Бошњаковски: Лидерската средба може да го одблокира формирањето на ДИК


Скопје, 17 јули, 2018 - 14:59 (META) 

Измените на Изборниот законик кои се веќе во собраниска процедура, и со кои изборот на членовите на Државната изборна комисија (ДИК) би се вршел со мнозинство од 61 пратеник, наместо двотретинско мнозинство како досега, ќе влезат во процедура ако утре на лидерската средба не се постигне политички консензус за ДИК, рече владиниот портпарол Миле Бошњаковски.

На редовната прес-конференција во Владата на која информираше за владиниот предлог-закон за измена на Изборниот законик, одговарајќи на новинарско прашање, Бошњаковски рече дека новиот состав на ДИК би се формирал во многу скоро време.

– Измените се доставени во Собранието, утре е лидерската среда. Да го видиме резултатот од неа, но мислам дека во многу скоро време може да очекува формирање на ДИК. Или утре ќе има политички консензус или измените влегуваат во процедура – рече Бошњаковски.


Објавен оглас за членови на ДИК чиј мандат ќе трае шест месеци


Скопје, 5 јуни, 2018 - 9:41 (META) 

Оглас за нови членови на Државната изборна комисија (ДИК) за следните шест месеци е објавен денеска во весниците, откако Собранието во петокот донесе одлука за распишување на оглас за избор на нови членови на ДИК. Ова ќе биде привремен состав на Комисијата, бидејќи до есен се очекува да биде изготвено новото изборно законодавство, со кое ќе биде опфатен и составот на ДИК.

Огласот за претседател, заменик-претседател и петмина членови на Комисијата трае осум дена од денот на објавување во „Службен“ весник“.  По завршувањето на огласот собраниската Комисија за прашања на изборите и именувањата треба да подготви предлог листа.

Претседателот на Собранието ги известува партиите што освоиле најмногу гласови на последните избори во рок од три дена од денот на приемот на известувањето да му достават предлог за членови на ДИК.

Претседателот на привремениот состав и двајца членови на ДИК ќе треба да го делегира опозицијата, а партиите на власт да предложат потпретседател и тројца членови.

Членовите на ДИК ќе ги избира Собранието со двотретинско мнозинство гласови од вкупниот број пратеници.

Лицето кое ќе биде избрано за член на ДИК треба да е државјанин на Република Македонија со постојано место на живеење во земјата, да има завршено високо образование со најмалку осум години работно искуство и да не е член на орган на политичка партија.

На избраните претседател, потпретседател и членови на Комисијата од денот на изборот работниот однос ќе им мирува.

Засега нема информации кој ќе биде во составот на ова привремено изборно тело. Партиите се уште не ги соопштуваат можните кандидати кои би ги поддржале, ниту, пак, има информација, каква ќе биде поделбата на местата кај владејачките партии на Албанците ДУИ, Беса и ДПА.

За ваквото решение за шестмесечен привремен состав на ДИК беа согласни сите парламентарни партии и измените на Изборниот законик, во делот на ДИК беа донесени едногласно.


Собранието го донесе законот за ДИК со шестмесечен мандат


Скопје, 22 мај, 2018 - 15:19 (META) 

Со 80 гласа за, без гласови против, Собранието го донесе Предлог – законот за изменување на Изборниот законик, по скратена постапка, со кој ќе се воспостави привремен состав на Државната изборна комисија (ДИК).

Со овој закон, кој беше договорен од власта и од опозицијата, а беше поднесен од пратениците Томислав Тунтев, Драган Данев, Ејуп Алими и Африм Гаши, координатори на пратеничките групи на СДСМ, ВМРО-ДПМНЕ, ДУИ и Беса, се предвидува во ДИК во следните месеци да  нема членови – експерти, а мандатот на членовите да биде шест месеци, до есен, за кога се предвидуваат повеќе измени на закони што се однесуваат на изборите.

Образлагајќи ја потребата да се донесе законот по скратена постапка, Тунтев вчера рече дека тој е изготвен во договор и на власта и на опозицијата, со цел да се овозможи изјаснување на граѓаните. Тој појасни дека измените што заеднички ги доставуваат двете спротивставени страни е шестмесечен мандат за седум члена на ДИК, при што потпретседателот на ДИК и три члена ќе ги предлага власта, а претседателот и два члена опозицијата.


Направен првиот чекор кон формирање на привремена Државна изборна комисија


Скопје, 21 мај, 2018 - 12:26 (META) 

Со прифаќањето по скратена постапка да се донесе предлог-законот за изменување и дополнување на Изборниот законик, 86 пратеници и од владејачката коалиција и од опозицијата, денеска ја почнаа постапката за нов состав на Државната изборна комисија (ДИК), кој ќе има мандат од шест месеци. Во него не се предвидуваат експерти, туку само партиски делегирани членови.

Предлог-законот беше предложен од координаторите на пратеничките групи на СДСМ и на ВМРО-ДПМНЕ, Томислав Тунтев, Драган Данев и од координаторите на пратеничките групи на ДУИ и БЕСА. Образлагајќи ја потребата да се донесе законот по скратена постапка, Тунтев рече дека тој е изготвен во договор и на власта и на опозицијата, со цел да се овозможи изјаснување на граѓаните.

– Сите сме сведоци дека од објективни причини ДИК во моментов не постои, а е неопходно да се најде начин ДИК да биде што поскоро ставена во функција. Надлежностите на ДИК не се само за изборни циклуси, туку и со други начини за изјаснување на граѓаните. Со опозцијата најдовме заеднички јазик за преодно решение до есен, кога ќе се случат големи измени, со пакет закони од изборното законодавство – рече Тунтев.

Тој рече дека измените што заеднички ги доставуваат двете спротивставени страни е шестмесечен мандат за седум члена на ДИК, при што потпретседателот на ДИК и три члена ќе ги предлага власта, а претседателот и два члена опозицијата.

Откако пратениците го прифатија предлогот, претседателот на Собранието, Талат Џафери го пушти законот на комисиска расправа.


Судот прифати една тужба на ВМРО-ДПМНЕ за Сарај, ДИК ќе каже дали ќе има прегласување


Скопје, 24 октомври, 2017 - 11:03 (META) 

Управниот суд уважи една жалба од 28-те поднесени тужби против приговорите одбиени од Државната изборна комисија (ДИК) за гласањето и за сумирањето на резултатите од првиот круг од локалните избори што се одржа на 15 октомври.

Управниот суд ги објави одлуките по сите тужби од партиите на својата веб-страница, според кои уважена е една тужба поднесена од коалицијата предводена од ВМРО-ДПМНЕ за поништување на гласање на избори за членови на Советот на Град Скопје, на гласачкото место 2461 во општина Сарај.

Сите други тужби Управниот суд ги одбил како неосновани.

Инаку, тужби до Управниот суд за одбиените приговори од ДИК поднесоа ВМРО-ДПМНЕ, вкупно 24, а по една – ТМРО, Левица и Алијанса за Албанците.

По добивање на одлуката од Управниот суд, ДИК треба да се изјасни дали прегласувањето во избирачкото место 2461 во Сарај ќе има влијание врз изборниот резултат и дали врз основа на тоа ќе има прегласување на ова избирачко место.

Одлуките на Управниот суд се конечни.

По тужбите на партиите одлучуваа пет судечки совети, секој составен од пет судии, избрани со жрепка. Управниот суд објави дел од одлуките во текот на вчерашниот ден, но поради проблеми со компјутерскиот систем, како што беше соопштено од судот, другите 12 одлуки беа објавени ноќеска.

Вториот круг од локланите избори за градоначалници во 35 општини ќе се оджри в недела, на 29 октомври.


ВМРО-ДПМНЕ: Заев не може да го сокрие фактот дека изборите беа криминални


Скопје, 22 октомври, 2017 - 18:20 (META) 

„Ова се први избори во кои беше убиен директен учесник во изборниот процес. На кандидат за градоначалник му беше скршен черепот, а секојдневно пристигнуваат сведочења за закани со оружје, заплашувања и за поткуп“, се вели во реакцијата на ВМРО-ДПМНЕ на денешната изјава на лидерот на СДСМ и премиер, Зоран Заев, во Кавадарци.

„Лагите на Заев нема да го покријат фактот дека се одржаа најкриминалните избори досега. ДИК беше ставена под целосна партиска контрола, а нејзините членови, кои не ги слушаа наредбите на Заев, беа заплашувани со пријави и со обвиненија од СЈО. Ваквите криминални дејства еден ден ќе се истражат, документираат и за нив ќе има одговорност. Кавадарци ќе има можност да го даде својот глас против криминалот и лагите на Зоран Заев на 29 октомври“, стои во соопштението.


Поднесени 27 жалби до Управниот суд за одбиените приговори од ДИК


Скопје, 22 октомври, 2017 - 10:18 (META) 

Вкупно 27 жалби се поднесени до Управниот суд од партиите ноќеска против решенијата на Државната изборна комисија (ДИК) за приговорите за првиот круг од локалните избори, што се одржа на 15 октомври, соопшти судот.

Инаку, рокот за за поднесување жалби за одбиените приговори од ДИК истекува денеска во 11 часот.

Најмногу тужби поднела ВМРО-ДПМНЕ, вкупно 24, две жалби се од ТМРО и една од Левица.

Управниот суд има рок од 48 часа во кој треба да донесе одлука по жалбите.

По тужбите ќе одлучуваат пет судечки совети, составени од петмина судии од Управниот суд, избрани со жрепка. Тужбите електронски им се распоредуваат на судиите, а одлучувањето ќе биде на јавни седници.

Управниот суд вчера ја отфрлил тужбата од Ѓорѓи Шарковски против „државната администрација во Кривогаштани“ поради оневозможување на собирање потписи за градоначалник и за членови на совет во Општина Кривогаштани.

Во меѓувреме тече кампањата за вториот круг од локалните изборите. Ноќеска на полноќ заврши рокот за поднесување барања за гласање на болни и изнемоштени лица.

Вториот круг од локалните избори ќе се одржи на 29 октомври.


ВМРО-ДПМНЕ до Управниот суд ќе поднесе жалби за сите приговори одбиени од ДИК


Скопје, 21 октомври, 2017 - 13:25 (META) 

ВМРО-ДПМНЕ ќе го искористи правото на жалба пред Управниот суд за сите приговори за локалните избори на 15 октомври, што беа одбиени од Државната изборна комисија, соопштија денеска од опозициската партија, додавајќи дека нема да дозволат некој да ја уништува демократијата и правната држава во Република Македонија.

Рокот за поднесување жалби до Управниот суд е 24 часа и истекува вечерва, имајќи предвид дека ДИК синоќа им ги достави решенијата на политичките партии за чии приговори одлучуваше. Откако ќе ги добие приговорите, Управниот суд има рок од 48 да одлучи по нив.

Од ВМРО-ДПМНЕ обвинуваат дека СДСМ ги организирала најнедемократските избори во историјата на независна Македонија и дека целата изборна кампања поминала во изборен поткуп, уцена и со закани врз гласачите, додека во текот на изборниот ден бил спроведен и т.н. бугарски воз, односно гласачките кутиите биле полнети со гласачки ливчиња однапред заокружени за СДСМ.

Партијата ја обвини и ДИК дека станала соучесник во сето тоа, „занемарувајќи и релативизирајќи очигледни факти и докази, со што се стави во функција на прикривање на изборните криминали на СДС“.

„ВМРО-ДПМНЕ ги повикува ОБСЕ/ОДИХР да ги нотираат овие очевидни случаи на криминал, да застанат на страна на демократијата, правото на глас и на слободата како врвни вредности на цивилизираниот свет“, се додава во соопштението.

Државната изборна комисија ги одби сите приговори поднесени за гласањето и за сумирањето на резултатите од првиот круг на локалните избори, од кои 40 беа поднесени од ВМРО-ДПМНЕ и по еден од ТМРО, Алијанса за Албанците и од Левица.


ДИК на маратонската седница ги одби сите приговори за изборите


Скопје, 20 октомври, 2017 - 10:09 (META) 

Државната изборна комисија (ДИК) ги одби сите приговори поднесени за гласањето и сумирањето на резултатите од првиот круг на локланите избори кои што се одржаа во неделата, на 15 октомври.

Портпаролката на ДИК, Љупка Гугучевска за „Мета“ изјави дека маратонската седница, која почна вчера околу 10 часот претпладне, завршила утрово и дека сите приговори се одбиени.

ДИК одлучуваше по вкупно 43 приговори, од кои 40 беа поднесени од ВМРО-ДПМНЕ, и по еден од ТМРО, Алијанса за Албанците и Левица.

Против одлуките на ДИК, партиите во рок од 24 од приемот на решенијата можат да поднесат жалба до Управниот суд, кој, пак, е должен по приемот на жалбата да донесе одлука во рок од 48 часа.

Вториот круг на локалните избори ќе се одржи на 29 октомври.

Инаку, седницата на ДИК за разгледување на приговорите до најголем дел помина во жестоки расправии меѓу членовите на Комисијата од СДСМ и од ВМРО-ДПМНЕ.

Комисијата за дел од приговорите на ВМРО-ДПМНЕ констатираше дека се полни со технички грешки, кои се повторуваат, односно наместо имињата на општините во кои се наоѓаат избирачките места за кои се однесува приговорот, беше наведено името на друга општина. Претставниците на подносителот ВМРО-ДПМНЕ, беа согласни дека има грешки во приговорите, но, бараат ДИК и покрај тоа да одлучува по нив по службена должност бидејќи имало неправилности.


ДИК го проби рокот за одлучување, досега решени само седум приговори


Скопје, 19 октомври, 2017 - 21:50 (META) 

Државната изборна комисија го проби рокот од 48 часа за разгледување и одлучување по приговорите од политичките партии за изборите, кое требаше да заврши вечерва во 19 часот.

Ова, во текот на седницата, која сè уште е во тек и на која има жестоки расправии меѓу членовите од СДСМ и од ВМРО-ДПМНЕ, го спомена и претседателот на Комисијата, Александар Чичаковски, како и членот на ДИК од СДСМ, Игор Милев.

Во моментов се пребројуваат ливчиња од гласачко место во Чаир за да се утврди дали се 406 или 409, во врска со приговорот од ВМРО-ДПМНЕ за поголем број ливчиња во гласачката кутија од бројот на запишани избирачи.

Претходно ДИК отфрли уште два приговори од ВМРО-ДПМНЕ за две избирачки места во Кривогашатни и за едно изборачко место во Аеродром. И во овие два приговори, како и во претходните, се повторуваше грешката со локацијата на избирачките места, односно наместо за избирачки места во општина Кривогаштани и во општина Аеродром беше наведена општина Прилеп.

Комисијата ќе чека да пристигне и општинска изборна комисија од Струга за да објасни зошто не е забележано дека на едно избирачко место гласал граѓанин што не бил во избирачкиот список и не се потпишал во него.

Од вкупно 43 приговори, ДИК на денешната седница досега успеа да разгледа само десет, сите од ВМРО-ДПМНЕ. Од нив отфрли седум, а постапката за трите приговори сè уште е во тек.

За разгледување остануваат уште 30 приговори на ВМРО-ДПМНЕ и по еден од ТМРО, Алијанса за Албанците и на Левица.