!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Груевски им се пожали на амбасадорите дека власта ги злоупотребувала институциите


Скопје, 12 октомври, 2017 - 19:53 (META) 

Лидерот на ВМРО-ДПМНЕ, Никола Груевски, денеска имал средба со амбасадорите на САД, на државите членки на Европската Унија и на НАТО во земјава, на која од страна на партијата било посочено дека во текот на кампањата се забележени низа прекршувања на изборниот процес, физички инциденти, демолирања на штабови, како и злоупотреба на државните ресурси во партиски цели.

Од ВМРО-ДПМНЕ, како што се наведува во соопштението, било истакнато дека е неминовно „власта да престане со злоупотребите на државните институции за да се запази демократијата“.

„Од страна на ВМРО-ДПМНЕ исто така беше истакната потребата од спроведување на фер и демократски избори, за што е потребен зголемен ангажман на државните институции. ВМРО-ДПМНЕ ќе остане посветена во заложбата за спроведување на фер и демократски избори и создавање на демократски амбиент за сите учесници во изборниот процес. ВМРО-ДПМНЕ е убедена дека претстојните локални избори мора да бидат по највисоките стандарди, за Република Македонија да продолжи да чекори по патот кон ЕУ и НАТО“, стои во соопштението од ВМРО-ДПМНЕ за средбата.

Ова е втора средба на Груевски со амбасадорите во пресрет на локалните избори. На 19 септември, тој со членови на извршниот комитет на партијата имаше средба со амбасадорите на земјите членки на ЕУ во Македонија и со претставници на ОБСЕ/ОДИХР, на која, меѓу другото, побара „Владата активно да се ангажира за создавање демократски амбиент за одржување на локалните избори“.


План за намалување на институционалната затвореност во Македонија и во регионот


Скопје, 11 август, 2017 - 13:30 (META) 

„Сеопфатен план за добро владеење за државните институции во Република Македонија“ е најновото издание изработено врз основа на истражувањето за степенот на отвореност на институциите во шест земји од регионот во рамки на проектот АКТИОН СЕЕ – Одговорност, технологија и мрежа на институционална отвореност во Југоисточна Европа, кој го спроведува Фондацијата за интернет и општество „Метаморфозис“.

За да се измери степенот на институционалната отвореност, партнерите од АКТИОН СЕЕ, ги оценуваа институциите врз основа на: пристап до информации на официјалните веб-страници на институциите, квалитет на правната рамка за одделни прашања, други извори на информирање на јавноста, како и прашалници доделени на институциите.

Резултатите од истражувањето спроведено од октомври до крајот на декември 2016 година покажуваат дека просечната отвореност на извршната власт, вклучувајќи ги Владата, министерствата и другите извршни органи, во Македонија изнесува 36 отсто, a во регионот – 47 отсто. Македонското Собрание, пак, исполнува 59 проценти од индикаторите на отвореност, што е исто под просекот од 63 отсто отвореност на парламентите во регионот.

Судовите кај нас исполнуваат 52 проценти од индикаторите на отвореност, додека Судскиот совет е незначително подобар и исполнува 58 отсто од индикаторите на отвореност. Општините исполнуваат само 34 проценти од индексот на отвореност.

Врз основа на следењето на податоците и на наодите, се создаде сет на практични предлози за подобрување на степенот на отвореност на државните институции во Македонија, но и во Србија, Црна Гора, Албанија, Косово и во Босна и Херцеговина.


Кадровските смени, една од темите на денешната седница на Владата


Скопје, 31 јули, 2017 - 15:36 (META) 

Владата денеска ќе ја одржи својата 18. седница со почеток во 18 часот.

„На денешната седница Владата ќе разгледа и констатира состојби за напредок на земјата во процесот на европска интеграција, користење и имплементација на ЕУ-фондовите и статусот на реализација на приоритетите на Република Македонија за влез во НАТО, а ќе ја разгледа и информацијата за имплементацијата на Рамковниот договор“, се вели во соопштението на Владата.

На седницата ќе се разгледаат и ќе се донесат повеќе одлуки во однос на извештаи од работата на повеќе јавни државни претпријатија и агенции и неколку предлози за кадровски решенија.

На денешниот дневен ред пред министрите ќе се најде и предлог-законот за ратификација на спогодба за соработка помеѓу Владата  и Советот на министрите на Босна и Херцеговина во процесот на пристапување во Европската Унија.

„Ќе биде разгледан и извештајот за завршените преговори за потпишување протокол помеѓу македонската и косовската влада за начинот на изработка на урбанистичко-планска и соодветна техничка документација, поделба на режимски трошоци и заеднички трошоци за одржување на заедничкиот објект, како и вршење на граничната контрола на заедничкиот граничен премин помеѓу двете земји наменет за меѓународен сообраќај Белановце – Станчиќ“, се додава во соопштението од Влада.


ВМРО-ДПМНЕ ќе побара информации за новите вработувања во институциите


Скопје, 22 јули, 2017 - 13:11 (META) 

Пратениците на ВМРО-ДПМНЕ и на Коалицијата за подобра Македонија ќе поднесат барање да им се достават информации за тоа колку нови луѓе се ангажирани или вработени во државните институции на определен, неопределен период, засновале работен однос врз основа на договор за дело, авторски или друг договор, информираше на денешната прес-конференција пратеникот од ВМРО-ДПМНЕ, Драган Данев.

Тој додаде дека во согласност со Законот за слободен пристап до информации од јавен карактер, ќе бараат да им биде доставена оваа информација бидејќи „јавноста секојдневно е бомбардирана со вработувања на партиски војници, членови на таканаречената „Шарена револуција“ и лица кои се во директни роднински релации со функционери од власта.“

– СДСМ дури и во ребалансот на буџетот кој е во собраниска процедура има предвидено повеќе средства за партиски вработувања во рамките на министерствата. Во буџетот има допoлнителни 12 милиони денари за привремени вработувања во Владата, односно буџетот е направен за да одговори на основната желба на СДСМ за партизација на институциите – изјави Данев.


Тевдовски: Долгот на државните институции изнесува 363 милиони евра


Скопје, 20 јули, 2017 - 14:05 (META) 

Долгот на државните инстутиции заклучно со 31 мај годинава изнесува 363 милиони евра, информираше денеска министерот за финансии, Драган Тевдовски.

Тој додаде дека прегледот на неплатените обврски е изработен врз основа на податоци кои буџетските корисници, фондови, јавни претпријатија и општини ги доставиле до Министерството и оттука не може да се гарантира нивната веродостојност.

– Неплатените обврски на буџетските корисници изнесуваат 5,1 милијарди денари, на фондовите – 30 милиони денари и на локалните установи финансирани преку блок-дотации – 833 милиони денари – изјави Тевдовски.

Најголем долг има во областа на културата, во износ од 2,4 милијарда денари. Тука, неплатените обврски се за изградбата на салата на Филхармонија, Драмски театар, објектот на Музеј „Мајка Тереза“ и театарот во Велес.

Неплатените обврски на јавните здравствени установи, изнесуваат 3,2 милијарда денари. Најголеми се долговите на Институтот за трансфузиона медицина (283 милиони денари), Градска болница „8 Септември“ (226 милиони денари), Клиниката за хируршки болести „Св. Наум Охридски“ (201 милиони денари).

– Јавните претпријатија имаат неплатени обврски во износ од 6 милијарди денари. Најголеми се во „МЖ Транспорт“, која должи 2,439 милиони денари, МЕПСО (977 милиони денари) и „Македонија пат“ (779 милиони денари), која должи врз основа на неплатен данок – додаде Тевдовски.

Општините имаат неплатени обврски во износ од 4,6 милијарди денари, а најголеми долгови имаат Општина Охрид (719 милиони денари), Општина Тетово (499 милиони денари) и Општина Карпош (476 милиони денари).

Министерот за финансии информираше дека во моментов се договара со Светска банка за да се најде начин како да се намират овие обврски. Истовремено, Министерството за финансии планира надоградба на софтверот за неплатените обврски да бидат системски евидентирани и да се гледаат во реално време.


Заев за знамето во кабинетот на Џафери: Ако се случила грешка, треба да се поправи


Скопје, 4 мај, 2017 - 13:04 (META) 

Постојат можности до крајот на месецот да биде формирана новата влада, согласно роковите, но зависи од одлуката на Ѓорге Иванов како и од техничката подготвеност на Собранието, изјави лидерот на СДСМ, Зоран Заев, по средба со претставници на ОБСЕ во „Холидеј Ин“.

Тој додаде дека е подготвен да се сретне со Иванов и да му ја гарантира унитарноста и сувереноста на државата. Заев исто така рече дека на средбата побарале ОБСЕ да се вклучи и да помогне во идните процеси на државата.

– Јас верувам дека ОБСЕ може да бидат од голема помош пред се во реформите што претстојат државните институции, правосудството, во тајните служби, во МВР, па дури и реформите во медиумите и тие може да бидат од голема помош во стабилизација на земјата, функционирање на институциите и гаранција дека никогаш повеќе нема да се случат вакви настани – изјави лидерот на СДСМ.

Заев рече дека повредените пратеници од редовите на СДСМ до сега не биле повикани во Јавното обвинителство да сведочат и апелираше државните институции соодветно да постапуваат. Според него кривичното дело Учество во толпа за кое што се гонат осомничените, не е тоа што се случило во Собранието во четвртокот.

На новинарско прашање што мисли за поставувањето на албанското знаме во кабинетот на претседателот на Собранието Талат Џафери, Заев порача да се почитуваат законите и Уставот и дека секој треба да има правна и политичка одговорност без разлика дали се работи за нивниот коалиционен партнер.

– Законите во Македонија се јасни и тие треба да се почитуваат. Ако се случила некаква грешка, се надевам ќе се поправи. Треба сите наши политички преокупации да ги ставиме во секундарно или терцијарно значење, мораме да испратиме порака дека Уставот и законот не може повеќе да се газат во Македонија и тоа да се покажува како патриотски чин – додаде Заев.


„Еден“: Граѓаните не се информирани за инфраструктурните проекти на Галичица


Охрид, 24 април, 2017 - 16:45 (META) 

Граѓаните немаат слушнато за бизнис-планот за националниот парк Галичица, покажува анализата на здружението за заштита на животните и на животната средина „Еден“.

Според Драгана Велковска од ова здружение, државните институции сметаат дека нема потреба од нова или дополнителна законска регулатива за заштита на Галичица, но потребно е доследно спроведување на постојната.

Повеќе од половината институции сметаат дека акциските планови се спроведуваат, а другите сметаат дека се спроведуваат селективно.

– Во однос на Законот за водите, воопшто не се почитува како што можевме да посведочиме и со последниот случај со хотелот во Лагадин, каде што се изгради една огромна градба која прекршуваше најмалку 12 закони, еден подзаконски акт и Уставот. Се изгради не на речиси 50 метри, туку на можеби 10-15 метри од брегот на езерото – рече Велковска.

Речиси 89 проценти од испитаниците од државните институции се изјасниле дека сметаат дека Студечнишкото Блато треба да се прогласи за споменик на природата, додека сите анкетирани граѓани недвосмислено одговориле дека тоа треба да се заштити.

Понатаму, 43,5 проценти од граѓаните се изјасниле дека Охрид воопшто нема потреба од пристаниште. Доколку веќе се гради, сите сметаат дека не смее и не треба да се гради кај Студенчишко Блато. На 69 проценти не им се допаѓаат тековните градежни зафати долж каналот Студенчишта.

Граѓанските организации сметаат дека е потребен посебен закон за заштита на Охридското Езеро и да се прогласи за национален парк, да се забрани сеча во националните паркови, а пловните објекти да бидат на некаков вид еколошко гориво.


СДСМ: Институциите да не подлегнуваат на насилните сценарија на Груевски


Скопје, 10 април, 2017 - 9:47 (META) 

Никола Груевски не смее да се заканува со насилство, тоа е противуставно и дело казниво по закон, порачуваат од СДСМ во утринското соопштение. Од партијата нагласуваат дека многу бргу ќе биде избран новиот претседател на Собранието, а потоа и „новата реформска влада на унитарна Македонија, во согласност со деловникот, Уставот и со законите во Република Македонија“.

„Груевски не е народот. Тој не е фактор. Граѓаните се фактор, а тие избраа заедништво, правда и промени и тие ќе се случат. Мирен трансфер на власта е врвен државен интерес на граѓаните и на Македонија! Секој кој ќе се обиде да ја попречи волјата на мнозинството и да дејствува спротивно на државните интереси, ќе се соочи со својата одговорност“, стои во соопштението на СДСМ.

Оттаму нагласуваат дека Груевски има „интерес да ја дестабилизира државата затоа што се надева дека така ќе избегне одговорност за криминалот“.

„Укажуваме на институциите и на вработение во нив, дека има ново парламентарно мнозинство и дека се должни да ги овозможат демократските процеси во согласност со мнозинската волја на граѓаните од изборите. Никола Груевски и ВМРО-ДПМНЕ се опозиција“, порачуваат од СДСМ.


Што сè бара СЈО, а институциите не му даваат?


Скопје, 20 јануари, 2017 - 13:38 (META) 

Одбивањето на Основниот суд 1 на СЈО да му го достави записникот од спогодбата на Звонко Костовски е една од многуте опструкции или несоработки со кои се соочува кабинетот на Катица Јанева.

Претходно, Судот го одби барањето на СЈО да издаде судски налог, во рамките на случајот „Таргет“, за претрес на компјутерските системи во еден од телекомуникациските оператори, не издаде налог за одземање компјутери од УБК и инсистира СЈО да добие дозвола за користење на класифицираните податоци во судскиот процес за „Тврдина 2“. Во оваа низа влегуваат и одбивањата да му се дадат на СЈО предмети за случаите „Маѓар телеком“ и „Сопот“, како и одбивањата на најголем дел од барањата за притвор.

Ова се случува иако државните институции имаат законска обврска да соработуваат и да му помагаат на Специјалното јавно обвинителство, кое, според законот со кој е уредена неговата работа, меѓу другото, има право да врши „преглед на сите достапни документирани докази од кој било извори“ и на „добивање на сите безбедносни ослободувања за преглед на доверливи информации и информации кои не се достапни за јавноста“.

„По писмено барање од Јавно обвинителство (СЈО, н.з.), јавните обвинителства (редовните, н.з.) се обврзани, во рок од 8 дена, да предадат кој било предмет по кој постапуваат за да се одлучи дали предметот спаѓа во надлежноста на специјалниот јавен обвинител, согласно неговите/нејзините овластувања определени со овој закон“, стои во ставот 2 од членот 11 на Законот за СЈО.

Ваквата континуирана несоработка беше нотирана и во Извештајот на Европската комисија за напредокот на земјава, во кој беше наведено дека „работата на СЈО продолжува во практика да биде попречувана и да е постојана мета на критики од Советот на јавни обвинители и од владејчката партија (ВМРО-ДПМНЕ, н.з.)“.

„Работата на Специјалното јавно обвинителство не смее да биде опструирана. Во годината што следува, земјата треба да овозможи целосна поддршка и ресурси за Специјалното обвинителство“, се додава во извештајот на Европската комисија.

Еве ги институциите и опструкциите со кои се соочува СЈО:

Основен суд Скопје 1 (Кривичен суд)

  • Го одби барањето на СЈО да издаде судски налог, во рамките на случајот „Таргет“, за претрес на компјутерските системи во еден од телекомуникациските оператори заради обезбедување податоци и докази во врска со телефонските броеви што биле цел на незаконското следење на комуникациите;
  • Го одби барањето на СЈО за одземање компјутери од Управата за безбедност и контраразузнавање (УБК);
  • Одби најголем дел од барањата за притвор и за други мерки против дел од досега осомничените во случаите што ги води СЈО;
  • Одбива да го достави записникот од спогодбата на Звонко Костовски, осуден во случајот „Пуч“ за помагање, со кој тој ја признава вината.

Јавно обвинителство и Совет на јавни обвинители одбиваат на СЈО да му ги додат предметите за:

  • „Сопот“ – судски процес во врска со подметнатата експлозивна направа, од која во 2003 година загинаа двајца припадници од контингентот на НАТО и еден македонски државјанин, за што подоцна беа осудени 11 Албанци;
  • „Маѓар телеком“ – случај во кој поранешни високи државни функционери се осомничени дека примиле поткуп за да не дозволат влез на трет мобилен оператор во земјава пред десетина години;
  • Случај „Верушевски“ – предмет против поранешниот директор на УБК, Зоран Верушевски, за незаконско поседување оружје, и против неговиот син, кој се товари за производство и за диструбиција на детска порнографија;
  • Предметот против новинарот и сопственик на порталот „Буревесник“, Зоран Божиновски, кој е поврзан со случајот „Шпион“.

Претходниот состав на Собранието, односно пратениците на ВМРО-ДПМНЕ, одбија:

  • Да го поддржат продолжувањето на мандатот, односно рокот за истраги и за поднесување обвиненија на СЈО;
  • Да ги усвојат измените на Законот за заштита на сведоци што ги бараше Јанева.

Партиите ја злоупотребуваат државата и политички дискриминираат


Скопје, 8 ноември, 2016 - 12:59 (META) 

Нема јасно разграничување помеѓу партиите и државата, се злоупотребува државниот систем и постои политичка дискриминација, а со тоа се прекршуваат низа закони, е заклучокот од конференцијата „Одвојување на државата од политичките партии“, организирана од граѓанската асоцијација „Мост“.

Уставната судијка Наташа Габер-Дамјановска вели дека во Македонија постои политичка дискриминација и дека луѓето се дискриминираат бидејќи припаѓаат или не припаѓаат на одредена политичка партија.

– Постои значително поголема можност за вработување на оние кои се членови на политичките партии на власт. Страшно е што јавноста со години е научена така да функционира и тоа се прифаќа како нормално, а прекршува цел корпус закони. Целиот систем се извитоперува и го голта државниот апарат, не се почитува мерит-системот, а тоа е закана за уништување на врзивното ткиво на ова општество – вели Габер-Дамјановска.

Уставната судијка смета дека крајно време е државата да ги заштити граѓаните од ваквите притисоци, но и дека граѓаните можат да влијаат со тоа што ќе издигнат поголема свест и ќе ги пријавуваат поткупувањата и притисоците.

Во Македонија има добри закони, но тие не се применуваат во реалноста, а проблематично е и финансирањето на политичките партии, смета Френк Хантке, раководител на канцелариите на фондацијата „Фридрих Еберт“ во Скопје и во Тирана.

– Балканските држави се движат кон автократија. Треба да е јасно дека владата не е составена од политички партии кои им служат на гласачите што ги донеле на власт. Власта треба да им служи на сите граѓани, затоа што сите граѓани ги имаат истите права. Исто така, важен е начинот на финансирање на политичките партии. Како е можно една партија од Македонија да е многу побогата од најбогатата партија во Германија кога партиите во Македонија не добиваат пари од членарина? Мора јасно да се знае од каде доаѓаат парите – вели Хантке.

Македонија има потпишано конвенции и декларации кои се залагаат за борбата против корупцијата, правото на еднаквост, правото на фер избори, владеењето на правото, но сепак се забележува непочитување на овие заложби, заклучи Ендрју Елис, уставен експерт и експерт за избори.