Софија: Од Западен Балкан до ЕУ ќе се трча индивидуално, нема да се чекаат другите


Софија, 6 февруари, 2018 - 17:17 (META) 

Напредокот на секоја од земја од Западен Балкан ќе се оценува според индивидуалните постигнувања и од ниту една држава, која е подготвена за членство во Европската Унија, нема да се бара да чека друга за влез во Унија, се наведува во соопштението на бугарското Министерство за надворешни работи, во кое ја поздравува Стратегијата за Западен Балкан на Европската комисија.

„Стратегијата се однесува на сите шест држави, кои треба да ги забрзаат реформите и да изградат добрососедски односи. Напредокот ќе продолжи да се базира на индивидуалните постигнувања на секоја земја одделно, односно ниту една држава, која е готова, нема да мора да чека друга“, стои во соопштението.

Државите од регионот, се додава во него, имаат јасна временска перспектива.

„2025 година е амбициозна цел, чие исполнување налага мобилизација за решителни реформи во клучните области на политичкиот, економскиот и социјалниот живот“, велат од МНР на Бугарија, која е актуелен претседавач со Советот на Европа.


„Фајненшл тајмс“: ЕУ ќе прими шест држави од Балканот, меѓу нив и Македонија


Лондон, 2 февруари, 2018 - 18:19 (META) 

Планот на ЕУ е во своето членство да прими шест држави: Албанија, Србија, Црна Гора, Босна и Херцеговина и Македонија, но и Косово, пишува „Фајненшл тајмс“.

Според весникот, главната причина за таквиот потег на Брисел е што Балканот служи како главен „терен“ преку кој илјадници емигранти стигнуваат до тлото на Европската Унија. Меѓутоа, „Фајненшл тајмс“ тврди и дека стратезите на ЕУ стравуваат дека Русија опасно ја шири својата зона на влијание, токму во регионот каде што традиционално веќе има сојузници.

Новиот план на Брисел ќе ѝ биде претставен на Европската комисија на 6 февруари, кога ЕУ треба да го претстави својот план за Западниот Балкан. Се очекува новиот план да биде усвоен, пишува ФТ.

Рокот за „големото проширување на ЕУ“ е датумот кој веќе беше спомнуван во српската јавност како рамка до која Србија треба да биде примена во ЕУ, а тоа е 2025 година.

„Фајненшл тајмс“ истакнува дека шесте држави сепак ќе мораат, пред конечниот прием во ЕУ, дефинитивно да ги решат отворените прашања, како и проблемот со корупцијата. Во таа смисла најблиску до достигнувањето на целта се Србија и Црна Гора.

Се истакнува и дека Бугарија, која во моментов претседава со Унијата, но и Австрија, која е следна, како свои приоритети го одредија токму проширувањето на ЕУ на Западниот Балкан.


Стопанска комора на конференција во Тирана за иднината на Балканот во глобалната економија


Тирана, 24 јануари, 2018 - 10:11 (META) 

Претставници на Стопанската комора на Македонија ќе учествуваат на конференцијата „Иднината на Балканот – кон глобална вклученост“, која ќе се одржи денеска во Тирана.

На конференцијата, како што информираат од Комора, ќе се разговара за перспективите на институциите за глобална вклученост на земјите од Западен Балкан, за состојбите на пазарот на капитал во овие земји, но и за можностите за унапредување на прекуграничната соработка.

„Во рамките на последниот панел, кој ќе биде посветен на ктивностите на Коморскиот инвестициски форум, унапредување на деловниот амбиент во регионот и активно вклучување на бизнис-заедницата во Берлинскиот процес ќе учествува и националниот национален координатор на Коморскиот инвестициски форум во рамките на Стопанската комора на Македонија, Татјана Штерјова“, се вели во соопштението на Стопанска комора.

На конференцијата ќе учествуваат и претседателот на Албанија, Илир Мета, заменик-претседателот на Владата на Албанија, Сенида Меси, директорите на берзите од регионот, како и претставници на коморите од земјите од Западен Балкан.


Советот за безбедност на ОН има шест нови земји-членки


Њујорк, 2 јануари, 2018 - 19:55 (META) 

Советот за безбедност на Обединетите Нации има шест нови членки Екваторска Гвинеја, Брегот на Слоновата Коска, Холандија, Кувајт, Перу и Полска. Знамињата на овие земји, денеска беа поставени пред седиштето на ОН во Њујорк.

Египет, Јапонија, Сенегал, Украина и Уругвај го завршија својот мандат минатата година.

Советот за безбедност на ОН има 15 членки помеѓу кои и постојаните Кина, Франција, Русија, САД и Велика Британија. Останатите членки, ги избира Генералното собрание на ОН на две години.


Казахстан предлага „исламски Г-20“


Астана, 10 септември, 2017 - 16:20 (META) 

Казахстанскиот претседател Нурсултан Назарбаев денеска излезе со иницијатива петнаесетте најразвени држави од Организацијата за исламска соработка да создадат форум за развој на науката и економијата налик на Г-20.

Назарбаев предлогот го даде на самитот за наука и технологија на ОИС во Атана, јави ТАСС.

– Сметам дека треба да создадеме форум, како Г-20, неофицијална група за развој на науката и на економијата во исламскиот свет. Од развиените 15 држави во ОИС може да се создаде организацијата ОИС-15. Развојот на науката и на технологијата е мошне важен за нас – смета Назарбаев.


СДСМ: Пресудите против Ристески и Панов се доказ за коруптивното владеење на ВМРО-ДПМНЕ


Скопје, 20 август, 2017 - 10:19 (META) 

Судските пресуди против градоначалниците од ВМРО-ДПМНЕ, Марјан Ристески и Александар Панов се првите институционално потврдени докази за децениското криминално, коруптивно и расипничко владеење на ВМРО-ДПМНЕ на секое ниво на власт, се вели во утринското соопштение на СДСМ.

Во него се додава дека „ВМРО-ДПМНЕ веќе има двајца градоначалници кои се осудени за несовесно и неодговорно владеење“.

„Владимир Талевски е првоосомничен во случај на Специјалното јавно обвинителство за сторен криминал тежок 360.000 евра, пари на граѓаните. По ова, логично се поставува прашањето уште колку криминалци градоначалници има во редовите на ВМРО-ДПМНЕ? Уште колку локални шерифи краделе од граѓаните и кој од  градоначалниците на ВМРО-ДПМНЕ крадел најмногу од граѓаните и државата?“, се додава во соопштението.


Светска банка ќе издвои 57 милијарди долари за Африка


Вашингтон, 20 март, 2017 - 12:35 (META) 

Светска банка соопшти дека ќе издвои околу 57 милијарди долари за инвестиции во следните три години во државите во Африка.

Најголем дел од тие средства, 45 милијарди долари, ќе ги издвои Агенцијата за меѓународен развој во рамките на Светска банка, која ќе дава бескаматни кредити на најсиромашните земји.

Претседателот на Светска банка, Џим Јонг Ким, оваа недела ќе ги посети Руанда и Танзанија каде што со властите ќе разговара за финансиската поддршка на тој дел на Африка.

Светска банка е одговорна за обезбедување финансии и за давање совети на земјите за да се засили нивниот економски развој и да се намали сиромаштијата, но и за да се сочуваат меѓународните инвестиции.


Велика Британија ќе воведе такса за работниците од ЕУ


Лондон, 11 јануари, 2017 - 17:57 (META) 

Британската влада сака да воведе такса од 1.000 фунти за секој британски работодавец што ќе вработи работник кој потекнува од некоја од земјите членки на Европска Унија.

Британскиот министер за миграција, Роберт Гудвил, пред Горниот дом на британскиот парламент истакнал дека е можно воведување на такса за работниците од ЕУ.

Гудвил истакнал дека ќе има програми кои ќе дозволуваат работниците во земјоделството да добиваат краткорочни, сезонски договори за работа во Велика Британија.

Велика Британија веќе ги зголеми таксите за работниците од земјите кои не се членки на ЕУ и тие ќе стапат на сила во април.

Работниците од 27 земји членки на ЕУ сега имаат право да живеат и да работат во Велика Британија, но тоа ќе се промени кога земјата ќе излезе од Европска Унија.


Американците утре ќе гласаат за нов претседател


Вашингтон, 7 ноември, 2016 - 10:17 (META) 

Утре 225 милиони Американци ќе гласаат за нов претседател, а ќе победи кандидатот кој ќе освои 270 електорски гласа, апсолутно мнозинство од 538. Во трка се демократската кандидатка Хилари Клинтон и републиканецот Доналд Трамп.

Изборите се одржуваат во вторникот по првиот понеделник во ноември, на секои четири години, а гласањето е во еден круг во секоја од 50 американски сојузни држави.

Победата во некоја држава одредува како ќе гласаат членовите на изборниот колегиум, орган кој потоа ќе го избере идниот претседателот на САД.

Најновата голема анкета на „Еј-би-си“ и на „Вашингтон пост“, објавена вчера, ѝ дава на Клинтон предност од пет процентни поени во однос на Трамп.


Мароко по 40 години повторно сака членство во Африканската унија


Рабат, 23 септември, 2016 - 20:00 (META) 

Мароко поднесе официјално барање за приклучување кон Африканската унија (АУ) по 40 години, соопшија денеска од таа организација.

Мароко е единствената африканска земја која не е членка на таа организација, која ја сочинуваат 54 држави.

Властите во Рабат ја напуштија организацијата во 1975 година поради спорот околу Западна Сахара, која АУ ја смета за независна држава, а Мароко за своја јужна провинција.

Членките на оваа АУ ќе бидат известени за барањето на Мароко, а потоа кралот на оваа држава ќе биде известен за одлуката.