Земјата во која живееме со Ахмети има име: Република Македонија


Скопје, 9 февруари, 2018 - 10:07 (META) 

Лидерот на Демократската унија за интеграција Али Ахмети во интервју за грчки медиум ја даде следната изјава што e невистина, оценува „Вистиномер.мк“:

Ние сме земја без име, имаме едно привремено име, ПЈРМ. Во пракса се обидуваме конечно да добиеме нормално име со преговорите што се водат – изјави Ахмети во емисијата „Историес“ на ТВ Скај.

[Извор: ТВ Алфа –  Ахмети: Ние сме држава без име…, датум: 07.02.2018]

ОБРАЗЛОЖЕНИЕ:

Изјавата на Али Ахмети, пратеник и лидер на ДУИ, што е во коалиција во владата со СДСМ, е очигледна невистина. Според Уставот на Република Македонија, според сите други државни документи и историски факти, сосема е сигурно дека државата во која живееме заедно со Ахмети се вика Република Македонија.

Република Македонија е прогласена за независна држава на 8 септември 1991 година врз основа на резултатите наРеферендумот за независност, а на 17 ноември 1991 година, кога е прогласен  и донесен Уставот, таа е уредена и како таква – самостојна, суверена, независна демократска држава на Македонците и на Албанците, Турците, Власите, Србите, Ромите, Бошњаците и на сите други граѓани што живеат во неа. Пред Референдумот одржан на 8 септември, со кој граѓаните решија да се одвојат од социјалистичка Југославија, во јануари 1991 година беше донесена Декларација за независност во Парламентот, кој, пак, беше конституиран по првите повеќепартиски избори одржани во 1990 година.

Претходно, во разни форми кои го означувале уставното уредување Република Македонија, носела различни имиња, но секогаш со зборот Македонија од конституирањето на АСНОМ во 1944 на втори август.

Впрочем, Али Ахмети е пратеник во Собранието на Република Македонија од 2002 година до денес.

Тоа што Република Македонија според соодветни резолуции на Обединетите нации денес (во последните 20-тина години) разговара за разликите околу името со Република Грција, е сосема друго прашање, исто како што е друго прашањето околу „привременото име“ за кое зборува Ахмети, а тоа е акронимот Поранешна Југословенска Република Македонија.

Овој акроним, со кој сме заведени во Обединетите нации, според документите на светската организација, е наменет само за внатрешна употреба во рамките на ословувањето во организацијата. Тоа што таквото правило не се почитува во голема мерка е резултат на моќното лоби на Република Грција, која, сепак, не успеа на 130-тина земји да им го наметне нивниот став.

Ахмети во истата емисија, според изворот, но и другите медиуми од каде што го цитираме, изразува готовност и за промена на Уставот поради барањата на Грција, но, сепак, тука нагласува дека ДУИ е подготвена да го стори тоа, со што станува јасно дека и по ова прашање има разлика меѓу коалиционите парнтери во Владата, исто како што има разлика и по прашањето за референдум на кој граѓаните би се изјасниле за решението од разговорите со Грција.

Поради погоре наведените аргументи тврдењето на Али Ахмети дека „земјата нема име“ и дека има само едно привремено име ПЈРМ, ја оценуваме како невистина.

ИЗВОРИ:


Средба на коалициските партнери од „За подобра Македонија“


Скопје, 4 февруари, 2018 - 21:09 (META) 

Претседателот на ВМРО-ДПМНЕ, Христијан Мицкоски денеска се сретна со коалициските партнери од „За подобра Македонија“.

На средбата, како што информираат од ВМРО-ДПМНЕ, се разговарало за актуелната политичка состојба, „случаите на политичките притисоци и реваншизам, како и размена на мислења околу актуелните теми врзани со предизвиците на надворешната политика, спорот за името и евроатланските интеграции.“

На состанокот било заклучено дека државата се движи во погрешен правец и кон континуирано економско и политичко слабеење.

„Евидентни се политичките притисоци кои ги прави актуелната власт, пресметката и реваншизмот кој се спроведува врз политичките неистомисленици“, се вели во соопштението на ВМРО-ДПМНЕ.

На средбата било посочено дека „владата треба да се откаже од намерата да донесе неуставен и неприменлив Закон за јазици.“

„Воедно тоа е и закон кој ги става и припадниците на другите заедници во подредена состојба, менувајќи го карактерот на државата. Во однос на спорот за името, суштествено важно е владата која ги води разговорите, да ги запази државните и националните интереси и да води грижа за заштита на македонскиот идентитет кој треба да остане непроменет“, се додава во соопштението.


Владата и Сорос отворени за соработка за развој на демократијата и нови инвестиции


Давос, 26 јануари, 2018 - 20:02 (META) 

Премиерот Зоран Заев, денеска во Давос се сретнал со филантропот и финансиер Џорџ Сорос, основач на Фондацијата отворено општество (ФОО) и со Александар Сорос, заменик претседавач со глобалниот одбор на ФОО.

На средбата било истакнато дека Македонија ги споделува и промовира вредностите на демократијата, заштитата на човековите права, владеењето на правото и отвореното општество, како вредности за кои се застапува и ФОО.

„Концептот отворено општество еднакво за сите и понатаму останува столб врз кој се гради новиот лик на Република Македонија, заедно со демократските реформи за членство во ЕУ ​​и НАТО и со економските мерки кои ги презема Владата“, било нагласено на средбата со Сорос.

Во соопштението се додава дека, Владата и Џорџ Сорос и понатаму остануваат отворени за соработка на планот на развојот на демократските капацитети на општеството, како и на можностите за нови бизниси и директни инвестиции.


Заев: За проблемот на секој граѓанин, ако треба цела држава ќе помогне


Берово, 29 септември, 2017 - 21:52 (META) 

Секој граѓанин, со каков предизвик и да се соочи, градоначалникот, општината, ако треба цела држава, ќе застане зад него да помогне. Граѓаните ќе кажуваат што ќе се гради. Што ќе кажат граѓаните, тоа ќе биде закон и за градоначалникот и за советниците и за извршната власт, порача претседателот на СДСМ, Зоран Заев, на вечерашниот митинг во Берово.

– Ќе изградиме отворени општини, граѓаните секогаш ќе знаат како се трошат нивните пари. Не може да нема асфалт во селата. Ќе има рамномерен регионален развој во Македонија. Локален економски развој значи локални производствени капацитети. Целта мора да биде луѓето да имаат повеќе пари во местото каде живеат. Ако луѓето имаат пари, ќе останат да ни живеат во Македонија – рече Заев.


Државите да ги зголемат ефектите од отворените образовни ресурси


Љубљана, 20 септември, 2017 - 14:50 (META) 

Вториот светски конгрес на отворени образовни ресурси (ООР) се одржува од 18 до 20 септември во Љубљана во организација на УНЕСКО и на Владата на Република Словенија.

На конгресот учествуваат министерката за образование и наука, Рената Дескоска, и претставници од Македонија.

Членот на Алијанса за ООР во Македонија, професорот од Економски институт, Зоран Јаневски, вели дека овој конгрес е особено значаен поради тоа што прави пресек на постојната состојба во светот со актуелните прашања поврзани со отворените образовни ресурси и дава насоки во кој правец треба да се движат државите за да го унапредат нивното користење и да ги зголемат ефектите кои со тоа се постигнуваат.

– За разлика од пред пет години, кога се одржа првиот конгрес во Париз во 2012 година, денес постојат политики за ООР во многу држави во светот. Голем број влади покажуваат дека навистина се подготвени да работат на поттикнување поголема нивна примена во образовниот процес. Сè повеќе автори создаваат образовни и тренинг-материјали во форма на ООР, а бројот на електронски складишта со ваквите материјали се зголемува неверојатно брзо. На конгресот се работи на заклучоци и на препораки за сите чинители од сферата на ООР кои одат во насока дека и понатаму треба посветено да се работи на подигнување на јавната свест за придобивките од ООР, да се развијат и да се усвојат политики за ООР онаму каде тоа досега не е сторено, да се поттикнуваат чинителите за нивно поголемо создавање и користење, но и да се работи и на зајакнување на капацитетите на самите чинители за да можат да одговорат на сите овие предизвици“, изјави Јаневски.

Годинешната тема на конгресот е „ООР за инклузивно образование и образование со еднаков квалитет: Од посветеност до акција“, а ќе бидат одбележани 15-годишнината од промовирањето на концептот на отворени образовни ресурси од УНЕСКО, како и петгодишнината на Париската декларација за ООР.


Анѓушев: „Фероинвест“ и другите мои компании нема да учествуваат на државни тендери


Скопје, 19 септември, 2017 - 10:45 (META) 

Вицепремиерот за економски прашања, Кочо Анѓушев, најави дека „Фероинвест“ и другите компании кои се во негова сопственост, а законски имаат други управители, нема да учествуваат на државни тендери.

Тој во емисијата „Топ-тема“ на телевизијата „Телма“, појасни дека тендерот за компанијата ЕЛЕМ, случај кој предизвика бурни реакции во јавноста, бил распишан во февруари уште пред да се знае дека тој ќе биде дел од новата влада.

– Тендерот за ЕЛЕМ беше распишан во февруари кога јас не разговарав за вицепремиерско место и никој не знаеше кога ќе има влада. Ние дадовме понуда во рамките на законскиот рок од 60 дена. Понудата е дадена на 14 април, кога повторно воопшто никој не знаеше дали ќе има нова влада и дали ќе бидам составен дел од неа. Потоа постапката продолжи, заврши со две наддавања кои беа распишани од претходното раководство на ЕЛЕМ, во кои „Фероинвест“ доби одредени делови од тендерот, но истите беа поништени. Кога станав потпретседател на Влада, немаше начин како „Фероинвест“ и партнерот да се откажат од тендерот. Вистината е дека „Фероинвест“ не доби ништо на тендерот – појасни Анѓушев.

Тој додаде дека „Фероинвест“ не само на овој тендер, туку нема да добие на ниту еден друг тендер, каде што од другата страна ќе биде партнер државата.

– „Фероинвест“ ќе си работи како што знае да работи на интернационалниот пазар. Фирмите 96 проценти извезуваат. Компаниите имаат 800 вработени кои и понатаму треба да продолжат да живеат и ќе бидат активни во економскиот живот во државата – додаде Анѓушев.

Тендерот со ЕЛЕМ предизвика големо внимание во јавноста бидејќи компанијата „Фероинвест“ е во сопственост на Анѓушев. Тој тогаш не гледаше ништо спорно фирмата да учествува на тендери, бидејќи се запазени сите законски процедури и бидејќи е назначен друг управител.

За овој случај се произнесе и премиерот Зоран Заев, кој кажа дека покрај законите, важен е и етичкиот кодекс и ја повика јавноста будно да следи што ќе се случува.


Царовска: 220.000 работници се сиромашни, односно секој трет вработен


Скопје, 15 септември, 2017 - 16:20 (META) 

Според податоци од Министерството за труд и социјална политика, 220.000 работници, односно секој трет вработен е сиромашен, додека според одредени индикатори на Еуростат за 2015 година, 8,9 проценти од вработените се сиромашни.

Ова денеска го истакна министерката за труд и социјална политика, Мила Царовска, која се обрати на шестата национална конференција на сиромашни и социјално исклучени лица во организација на Македонската платформа против сиромаштија. Настанот со „Работа, колку да не е без ич“ беше посветен на лицата кои се вработени, но сиромашни.

Во обраќањето на министерката беше спомнато дека за надминување на сиромаштијата кај вработените, клучна улога имаат синдикатите.

„Многу е важно тие да функционираат и да се грижат повеќе да бидат блиски со работниците, наместо со политичките елити. Ако имаме силни синдикати, многу помалку ќе зборуваме за кршење на работничките права. Во Македонија малку работници се свесни за нивните права или чувствуваат страв дека нема кој да ги заштити. Во таа насока, во секоја приватна компанија со најмалку 20 вработени, ќе треба работните односи да се уредат и со колективен договор, покрај Законот за работни односи“, изјави Царовска.

Таа укажа дека постои неповолна почетна позиција за креирање политики поради недостигот од релевантна статистика, затоа што истата се базира на податоци од пописот во 2002 година, а оттогаш состојбата во Македонија е многу изменета.

Министерката се задржа и на проблемот со неформалната, сива економија. Луѓето кои собираат пластика, хартија, стакло, како што посочи, се исклучени од системот. Иако тие помагаат државата да го исчисти сметот, тие не се социјално обезбедени и немаат заштита при работа.


Владата денеска ќе објави колку изнесува државната помош за странските инвеститори


Скопје, 13 септември, 2017 - 9:19 (META) 

Владата денеска ќе го објави податокот колку изнесува државната помош за странските инвеститори за последните десет години.

Од владиниот прес-центар информираат дека тема на прес-конференцијата што ќе се одржи во 10 часот ќе биде презентација на анализата на трошоците наспроти резултатите од странските директни инвестиции во Македонија за периодот од 2007 до 2017 година.

Анализата е направена по декласификација на договорите потпишани од поранешната влада.

Вицепремиерот за економски прашања, Кочо Анѓушев, кажа дека ќе биде објавена вкупната сума на државната помош за странските компании, за да се заштитат деловните договори со инвеститорите.


Заев: Постојат реални можности да добиеме препорака, а потоа и датум за преговори со ЕУ


Скопје, 7 септември, 2017 - 20:42 (META) 

Премиерот Зоран Заев, во обраќањето пред зградата на Владата по повод прославата на 8 Септември – Денот на независноста, рече дека во Македонија има одговорни политичари кои знаат што им е потребно на граѓаните, но има и свесни граѓани кои знаат што ѝ е потребно на државата.

Тој додаде дека од земја „генератор на криза“, Македонија е претворена во „мотор на развој на регионот“.

– Постојат реални можности Македонија да добие чиста препорака, а потоа и датум за преговори со Европската Унија. Реални се надежите и дека Република Македонија може да биде 30. членка на НАТО – рече Заев.

Тој додаде дека клучен тест се локалните избори, а Владата е определена да организира и да спроведе фер, демократски и регуларни избори, со нула толеранција за евентуални злоупотреби.

Според премиерот, друг тест се и реформите, за да се овозможи независно судство, објективни медиуми, независни институции, како и развој на добрососедски односи и регионална соработка.

Освен пред зградата на Владата, прослава по повод 8 Септември имаше и во Собранието, каде што претседателот на законодавниот дом, Талат Џафери, во обраќањето пред премиерот и пратениците рече дека пред 26 години биле поставени стратешките цели на државата, како на внатрешен така и на надворешен план.

– На внатрешен план, Македонија беше дефинирана како граѓанска држава која се темели врз индивидуалните и колективните човекови права и слободи, врз принципите на парламентарната демократија и владеењето на правото, почитувањето на приватната сопственост и пазарните законитости. Притоа, општество беше дефинирано како мултиетничко, мултикултурно и мултиконфесионално. На надворешен план, како приоритетна стратешката цел беше поставена целосната интеграција во евроатлантските структури – рече Џафери.

По повод стоте дена од конституирањето на Собранието, тој додаде дека ова парламентарно мнозинство „има храброст, волја, знаење и капацитет да направи значајни чекори напред во остварувањето на тие стратешки цели“.

– Секако дека во овие процеси очекувам свој придонес да даде и опозицијата, со аргументирана критика, меѓутоа и со конструктивни предлози. А мнозинството е должно да создаде услови за опозицијата да може сето ова да го артикулира преку институциите на транспарентен начин пред јавноста – додаде Џафери.


Заев: Ќе има нула толеранција за изборни злоупотреби


Скопје, 6 септември, 2017 - 12:41 (META) 

Испраќам порака до владините и до државните институции дека ќе има нула толеранција за изборни злоупотреби, рече премиерот Зоран Заев на денешната конференција „Одвојување на државата од политичките партии“, во организација на Граѓанската асоцијација „Мост“.

– Владата на Македонија гради институции за и на граѓаните и има цел на претстојните локални избори да ги заштити граѓаните од партиски злоупотреби. Вршителите на јавните функции нема да ги злоупотребуваат своите надлежности за партиски цели. Нема да има уцени, закани и заплашувања за партиски цели. Одвојувањето на партијата од државата е даден збор на новата влада. Врвен приоритет ни е одржувањето на фер и демократски избори. Владата ќе донесе мерки со кои ќе ги спречи кандидатите за градоначалници да користат државни средства – рече Заев.

Шефот на Делегацијата на Европска Унија, Самуел Жбогар, на лидерите на политички партии им порача да ги искористат локалните избори за да покажат демократски вредности.

– Примарно е политичките лидери што ги спроведуваат кампањите за изборите, да ги спроведуваат без насилство, заплашувања и без етнички тензии. Лидерите да го користат изборниот процес за да покажат демократски вредности. Изборите да бидат чекор напред во евроинтеграциите – вели Жбогар.

Во минатото имаше доволно примери за непочитување на принципот на одвојување на државата од партијата, смета Дарко Алексов, извршниот директор на „Мост“, кој порача дека сите сакаат да видат дека власта може и поинаку да се практикува.

– Треба прекршувањата на принципот на одвојување на државата од партијата да бидат истражени и соодветно санкционирани – додаде Алексов.