!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Милан Зарубица, притворениот од „фабриката“ во Тетово, бил доктор за рак и за дрога


Белград, 5 декември, 2017 - 13:45 (META) 

Милан Зарубица, некогаш угледен фармацевт кој докторирал на анализа за лекување карцином, а подоцна станува озлогласен српски нарко-хемичар, е еден од главните организатори на нелегалното производство на амфетамини во „лабораторијата“ во Тетово.

Бил уапсен во Мала Речица, во фабриката за екстази и за каптагон во петокот, но тоа не е неговото прво апсење.

Како што пишува српскиот весник „Блиц“, Милан Зарубица од Земун, по ненадејната смрт на неговиот брат, фармацевт и стоматолог, Горан Зарубица, во деведесетите години на минатиот век, го презел неговиот бизнис со увоз на лекови и на фармацевтска опрема, го развил, но набргу зачекорил на другата страна на законот.

Милан докторирал на почетокот од деведесеттите години на минатиот век, со дисертација за лекување рак на тироидната жлезда на медицинскиот факултет во Белград, а откако го презел фармацевтскиот бизнис од брат му, односно во моментот на првото апсење во февруари 2003 година, бил сопственик и косопственик на фирмата „Ленал НБЦ“ и уште пет фирми за увоз на лекови и на фармацевтска опрема – „Микропоинт“, „Давидшпед“, „Варан фармасеутикалс“, „Варан кемикалс“ и „Кимел“. Повремено хонорарно ангажирал професори од Фармацевтскиот факултет во Белград, а таму доведувал и светски имиња.

Истовремено го ширел и бизнисот со производство на синтетички дроги, сокривајќи го зад фиктивните фирми кои му биле параван за продажбата, сè до моментот кога го „извезува“ бизнисот во Македонија. За тоа, како што пишува „Блиц“, информацијата дошла од американската агенција за борба против дрогата ДЕА.

Милан Зарубица првпат е уапсен на 4 февруари 2003 година, заедно со неговиот татко Филип, пред дрогата од тогаш најголемата балканска „фабрика“ да ја продаде на купувачи од Македонија и од Бугарија. Иако нивниот идентитет не се дознал, Зарубица добил 11 години затвор. Но, затворската управа на докторот на науки од Земун му дала повластен статус и слободни викенди, а тој тоа го користел за развивање на „бизнисот“, во кој го вклучил и внукот од брат, Бојан Зарубица, кој исто така бил уапсен во Белград, во рамките на големата акција на полициите на Македонија, Србија и на ДЕА.

Второто апсење на Милан поради производство и продавање синтетички дроги се случило на 12 мај 2011 година, откако на границата со Македонија била фатена негова пратка за двајца Турци и за еден Македонец. И откако во последниот ден до 2014 година излегол од затвор отслужувајќи ја првата затворска казна, следната година направил спогодба со српското обвинителство за организиран криминал за случајот од 2011 година, признавајќи дека поседува опрема и материјал за производство на синтетичка дрога, но специјалниот суд му ја потврдил казната и му изрекол единствена казна за случаите од 2003 и од 2011 година, односно 11 ипол години без решетки. Сепак, бидејќи веќе ја одлежал, не се вратил во затвор.

Потоа, пишува српскиот весник, со клиентите од Македонија кои првин му купувале дрога, а потоа посакале и повеќе и го довеле во Македонија за да произведува, бил следен од ДЕА, која заедно со српската и со македонската полиција обезбедила докази за да го врати зад решетки.

Милан Зарубица сега е во 30-дневен притвор изречен од судија на претходна постапка по барање од Основното јавно обвинителство за гонење организиран криминал и корупција на Македонија.


Притвор од 30 дена за лицата од тетовската лабораторија за амфетамин


Скопје, 5 декември, 2017 - 10:20 (META) 

Основното јавно обвинителство за гонење организиран криминал и корупција соопшти дека почнало истрага против двајца државјани на Република Србија и петмина македонски државјани. Тие се осомничени за неовластено производство и пуштање во промет на наркотични дроги, психотропни супстанции и прекурсори, а беа уапсени на крајот на минатиот месец при акцијата на полициите на Македонија и на Србија, кога беше откриена и лабораторијата за синтетички дроги во Тетово.

Сите седуммина од судија на претходна постапка добиле 30-дневен притвор. Меѓу нив е и Милан Зарубица, познат во Србија како некогашен стручњак што станал „балкански крал на синтетичките дроги“.

На 30 ноември и на 1 декември, македонското МВР со соработка со МВР на Србија изврши претрес на повеќе објекти и локации на подрачјето на Тетово и на Скопје. Притоа во Тетово беше откриена лабораторија за синтетички дроги, а во скопско Батинци се откриени опрема и големи количества материи за кои се смета дека се поврзани со пронајдените во Тетово.

Според Обвинителството, групата произвела вкупно 204.696 таблети амфетамин со вкупна маса од 35 килограми.


Пронајдени 60 килограми марихуана покрај реката Сатеска


Охрид, 24 ноември, 2017 - 13:50 (META) 

Дури 60 килограми марихуана во пакувања од околу еден килограм биле пронајдени вчеравечер крај мостот на реката Сатеска, на стариот пат Охрид – Струга, извести СВР Охрид.

Дрогата била пронајдена околу 21 часот вчера, во 59 пакувања, ставени во пет торби. Покрај нив имало и едно пакување кафена прашката материја, која заедно со марихуаната, е испратена за вештачење во Министерството за внатрешни работи во Скопје.

СВР Охрид и Секторот за недозволена трговија со оружје и со опасни материи преземаат мерки за целосно документирање и за расчистување на случајот.


Секој втор во Македонија пуши, најмладите најмногу се опиваат


Скопје, 21 ноември, 2017 - 14:47 (META) 

Речиси секој втор граѓанин на Македонија пуши, а во текот на изминатава година најголемо секојдневно опивање е забележано меѓу младите на возраст од 15 до 24 години, покажува новата студија за употребата на психоактивни супстанци во Република Македонија, која ја изработи Институтот за јавно здравје (ИЈЗ) на Република Македонија.

Презентирајќи ја студијата, директорот на ИЈЗ, Шабан Мемети, нагласи дека загрижува и фактот што дури половината од учениците на возраст од 15 и 16 години барем еднаш или двапати пробале марихуана.

Студијата го опфатила населението на возраст меѓу 15 и 64 години и е утвдено дека 46 отсто од нив се активни пушачи, а потесно, во групата од 15 до 34 години, 40 отсто пушат.

Во поглед на алкохолот, дури 76,9 отсто од луѓето на возраст од 25 до 34 години некогаш консумирале алкохол, а во изминатата година и во изминатиот месец највисок е процентот на консумирање алкохол кај младите на возраст од 15 до 24 години, односно 68,5 отсто. Четири или повеќепати седмично алкохол консумира највозрасната група од испитувањето, односно луѓето на возраст од 55 до 64 години, при што бројката на мажи во оваа категорија е четирипати поголема од таа на жените.

Од сите старосни групи, бројката на секојдневно тешко пиење (шест или повеќе чаши алкохолни пијалоци во иста пригода) е најзастапено кај младите на возраст од 15 до 24 години, односно 1,7 отсто од нив се со таква зависност.

Дури 32,5 отсто од испитаниците пријавиле дека во изминатата година земале апчиња за смирување, а тука се „најактивни“ најстарите меѓу испитаниците.

Во поглед на негалните дроги, 8,9 отсто од сите испитаници рекле дека некогаш во животот земале илегални дроги, а тука предничат младите на возраст меѓу 15 и 24 години, со 18,9 отсто.


Во Италија запленета дрога на Исламска држава вредна 50 милиони евра


Рим, 3 ноември, 2017 - 13:24 (META) 

Во Италија се запленети повеќе од 24 милиони таблети синтетички опијати, чија вредност се пронесува на 50 милиони евра.

Италијанските власти тврдат дека екстремистите на Исламска држава планирале со парите од продажбата да финансираат напади на повеќе места во светот.

Апчињата ги заплениле припадниците на финансиската полиција и на царината во најголемото италијанско пристаниште Џоја Тауро, стои во соопштението на претседателот од локалниот суд.

Објавена е и видеоснимка на која се гледа како полицијата отвора контејнер полн кутии „трамадол“, јак лек против болки кој може да се добие само на рецепт.

Меѓународните истражители соопштија дека дрогата припаѓа на Исламска држава.

Обвинителот истакнал дека со продажбата на дрога раководела Исламска држава.

Како што се наведува, дел од парите заработени од продажбата на дрогата требало да се користат за финансирање екстремистички групи во Либија, Сирија и во Ирак.


Запленети 16 килограми марихуана на Блаце


Скопје, 31 октомври, 2017 - 13:20 (META) 

Двајца скопјани добија кривични пријави за трговија со дрога, поради обид во земјава да внесат речиси 16 килограми марихуана.

Тие на 28 октомври, на граничниот премин Блаце, се пријавиле за влез во Македонија од Косово. При прегледот на автомобилот „шкода октавија“ со кој патувале биле најдени 22 пакувања, односно 15 килограми и 725 грама марихуана.

Шверцерите рекле дека дрогата ја презеле од Косово и била наменета за Скопје, а тие требало само да ја транспортираат. За тоа им биле ветени 7.500 евра.

Вредноста на дрогата, при улична продажба на црниот нарко-пазар, се проценува на околу 80.000 евра.


Бурна биографија на „боемот“ Борис Трајков, обвинет за проневера во Мелбурн


Мелбурн, 18 октомври, 2017 - 15:08 (META) 

Медиум на македонски јазик во Австралија, Борис Трајков го нарекува „боем“ и „плејбој“. Австралиската државна телевизија „Еј-би-си“, пак, со него се занимава како осомничен за проневери вредни милиони австралиски долари, како човек уапсен во јануари годинава поради одгледување значителни количества марихуана, како човек што крадел струја додека бил пуштен на слобода со кауција… Австралискиот новинар со македонско потекло, Саша Узунов, пак, на својот блог подолго време наназад вади по некој интересен детаљ и Трајков го нарекува „соработник на пројугословенските структури во тогашна Социјалистичка Република Македонија и тогашна СФРЈ“.

Поранешниот новинар Борис Трајков (76) вчера го привлече вниманието на јавноста во Република Македонија и на Македонците низ светот поради судскиот процес за проневера на пари од Викториската мултиетничка славјанска добротворна асоцијација (Victorian Multiethnic Slavic Welfare Association), која им помагала на остарените мигранти од просторите на поранешна Југославија, а раководела и со детска градинка во мелбурнското предградие Лелор. Таа завршува во стечај во 2016 година и оттогаш почнува да се расплеткува клопчето кое стасува до 3,5 милиони австралиски долари на кои им се губи трагата.

Според тоа што го пренесува веб-страницата на австралиската „Еј-би-си“, во текстот за обвинението против Борис Трајков во февруари годинава, тој и неговата сопруга се доселиле во Австралија во 1967 година и тој набргу станува интересен за АСИО – австралиската тајна служба за контраразузнавање. Во неговото досие, отворено од контраразузнавачите во 1971 година, потоа се додадени и различни полициски документи од претходниот период, кои зборуваат за негово активирање на полето на криминалот.

Така, една полициска белешка од 1968 година содржи наводи дека во неговото кафуле се одвива нелегално коцкање. Друга белешка од полицијата на сојузната држава Викторија од 1969 година вели дека во неговото кафуле „чести гости се крадци и бандити“, а за Трајков се вели дека е без работа и во неговиот локал прибира личности со сомнителен морал.

Неговиот интерес за угостителството не запира, па го отвора ресторанот „Голден грил“, а во поново време тој е сопственик во сенка на ресторанот „Њу Јуроп“ во мелбурншкото северно предградие Престон, каде што многу често има настапи на музичари и на групи од Македонија. Во октомври 2015 година, двајца членови на мотоциклистичката банда Команчерос испукале два куршума во плафонот на ресторанот, кој пак минатата година беше опожарен.

Според „Еј-би-си“, на Борис Трајков му се закануваат и други обвиненија, вклучувајќи стекнување имот со измама, користење лажни документи при аплицирање за кредитни картички во август минатата година, а исто така на суд било посведочено дека двапати на полицајците им се претставувал со лажен идентитет кога бил испрашуван поради неговото возење.

Тој, инаку, бил цел на АСИО во седумдесетите и во осумдесетите години на минатиот век поради неговите блиски врски со југословенските дипломати. Од 1975 година до 2000 година бил спикер и новинар на австралиското државно мултиетничко радио „Си-би-ес“.

 


Во Перу запленети 1.300 килограми дрога и уапсени 17 лица


Лима, 18 октомври, 2017 - 10:34 (META) 

Полицијата во Перу запленила 1.3оо килограми кокаин во контејнер во пристаниште во близина на Лима и уапсила 17 лица.

Групата криумчари ја предводел Мексиканец, а била финансирана од Бразилец, соопшти полицијата и додаде дека дрогата ја пронашле обучени кучиња.

Дрогата требало да биде префрлена во Мексико и оттаму во САД со помош на мексиканскиот нарко-картел Синалоа, соопштија властите во Перу.

Апсењата истовремено се спроведени во неколку перуански градови, а меѓу уапсените е и Бразилецот Нелсон Добинс Робељо, локално познат криумчар.

Перуанските нарко-картели се меѓу најголемите производители на кокаин со 400 тони дрога годишно и со приход од 8,5 милијарди долари.


На „Блаце“ запленети 22 килограми марихуана


Скопје, 15 август, 2017 - 13:06 (META) 

Вкупно 22 килограми марихуана скриени во џип биле откриени од цариниците на граничниот премин „Блаце“ завчера вечерта, соопшти Царинската управа на Република Македонија.

Околу 18.30 часот во неделата за влез во државата на граничниот премин „Блаце“ бил пријавен спортски теренец со бугарски таблички, управуван од бугарски државјанин, жител на селото Белаковец, Бугарија. Возачот рекол дека нема ништо за царинење, но цариниците го ставиле автомобилот на детална контрола, по што бил откриен специјално направен бункер по целата должина на левата и десната страна од подот. Во левиот дел од бункерот биле пронајдени 12 паковки а во десниот дел биле пронајдени уште 13 паковки со непозната зеленкаста тревкаста материја, за која по извршената проверка со тестер за дрога се утврдило дека е марихуана. Вкупната маса изнесувала околу 22 килограми.

Во разговорот со возачот било утврдено дека тој со косовски државјанин се договорил за надомест од 3.000 евра да ја превезе дрогата до Западна Европа.


ВМРО-ДПМНЕ: СДСМ нема фатено дрога не затоа што ја нема, туку зашто е во коалиција со криминалот


Скопје, 11 август, 2017 - 12:27 (META) 

МВР под водство на СДС и на неспособниот Оливер Спасовски нема фатено ни грам дрога, не затоа што ја нема, туку затоа што СДС е во коалиција со криминалот, обвини Сашо Павлоски од ВМРО-ДПМНЕ на прес-конференција денеска.

Тој додаде дека приоритет за СДСМ и за Оливер Спасовски било да се пресметаат со сите полициски службеници кои професионално воделе истраги за нарко-дилерите што одработувале за Заев на минатите избори.

– За неполни три месеци од доаѓањето на власт, СДС направи целосен хаос и партизација во министерството за внатрешни работи. За неполни три месеци Оливер Спасовски подели 500 решенија, унапредувајќи партиски послушници по четири-пет скалила, што е спротивно на системот на кариера и на Законот за внатрешни работи. Сведоци сме дека и во минатото, кога СДС беше на власт, наместо структурни реформи во полицијата и унапредување на ефикасноста на министерството, наместо откривање и неутрализирање на криминални групи, се случуваше токму спротивното – изјави Павлоски.

Тој додаде СДСМ ја препушта безбедноста на граѓаните во раце на неспособни и на непрофесионални кадри, кои имаат цел да го штитат криминалот на луѓето блиски до врвот.