Во Полошко полицијата привела 48 странски државјани со нелегален престој


Тетово, 14 ноември, 2018 - 12:14 (META) 

Полициските службеници на Секторот за внатрешни работи Тетово ноќеска од полноќ до 2 часот и 30 минути, спровеле акциска контрола во угостителски објект во тетовско Горно Седларце.

Таму биле затекнати осум женски лица, од кои пет од Република Албанија и три македонски државјанки. Албанските државјанки на возраст од 25 до 45 години, кои во објектот ги забавувале гостите, приведени се во Полициската станица Тетово, по што се предадени во Отсекот за прекуграничен криминал, миграции, странци и реадмисија за натамошна постапка, информираат од СВР Тетово.

Во истиот период, спроведена е акциска контрола и во угостителски објект во Желино, во кој биле затекнати шест женски лица, од кои една од Република Косово и пет македонски државјанки. Косовската државјанка на возраст од 23 години приведена е и предадена за натамошна постапка.

Во период од 4 до 7 часот, акциска контрола се реализирала и во неколку објекти во Гостивар. Биле откриени и приведени 14 албански државјани на различна возраст од 17 до 57 години. Спроведена е контрола и во неколку гостиварски села, кае што откриени се 28 албански државјани со нерегулиран престој во земјава, соопштија од СВР Тетово.


Стапи на сила забраната за патување на Американци во Северна Кореја


Вашингтон, 2 септември, 2017 - 10:46 (META) 

Стапи на сила забраната за американските државјани да патуваат во Северна Кореја. Властите соопштија дека граѓаните може да бараат исклучоци, но дека малку од нив ќе добијат.

Забраната за патување во јули ја најави државниот секретар, Рекс Тилерсон, по смртта на американскиот студент Отоа Вармбир, осуден во Северна Кореја затоа што украл пропаганден плакат.

Американците кои имаат оправдана причина да патуваат во Северна Кореја и понатаму може да одат, но под „исклучиво ограничени“ околности, соопшти Стејт департментот, додавајќи дека тие државјани мораат да докажат дека нивниот пат е во национален интерес на САД.


Државјаните од земјите што ги прекинаа односите со Катар, може да останат во таа држава


Доха, 11 јуни, 2017 - 15:36 (META) 

На државјаните на земјите што ги прекинаа односите со Катар, ќе им биде дозволено да останат во таа држава, јавуваат странските медиуми.

„Доха нема да преземе никакви мерки против оние граѓани што потекнуваат од државите што ги прекинаа или ги ограничија дипломатските односи со Катар“, се вели во соопштението објавено во странските медиуми.

Оваа одлука ќе влијае на повеќе од 11.000 лица кои потекнуваат од Саудиска Арабија, Обединетите Арапски Емирати и од Бахреин, а живеат во Катар.

Овие земји заедно со Египет ги прекинаа дипломатските односи со Катар, обвинувајќи дека таа држава ги поддржува регионалните терористички групи.


Федералниот суд привремено го суспендираше указот на Трамп


Вашонгтон, 29 јануари, 2017 - 16:35 (META) 

Судија во американскиот Федерален суд привремено ја запре депортацијата на луѓето со визи или на бегалци, кои останале заробени на разни аеродроми низ светот, по најновиот указ на претседателот на САД, Доналд Трамп, дека државјани од Иран, Ирак, Либија, Сомалија, Судан, Сирија и од Јемен не можат да влезат во САД.

Одлуката била донесена врз основа на тужбата на американската Унија за граѓански слободи, што беше поднесена веднаш по потпишувањето на претседателскиот указ.

Според информациите од Унијата, околу 200 лица останале заробени по аеродромите или во транзитните зони, затечени со указот на Трамп.

Дестици илјади луѓе демонстрираа пред аеродромите во повеќе градови на САД против оваа одлука на претседателот.


Трамп потпиша указ со кој во САД се забранува влез на државјани од седум муслимански земји


Вашингтон, 28 јануари, 2017 - 15:55 (META) 

Американскиот претседател Доналд Трамп потпиша указ со кој се забранува влез на државјани од седум муслимански земји: Ирак, Иран, Либија, Сомалија, Судан, Сирија и Јемен.

При потпишувањето на указот, Трамп изјавил дека неговата администрација сака поригорозен надзор над бегалците и над посетителите од одредени земји за да се спречи терористички напад.

Тој додаде дека САД сакаат да ги примат само тие луѓе што ја поддржуваат нивната земја и кои длабоко го почитуваат американскиот народ.


Бугарија бара укинување на визите од Канада за да го поддржи трговскиот договор со ЕУ


Софија, 20 октомври, 2016 - 10:23 (META) 

Бугарија нема да го поддржи трговскиот договор меѓу Европската Унија и Канада (ЦЕТА) без да има гаранции од канадската влада дека ќе ги укине визите за бугарските државјани. Одлуката била донесена на седница на бугарската влада.

Со тоа бугарската влада ќе ги брани своите интереси на Самитот во Брисел, кој се одржува денеска и утре.

Ова барање на бугарската влада е и во насока на тоа економските оператори од таа земја да бидат еднакво конкуретни како и другите земји-членки на ЕУ.


Во Германија се доселиле рекорден број државјани од земјите членки на ЕУ


Берлин, 2 јули, 2016 - 17:34 (META) 

Имиграцијата на државјани од земјите членки на Европска Унија во Германија достигна рекордно ниво. Лани, во Германија се доселиле 685.485 државјани на Романија, Полска и на Бугарија, пишува весникот „Велт“, повикувајќи се на официјални статистички податоци.

Во Германија во најголем број се доселиле Романци (174.779), Полјаци (147.910), Бугари (71.709) и Хрвати (50.646).

Како најголема економска сила во Европа, Германија има многу ниска стапка на невработеност, која изнесува 6,1 отсто и е пожелна дестинација за граѓаните од другите држави, кои бараат подобри услови за живот.


Нови апсења на шверцери на бегалци во Грција


Скопје, 22 јуни, 2016 - 10:08 (META) 

Тројца Бугари и еден Словенец се уапсени во Грција поради обид за нелегално пренесување бегалци и мигранти преку грчко-македонската граница. Вчера грчката полиција во близина на Кукуш откри комби со 25 бегалци од Авганистан, Пакистан и од Сирија, кое се движело во насока на македонската граница.

Бегалците биле откриени при рутинска проверка на возилата. Возачот на комбито успеал да избега, а полицијата уапсила тројца бугарски државјани во возило кое го следело комбито како негова заштита.

Уапсените се на возраст од 20, 21 и 25 години. Веднаш биле изведени пред обвинител и се товарат за учество во мрежи за нелегален шверц на бегалци.

Во понеделникот во Солун полицијата откри уште еден обид за нелегален пренос на бегалци. Во западните предградија на Солун бил уапсен 38-годишен Словенец, кој во украден камион пренесувал 35 бегалци и мигранти, од кои 12 малолетни лица.

Уапсениот веднаш бил изведен пред обвинител, а полицискиот распит покажал дека секој од бегалците имал платено по 1.300 евра за да бидат пренесени првично во Македонија, а потоа и кон друга европска држава.

Во Грција, според официјалните владини бројки, има околу 57.000 бегалци. Најголем број од нив, околу 24.000 лица, се во камповите во Северна Грција, околу Солун, Пиерија и Јанина.


ДИК: Македонија има вкупно 2.464.266 државјани


Скопје, 11 мај, 2016 - 10:21 (META) 

Државната изборна комисија (ДИК) синоќа едногласно го усвои извештајот за податоците од регистарот на државјани (лица со македонски пасош) на Министерството за внатрешни работи (МВР), според кој Македонија има 1.958.844 полнолетни државјани и 505.422 малолетни државјани или, вкупно, 2.464.266 државјани.

Инаку, ако денеска до полноќ, кога истекува последниот рок за доставување листи на кандидати за пратеници до Државната изборна комисија (ДИК), не пристигне ниту една кандидатска листа, Комисијата има само една можност – да ја констатира таквата состојбата.

Како што велат за „Мета“ од ДИК, тоа е новонастаната состојба, која не е предвидена во Изборниот законик. Оттаму брифираат дека доколку се реализира ова сценарио, ќе се констатира состојбата, со забелешка дека не може да се одржат избори без кандидати за пратеници, по што топката се префрла во рацете на Собранието на Република Македонија.

Дека е можно ова сценарио, завчера потврдија и извори од ВМРО-ДПМНЕ.

– Можеби и ние нема да учествуваме на изборите, ќе се откажеме, па ќе учествува некој трет, ќе освои 10.000 гласа и изборите ќе пропаднат. Или, ако странците инсистираат на некакво неповолно решение, можеби ќе излеземе од Владата, па СДСМ нека прави малцинска влада со кого сака – изјавија неофицијални извори од вадејачката партија.

Сепак, од ДИК велат дека вообичаено е партиите да ги достават кандидатските листи во последен миг или буквално пет минути пред полноќ.

Засега, ВМРО-ДПМНЕ сè уште официјално стои на ставот изборите да се одржат на 5 јуни, СДСМ нема да учествува доколку изборите се одржат, а ДУИ и ДПА официјално не се изјасниле, но ако се суди според последните постапки, тие нема да достават кандидатски листи за пратеници до ДИК.


Груевски: На избори не гласаат адресите, гласаат државјани на Македонија


Скопје, 10 март, 2016 - 19:10 (META) 

Гласачи на избори се сите лица што имаат државјанство, а не тие што живеат на онаа или оваа адреса, изјави денеска лидерот на ВМРО-ДПМНЕ, Никола Груевски, додавајќи дека СДСМ се обидува вештачки да создаде привид дека има некаков хаос и неправилности во избирачкиот список.

Според Груевски, актуелниот избирачки список е истиот во последните 20, 30 и повеќе години и дека во Македонија отсекогаш имало лица кои ги менувале адресите, а не го пријавувале тоа.

– Тоа не е некакво кривично дело. Но, тоа во овој случај се злоупотребува од СДСМ. Кривично би било доколку едно лице гласа на две места, но во овој случај немаме таква ситуација, само некој граѓанин се преселил од едно на друго место, а не ја пријавил адресата во МВР најчесто затоа што и не знае дека треба да се пријави – рече Груевски.

Лидерот на ВМРО-ДПМНЕ вели дека СДСМ се обидува да создаде привид за хаос во избирачакиот список, со една единствена цел – кога ќе дојде време за распуштање на Собранието и за поднесување на листите на пратеници, да не излезат на избори или ако излезат, по изборите да прогласат дека сè било нерегуларно и дека не ги признаваат изборите.

– Пет претседатели на ДИК ја раководеа институцијата досега и не им пречеа адресите какви што се. Не им пречеа адресите на СДСМ во 2002 година кога победија на изборите, во деведесеттите кога победуваа на избори, не пречеше ни на ВМРО кога победи во 1998 и во 2006 година, туку им текна сега. Уште еднаш повторувам дека адресите не гласаат, туку гласаат луѓе кои мора да се државјани на Република Македонија – рече Груевски.