешната владејачка партија националистичката ВМРО-ДПМНЕ“, пишува во извештајот.

Dolg_evra_0

Од „Фич“ потенцираат дека главните ризик-фактори кои индивидуално или колективно би можеле да доведат до подобрување на кредитниот рејтинг на Македонија се подобрување на стандардите на управување и понатамошно намалување на политичките ризици, како на пример низ подолгорочна политичка стабилност, имплементација на клучните институционални реформи и прогрес кон зечленувањто во ЕУ и краткорочна фискална консолидација со стабилизација на на јавниот долг како дел од БДП.

foto brit emb foto uk gov Овој текст е подготвен во рамките на проектот „Поддршка на демократските вредности и промени во општеството преку новинарството“ финансистан од Владата на Обединетото Кралство, со поддршка на Британската амбасада во Скопје. Мислењата и ставовите наведени во оваа содржина не ги одразуваат секогаш мислењата и ставовите на Британската амбасада/Британската Влада.


СДСМ: Растот на БДП од 3,1 отсто ја потврдува успешноста на владините економски политики


Скопје, 7 септември, 2018 - 9:32 (META) 

Растот на домашниот бруто-производ БДП од 3,1 отсто во вториот квартал ја потврдува успешноста на владините економски политики и позитивното влијание на интеграциите во ЕУ и НАТО, се вели во соопштението на СДСМ.

Од таму додаваат дека „придвижувањето на процесот на интеграција на Македонија во ЕУ и НАТО позитивно влијае врз економијата.“

„Таквиот процес дополнително ќе се интензивира по влезот во НАТО и по започнување на пристапните преговори за членство во ЕУ. Со влезот во ЕУ, Македонија станува дел од пазар од 500 милиони потрошувачи, македонската економија станува поконкурентна, се отвораат можности за повеќе инвестиции, нови работни места и засилен економски раст.Имајќи предвид дека во последниот квартал од владеењето на ВМРО-ДПМНЕ во 2017 економијата бележеше пад од 1,3 отсто, за нешто повеќе од една година, Владата предводена од СДСМ со успешните економски политики успеа да ја стабилизира економијата и да ја придвижи во вистински правец“, се додава во соопштението.

Од ВМРО-ДПМНЕ пак велат дека економијата повеќе од 15 месеци тоне, нема реален напредок, а граѓаните се се посиромашни.

„Единствена светла точка се странските инвестиции, кои дојдоа во државата и отворија голем број на работни места благодарение на добрите политики на ВМРО-ДПМНЕ“, велат од таму.


Економијата закрепнува, пораст од 3,1 процент на БДП во вториот квартал


Скопје, 6 септември, 2018 - 17:14 (META) 

Стапката на пораст на бруто-домашниот производ (БДП) за второто тримесечје од 2018 година е 3,1 проценти, објави Државниот завод за статистика.

Финалната потрошувачка на домаќинствата, вклучувајќи ги непрофитните институции кои им служат на домаќинствата, во второто тримесечје од 2018 година, номинално расте за 3,2 проценти, а нејзиното учество во структурата на БДП изнесува 69,6 проценти.

Во истиот период, извозот на стоки и на услуги номинално се зголеми за 13 проценти, а увозот на стоки и на услуги забележа зголемување во номинален износ од 6,6 проценти.

БДП во првиот квартал годинава, имаше пораст од само 0,1 процент.


ЕУ: Зајакнување на трговијата со Иран е клучна за спроведување на договорот


Велингтон, 7 август, 2018 - 13:19 (META) 

Високата претставничка на Европската унија за надворешна политика и безбедност, Федерика Могерини изјави денеска дека ЕУ ги охрабрува компаниите да развиваат бизнис со Иран, бидејќи таа земја ги исполнува условите за примена на договорот за нуклеарно оружје.

Могерини, која е во посета на Нов Зеланд, изјави дека ЕУ вложува напори иранскиот народ да има економски бенефит кој го носи примената на договорот, бидејќи е во интерес на регионот и на целиот свет, пренесуваат светските медиуми.

Американскиот претседател, Доналд Трамп во мај одлучи да се повлече од договорот, а синоќа потпиша указ за повторно воведување на санкции кои денеска стапија на сила.

Првата фаза од санкциите подразбира блокада на финансиските трансакции, увоз на сировина како и казнени мерки во секторите за купување на автомобили и авиони. Втората фаза на санкции, кои ќе стапат на сила во ноември, ќе ги погоди нафтениот сектор и иранската централна банка.

ЕУ вчера изрази жалење поради повторното воведување на американски санкции, но очекува од Иран да продолжи во потполност да ги спроведува обврските преземени во рамките на договорот за нуклеарно оружје.


ВМРО-ДПМНЕ: Владата имаше доволно време да ги ревидира проектите, ако имало потреба


Скопје, 31 јули, 2018 - 13:30 (META) 

За катастрофалната реализација на капиталните инвестиции од 16,65 проценти мора да има одговорност, се вели во реакцијата на ВМРО-ДПМНЕ на прес-конференцијата на вицепремиерот за економски прашања Кочо Анѓушев.

Од таму додаваат дека „оправдувањата дека проектите наводно не чинеле се банални и смешни, бидејќи владата на СДСМ ја има власта повеќе од една година и имаше доволно време да ги ревидира, доколку навистина била потребна корекција.“

„Растот на индустриското производство е уште еден доказ за добрите економски политики на ВМРО-ДПМНЕ и ефектите од креирањето бизнис клима во која што странските инвеститори би биле мотивирани да работат во ТИРЗ. Обидот на Кочо Анѓушев да ја покрие неспособноста на владата со растот на индустриското производство во ТИРЗ е уште една манипулација на СДСМ“, се додава во соопштението.


Анѓушев: Референдумот нема позначајно да влијае на економскиот раст на државата


Скопје, 31 јули, 2018 - 12:19 (META) 

Вицепремиерот за економски прашања Кочо Анѓушев денеска на прес-конференција рече дека растот на индустриското производство од 12,1 отсто во јуни во однос на истиот месец лани и растот на просечната плата забележан во мај покажуваат дека економските политики на Владата се добри и оти даваат резултати на долг рок.

Тој додаде дека економијата се мери со бројки, а не со политизирање и потребно е, како што рече мало трпение на граѓаните и бројките ќе си дојдат сами по себе.

Во однос на малиот процент на реализација на капиталните инвестиции од околу 16 проценти, Анѓушев рече дека во првите шест месеци има мал застој во реализацијата, но додаде дека е оптимист и смета дека до крајот на годинава ќе се реализираат 90 отсто од планираните инвестиции.

– Малиот застој се должи на тоа што е потребно проектите да се доведат до нормално техничко ниво за да не ни се случуваат непотребни анекси – рече Анѓушев и додаде дека реализацијата на капиталните инвестиции кај државните компании е многу повисока.

Анѓушев не очекува референдумот значајно да влијае на реализацијата на капиталните инвестиции, бидејќи како што рече, предвидено е да ја чини државата околу 3,5 милиони евра, а тоа е помалку од еден отсто од планираните 400 милиони евра за капитални инвестиции.

– Сите политички случувања, па и референдумот негативно влијаат на економијата, но ценам дека нема позначајно да влијае на економскиот раст на државата – рече Анѓушев.

Нагласи дека референдумот се организира со цел Македонија да се придвижи кон евроатланските интеграции, а токму тоа, како што кажа, значи и поголеми инвестиции во земјата и економски раст на државата и се темели на искуството на сите држави кои се приклучиле кон ЕУ и НАТО.

На новинарско прашање во однос на конфликтот на интереси поврзан со компаниите во кои тој е дел од сопственичката структура, Анѓушев рече дека не се битни тие компании.

 -Нема никаков конфликт на интереси и заобиколување на законите. Престана делењето пари зад затворени врати и класифицирани договори. Компаниите кои ги задоволуваат законските критериуми имаат право да аплицираат. Сепак овие компании се повлекоа не поради конфликт на интереси, туку затоа што сензитивноста кај јавноста е голема после подолг период. Не се битни тие две компании, ако се проблем нема да аплицираат. Треаба да гледаме што е добро за целата економија. Бројките покажуваат дека целата економија се раздвижува – рече Анѓушев.