Ципрас до Заев: Честитки пријателе, ова е важен чекор кон заедничкиот успех


Атина, 19 октомври, 2018 - 23:40 (META) 

Грчкиот премиер, Алексис Ципрас, вечерва на својот „Твитер“ профил му честиташе на неговиот македонски колега, Зоран Заев, за гласањето со двотретинско мнозинство во Собранието за потреба од уставни измени кои произлегуваат од Договорот од Преспа.

„Честитки пријателе Зоран Заев! Вечерашното гласање е важен чекор кон нашиот заднички успех. Важен чекор кон мирна и просперитетна иднина за нашите граѓани“, напиша Ципрас.

Честитка пристигна и од претседателот на Европскиот совет, Доналд Туск.

„Еден глас, еден голем чекор поблиску до заземање на местото кое ви припаѓа во нашата трансатлантска заедница“, Туск порача на својот профил на Твитер со порака напишана на македонски јазик.


Собранието со 80 гласа „за“ ја донесе одлуката за потреба од уставни измени


Скопје, 19 октомври, 2018 - 22:33 (META) 

По цел ден чекање на почетокот на собраниската седница за уставни измени, вечерва владејачкото мнозинство успеа да обезбеди двотретинско мнозинство за предлогот на Владата за потребата од уставни измени кои произлегуваат од Договорот од Преспа помеѓу Македонија и Грција. Пратениците гласаа со 80 гласа „за“, без гласови „против“ и „воздржани“ од присутни 117 пратеници.

Од опозициската коалиција на ВМРО-ДПМНЕ „за“ гласаа Владанка Авировиќ, Емилија Александрова, Сашо Василевски, Нора Исмаиловска Старова, Елизабета Канческа Милевска, Крсто Мукоски, Љубен Арнаудов и Зекир Ранчиловиќ.

Пратениците од останатиот дел од пратеничката група на ВМРО-ДПМНЕ за време на гласањето станаа од своите седишта и стоеја на страна за да се види кој гласал „за“. Координаторот Драган Данев побара и поединечно изјаснување на пратениците по што секретарот на Собранието, Цветанка Иванова ги читаше сите пратеници посебно а тие кажуваа дали се „за“ или против.

Владејачкото мнозинство неколку дена се обидуваше да постигне двотретинско мнозинство кое беше неопходно за да се пристапи кон измени на Уставот преку амандмани.

Пратениците од ВМРО-ДПМНЕ до вчера беа категорично против предлогот за уставни измени. Пратеничката група во средата испрати писмо во кое се велеше дека се откажуваат од дебатата во Собранието, која ја нарекоа јалова, и потенцираа дека нема да гласаат за уставни измени.

Апели за двотретинско мнозинство пристигнаа и од ЕУ и САД.

Еврокомесарот за соседска политика и проширување, Јоханес Хан, утринава изрази увереност дека пратениците од сите политички парии во македонското Собрание ќе ги тргнат настрана партиските интереси и ќе донесат одлука во интерес на земјата и граѓаните.

Заменикот помошник државен секретар на САД, Метју Палмер, кој треба да пристигне во понеделник, апелираше до ВМРО-ДПМНЕ да ги ослободи пратениците да гласаат по нивно уверување без страв од закани и одмазда.

Според Деловникот, следно е Владата во рок од 15 дена да ги подготви уставните амандмани, кои треба да се гласаат во Комисијата за уставни прашања и Законодавно правната комисија. Потоа Собранието треба да отвори јавна дискусија, по што ќе се поднесуваат амандмани на уставните амандмани. По расправата и изјаснувањето за поднесените амандмани, Собранието треба уставните амандмани да ги изгласа со двотретинско мнозинство со што Уставот ќе биде конечно променет.

Оваа процедура се очекува да трае околу три месеци.


Собраниската седница за уставните измени ќе почне во 15 часот


Скопје, 19 октомври, 2018 - 14:35 (META) 

Собраниската седница на која треба да продолжи расправата за предлогот за пристапување кон уставни измени ќе продолжи во 15 часот, наместо како што првично беше најавено, во 12 часот денеска, соопштија од Собранието.

Како причина за одлагањето на почетокот на седницата во повеќе медиуми се наведуваат шпекулации дека сега се одвиваат разговори  за обезбедување двотретинско мнозинство меѓу владејачките партии и опозицијата.

Во собраниската зграда се и премиерот Зоран Заев и претседателот на ДУИ, Али Ахмети.

Седницата беше закажана за 12 часот, а по чекање од речиси два часа, беше одложена одложена за 15 часот.


Заев: Верувам дека пратениците од ВМРО-ДПМЕ ќе се исправат пред историската одговорност


Струмица, 18 октомври, 2018 - 14:23 (META) 

Заедно со премиерот Алексис Ципрас остануваме целосно посветени на перспективите на новиот Балкан на 21 век, изјави денеска премиерот Зоран Заев, одговарајќи на новинарско прашање за вчерашниот телефонски разговор со својот грчки колега по оставката на министерот за надворешни работи, Никос Коѕиас. Заев денеска присуствуваше на одбележување на 20-годишнината од постоењето на Штедилницата „ФУЛМ“, во неговото родно село Муртино.

Премиерот додаде дека Ципрас го информирал за случувањата кај нив и дека тој останува посветен на договореното и дека је презема и функцијата министер за надворешни работи за да гарантира дека ќе се реализира Договорот од Преспа.

– Јас сум среќен заради целосната посветеност на Република Грција кон овој Договор. Можам да ја потврдам и нашата целосна посветеност. Негувам надеж дека утре парламентот ќе собере сили, дека пратениците ќе се одважат и охрабрат, затоа што, пред се, се претставници на граѓаните, а потоа на политичките партии и ќе се исправат пред историската одговорност, пред оваа непропустлива шанса за Македонија. Конечно да дадат пас за потврдување на потребата за отворање на уставни промени – рече Заев.

Објасни дека потоа ќе следува нацрт на уставните амандмани, по кои ќе се дискутира, ќе се одобрат, па ќе има јавна дебата и на крајот е гласањето за самите уставни амандмани.

На новинарско прашање како ќе успее да го обезбеди двотретинското мнозинство, претседателот на македонската влада рече дека е верник и дека некогаш чуда се случуваат.

– Дебатата е отворена и навистина прифативме многу иницијативи кои дојдоа од пратениците. Јас сум подготвен и понатаму да разговарам за иницијативите од самите пратеници во функција на тоа што е произлезено како дополнителна грижа од преговарачкиот процес, од прогласувањето на договорот, од кампањата за референдумот, а тоа е да најдеме начин да го зацврстиме идентитетот, да го потврдиме јазикот, да го гарантираме тоа што го правиме дека ќе биде исполнето од грчка страна, да ја гарантираме европската иднина на Македонија. Но, еве мое очекување е и во тоа верувам, дека до утре ќе соберат сили – вели Заев.

Запрашан за помирувањето и дали неговиот глас допрел до Кривичниот совет кој укина мерки на претпазливост кон обвинети за настаните од 27 април, премиерот Заев одговори дека разговарал со Министерството за правда за да праша дали е тоа поради неговиот повик за помирување или поради нешто друго.

– Дефинитивно луѓето си имаат обезбедено гаранција и откако ги поднеле во оваа фаза на процесот судот одлучил да ги прифати. Не ги знам ставовите на обвинителството и судовите, но мене ми е драго луѓето што излегуваат од притвор –додаде премиерот.


Седницата за уставни промени ќе продолжи утре


Скопје, 18 октомври, 2018 - 9:37 (META) 

Собраниската седница за уставни измени кои произлегуваат од Договорот од Преспа помеѓу Македонија и Грција ќе продолжи утре.

Вториот дел од вчерашната седница помина без пратениците од ВМРО-ДПМНЕ и коалицијата „За подобра Македонија“, откако тие претходно преку соопштение најавија дека се откажуваат од дебатата, нарекувајќи ја јалова и потенцираа дека ќе гласаат против уставните измени.

Тие ги повикаа пратениците од владејачкото мнозинство да се откажат од настапите и да се пристапи кон гласање по владиниот предлог за измени на Уставот.

За парламентарното мнозинство не може да има подобар договор од овој и ако се отфрли на Македонија и се заканува долгогодишна изолација и стопирање на интеграцијата во НАТО и ЕУ.

Според информациите од Собранието гласањето најверојатно ќе се случи в петок.

Владиниот портпарол Миле Бошњаковски вчера истакна дека Владата дека ќе пристапи кон изработка на уставните амандмани дури откако ќе заврши работата во Собранието со изгласување на потребата за нивно изготвување. Владата смета дека е најдобро тие да се подготват заедно со опозицијата односно да се постигне национален консензус.

Еврокомесарот за соседска политика и проширување, Јоханес Хан, преку социјалната мрежа „Твитер“ ја повика опозицијата да се однесува државнички и да го поддржи договорот од Преспа.

-Ако не успее во тоа, тогаш ќе мора да одговара за тешките последици за граѓаните на Македонија – напиша Хан.


Пратениците на ВМРО-ДПМНЕ се откажаа од дебатата, ќе гласаат против уставни измени


Скопје, 17 октомври, 2018 - 16:04 (META) 

Пратениците од ВМРО-ДПМНЕ и од коалицијата „За подобра Македонија“ денеска на заедничка координација одлучиле да се откажат од дебата која што се води во Собранието на Република Македонија, соопшти партијата.

„Пратеничката група заклучува дека е кажано сè и дека нема потреба од натамошна дебата во однос на предложените уставни измени и Договорот од Преспа кој што беше отфрлен од народот на референдум. Истовремено пратениците од ВМРО-ДПМНЕ и коалицијата „За подобра Македонија“ апелираат и до пратениците од владејачкото мнозинство и тие да се откажат од настапите и да се пристапи кон гласање по предлогот на Владата на Република Македонија за уставни измени“, се вели во партиското соопштение.

Пратениците од ВМРО-ДПМНЕ, се додава во соопштението, заедно со раководството на партијата едногласно ја потврдиле својата позиција дека ќе гласаат против уставните измени.


Собраниската седница за уставни измени – тест за двотретинското мнозинство


Скопје, 15 октомври, 2018 - 9:41 (META) 

Денеска во 11 часот ќе започне собраниската пленарна седница на која на дневен ред ќе се најде Предлогот на Владата за уставни измени кои произлегуваат од Договор со Грција.

Предлогот за уставни измени во петокот беше изгласан во Комисијата за уставни прашања која расправаше два од можните десет дена. За предлогот гласаа 10 пратеници од владејачкото мнозинство додека 7 пратеници од ВМРО-ДПМНЕ се изјаснија против.

Пленарната седница за уставните измени може да трае максимум десет дена по што потребно е двотретинско мнозинство за предлогот да помине.

Доколку се постигне за отворање на Уставот, допрва ќе започне постапката за уставни измени, при што на крајот на третата фаза потребно е уште една двотретинска поддршка за заокружување на процесот.

Од владејачкото мнозинство најавија дека доколку не се постигне двотретинско мнозинство за промена на уставот ќе распишат предвремени парламентарни избори. Во случај на распуштање на Собранието, според Уставот, избори се распишуваат од 45 до 60 дена. А пак Владата на која ѝ е изгласана недоверба, поднела оставка или на која мандатот ѝ престанал поради распуштање на Собранието, останува на должност до изборот на нова Влада.

Од ВМРО-ДПМНЕ, велат дека на денешната координација на пратеничката група ќе решат како ќе настапат на парламентарната седница, меѓутоа јасно порачуваат дека пратениците нема да поддржат уставни измени за промена на уставното име на државата.

Деловникот на Собранието е поконкретен и детално во 10 членови ја објаснува процедурата и чекорите кои треба да се поминат за да се измени Уставот со амандмани.


Трнлив и долг е патот до промени на Уставот (инфографик)


Скопје, 8 октомври, 2018 - 16:41 (META) 

Промената на Уставот со уставни амандмани не е ни малку лесна и едноставна процедура. На предлагачот на измените, во овој случај на Владата, во два наврати и е потребно двотретинско мнозинство. Еднаш за да го отвори и еднаш за да го затвори Уставот, процедура која трае неколку месеци.

Според Уставот, одлука за пристапување кон измена на Уставот донесува Собранието со двотретинско мнозинство гласови од вкупниот број пратеници. Нацртот за измената на Уставот го утврдува Собранието со мнозинство гласови од вкупниот број пратеници и го става на јавна дискусија. Одлука за измена на Уставот донесува Собранието со двотретинско мнозинство гласови од вкупниот број пратеници. Измената на Уставот ја прогласува Собранието.

Деловникот на Собранието е поконкретен и детално во 10 членови ја објаснува процедурата и чекорите кои треба да се поминат за да се измени Уставот со амандмани:

  • Предлог за пристапување кон измена на Уставот на Република Македонија можат да поднесат претседателот на Републиката, Владата, најмалку 30 пратеници или 150.000 граѓани.
  • Предлогот за пристапување кон измена на Уставот, претседателот на Собранието го доставува до пратениците и до претседателот на Републиката и до Владата, кога тие не се подносители на предлогот.
  • По предлогот за пристапување кон измена на Уставот на седницата на Собранието се води претрес во целина кој може да трае најмногу десет работни дена.
  • Претресот по предлогот за пристапување кон измена на Уставот во Комисијата за уставни прашања може да трае најмногу десет работни дена.
  • Одлуката за пристапување кон измена на Уставот, Собранието ја донесува со двотретинско мнозинство гласови од вкупниот број пратеници.
  • По донесувањето на одлука за пристапување кон измена на Уставот, Собранието со заклучок утврдува рок во кој подносителот на предлогот за пристапување кон измена на Уставот изготвува текст на нацртот на амандманите на Уставот.
  • Текстот на нацртот на амандманите на Уставот со образложение, предлагачот го доставува до претседателот на Собранието кој го доставува до пратениците и до претседателот на Републиката и до Владата, кога не се предлагачи, најдоцна 30 дена пред одржувањето на седницата на Собранието.
  • Претресот во Собранието се води по текстот на нацртот на секој амандман одделно и може да се дадат мислења и предлози. Претресот може да трае најмногу три работни дена по текстот на нацртот на секој амандман одделно.
  • Претресот во Комисијата за уставни прашања и во Законодавноправната комисија може да трае најмногу три работни дена по текстот на нацртот на секој амандман одделно.
  • Собранието со мнозинство гласови од вкупниот број пратеници, го утврдува нацртот на секој амандман на Уставот одделно.
  • Нацртот на амандманите Собранието го става на јавна дискусија.
  • Собранието определува рок за спроведување на јавната дискусија, начинот на објавувањето на нацртот на амандманите и рок во кој предлагачот како носител на јавната дискусија до Собранието поднесува извештај за резултатите од јавната дискусија и текст на предлогот на амандманите на Уставот.
  • На текстот на предлогот на амандманите на Уставот, предлагачот, секој пратеник, работно тело и Владата кога не е предлагач, можат да поднесат амандмани најдоцна осум дена пред седницата на Собранието на која ќе се усвојуваат амандманите на Уставот.
  • Комисијата за уставни прашања и Законодавно-правната комисија по текстот на предлогот на секој амандман на Уставот водат општ претрес и претрес по текстот, кој може да трае најмногу три работни дена.
  • По текстот на предлогот на секој амандман на Уставот се води општ претрес и претрес по текстот кој може да трае најмногу три работни дена.
  • Собранието се изјаснува одделно за секој амандман на текстот на предлогот на амандманите на Уставот, со мнозинство гласови од вкупниот број пратеници.
  • Амандманите за измена на Уставот се донесуваат со двотретинско мнозинство гласови од вкупниот број пратеници.

Хан: Не нови избори, туку градење двотретинско мнозинство во парламентот


Виена, 5 октомври, 2018 - 12:55 (META) 

Нови избори во Македонија ќе бидат одолговлекување на патот кон почетокот на преговорите со ЕУ, порачува комесарот за проширување на ЕУ, Јоханес Хан за австрискиот весник „Куриер“, велејќи дека го советувал македонскиот премери Зоран Заев да не свикува вонредни парламентарни избори, туку да изгради двотретинско мнозинство во Собранието кое би го поддржало Договорот со Грција.

-Новите избори ќе бидат одолговлекување на патот кон почетокот на преговорите со ЕУ. Опозицијата придонесе за нискиот одзив преку бојкот. Далеку од тоа дека може да се каже оти референдумот бил неуспешен. Невообичаено е еден референдум да добие поддршка од 94 проценти од гласачите, но да земат учество само 37 проценти – затоа што опозицијата очигледно беше успешна во бојкотот. Во парламентот ќе може да се обезбеди двотретинско мнозинство. На власта ѝ се потребни 8 или 9 гласа од опозицијата и тоа мора да биде остварливо. Сите велат дека сакаат во ЕУ и НАТО, и опозицијата исто така, и затоа мора да се плати цената со овој договор – вели Хан.

На новинарското прашање како да се дојде до потребното мнозинство во парламентот, Хан одговора „со комбинација на Балкан и рационалност“.


Заев: Нема да поднесам оставка, пратениците да го следат гласот на мнозинството


Скопје, 30 септември, 2018 - 23:29 (META) 

Европска Македонија доби повеќе гласови за од било кој победник на било кои избори во историјата на независна Македонија. Дури и ако имаше цензус и ако имаше 1.100.000 гласачи овој резултат од 600.000 граѓани ќе значеше јасна определба за европска Македонија, рече премиерот Зоран Заев на втората прес-конференција по завршувањето на референдумот.

-Сега кога имаме мнозинска изразена волја за европска Македонија, време е пратениците во Собранието да го следат гласот на мнозинството за да ги забрзаме процесите за НАТО и ЕУ и да обезбедиме подобра иднина. Гласот на граѓаните е јасен повик сите политички партии да работат за оваа цел. Ги повикувам сите одговорни лидери, секој пратеник, да се обединиме и да ја одведеме нашата земја таму каде што припаѓа во ЕУ и НАТО – рече Заев.

Тој истакна дека подобар договор со Грција нема и не може да има, и дека алтернатива за членство во ЕУ и НАТО нема и не може да има. Тој ги повика сите да ги стават националните интереси пред се и над се и порача „да не си играме играчки со нашата идинина и иднината на Македонија“.

Заев го повтори ставот дека во спротивно единствена друга деморкатска алака која преостанува се предвремени парламентарни избори веднаш.

-Изборите не би требало да бидат најпосакуваната опција туку неопходна опција доколку дојде до тоа. Остануваат неколку денови да направиме напори да видиме дали ќе има двотретинско мнозинство во Собранието. Ако нема, веднаш ќе се преземат чекори за распишување избори за да ги запазиме роковите. Изборите би можеле да се одржат до крајот на ноември – додаде Заев.

На новинарско прашање дали ќе даде оставка како што ветил доколку не успее референдумот, Заев рече дека не само што нема намера да поднесе оставка туку дека има намера Македонија да ја направи членка на НАТО и ЕУ.

Тој им се заблагодари на тие што гласаа „за“ и „против“ бидејќи, како што рече, преземале одговорност и им се заблагодари и на дел од членовите на ВМРО-ДПМНЕ кои презеле одговорност за својата татковина и излегле да гласаат.