АППТ: Туристите годинава потрошиле 64,7 милиони долари


Скопје, 6 август, 2018 - 15:27 (META) 

Агенцијата за промоција и поддршка на туризмот (АППТ), соопшти дека туристите во Македонија во првиот квартал потрошиле 64,71 милиони американски долари што е повеќе за 26,5 проценти во споредба со истиот период лани.

„Една од активностите што ги реализира АППТ во насока на промоција на Македонија во странски земји, беше интензивирана и реализирана преку строго таргетирање на маркетинг кампања која се пласираше во таргет земјите. Македонија се најде во бројни објави на светски познати магазини и интернет страни, додека интересот на информативни патувања во Македонија континуирано е во пораст. Реализацијата на турите за новинари и тур-оператори кои имаат за цел да го претстават туристичкиот потенцијал на државава важат за дополнение на промоцијата на државава“, се вели во соопштението.

Од Агенцијата оценуваат дека придонесот за целокупниот пораст во туристичката индустрија се должи и на зголемувањето на бројот на летови од и до скопскиот и охридскиот аеродром, но и модернизација на патната инфраструктура во земјава.

„Земајќи го предвид досегашниот тренд на пораст, очекувањата до крајот на 2018 година е овој тренд да регистрира благ пораст поради зголемувањето на број на туристи кои ќе патуваат низ Македонија со автобуси или сопствени возила“, се додава во соопштението на АППТ.


Мицкоски: Јас сум за иднина во која нема да се „проституираме“ како народ и држава


Скопје, 1 август, 2018 - 9:42 (META) 

Лидерот на ВМРО-ДПМНЕ, Христијан Мицкоски на неговиот фејсбук-профил напиша дека тој е за иднина во која Македонија ќе ја водат принципиелни, чесни и од збор луѓе, а не аболицирани политичари, иднина во која политичарите што бараат мито ќе одат во затвор.

„Иднина во која нема да се проституираме како народ и држава, затоа што уценети и неспособни политичари се во владата, иднина во која нема министрите да си делат грантови и тендери на шибицарски начин, а премиерот ќе им прости со стерилно образложение дека немало да ги смени затоа што немал со кого да работи. Иднина во која моите студенти наместо да се збогуваат со мене после одбраната на дипломската работа ќе ме консултираат во која фабрика и кое работно место ќе го прифатат овде во нивната татковина, иднина во која нема мојата татковина да биде рекордер по бројот на мртви новороденчиња во Европа“, напиша меѓудругото Мицкоски на неговиот фејсбук-профил.

Од СДСМ рeагираат и му порачаа „Мицкоски, ако си за иднината, поддржи го референдумот за ЕУ и НАТО, во спротивно остануваш заглавен во минатото, на браникот на криминалот“.

„Христијан Мицкоски декларативно вели дека е за иднина, време е да го докаже тоа на дело и да ги повика членовите на ВМРО-ДПМНЕ да излезат на референдум и да изберат иднина. Во спротивно, Мицкоски ќе покаже дека лаже и дека всушност е за изолација, назадување и неизвесност. Мицкоски, ЕУ и НАТО се нашата иднина. Ајде, ако си за просперитетна иднина поддржи го референдумот на кој граѓаните ќе го имаат последниот збор и ќе одлучат за македонска иднина во ЕУ и НАТО“, се вели во реакцијата на СДСМ.


СДСМ: Граѓаните имаат историска можност да одлучат за иднината на државата


Скопје, 31 јули, 2018 - 9:53 (META) 

СДСМ, како одговорна и државотворна партија заедно со сите политички чинители кои се определени за напредок на Македонија, овозможи последниот збор за Договорот со Грција да го имаат граѓаните, се вели во соопштението на партијата.

Од таму додаваат дека „на 30 септември, на демократски и непосреден референдум, граѓаните ќе имаат историска можност директно да одлучуваат за сопствената и за иднината на државата.“

„Референдумот е вистинска и непосредна демократија, а волјата изразена на него ќе биде обврзувачка за сите, затоа што гласот на граѓаните е клучен за македонската иднина. Се обединија сите политички партии кои навистина се за ЕУ и НАТО, освен Христијан Мицкоски и раководството на ВМРО-ДПМНЕ кои што се против интеграција. Се обединија сите кои се за напредок на Македонија, освен Мицкоски кој сака изолација, стагнација и неизвеснот. Обединети се сите политички и општествени чинители кои се за македонската иднина, освен Мицкоски и највисокото раководство на ВМРО-ДПМНЕ кои сакаат назад во темното минато на криминал, насилство и неказнивост. Но, ВМРО-ДПМНЕ и Мицкоски нема да ја закочат и загрозат македонската иднина со нивните антидржавни постапки“, велат од СДСМ.


Хан: Несоодветно е претседател да одбие разговор со премиер, треба одговорност


Брисел, 14 јуни, 2018 - 9:32 (META) 

Несоодветно е за претседател на држава, да одбие да разговара со премиер, со министер за надворешни, за да добие информации од прва рака, вели еврокомесарот за проширување и добрососедска политика Јоханес Хан, во интервју за МИА.

„Мислам дека премиерот и министерот за надворешни целосно ги почитуваа уставните насоки и можам само да го повикам итно претседателот да преземе одговорност. Ова не е прашање на прифаќање, но во демократија може да очекуваме да се слушаат луѓето меѓусебно и да дискутираат и не треба да се заборави дека шеф на држава е на некој начин модел за многу луѓе во една земја. Претседателот како директно избран има специјална позиција и одговорност и треба да е свесен за ова, инаку и наштетува на функцијата“, вели Хан.

Тој и порачува на опозицијата дека треба внимателно да го простудира договорот.

„Треба да дискутира со Владата, зборуваме за тема која е од национален интерес, има непосреден ефект врз иднината на земјата и нејзината евроатлантска перспектива. Тоа не беше мала пречка, тоа беше планина и сега таа е отстранета. Се разбира, не сакам да го проценувам исходот на овој договор, но таква е природата на преговорите и на компромис, секој треба да отстапи, но генерално се чини дека исходот е доста поволен за вашата земја. Но уште еднаш, ова треба да биде проценето од сите, мое скромно барање е дека секој треба да е свесен за историската димензија и долгорочниот импакт врз развојот на оваа земја и условите на живот и можностите за нејзините граѓани“, додава Хан.

Во однос на одлуката на Советот за старт на преговорите во јуни, Хан очекува дека „ако се ова сега е потпишано и договорено, дека ќе има импакт во заклучоците на Советот.

Очекува, по препораката за преговори, да почнат подготовките за старт на преговори.

„Ништо не можам да гарантирам стопроцентно. Секогаш сум многу внимателен кога треба да се вети нешто, но имам многу, многу добро чувство, а обично можам да им верувам на моите чувства“, додаде тој.


СДСМ и коалицијата ќе ја поддржат Ангеловска Бежовска за гувернерка на Народна банка


Скопје, 17 мај, 2018 - 12:30 (META) 

Пратеничката група на СДСМ и коалицијата в понеделник на координација ќе го разгледаат предлогот на претседателот Ѓорге Иванов, вицегувернерката Анита Ангеловска Бежоска да биде новата гувернерка на Народната банка.

Координаторот Томислав Тунтев рече дека пратеничката група на СДСМ и Коалицијата, позитивно гледаат на новиот предлог на Иванов.

„Лично сметам дека Ангеловска Бежоска, која што е докажан експерт и професионалец во својата област, ја заслужува нашата поддршка. Само да потсетам дека лани летото ние како пратеничка група го искажавме нашиот афирмативен став и ја дадовме нашата поддршка за Анита Ангеловска Бежоска, кога го поддржавме и гласавме за нејзиниот реизбор на функцијата вицегувернерка. Имајќи ја предвид нејзината импозантна биографија, богатото искуство и нејзините професионални постигнувања, воопшто не се сомневам дека генералниот став на нашата пратеничка група во врска со овој предлог ќе остане непроменет – дека ќе биде позитивен и дека само ќе биде потврден на претстојната координативна средба на пратеничката група“, рече Тунтев.

Тој додаде дека станува збор за исклучително значајна позиција, поради што личноста што ќе застане на чело на НБРМ мора да произлезе преку здрав и аргументиран дијалог помеѓу највисоките државни функционери, за да се дојде до заедничко прифатливо решение за гувернер.

„На позицијата гувернер потребно е да застане човек кој ќе ја гарантира независноста на институцијата, кој ќе се грижи за развој и унапредување на банкарскиот систем и за финансиската стабилност на државата, и кој ќе работи исклучиво во интерес на граѓаните“, додаде тој.


Анкета: Економската состојба е лоша, но компаниите очекуваат дека ќе се подобри


Скопје, 10 мај, 2018 - 14:48 (META) 

Сегашната економска ситуација е оценета како полоша во однос на минатата година, покажува Анкетата за деловната клима во Македонија спроведена помеѓу членките на Македонско – германското стопанско здружение.

Само 7 отсто од компаниите, моменталната економска состојба ја оцениле како добра, а 50 отсто ја оценуваат како лоша.

– Кај компаниите има позитивното расположение во однос на очекувањата дека деловната клима значително ќе се подобри оваа година и тие се многу повисоки во однос на минатогодишната анкета. Дури 45 отсто од извршните директори очекуваат подобрување, а само 12 отсто очекуваат полоши макроекономски услови – рече директорот на Делегацијата на германското стопанство во Македонија, Патрик Мартенс.

Зголемена продажба очекуваат 68 отсто од испитаните компании, а 5 отсто стравуваат од пад на продажбата. Производителите оваа година очекуваат зголемен извоз во споредба со лани.

– Годинава, некои од факторите кои минатите години беа оценети како негативни се подобрени но, повторно, испитаниците не се задоволни од сузбивањето на корупцијата и криминалот, правната сигурност и ефикасноста на јавната администрација. И покрај наведените проблеми, сепак е охрабрувачки фактот дека 72 отсто од компаниите кои работат во Македонија повторно би инвестирале во Македонија – додаде Мартенс.

Сепак, процентот на компании кои повторно би инвестирале во државата е намален за 12 отсто во однос на 2016 година.

Заменикот-амбасадор на Германија во Македонија, Марко Акватичи рече дека од денешната посета на државниот министер за европски прашања во МНР на Германија, Михаел Рот имаат информации дека ќе се реши спорот со името, а евроатлантската перспектива е позитивен знак за економијата.

„Кога ја спроведовме анкетата тогаш на власт дојде новата Влада. И од тогаш до сега се случија позитивни работи како препораката од Европска комисија за почеток на преговорите и волјата за решавање на спорот со името“, додаде Акватичи.

Во земјата работат повеќе од 200 компании со германски капитал кои вработуваат 20.000 лица. Трговската размена помеѓу Македонија и Германија, лани се зголемила за 10 отсто во однос на 2016 година.


ВМРО-ДПМНЕ: Со вработувањето на Командант Хоџа, Заев им попушта на насилниците


Скопје, 7 мај, 2018 - 15:21 (META) 

Единствена референца на пријателот на Заев, Командантот Хоџа, е тоа што тој склучил политички договор со првиот човек на СДСМ да му го ослободи Танушевци, а за возврат на тоа да добие висока политичка функција во владата. Но, кој го држел Танушевци заробено и каде се оружјето и лицата кои биле подготвени да се спротивстават на македонската полиција? Каква порака испраќа Заев до сите идни криминалци и насилници кои планираат да се закануваат и уценуваат?, праша на прес-конференција денеска Наум Стоилковски, портпарол на ВМРО-ДПМНЕ.

Тој рече дека со вработувањето на Џезаир Шакири – Хоџа, како негов советник за внатрешна безбедност и борба против радикализам, Заев ги посрамотил и државата и македонскиот народ.

– Ова е големо понижување и за граѓаните и за државата, но и за полициските службеници кои ги имаат загубено животите во борбата против ваквите екстремисти. Владата не е приватна сопственост на Зоран Заев и криминалниот картел околу него. Договорот на Командант Хоџа мора да биде раскинат, а институциите мора да покажат храброст и волја да ги бранат интересите на државата. По признанието на Шаќири, мора да следи сериозна истрага и да се утврди кој се’ му помагал во заканите и со какво оружје се заканувал? – рече Стоилковски, предупредувајќи дека издавањето безбедносен сертификат од највисок степен за Командант Хоџа, надвор од процедурите е кривично дело.


Земјата во која живееме со Ахмети има име: Република Македонија


Скопје, 9 февруари, 2018 - 10:07 (META) 

Лидерот на Демократската унија за интеграција Али Ахмети во интервју за грчки медиум ја даде следната изјава што e невистина, оценува „Вистиномер.мк“:

Ние сме земја без име, имаме едно привремено име, ПЈРМ. Во пракса се обидуваме конечно да добиеме нормално име со преговорите што се водат – изјави Ахмети во емисијата „Историес“ на ТВ Скај.

[Извор: ТВ Алфа –  Ахмети: Ние сме држава без име…, датум: 07.02.2018]

ОБРАЗЛОЖЕНИЕ:

Изјавата на Али Ахмети, пратеник и лидер на ДУИ, што е во коалиција во владата со СДСМ, е очигледна невистина. Според Уставот на Република Македонија, според сите други државни документи и историски факти, сосема е сигурно дека државата во која живееме заедно со Ахмети се вика Република Македонија.

Република Македонија е прогласена за независна држава на 8 септември 1991 година врз основа на резултатите наРеферендумот за независност, а на 17 ноември 1991 година, кога е прогласен  и донесен Уставот, таа е уредена и како таква – самостојна, суверена, независна демократска држава на Македонците и на Албанците, Турците, Власите, Србите, Ромите, Бошњаците и на сите други граѓани што живеат во неа. Пред Референдумот одржан на 8 септември, со кој граѓаните решија да се одвојат од социјалистичка Југославија, во јануари 1991 година беше донесена Декларација за независност во Парламентот, кој, пак, беше конституиран по првите повеќепартиски избори одржани во 1990 година.

Претходно, во разни форми кои го означувале уставното уредување Република Македонија, носела различни имиња, но секогаш со зборот Македонија од конституирањето на АСНОМ во 1944 на втори август.

Впрочем, Али Ахмети е пратеник во Собранието на Република Македонија од 2002 година до денес.

Тоа што Република Македонија според соодветни резолуции на Обединетите нации денес (во последните 20-тина години) разговара за разликите околу името со Република Грција, е сосема друго прашање, исто како што е друго прашањето околу „привременото име“ за кое зборува Ахмети, а тоа е акронимот Поранешна Југословенска Република Македонија.

Овој акроним, со кој сме заведени во Обединетите нации, според документите на светската организација, е наменет само за внатрешна употреба во рамките на ословувањето во организацијата. Тоа што таквото правило не се почитува во голема мерка е резултат на моќното лоби на Република Грција, која, сепак, не успеа на 130-тина земји да им го наметне нивниот став.

Ахмети во истата емисија, според изворот, но и другите медиуми од каде што го цитираме, изразува готовност и за промена на Уставот поради барањата на Грција, но, сепак, тука нагласува дека ДУИ е подготвена да го стори тоа, со што станува јасно дека и по ова прашање има разлика меѓу коалиционите парнтери во Владата, исто како што има разлика и по прашањето за референдум на кој граѓаните би се изјасниле за решението од разговорите со Грција.

Поради погоре наведените аргументи тврдењето на Али Ахмети дека „земјата нема име“ и дека има само едно привремено име ПЈРМ, ја оценуваме како невистина.

ИЗВОРИ:


Средба на коалициските партнери од „За подобра Македонија“


Скопје, 4 февруари, 2018 - 21:09 (META) 

Претседателот на ВМРО-ДПМНЕ, Христијан Мицкоски денеска се сретна со коалициските партнери од „За подобра Македонија“.

На средбата, како што информираат од ВМРО-ДПМНЕ, се разговарало за актуелната политичка состојба, „случаите на политичките притисоци и реваншизам, како и размена на мислења околу актуелните теми врзани со предизвиците на надворешната политика, спорот за името и евроатланските интеграции.“

На состанокот било заклучено дека државата се движи во погрешен правец и кон континуирано економско и политичко слабеење.

„Евидентни се политичките притисоци кои ги прави актуелната власт, пресметката и реваншизмот кој се спроведува врз политичките неистомисленици“, се вели во соопштението на ВМРО-ДПМНЕ.

На средбата било посочено дека „владата треба да се откаже од намерата да донесе неуставен и неприменлив Закон за јазици.“

„Воедно тоа е и закон кој ги става и припадниците на другите заедници во подредена состојба, менувајќи го карактерот на државата. Во однос на спорот за името, суштествено важно е владата која ги води разговорите, да ги запази државните и националните интереси и да води грижа за заштита на македонскиот идентитет кој треба да остане непроменет“, се додава во соопштението.


Владата и Сорос отворени за соработка за развој на демократијата и нови инвестиции


Давос, 26 јануари, 2018 - 20:02 (META) 

Премиерот Зоран Заев, денеска во Давос се сретнал со филантропот и финансиер Џорџ Сорос, основач на Фондацијата отворено општество (ФОО) и со Александар Сорос, заменик претседавач со глобалниот одбор на ФОО.

На средбата било истакнато дека Македонија ги споделува и промовира вредностите на демократијата, заштитата на човековите права, владеењето на правото и отвореното општество, како вредности за кои се застапува и ФОО.

„Концептот отворено општество еднакво за сите и понатаму останува столб врз кој се гради новиот лик на Република Македонија, заедно со демократските реформи за членство во ЕУ ​​и НАТО и со економските мерки кои ги презема Владата“, било нагласено на средбата со Сорос.

Во соопштението се додава дека, Владата и Џорџ Сорос и понатаму остануваат отворени за соработка на планот на развојот на демократските капацитети на општеството, како и на можностите за нови бизниси и директни инвестиции.