Се отвори огромна дупка на Нов Зеланд, вулканолозите среќни


Велингтон, 7 мај, 2018 - 13:37 (META) 

Огромна дупка се отвори на една фарма на Северниот Остров на Нов Зеланд, која има длабочина колку четири двокатни автобуси и површина колку две фудбалски игралишта, односно 20 метри на 200 метри површина.

Не се предизвикани огромни штети и нема загинати луѓе и животни, а еден ефект од оваа појава предизвикана од обемните врнежи, е што вулканолозите ќе може од дупката кај гратчето Роторуа да ги проучуваат 60.000 старите наслаги на карпи создадени од вулкан.

Експертите посочуваат дека дупката се создала бидејќи огромното количество дождовна вода ги подјала варовничките карпи по што горниот слој на земјата паднал долу, создавајќи понор.

Според вулканологот Бред Скот, дупката е на кратерот на одамна заспан вулкан.


Огромна дупка во Рим проголта седум автомобили


Рим, 15 февруари, 2018 - 14:34 (META) 

Над 20 семејства се евакуирани вчеравечер во населбата Балдуина на северозападот на Рим, откако нешто пред 18 часот се отворила голема дупка во која пропаднале седум автомобили. За среќа нема повредени.

Земјиштето пропаднало создавајќи дупка длабока околу 10 метри, а некои жители велат дека претходно чувстувале тресење на подовите кога во близина се вршеле градежни работи.  Во текот на вечерта и ноќта се вршела евакуација на жителите, а пожарникарите и безбедносните служби се обидуваат да ги утврдат причините за пропаѓањето. Локацијата е близу до градилиште, каде работите се почнати во октомври минатата година со уривање објекти, а се планира да се градат станбени згради и подземни паркинзи.

На местото каде се создаде понорот, меѓу 25 и 28 јануари поради големи загуби на вода се вршени повеќе зафати, но вода и понатаму истекувала. Јавниот обвинител на Рим почна истрага.


„Адоуб“: Деактивирајте го „флеш плеерот“


Вашингтон, 3 февруари, 2015 - 19:31 (META) 

Компанијата „Адоуб“ денеска го објави безбедносниот билтен во кој наведува критичен пропуст (кодно име: CVE-2015-0313) во својот софтвер „флеш плеер“, кој овозможува да се внесе произволен код на далечина што се користи за напад на оперативни системи.

„Адоуб“ работи за крпенка која треба да биде готова во следните неколку дена. Додека корекцијата не биде објавена, корисниците се повикуваат да го деактивираат „флеш плеерот“ и да ја користат безбедносната алатка ЕМЕТ, која е направена за „Мајкрософт“ да ја ограничи опасноста од злоупотреба на пропустите.

Меѓу верзиите погодени со овој пропуст се и верзијата 16.0.0.296, која е објавена пред седум дена,  но  и некои промени во верзиите „13.x“ и „16.x“.

Пропустот кој го откриле вработените во „Мајкрософт“ и во „Тренд микро“ овозможува внесување, засега се користи за напад на оперативни системи како што е „виндоус 8.1“ преку навигаторите како што се „интернет експлорер“ и „фајрфокс“.


Центар ќе го затвори опасното градилиште на „Настел“


Скопје, 21 јануари, 2015 - 17:17 (META) 

Општина Центар планира утре да го затвори градилиштето каде што фирмата „Настел“ пред неколку години ископа градежна јама за да гради хотел, соопштија од локалната самоуправа.

„Земјата околу јамата на улицата Осма ударна бригада, во близина на италијанската амбасада, е пропадната, отворена е дупка поради градилиштето и е нарушена стабилноста на околното земјиште“, пишува во соопштението на Општината.

Како што известуваат од локалната самоуправа на Центар, во согласност со Законот за градење, фирмата ќе биде казнета со глоба од 2.000 до 4.000 евра, додека за одговорното лице ќе има глоба од 1.000 до 2.000 евра.

„Улицата Осма ударна бригада беше целосно реконструирана пред  речиси една година, но веднаш беше забележано дека има опасност од поткопување на улицата и од оголување на инсталациите бидејќи веднаш до улицата, Азманов има добиено дозвола за изградба на хотел, за што веќе неколку години стои ископана огромна дупка длабока неколку метри. За опасноста од свлечиштето, за оголената инсталација и за опасноста за возила и за пешаци, неколкупати во текот на минатата година надлежните го известуваа бизнисменот Азманов, кој ветуваше дека ќе го реши проблемот“, пишува во соопштението од Општина Центар.