!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Филип: Граѓаните гласаа за Макрон и за промените во законот за работа


Париз, 13 септември, 2017 - 11:00 (META) 

Францускиот премиер Едуар Филип соопшти дека без разлика на вчерашните протести, измените во законот за работа ќе се спроведат затоа што граѓаните на изборите гласале за тоа.

– Слушам и обрнувам внимание. Но, морам да кажам дека Французите, кога гласаат, исто така имаат право да бидат третирани со почит. А, реформите кои ги спроведуваме, ги најави претседателот Емануел Макрон за време на предизборната кампања – изјави Филип во интервју за телевизијата „Франс 2“.

Француската влада минатиот месец, по повеќенеделни преговори со синдикатите, воведе мерки што опфаќаат ограничување на исплатата на отпремнина во случај на отказ. Синдикатите оценија дека новите мерки се на штета на работниците и оти со нив се охрабруваат компаниите да отпуштаат и да вработуваат луѓе.


Франција ќе ја укине вонредната состојба на 1 ноември


Париз, 4 јули, 2017 - 16:59 (META) 

Францускиот премиер Едуар Филип изјави дека вонредната состојба во земјата ќе биде укината на 1 ноември.

Претседателот на Франција, Емануел Макрон, претходно вети дека ќе се потруди вонредната состојба да не остане на сила, но најави дека ќе ги зајакне мерките за безбедност за земјата да се избори со сите закани.

Вонредната состојба во Франција беше воведена во ноември 2015 година, по терористичкиот напад во Париз, во кој беа убиени 130 лица.


Едуар Филип е нов премиер на Франција


Париз, 15 мај, 2017 - 16:24 (META) 

Претседателот на Франција, Емануел Макрон, денеска го постави пратеникот на конзервативците Едуар Филип за премиер, со што го одржа ветувањето од кампањата дека во француската политика ќе „воведе“ нови лица.

Четириесет и шестгодишниот Филип е член на Републиканската партија и не е доволно познат на гласачите.

На неговото именување за претседател на француската влада се гледа како обид на центристот Макрон да формира мнозинство во парламентот, привлекувајќи ја десницата.

Макрон вчера положи заклетва како нов претседател на Франција.


РТЛ: Макрон и Жипе постигнаа договор за формирање влада


Париз, 13 мај, 2017 - 10:02 (META) 

Новоизбраниот француски претседател Емануел Макрон и еден од лидерите на конзервативната партија на републиканците (ЛР), Ален Жипе, вчера постигнале договор за формирање нова влада на Франција, јави радиото РТЛ.

Владата, која би била формирана в понеделник, ќе биде предводена од актуелниот градоначалник на Авр, републиканецот Едуар Филип. Таа би ја водела земјата до предвремените парламентарни избори закажани за 11 и 18 јуни.