Могерини и Захариева оптимисти за датумот за преговори и за решение на спорот за името


Софија, 16 февруари, 2018 - 12:45 (META) 

Високата преставничка на ЕУ за надворешна и безбедносна политика, Федерика Могерини и министерката за надворешни работи на Бугарија, Екатерина Захариева, која е актуелен претседавач со Советот на ЕУ, се оптимисти дека во јуни Македонија и Албанија ќе добијат датум за почетокот на преговорите за членство во Европската Унија.

– Она што е многу важно за Стратегијата на ЕК за Западен Балкан е што дава шанса за сите држави од регионот. Се надевам дека во јуни на Советот ќе биде донесена одлука почеток на преговори со Скопје и Тирана. Сметам дека е голема веројантоста тоа да се случи. Она што го чув на вчерашната дебата меѓу колегите за Страгијата има големи шанси тоа да се случи. Државите треба да работат интензивно за да ги исполнат реформите и ние навистина би сакале тоа да се случи – рече Захариева на денешната прес-конференција по работната сесија на Неформалниот состанок на Министрите за надворешни работи од земјите – кандидати за членство во ЕУ – Гимних (Gymnich), кој оваа година се одржува во Софија, Република Бугарија.

Одговарајќи на идентично прашање, дали може да се очекува датум за преговори за некоја од земјите на Западен Балкан, Могерини изјави дека за време на бугарското претседателство „имаме можност да направиме напредок“ во однос на ова прашање.

– Покрај земјите кои веќе се во фаза на преговори, од сега па до јуни постои можност за отпочнување на преговори со други земји од регионот – рече Могерини.

Во врска со спорот за името, Захариева рече дека на состанокот не било разговарано за ова прашање, но нагласи оти е охрабрена дека е возможно во скора иднина да се најде решение.

– Се радувам што двајцата министри и во Софија ги продолжија неформалните разговори за решавање на спорот. Од искажувањето на двате страни јас сум охрабрена дека е возможно во догледна иднина да се најде решение. Дали сум оптимист? Мислам дека сум поскоро реалист, бидејќи гледам политичка волја од двете страни за изнаоѓање на решение кое ќе помогне за членството во НАТО и за иднината на Скопје во ЕУ – изјави Захариева, одговарајќи на новинарско прашање.

Високата претставничка на ЕУ, истакна дека дијалогот меѓу Скопје и Атина е доста охрабрувачки.

– Ние му посветуваме внимание и го поддржуваме, овој дијалог. Чекорите што се преземаат се многу позитивни за натамошниот развој на настаните. Потребно е политичко лидерство и храброст, но, она што мислам дека е најважно е имањето на јасна визија за тоа што е потребно за сопствените граѓаните – истакна Могерини, додавајќи дека е импресионирана од дијалогот меѓу Македонија и Грција и оти се надева дека наскоро ќе доведе до добри резултати.


Договорот за пријателство, добрососедство и соработка со Бугарија стапи во сила


Софија, 14 февруари, 2018 - 19:27 (META) 

Министрите за надворешни работи на Македонија и на Бугарија, Никола Димитров и Екатерина Захариева, во присуство на премиерот Бојко Борисов, ги разменија ратификационите документи на Договорот за пријателство, добрососедство и соработка и го потпишаа Протоколот за нивната размена, со што Договорот стапи во сила, информираа од МНР.

– Мислам дека со овој пример, во кој за неколку месеци успеавме еден ваков пресврт да направиме, даваме на некој начин и надеж и храброст дека Балканот е Европа. И се надеваме дека оваа позитивна енергија ќе ги зарази и другите прашања кои што се уште не се затворени – рече Димитров.

Захариева истакна дека резултатите од овој Договор се видливи уште пред да стапи во сила.

– Резултатите од Договорот се видливи, раст на стоковата размена од 11 и на туризмот од 10 проценти – изјави Захариева.

Според бугарскиот премиер Борисов, овој пример треба да го следат сите на Балканот.

– Ако Скопје и Атина бидат храбри, а нашите пријатели Ципрас, Мицотакис и Заев најдат заедничко решение за спорот со името во наредните месеци, нештата ќе се развиваат во многу добра насока за сите. Ние сега можеме да стискаме палци за да се реши спорот. Бугарија ќе биде само конструктивна – рече Борисов.

Договорот за пријателство, добрососедство и соработка, во Собранието на Република Македонија, беше ратификуван на 15 јануари 2018 година, и во Националното Собрание на Република Бугарија на 18 јануари 2018.

Димитров, денеска во рамките на дводневната работна посета на Бугарија, оствари средби и со претседателот Румен Рaдев и со премиерот Бојко Борисов.


Димитров од утре во Бугарија на средби со Борисов, Радев и Захариева


Скопје, 13 февруари, 2018 - 14:07 (META) 

Шефот на македонската дипломатија, Никола Димитров, од утре до 16 февруари ќе престојува во работна посета на Бугарија, соопшти Министерството за надворешни работи.

За време на посетата е предвидено тој да има средби со бугарскиот претседател Румен Радев, премиерот Бојко Борисов и со министерката за надворешни работи на Бугарија, Екатерина Захариева.

„Во рамки на билатералната средба со министерката Захариева, која е закажана за утре, предвидено е министрите да извршат размена на ратификациони документи на Договорот за пријателство, добрососедство и соработка, со што и практично ќе се заврши формалната постапка за стапување на Договорот во сила, по неговата ратификација во Собранието на Република Македонија, на 15 јануари 2018, и во Националното Собрание на Република Бугарија на 18 јануари 2018“, стои во соопштението.

Од МНР информираат и дека на покана на високата претставничка на Европската Унија за надворешни работи и безбедносна политика, Федерика Могерини и министерката за надворешни работи на Бугарија, Екатерина Захариева (во својство на земја претседавач со Советот на ЕУ), Димитров на 15 и 16 февруари ќе учествува и на неформалниот состанок на Министрите за надворешни работи на земјите-членки на Европската унија и земјите-кандидати за членство во ЕУ – Македонија, Албанија, Црна Гора, Србија и Турција – Гимних што ќе се одржи во Бугарија.

Дискусиите на состанокот ќе се фокусираат на соработката и партнерството во областа на безбедноста и одбраната.


Захариева: Да ги оставиме Атина и Скопје да ги водат преговорите


Софија, 13 февруари, 2018 - 13:50 (META) 

Се радувам што има напредок во преговорите меѓу Атина и Скопје, изјави денеска министерката за надворешни работи на Бугарија, Екатерина Захариева во Софија одговарајќи на новинарско прашање во врска со спорот за името, пренесува бугарската новинска агенција „БТА“.

– Тоа е билатерално прашање и да ги оставиме Атина и Скопје да ги водат преговорите со посредство на Обединетите нации (ОН) – изјави Захариева и посака успех во преговорите.

Поранешниот бугарски претседател, Георги Прванов вчера изјави дека преговорите за решавање на спорот за името меѓу Македонија и Грција не треба да бидат на сметка на Бугарија и дека за Софија и за нејзината дипломатија не треба да биде сеедно како ќе завршат преговорите, додавајќи дека во еден момент треба да постои и некаква усогласеност и со Бугарија.

Инаку, денеска во Виена се одржува средба меѓу министрите за надворешни работи на Македонија и на Грција, Никола Димитров и Никос Коѕиас на која присуствува и медијаторот на ОН во преговорите, Метју Нимиц.

Средбата трае повеќе од три часа. Засега нема информации дали по нејзиното завршување шефовите на дипломатиите на двете земји ќе дадат изјави или пак ќе има заедничко соопштение на министерствата за надворешни работи на Македонија и на Грција.


Захариева: Реално е очекувањето преговорите со Македонија да почнат до јули


Брисел, 23 јануари, 2018 - 19:43 (META) 

Мислам дека е многу реално преговорите со Македонија да започнат за време на бугарското претседавање со ЕУ и, секако да го видиме извештајот во кој ќе биде вклучен и акциониот план 3-6-9 и кој е поврзан со реформите во администрацијата, разузнавачката служба и судскиот систем. Ние ќе бидеме среќни и целосно ќе го поддржиме тој развој, исто и за Албанија, рече бугарската министерка за надворешни работи Екатерина Захариева додека ги презентираше приоритетите на Бугарија за време на претседавањето на земјата со ЕУ пред Комитетот за надворешни работи на Европскиот парламент.

Таа рече дека Бугарија е многу охрабрена од сигналите од Македонија и Грција во врска со преговорите за спорот за името.

– Западен Балкан е од големо значење за благосостојбата на Европа. Нема како да има сигурна и стабилна Европа без безбеден и стабилен Балкан – истакна шефицата на бугарската дипломатија пред европратениците и додаде дека самитот во мај годинава во Софија ќе биде прв настан на такво ниво по состанокот во Солун во 2003 година.

Бугарската министерка за надворешни работи ги наведе четирите главни приоритети на Претседателството: иднината на Европа и младите луѓе – економскиот раст и општествената кохезија, европска перспектива и поврзаност на Западен Балкан, дигиталната економија и вештините потребни за иднината и безбедноста и стабилноста во силна и обединета Европа.


Захариева: Реално е Македонија годинава да добие покана за преговорите за членство во ЕУ


Софија, 20 јануари, 2018 - 14:57 (META) 

Реално е да се очекува Македонија оваа година да добие покана за почеток на преговорите за членство во Европската Унија, изјави за радиото „Дарик“ бугарската министерка за надворешни работи, Екатерина Захариева.

Таа сепак спомна два услова: напредок на преговорите за името на земјата и на планот на реформите.
Захариева напомена дека Македонија има статус на кандидат за членство во ЕУ уште од 2005 година, но нејзината политика на нерешавање на проблемите со соседите ја доведоа до тоа, веќе 12 години преговорите да не се почнати.

– Се радувам што Владата во Македонија разбра дека политиката „против“ не е политика на европските вредности – рече Захариева.

Таа го оцени потпишувањето на договорот за добрососедство со Македонија како настан на 2017 година.

-Многу Влади работеа на ова прашање и ме радува што конечно заврши. Уште поважно е што овој договор се почитува уште пред да стапи на сила. Лично јас не можев да замислам премиерите на двете земји заедно да застанат пред споменикот на цар Самуил во Софија или пред споменикот на Гоце Делчев во Скопје. Промената на ставот на политичко ниво се чувствува и кај луѓето – додаде Захариева.


Македонија и Западен Балкан ќе бидат приоритет на бугарското претседавање со ЕУ


Софија, 27 октомври, 2017 - 12:15 (META) 

Главен приоритет на Бугарија за време на претседавањето со Европската Унија (ЕУ) ќе биде Западен Балкан и поддршка на европската перспектива на регионот, изјавила бугарската министерка за надворешни работи, Екатерина Захариева, на средбата во Софија со генералниот секретар на Регионалниот совет за соработка (РСС), Горан Свилановиќ.

Бугарија ќе продолжи со поддршка на зајакнување на соработката меѓу ЕУ и регионот низ практични мерки, како што е, на пример, неопходната енергетска инфраструктура, рекла Захариева. Таа истакнала дека брзата интеграција во ЕУ е препознаена како главен приоритет на државите во регионот и додала дека Западен Балкан треба да ја искористи оваа единствена можност, дотолку повеќе што со Советот на ЕУ во наредниот период последователно ќе управуваат пет земји што се залагаат за проширување – Естонија, Бугарија, Австрија, Романија и Хрватска.

Свилановиќ, како што соопшти РСС, рекол дека Советот и Бугарија можат да соработуваат на промоција на заедничките интереси во регионот.

„Се радуваме на претстојното претседателство на Бугарија со ЕУ и на силната желба и амбиција во текот на првата половина од 2018 година да се посвети повеќе внимание на Западен Балкан. Советот и Бугарија можат да соработуваат на промоција на заедничките интереси во регионот и да го подржат позитивниот напредок во регионалната соработка што е остварен во текот на годинава“, истакнал претседателот на РСС.

Захариева и Свилановиќ на средбата, одржана синоќа, разговарале за конкретни активности за време на бугарското претседателство со ЕУ, кое почнува на 1 јануари 2018 година, како и за планираниот самит на претседатели на држави и на влади на Западен Балкан и на ЕУ. Самитот треба да се одржи во мај во Бугарија, а истовремено ќе се одбележи и десетгодишнината на РСС, кој е формиран во 2008 година, исто така во Софија.

РСС e оперативно тело на Процесот за соработка во Југоисточна Европа (SEECP), чиј основач и полноправен член е и Република Македонија.


Захариева: Договорот со Македонија следната недела на ратификација во бугарското собрание


Софија, 25 октомври, 2017 - 17:20 (META) 

Договорот за добрососедство меѓу Македонија и Бугарија следната недела треба да влезе во постапка за ратификација во бугарското Народно собрание, изјавила денеска министерката за надворешни работи на Бугарија, Екатерина Захариева, пренесуваат софиските медиуми.

Ова Захарива го соопштила на денешната дискусија на тема „Европската интеграција, регионалната соработка и поврзаноста на земјите од Западен Балкан – придонесот на бугарското претседателство (со ЕУ)“, на форумот како дел од заседанието на парламентарните комисии на Народното собрание на Бугарија за европски прашања, за контрола на европските фондови и за надворешна политика.

Одговарајќи на пратеничко прашање, Захариева рекла дека Договорот со Македонија е во повторна процедура на усогласување во министерствата, а следната недела ќе биде разгледан од владата, која ќе го достави на ратификација во парламентот.

Во врска со интеграцијата на земјите од Западен Балкан во Европската Унија, шефицата на бугарската дипломатија рекла дека првпат по 12 години, земјите од регионот се посочени како приоритет на ЕУ и дека првпат како такви се споменати од актуелниот претседател на Европската комисија, Жан-Клод Јункер.

– Темата за Западен Балкан е многу важна и долгорочна и не се исцрпува само со нашето претседателство – рекла Захариева.

Таа истакнала дека само Црна Гора и Србија го имаат отворено преговарачкиот процес, а Македонија и Албанија се во очекување наскоро да ги почнат преговорите за членство во ЕУ.

Договорот за добрососедство меѓу Македонија и Бугарија беше потпишан од премиерите на двете држави, Зоран Заев и Бојко Борисов, на 1 август годинава во Скопје.

Засега нема најави кога Договорот ќе се најде пред пратениците во Собранието на Република Македонија за ратификација.


Захариева: Спроведете ги реформите поради граѓаните, не само поради членството во ЕУ


Будимпешта, 11 октомври, 2017 - 17:49 (META) 

„Стабилноста и просперитетот на Западен Балкан е долгогодишен надворешно-политички приоритет на Бугарија и ќе биде во фокусот на бугарското претседателство со ЕУ. Апелот до нашите пријатели е: Спроведете ги реформите поради вашите граѓани, не само поради идното членство во ЕУ“, истакна министерката за надворешни работи на Бугарија, Екатерина Захариева, на денешниот состанок на министрите за надворешни работи на земјите од Вишеградската група и на Западен Балкан, во Будимпешта.

Како што јави бугарската агенција БТА, министрите присутни на годинешниот состанок во Будимпешта, што се одржа во рамките на унгарското претседавање со Вишеградската група, ѝ додоа целосна поддршка на Захариева за побрза интеграција на регионот во Европската Унија за време на бугарското претседателство со Советот на Унијата, во првата половина на следната година.

– Без Западен Балкан во ЕУ нема да биде завршен европскиот проект и Европа нема да биде доволно стабилен и безбеден континент. Нашата цел е на самитот на ЕУ во Софија следната година да имаме јасен план за секоја од балканските земји. Ние сме балканска држава и јас се гордеам со тоа. Ако ја оставаме историјата во минатото, ако гледаме напред во иднината и сме чесни и отворени за проблемите, тогаш многу побргу ќе постигнеме напредок – рече Захариева.

Таа додаде дека покрај политичката поддршка за шесте земји од Западен Балкан (Србија, Македонија, Босна и Херцеговина, Црна Гора, Албанија и Косово), кои сакаат да станат членки на ЕУ, треба да им се овозможи и техничка и експертска помош во преговарачкиот процес.

Шефот на романската дипломатија, Теодор Малекшану, на состанокот истакна дека Договорот за пријателство меѓу Бугарија и Македонија е пример за целиот регион.

Министерот за надворешни работи на Унгарија, Петер Сијарто, кој е домаќин на форумот во Будимпешта, претходно истакна дека неговата земја се залага Македонија и Албанија да добијат датум за почнување преговори најдоцна во првиот квартал од 2018 година.

На министерскиот состанок во Будимпешта учествуваше и шефот на македонската дипломатија, Никола Димитров.


Хојт Ји: Договорот меѓу Македонија и Бугарија е важен за целиот регион


Блед, 5 септември, 2017 - 11:01 (META) 

„Го поздравувам Договорот за пријателство, добрососедство и за соработка со Република Македонија. Тој е важен за народите на Република Бугарија и на Република Македонија, но и за целиот регион“.

Ова го изјавил заменик-помошникот државен секретар на САД, Хојт Брајан Ји, на средбата со бугарската вицепремиерка и министерка за надворешни работи, Екатерина Захариева, во рамките на Бледскиот стратешки форум во Словенија, соопшти бугарското МНР.

– Се надевам дека овој договор ќе создаде одлична атмосфера, во која Република Македонија ќе ги подобри односите и со другите соседи – додал Ји.

Захарива на средбата истакнала дека една од најголемите придобивки на договорот е тоа што тој е изработен без странска помош, со што двете страни покажале дека ги решаваат прашањата без посредници.

Захариева и Хојт Ји разговарале и за актуелната политичка ситуација во регионот и за иницијативите на Бугарија во надворешната политика.