!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Велика Британија ќе воведе такса за работниците од ЕУ


Лондон, 11 јануари, 2017 - 17:57 (META) 

Британската влада сака да воведе такса од 1.000 фунти за секој британски работодавец што ќе вработи работник кој потекнува од некоја од земјите членки на Европска Унија.

Британскиот министер за миграција, Роберт Гудвил, пред Горниот дом на британскиот парламент истакнал дека е можно воведување на такса за работниците од ЕУ.

Гудвил истакнал дека ќе има програми кои ќе дозволуваат работниците во земјоделството да добиваат краткорочни, сезонски договори за работа во Велика Британија.

Велика Британија веќе ги зголеми таксите за работниците од земјите кои не се членки на ЕУ и тие ќе стапат на сила во април.

Работниците од 27 земји членки на ЕУ сега имаат право да живеат и да работат во Велика Британија, но тоа ќе се промени кога земјата ќе излезе од Европска Унија.


Американците утре ќе гласаат за нов претседател


Вашингтон, 7 ноември, 2016 - 10:17 (META) 

Утре 225 милиони Американци ќе гласаат за нов претседател, а ќе победи кандидатот кој ќе освои 270 електорски гласа, апсолутно мнозинство од 538. Во трка се демократската кандидатка Хилари Клинтон и републиканецот Доналд Трамп.

Изборите се одржуваат во вторникот по првиот понеделник во ноември, на секои четири години, а гласањето е во еден круг во секоја од 50 американски сојузни држави.

Победата во некоја држава одредува како ќе гласаат членовите на изборниот колегиум, орган кој потоа ќе го избере идниот претседателот на САД.

Најновата голема анкета на „Еј-би-си“ и на „Вашингтон пост“, објавена вчера, ѝ дава на Клинтон предност од пет процентни поени во однос на Трамп.


Мароко по 40 години повторно сака членство во Африканската унија


Рабат, 23 септември, 2016 - 20:00 (META) 

Мароко поднесе официјално барање за приклучување кон Африканската унија (АУ) по 40 години, соопшија денеска од таа организација.

Мароко е единствената африканска земја која не е членка на таа организација, која ја сочинуваат 54 држави.

Властите во Рабат ја напуштија организацијата во 1975 година поради спорот околу Западна Сахара, која АУ ја смета за независна држава, а Мароко за своја јужна провинција.

Членките на оваа АУ ќе бидат известени за барањето на Мароко, а потоа кралот на оваа држава ќе биде известен за одлуката.


Самит посветен на бегалската криза ќе се организира во ОН, в понеделник


Њујорк, 16 септември, 2016 - 19:18 (META) 

Генералното собрание на Обединетите нации (ОН) ќе организира самит посветен на бегалската криза во седиштето на ОН во Њујорк на 19 септември, в понеделник.

На самитот ќе се разговара за стратегијата за дејствување на државите на интернационално ниво, во врска со овој глобален проблем.

На овој настан ќе присуствуваат и претставници од Меѓународната организација СОС Детско село, за да се презентираат добри практики за работа со бегалците, посебно со децата и како оваа организација дејствувала за време на бегалската криза.

Една од клучните пораки ќе биде почитување на децата и детските права, без разлика на статусот на нивните родители.


Во Германија се доселиле рекорден број државјани од земјите членки на ЕУ


Берлин, 2 јули, 2016 - 17:34 (META) 

Имиграцијата на државјани од земјите членки на Европска Унија во Германија достигна рекордно ниво. Лани, во Германија се доселиле 685.485 државјани на Романија, Полска и на Бугарија, пишува весникот „Велт“, повикувајќи се на официјални статистички податоци.

Во Германија во најголем број се доселиле Романци (174.779), Полјаци (147.910), Бугари (71.709) и Хрвати (50.646).

Како најголема економска сила во Европа, Германија има многу ниска стапка на невработеност, која изнесува 6,1 отсто и е пожелна дестинација за граѓаните од другите држави, кои бараат подобри услови за живот.


СДСМ: Колку вработувања се спречија со петте милијарди евра што ги изнесе „фамилијата“?


Скопје, 24 март, 2016 - 15:52 (META) 

„Кумот Ставрески нека каже како заедно со кумашинот Груевски успеаја да изнесат криминално повеќе од 5 милијарди  евра пари на граѓаните надвор од државата и колку уништени вработувања се тоа за луксузите на фамилијата? Како е можно со пад на преработувачката индустрија од 2 отсто на годишно ниво, со пад на земјоделството од 0,7 отсто, со бруто-инвестиции еднакви речиси на нула, да креира нови работни места?“, се вели во соопштението на СДСМ.

Во него, исто така, се додава дека „крунскиот доказ дека Груевски лаже кога зборува за нови вработувања е токму историски највисокиот дефицит на Фондот за ПИОМ во 2014 година.

–  Дупката во ПИОМ во 2008 година изнесувала 165 милиони евра, за во 2014 година промашените економски политики на Груевски да ја продлабочат на неверојатни 369 милиони евра! Доколку вистински се намалуваше стапката на невработеност, дупката во ПИОМ требаше да се намалува, а не забрзано да се зголемува и да го доведе Фондот во ризик на неодржливост на среден рок, како што алармираше Светска банка – се вели во соопштението.

Од СДСМ потсетуваат дека според Светска банка, 626.312 граѓани ја напуштиле државава во потрага по работа и по достоинствени услови за живот.

– Поради промашените економски политики, 10.000 домашни фирми се затвроени, на сопствениците им се загрозени основните егзистенции, а 8.000 чекаат да бидат избришани од евиденција – додаваат од СДСМ.

 


„Твитер“ предупредува за хакерски напади спонзорирани од држави


Сан Франциско, 14 декември, 2015 - 13:04 (META) 

„Твитер“ првпат во својата историја објави предупредување до корисниците дека хакери, спонзорирани од држави, се обидуваат да украдат доверливи податоци од нивните компјутери.

Во соопштението се наведува дека нема индиции оти хакерите успеале да преземат чувствителни информации од „мала група компјутери“ кои биле мета, а компанијата исто така не понуди детали за нападот или потенцијалните осомничени во истрагата која ја спроведуваат.

„Твитер“ наведува дека мета на хакерите биле меил-адреси, ИП-адреси и телефонски броеви.

„Гугл“ и „Фејсбук“, исто така, почнаа да издаваат предупредување до корисниците кои се потенцијални мети на зачестени хакерски напади, спонзорирани од држави.


Педесет држави со резолуција ги осудија нападите врз новинари


Њујорк, 8 ноември, 2014 - 9:38 (META) 

Заеднички подготвена резолуција во Обединетите нации, во која се осудуваат нападите врз новинари, како и неуспехот да се казнат одговорните за убиства, тортура, киднапирање и за произволно апсење на медиумски работници, поднесоа речиси 50 држави.

Во нацрт-резулуцијата се повикуваат сите 193 држави-членки да направат сè за да се спречи насилството, заканите и нападите против медиумите.

Во текстот се повикува на брза и независна истрага за напади врз новинари и се бара судска разврска за извршителите. Во нацрт-резолуцијата се бара итно одлободување на медиумски работници кои се држат како заложници.

Резолуцијата мора да ја усвои одбор за човекови права, а потоа да биде усвоена од Генералното собрание.


Русија прати помош за борба со еболата во пет африкански држави


Москва, 31 октомври, 2014 - 12:29 (META) 

Помош за борба против епидемијата на ебола, испорача Русија во пет африкански држави. Пакетите ги исфрли транспортен авион на руската компанија „Волга-Дњепар“.

Се работи за пет контејнери, секој со 18 тони заштитни и други средства, изјави по телефон член на екипажот на авионот од Абиџан, јави ТАСС.

Руската помош е испорачана во ДР Конго, Гана, Мали, Гвинеја-Бисао и во Брегот на Слоновата Коска.

Товарот е доставен во согласност со препораките на Советот за безбедност на ОН.