ВМРО-ДПМНЕ: Законот што насилно го истурка власта е неуставен, неприменлив и штетен


Скопје, 16 март, 2018 - 9:34 (META) 

Зоран Заев и Талат Џафери режираа разочарувачки ден во Собранието, доведувајќи ја во прашање препораката за отпочнување на преговори за ЕУ, се вели во соопштението на ВМРО-ДПМНЕ.

Од таму додаваат дека „ова е реакција на амбасадорот на Франција, Кристијан Тимоние во врска со насилничкото и недемократско носење на штетниот закон за двојазичност.“

„СДСМ го погази Деловникот за работа на Собранието. Владејачкото мнозинство ја спречи амандманската расправа и насилно го прогласи неуставниот закон за двојазичност за изгласан. СДСМ ја обезвредни улогата на Собранието и пратениците и на сила истурка закон без да го испочитува правото на пратениците со амандмани да интервенираат во истиот“, се вели во соопштението.

Во него се додава дека „законот ваков каков што насилно го истурка власта е неуставен, неприменлив и штетен. За ВМРО-ДПМНЕ ваквиот закон е неприфатлив.“

„Насилното гласање е одлика на недостатокот на демократски капацитет на оваа власт. СДСМ покажа дека не знае да менаџира со државата за доброто на граѓаните. СДСМ во изминатава година демонстрираше насилие, незнаење, расипништво и злоупотреба на законите и институциите“, се додава во соопштението.


„Тврдокорни“: Со двојазичноста се губи македонскиот карактер на државата


Скопје, 21 јануари, 2018 - 14:52 (META) 

Здружението „Тврдокорни“ и Македонските обединети сили (МОС) заедно со уште неколку здруженија, денеска одржаа протест пред македонското собрание против законот за јазиците.

Тие порачаа дека нивните непријатели се во Собранието и Владата затоа што тие 27 години го уништуваат сопствениот народ. Според нив со двојазичноста се губи македонскиот карактер на државата, се губи и самата држава која дефакто станува трета албанска држава на Балканот.

Претставник на здружението „Тврдокорни“ ги читаше пратениците кои гласале за законот за употреба на јазиците и повика на масовен протест. Тие посакаа 1 милион Македонци да излезат на улица и да кажат доста на продавањето на националните интереси.

Според нив необјасниво е албанскиот јазик да биде службен јазик во Гевгелија, Валандово, Струмица, Кочани, Штип, Радовиш, Берово, Крива Паланка, а замеруваат и за тоа што власта ветувала дебати за се, сега ја суспендирала демократијата туркајќи го законот со европско знаменце.

По завршувањето на протестот, демонстрантите запалија знаме на Европската Унија.


„Тврдокорни“ денеска ќе протестираат против законот за јазиците


Скопје, 21 јануари, 2018 - 10:59 (META) 

Македонски обединети сили (МОС), „Тврдокорни“ и уште неколку здруженија денеска во 13 часот пред Собранието на Република Македонија организираат „Протест против двојазичноста и албанизација на Македонија“. Според организаторите, двојазичноста е губење на македонскиот карактер на државата.

Во повикот на ова здружение на граѓани се вели дека законот за двојазичноста ќе има долготрајни и несогледливи последици врз нашата татковина, дека двојазичноста е губење на македонскиот карактер на државата, уривање на асномските темели и де факто губење и на самата држава.

„Со двојазичноста де факто стануваме трета албанска држава на Балканот. Македонија по секоја цена треба и мора да остане дом на македонскиот народ. Двојазичноста треба, мора и ќе ја спречиме по секоја цена. Нема да дозволиме да се изгуби македонскиот карактер на државата“, се вели во повикот.


ВМРО-ДПМНЕ: Законот за двојазичност кој денеска се изгласа во Собранието е неуставен


Скопје, 11 јануари, 2018 - 15:23 (META) 

Законот за двојазичност кој денеска го изгласа парламентарното мнозинство е неуставен, се вели во реакцијата на ВМРО-ДПМНЕ. Од партијата додаваат дека „со овој чин власта покажа дека највисокиот правен акт, Уставот на државата, за неа е само мртво слово на хартија.“

„Овој закон беше донесен со измама, односно лажно исцртување на европско знаменце, со што беа злоупотребени процедурите за донесување на закони од важност за интеграција на земјата во ЕУ. Власта треба да сноси одговорност за оваа манипулација со граѓаните. Законот за двојазичност не придонесува за реално унапредување на правата на албанската заедница во Македонија, напротив ги продлабочува разликите и оди на штета на хомогеноста на македонското општество“, се вели во соопштението.

Од партијата велат дека „двојазичноста ќе креира хаос во правниот промет.“

„Истата ќе создаде неефикасни институции кои ќе потонат во преводот помеѓу јазиците, наместо да бидат од реална полза за граѓаните и да работат во извршување на работата за која постојат. Законот ќе создаде паралелизам во сите институции како на централно ниво, така и на локално ниво. Два јазика – две архиви. Ова ќе предизвика дополнителни финансиски импликации за опрема, нови вработувања и нови простории, трошок кој ќе треба да се покрие од парите на македонските даночни обврзници“, се додава во соопштението.


ВМРО-ДПМНЕ го обвини Заев дека е „дрско лицемерен“ во грижата за македонскиот јазик


Скопје, 15 ноември, 2017 - 15:05 (META) 

Дрско лицемерие е тоа што на истиот ден кога пратениците на СДСМ во Собранието гласаа за потреба за носење на противуставен закон за двојазичност во целата држава, Зоран Заев говори за некаква лажна грижа за македонскиот јазик, велат од ВМРО-ДПМНЕ како реакција на говорот на премиерот Заев за унапредување на македонскиот јазик.

„Ако Зоран Заев вистински се грижеше за зачувување на македонскиот јазик како силно идентитетско обележје на македонскиот народ јавно го повикуваме парламентарното мнозинство на СДС да гласа против неуставниот закон за двојазичност во државата и да не се ратификува договорот со Бугарија со кој јавно се откажа од македонскиот јазик. СДС со законот за двојазичност, кој е антиуставен и надвор од законот го деградира македонскиот јазик, неговата употреба и етапно го уништува истиот“, се вели во партиското соопштение.

Според ВМРО-ДПМНЕ, грижата на Заев за македонскиот јазик е само димна завеса за распродавање на државните и национални интереси.


„Тврдокорни“ на 2 септември ќе протестираат против двојазичност и кампови за мигранти


Скопје, 24 август, 2017 - 19:42 (META) 

Иницијативата „Тврдокорни“ преку нивната „Фејсбук“ страница повика на марш кој ќе се одржи на 2 септември во сабота, со почеток во 17 часот под мотото „Марш за аболиција на патриотите – Марш за будење на Македонскиот народ“.

Според најавите, протестот ќе почне од Соборниот храм по што ќе продолжи до Владата, а ќе заврши пред Собранието.

„Ајде сите заедно да се спротивставиме на неправдите кон македонскиот народ кои континуирано се спроведуваат десетина години наназад, сите заедно да се спротивставиме на двојазичноста, да се спротивставиме на обидот во Македонија да се населат т.н мигранти, ајде да им ставиме до знаење на политичарите дека народот е тој кој одлучува за својата иднина, и дека народот нема да седи мирен додека некој се обидува да му го одземе и тоа малку што е останато и нераспродадено, да им покажеме дека и ние имаме гордост. Ги повикуваме сите искрени патриоти да присуствуваат“, се вели во најавата на инцијативата на „Фејсбук“.


ВМРО-ДПМНЕ нема да го поддржи законот за јазици, смета дека е спротивен на Уставот


Скопје, 5 август, 2017 - 17:05 (META) 

Вчерашниот предлог-закон за двојазична Македонија од Зоран Заев се коси со Уставот на Република Македонија, изјави членот на ИК на ВМРО-ДПМНЕ, Антонио Милошоски.

Тој додаде дека ВМРО-ДПМНЕ не може и не смее да го поддржи законот што е „спротивен на Уставот“. Милошоски појасни дека тоа што „кукавички“ е направено е тоа што на овој предлог-закон за двојазична Македонија е ставено европско знаменце.

– Тоа е злоупотреба на европското знаменце за закон кој нема врска со усогласувањето на македонското со европското законодавство. Ова е направено заради тоа за законот да може да се расправа во Собранието само три дена. Брзањето на Заев и на Шекеринска, овој закон за двојазична Македонија да го донесат во Собранието, значи дека и самите се свесни колку е штетен и колку народот е незадоволен и понижен затоа што беше излажан – рече Милошоски.

Тој нагласи дека на народот никој не му кажа пред изборите дека ќе се носи закон за двојазична Македонија.

– Долго време предупредувавме дека Заев е марионета што не ги штити македонските национални интереси, туку истите ги распродава преку тиранската палтформа, преку Договорот со Софија, а сè со цел да се искупи од кривичните дела што ги направил. Кредитот го плаќа Македонија. Нашите национални интереси се дадени на распродажба за да се заштити желбата на господинот Заев, неговата алчност, лакомост и амбиција да остане премиер на марионетска влада – изјави Милошоски.


ВМРО-ДПМНЕ: Граѓаните не сакаат политичари кои лажат


Скопје, 25 мај, 2017 - 10:08 (META) 

ВМРО-ДПМНЕ прашува каква е состојбата со двојазичноста, поради контрадикторноста на тоа што го кажува Зоран Заев и портпаролот на Алијанса за Албанците.

„Кој лаже, Зоран Заев или Арбен Таравари? Кој ги манипулира гласачите и народот, Алијанса за Албанците или СДС?     Дали лаже Таравари кога вели дека побарале двојазичноста да се реализира експресно и Заев се согласил со тоа или лажеше Заев кога ја потпиша гаранцијата со која ја отфрли Тиранската Платформа?“, стои во утринското соопштение од партијата.
ВМРО-ДПМНЕ порачува дека „граѓаните не сакаат политичари кои лажат кај ќе стигнат“.

„Граѓаните оправдано се плашат дека криминалецот Заев е подготвен да ја реализира Тиранската Платформа, во надеж дека од позиција на власт ќе се спаси од кривичен прогон за кривични дела кои ги извршил“, вели ВМРО-ДПМНЕ.


ВМРО-ДПМНЕ: Џафери ја почна двојазичноста


Скопје, 13 мај, 2017 - 11:08 (META) 

Нелегално избраниот претседател на Собранието, Талат Џафери, поддржан од СДС, почна да го применува албанскиот јазик како јазик на кој Собранието се обраќа до јавноста, покрај македонскиот, давајќи ни само мал поглед како ќе се одвива и ќе се имплементира двојазичноста на дело, обвини ВМРО-ДПМНЕ.

Партијата вели дека Џафери кажал „дека нема намера да го почитува сегашниот закон за употреба на јазиците и дека собраниските седници ќе ги води на албански јазик, а доколку за тоа има потреба би го сменил и законот“, а СДСМ за тоа молчи.

„Граѓаните на Република Македонија можат да видат само мал сегмент како ќе функционираат институциите откако СДС би ја презел власта – целосно двојазични на сите нивоа на власта на локално и на централно ниво, двојазични банкноти и униформи, дебата за промена на државните симболи, промена на името на државата и како крајна фаза на планот од Тирана, федерализација на Република Македонија. Граѓаните не го дадоа својот глас за реализација на тиранската платформа, граѓаните се излажани и постизборно измамени“, порача ВМРО-ДПМНЕ, велејќи дека Заев е подготвен да ја реализира платформата на албанските партии „за да дојде на власт, во надеж дека од позиција на власт ќе се спаси од кривичен прогон за големиот број кривични дела што ги извршил“.


ВМРО-ДПМНЕ: Заев се претвори во маша на Рама и на Тачи и закана по безбедноста во регионот


Скопје, 5 мај, 2017 - 9:44 (META) 

Криминалецот Зоран Заев во еден ден ги направи Македонците и Бугари и Срби, и покажа како планира „да ја витка кичмата“ на Македонецот во иднина, порачува ВМРО-ДПМНЕ во денешното редовно утринско соопштение за јавноста. Партијата вели дека Заев е поттикнувач и поддржувач на пеењето на албанската химна во Собранието и дека со кршење на Уставот, законот и на деловникот за работа на Собранието се обиде да избере „тирански претседател на Собранието“.

„Криминалецот Зоран Заев направи правен и политички преседан со што отвори можност во иднина, на незаконски начин, да се гласа двојазичноста, албанските банкноти, двојазичните униформи, геноцидот и сите елементи од тиранската платформа, без да се почитува волјата на народот“, порача ВМРО-ДПМНЕ.

Партијата обвинува дека Заев ги влошил билатералните односи на Република Македонија со Република Србија, за што уследија низа реакции на највисоките државни претставници од таа земја, и дека ја доведува во опасност репутацијата на Република Македонија.