Еко герила: „Југохром“ ќе се рестартира без филтри, ни се закануваат за да молчиме


Тетово, 2 јули, 2018 - 14:07 (META) 

Движењето Еко герила денеска алармираше дека во изминатите денови различни поединци им испраќаат пораки, заедно со финансиски понуди, за да го замолчат движењето да не реагира на новиот обид да се рестатира металуршкиот комбинат „Југохром“ без соодветни филтри.

„За ова е известена полицијата и денес баравме директна средба со премиерот Зоран Заев за да го информираме за овие закани и уцени. Исто така, информацијата ќе ја споделиме и со амбасадите и организациите кои не поддржаа во нашата мисија за почиста животна средина, како и институциите на Европската Унија во Брисел, кои на нашата држава и поставија услови за започнување на преговорите: правната реформа, борбата против корупцијата и организираниот криминал и функционирањето на владеењето на правото“, велат од Еко герила.

Од движењето велат дека обидите да се рестартира комбинатот додека во него уште се одвива монтирањето на филтрите се неприфатливи.

„Сакаме да се потсетиме дека имавме уште поголеми предизвици со претходната влада, и не се повлековме, а камоли сега. Валканите игри со мафијашки тенденции, не само што нема да нè спречат, туку напротив, само нè мотивираат да не се откажуваме од нашата мисија. Граѓанската реакција ќе биде многу остра за секоја уцена од Југохром или од одредени кругови во Владата“, соопштуваат од движењето.

Велат дека според официјалните мерења на Министерството за животна средина комбинатот предизвикува 60% од вкупното загадување во Тетово и околината.

„Југохром треба да го плати скапо труењето на тетовчаните, бидејќи бројот на болни деца беше двојно повисок додека работеше оваа фабрика. Во 2015 година, кога работел „Југохром“, овој број изнесувал 31.446 случаеви, додека во 2017 година кога не работел овој број се намалил на 18.578 случаеви“, велат еко-активистите.


Екологистите повторно протестираа за Пирин, бугарскиот министер доби „туш“ во ЕП


Софија, 26 јануари, 2018 - 16:31 (META) 

Екологистите во Софија и во 16 други градови во Бугарија и во 11 градови на светот протестираа против одлуката на бугарската влада од крајот на минатата година да дозволи градежни активности во 48% од територијата на Националниот пак „Пирин“ и побараа оставка од бугарскиот министер за животна средина и води, Нено Димов.

Екологистите вчера покрај оставка на Димов, побараа и измена на законското решение.

Димов пак вели дека не станува збор за дозвола за пренаменување на 48 отсто од територијата на Националниот парк „Пирин“ во градежна зона, туку само на 2 отсто од неговата територија, а новиот ски лифт ќе бил само минорен дел од тие 2 отсто.

Бугарскиот министер за животна средина и води, Димов, утрово ги нарече демонстрантите неинформирани, а нивните протести против дозволата за проширување на зимскиот центар Банско политички.

– Протестите против втор ски лифт во Банско се политички – голем дел од луѓето веројатно немаат поим за што точно протестираат – рече Димов во емисијата „Здраво Бугаријо“ на бугарската телевизија Нова, пренесе агенцијата „Фокус Њус“.

Тој вели дека според новите законски одредби менувањето на легислативата за Националниот парк „Пирин“ дава само можност инвеститорите да изразат намера за градење, а потоа ќе мора да се направи специјализиран градежен план што ќе биде подложен на еколошка оценка.

Димов, како што посочи новинарот Дејв Китинг во рубриката за мислења на веб-сајтот на американскиот магазин „Форбс“, е негатор на теоријата за глобално затоплување, а до крајот на јуни годинава ќе раководи со Советот за животна средина на ЕУ. Тоа предизвикало згрозување завчера, кога давал отчет пред Европскиот парламент.

– Вие лично се прашувате дали има климатски промени и дали во прашање се активностите на човештвото, а дури и оспоривте дека има пораст на океаните и морињата – обвинил Гербен Јан Гербранди, либералниот европарламентарец од Холандија, по што неговите колеги побараа Димов јасно да ги искаже своите ставови.

Бугарскиот министер за животна средина и водите на тоа само кусо одговорил дека нема да го искаже својот став за климатските промени и наместо тоа напомена дека има политички консензус во ЕУ за климатските промени, а тој ќе го одржува „консензусот во живот“.

Од Лондон преку Софија до Сиднеј, на 4, 11, 18 јануари и вчера во голем број градови во Бугарија и во светски метрополи, илјадници луѓе маршираа на протести против најновите законски измени донесени во Бугарија со кој значително ќе се намали територијата на националниот парк „Пирин“ за сметка на зимскиот центар „Банско“, инаку многу популарна дестинација и меѓу македонските граѓани.

imgpsh_fullsize

Протестите за заштита на Националниот парк „Пирин“ се најголемата граѓанска мобилизација и протестна активност во Бугарија од антивладините протести во 2013 година.

За разлика од екологистите, жителите на Банско и на регионот се поддржувачи на идејата за проширување на зимскиот центар, бидејќи најголемиот извор на приходи за градот и блиската околина.


Бујароска: Од Владата очекувавме повеќе против загадувањето


Скопје, 14 јануари, 2018 - 16:29 (META) 

Посериозно почна да се решава проблемот со загадувањето, но не со брзината со која очекувавме да се остварат барањата нa еколошките организации, вели Александра Бујароска од Фронт 21/42, во неделното интервју на Радио Слободна Европа.

За печката за медицински отпад на депонијата „Дрисла“ таа вели дека во времето кога е инсталирана одговарала и на европските норми, но проблемот е што цели 17 години не е направена нејзина преправка за да одговара на нормите.

-Во 2001 кога оваа печка е дел од системот на Дрисла, важеле малку поинакви правила во однос на животната средина. Она што е важно е дека од 2005-2006, со усогласување на нашето законодавство со законодавството на Европската унија, оваа инсталација имала обврска да ја усогласи својата технологија со најдобрите технологии од областа на согорување на отпадот. Уште во 2013 е издадена дозволата за усогласување со оперативен план, односно еколошка дозвола. Тоа што е страшно е што од тогаш до денес операторот, односно сопственикот на Дрисла не исполни ниту една од мерките за намалување на загадувањето – вели Бујароска.

Таа вели дека не се одвиваат според очекувањата владините чекори за подобра животна средина.

-Можам да кажам дека посериозно почна да се решава проблемот, но сепак не со онаа брзина и со остварување на оние барања што ние ги имавме како граѓански сектор генерално, и не зборувам само за нашата организација, туку и за другите кои дадоа придонес за решавање на проблемот со загадувањето, ние очекувавме многу повеќе – вели Бујароска.


Градоначалниците да подготват проекти за гасифицирање на општините


Скопје, 2 јануари, 2018 - 17:08 (META) 

Градоначалниците да подготват проектна документација за гасификација на општините и да одлучат дали сами ќе инвестираат, дали ќе најдат инвеститори или тоа ќе го сторат преку јавно-приватно партнерство, порача премиерот Зоран Заев на денешната прес-конференција во Министерство за финансии.

Прашан за гасификацијата на Скопје, Заев додаде дека има гасоводна цевка до градот, но дека нејзината искористеност е од 15 до 20 проценти.

-Ги мотивирам градоначалниците да почнат со изготвување на проектна документација. Има главна гасоводна мрежа, но општините мора да имаат главни проекти. Некои од градоначалниците веќе доставија планска документација – рече Заев.

Тој додаде дека гасификацијата е многу важна од економски и еколошки аспект, а за неа во буџетот се предвидени 35 милиони евра.


Од утре, секој викенд на Водно без автомобили


Скопје, 24 ноември, 2017 - 16:05 (META) 

Најавената забрана за движење возила на патот до Средно Водно ќе се воведе викендов, соопшти скопскиот градоначалник Петре Шилегов.

Според планот, забраната ќе биде од 9 до 16 часот, а ќе важи од клучката за Сопиште и од манастирот „Свети Пантелејмон“ до Средно Водно. Ќе биде на сила за време на викендите и на државните празници, а се однесува на сите возила освен на тие на ЈСП, полицијата, пожарникарите, брза помош и на штабовите за итни интервенции.

Истовремено со воведувањето на забраната, Град Скопје воведува две нови пробни автобуски линии со броевите 25а и 25б. Тие ќе сообраќаат од своето поаѓалиште без застанување, сè до Средно Водно. Едната автобуска линија ќе тргнува пред катната гаража на улицата Свети Кирил и Методиј, а втората ќе тргнува од паркиралиштето кај Цветниот пазар.

На почетокот, возењето ќе биде бесплатно, а Град Скопје ќе овозможи бесплатно паркирање на двете поаѓалишта на овие автобуски линии.

Покрај новите линии, граѓаните може да ја користат и редовната линија со број 25, со која возењето исто така ќе биде бесплатно во наредниот период.


Од викендот следната седмица, Водно ќе биде без автомобили


Скопје, 17 ноември, 2017 - 16:02 (META) 

Најавената забрана за движење возила на патот до Средно Водно ќе се воведе од наредниот викенд, односно 25 и 26 ноември 2017 година, извести Град Скопје.

Според планот, оваа забрана ќе важи во еден правец, од клучката за Сопиште до Средно Водно и од паркиралиштето кај манастирот „Свети Пантелејмон“ до Средно Водно. Ќе биде на сила во викендите и на државните празници, а се однесува на сите возила освен на тие на ЈСП, полицијата, пожарникарите, брза помош и на штабовите за итни интервенции.

Истовремено со воведувањето на забраната, Град Скопје воведува две нови пробни автобуски линии со броебите 25а и 25б. Тие ќе сообраќаат од своето поаѓалиште без застанување сè до Средно Водно. Едната автобуска линија ќе тргнува пред катната гаража на улицата Свети Кирил и Методиј, а втората ќе тргнува од паркиралиштето кај Цветниот пазар.

Покрај новите линии, граѓаните може да ги користат и двете постојни, со броевите 25 и 28.


Коце Трајановски вети 20 електрични автобуси


Скопје, 3 октомври, 2017 - 14:46 (META) 

Актуелниот градоначалник на град Скопје и кандидат за оваа функција на престојаните локални избори, Коце Трајановски, денеска на прес-конференција најави дека доколку повторно ја добие функцијата, ќе набави 20 нови двојни електрични автобуси што не го загадуваат воздухот.

– Предвидуваме неколку мерки за модернизација на возилата на сите кои учествуваат во системот на јавниот сообраќаен превоз во Скопје. Првата мерка е набавка на 20 нови двојни (хармоника) електрични автобуси, кои се еколошки и не го загадуваат воздухот. Со втората мерка, првпат ќе ги вклучиме и приватните превозници во автобускиот сообраќај и ќе доделуваме до 10.000 евра за купување автобуси со стандард „еуро 5“ и „еуро 6“ или за поставување уреди на гас во автобусите. Со третата мерка ги опфаќаме и автотакси-превозниците во Скопје, на кои ќе им доделуваме субвенции во износ до 3.000 евра за купување електрични возила – рече Трајановски.

Тој додаде дека со реализацијата на овие проекти ќе се добие нов модерен јавен превоз, кој е еколошки и не го загадува воздухот, а со тоа и директно ќе се влијае во насока на намалување на загадувањето на воздухот.


Скопјани денеска ќе протестираат за чист воздух


Скопје, 21 септември, 2017 - 11:41 (META) 

Коалицијата О2 за чист воздух и Првата детска амбасада во светот „Меѓаши“ денеска ќе го одбележат светскиот ден на мирот (21 септември) со мирен марш за право на чист воздух.

Маршот, како што е најавено, ќе почне пред Владата во 17 часот, по што ќе продолжи по булеварот Илинден, а на булеварот 8 Септември, граѓаните ќе се спојат со здруженијата од Карпош, кои претходно ќе одржат протест пред Општина Карпош.

Здруженијата велат дека проблемот со загадениот воздух сериозно треба да го сфатат како централната, така и локалната власт и бараат нивните предлог-мерки да бидат вградени во изборните програми на кандидатите за градоначалници.

– На прагот на зимата сме, сите вредности за загаден воздух ќе скокнат драматично, а потоа ќе биде предоцна да реагираме. Последиците се чувствуваат во сите поголеми градови, во Скопје, Тетово, Битола. Срамно е за државата, од 10 најзагадени градови во Европа три да се во Македонија – вели Ели Пешева од Коалицијата О2.

Како причинители за загадувањето здруженијата ги наведуваат работата на индустриските капацитети без филтри и непочитување на пропишаните законски процедури, намалување на урбаното зеленило, лошото управување со отпадот.

Тие велат дека новата Влада покажала интерес за решавање на оваа проблематика.


Светскиот ден на мирот утре граѓаните ќе го одбележат со протест за чист воздух


Скопје, 20 септември, 2017 - 12:55 (META) 

Светскиот ден на мирот (21 септември), Коалицијата О2 за чист воздух и Првата детска амбасада во светот „Меѓаши“ ќе го одбележат со мирен марш за право на чист воздух.

Маршот ќе почне пред Владата со почеток во 17 часот, ќе продолжи по булеварот Илинденска и на булеварот 8 Септември, граѓаните ќе се спојат со здруженијата од Карпош, кои претходно ќе одржат протест пред Општина Карпош.

Здруженијата порачаа дека проблемот со загадениот воздух сериозно треба да го сфатат како централната, така и локалната власт. Тие ќе бараат нивните предлог-мерки да бидат вградени во изборните програми на кандидатите за градоначалници.

– На прагот на зимата сме, сите вредности за загаден воздух ќе скокнат драматично, а потоа ќе биде предоцна да реагираме. Последиците се чувствуваат во сите поголеми градови, во Скопје, Тетово, Битола. Срамно е за државата, од 10 најзагадени градови во Европа три да се во Македонија. Се зголемува бројот на заболени деца и на возрасни, но и на смртни случаи како последица на загадениот воздух – вели Ели Пешева од Коалицијата О2.

Меѓу мерките што здруженијата ги предлагаат е и усогласување на регулативата со меѓународната. Исто така, бараат одговорност за загадувачите, зголемување на свесноста на граѓаните, здрави животни навики, алтернативни решенија за чист воздух, санација на критични извори на загадување, кои иако не работат, загадуваат, како ОХИС и Топилница во Велес. За РЕК Битола бараат затворен систем на отпрашување, а посочуваат дека индустриските капацитети треба да се градат најмалку 10 километри надвор од населените места.

Како причинители за загадувањето ги наведуваат работата на индустриските капацитети без филтри и непочитување на пропишаните законски процедури, намалување на урбаното зеленило, лошото управување со отпадот.

Предлог-мерките кои се итни, среднорочни и долгорочни тие ги доставиле до Министерство за животна средина и до Владата, а ќе ги достават и до кандидатите за градоначалници.

– Долг и бавен е процесот за менување на свеста. Ако сега се почне, резултати ќе има за пет години. Потребна е соработка со локалната и со централната власт. Без оглед на разликите, чистиот воздух и здравата животна средина се прашање на здравје и од заеднички интерес за сите – додава Пешева.

Драги Змијанац од „Меѓаши“ изјави дека децата се ранлива група, така што сè поголем е бројот на оние со респираторни заболувања.

Тој додаде дека утре основните и средните училишта ќе се вклучат во акцијата за подигнување на еколошката свест кај децата.

Граѓанските здруженија велат дека новата влада покажала интерес за решавање на оваа проблематика.


На владина седница ќе се расправа за дислокацијата на тетовската депонија


Скопје, 30 јуни, 2017 - 18:00 (META) 

Се работи на решение за дислокација на депонијата во Тетово и тоа прашање наскоро ќе се најде на владина седница. Што се однесува до комбинатот „Југохром“,  прашањето ќе се решава со писмени гаранции за преземени обврски од сите засегнати страни.

Тоа премиерот Зоран Заев на денешната средба, на која биле и вицепремиерот Кочо Анѓушев и министерот за животна средина и просторно планирање, Садула Дураку, им го соопштил на претставници од невладината организација „Еко-герила“ од Тетово, соопшти Владата.

Заев, зборувајќи за „Југохром“, кој сега не работи поради ненавременото решавање на проблемот со загадувањето, односно непоставување филтри, рекол дека при наоѓање решение ќе се земаат земаат предвид и еколошките и егзистенцијалните потреби на граѓаните.

Досега веќе е разговарано со претставници на синдикатот на вработените во фабриката „Југохром“, како и со менаџментот.