Општините ќе може да искористат 6,5 милиони евра за инфраструктура и градинки


Скопје, 13 август, 2018 - 9:34 (META) 

Општините ќе можат да аплицираат за 6,5 милиони евра за капитални проекти преку Проектот за подобрување на општински услуги – МСИП, информираат од Министерство за финансии. Општинските власти треба да подготват предлог-проекти со кои ќе аплицираат на јавниот повик, кој Министерството за финансии ќе го објави во септември и истиот ќе го спроведува.

Тој е поддржан од Светска банка со вкупен фонд од 81,1 милион евра и ИПА-грант средства за рурален развој од ЕУ во износ од 14,6 милиони евра. Целта на проектот е да ги подобри услугите кои ги дава општината на граѓаните, како и капацитетите на општинската администрација за имплементирање на проектите.

Во рамки на проектот се финансираат општински проекти како изградба и реконструкција на систем за водоснабдување, канализација и одведување отпадни води, локална патна инфраструктура, енергетска ефикасност, изградба на детски градинки, зелени пазари, инфраструктура во индустриска зона и слични проекти.

– Илјадници граѓани во Македонија добиваат подобри услуги од својата општина благодарение на овој проект. Годишно, тоа се десетици километри нови или реконструирани локални улици, изградена или реконструирана водоводна мрежа, реконструирани речни корита, градинки, културни домови, општински згради итн. Ова се реални проекти, со реални вредности за граѓаните – вели министерот за финансии Драган Тевдовски.

Само преку овој проект, на годишно ниво – од јуни 2017 до јуни 2018 година, реализирани се 72 капитални проекта во 41 општина.


Глобите за царински прекршоци намалени за 75 отсто


Скопје, 6 август, 2018 - 9:30 (META) 

За 75 проценти во просек се намалени глобите за царинските прекршоци за кои е предвиден мандатен платен налог, односно за оние кои можат да се платат на лице место, информираат од Министерство за финансии.

Од таму додаваат дека со измените на Царинскиот закон се врши намалување на глобата од 250 евра на 50 евра за правно лице и од 50 евра на 15 евра за физичко лице.

„Како што истакна министерот за финансии Драган Тевдовски, целта на измените е подобрување на легислативата во насока на создавање на униформна, правична и пропорционална примена на прекршочните одредби, соодветно на тежината на сторениот прекршок. Со измените на Царинскиот закон се овозможува и побрз проток на стоките. Имено, тој овозможува взаемното признавање на издадените одобренија за овластен економски оператор во рамките на ЦЕФТА. Ова е голема придобивка за македонските трговски друштва кои тргуваат во регионот“, се вели во соопштението.

Од Министерство за финансии додаваат дека признавањето на одобренијата за економски оператор ќе овозможи побрз проток на стоката која се извезува, помалку физички и документарни контроли и можност да се одбере местото каде ќе се спроведат контролите.

„Со измените на законот се врши и усогласување со Конвенцијата за заедничка транзитна постапка. Со нив се усогласуваат одредбите кои се однесуваат на употреба на гаранции за обезбедување на плаќање на царинскиот долг или други давачки кои можат да настанат во врска со стоката ставена во транзитна постапка. Измените на законот стапуваат на сила кон средината на овој месец“, се додава во соопштението.


Собранието го усвои Царинскиот закон за олабавување на казнена политика


Скопје, 31 јули, 2018 - 10:19 (META) 

Хармонизација со законодавството на Европската унија, побрз проток на стоки и олабавување на казнената политика, предвидуваат измените и дополнувањата на Царинскиот закон, кои ги усвои Собранието на вчерашната седница.

– Целта на измените е подобрување на легислативата во насока на создавање на униформна, правична и пропорционална примена на прекршочните одредби, соодветно на тежината на сторениот прекршок. Со предложените измени во прекршочните одредби се врши намалување на глобата од 250 евра на 50 евра за правно лице и од 50 евра на 15 евра за физичко лице, за делот од царинските прекршоци за кои е предвиден мандатен платен налог – рече министерот за финансии Драган Тевдовски во експозето на законот.

Со предложените измени се овозможува взаемното признавање на издадените одобренија за овластен економски оператор во рамките на ЦЕФТА, што ќе придонесе за олеснување на регионалната трговија.

„Ова е голема придобивка за македонските трговски друштва кои тргуваат во регионот, на кои ќе им се овозможи побрз проток на стоката која се извезува, помалку физички и документарни контроли и можност да го одберат местото каде ќе се спроведат контролите. Со измените на законот се врши и усогласување со Конвенцијата за заедничка транзитна постапка. Со овие измени се усогласуваат одредбите кои се однесуваат на употреба на гаранции за обезбедување на плаќање на царинскиот долг или други давачки кои можат да настанат во врска со стоката ставена во транзитна постапка“, се вели во соопштението на Министерство за финансии.


Собранието ја усвои завршната сметка за ланскиот буџет


Скопје, 23 јули, 2018 - 12:19 (META) 

Собранието денеска ја усвои завршната сметка за буџетот за 2017 година. Во експозето за завршната сметка, министерот за финансии Драган Тевдовски посочи дека иако Владата се соочила со брзорастечки јавен долг оставен од претходната власт, успеала да го стави под контрола, како и дека се направени клучни промени во системот на јавните финансии со зголемување на транспарентноста.

Тевдовски посочи дека кога Владата дошла на власт во јуни 2017 година заткенала брзорастечки јавен долг, кој од 1,5 милијарди евра во 2008 година е зголемен на 4,7 милијарди евра во 2016 година. Тој рече дека од претходната влада се наследени доспеани, а неплатени обврски насекаде низ системот. Министерот истакна дека изминатата година успешно се управувало со јавниот долг и како резултат на тоа во 2017 година, за првпат после девет години, јавниот долг како процент од домашниот бруто-производ (БДП) е намален.

По доаѓањето на власт на сегашната влада, рече министерот, економскиот раст во втората половина од 2017 влегол во позитивна зона, со стапка на раст од 0,7 проценти. Приватната потрошувачка и извозот во текот на минатата година пораснале, додека невработеноста се намалила на 22,4 проценти.

Во однос на приходите во буџетот, министерот посочи дека имало солидна наплата и дека таа била повисока во однос на претходната година за 6,1 проценти. Во однос на расходите, тој истакна дека редовно се покривале сите обврски на државата.

Министерот за финансии посочи и дека минатата година капиталните расходи се реализирани на историско највисоко ниво во износ од 19,86 милијарди денари, и се за 2,89 милијарди денари повисоки во однос на реализацијата во 2016 година. Одлична реализација имале ИПА-проектите.

Буџетскиот дефицит е реализиран во износ од 16,86 милијарди денари или 2,7 проценти од БДП. Тоа е за 1,71 милијарди денари помалку од проектираното со буџетот.


Буџетот на државата ќе биде претставен преку веб-апликација, видео и игра


Скопје, 5 јули, 2018 - 13:04 (META) 

Министерството за финансии ќе го направи буџетот уште подостапен и транспарентен за граѓаните преку веб-апликација, видео и мултимедијална игра, информираат од таму. Во апликацијата, видеото и играта ќе се прикажат приходите и расходите на државата, како тие се собираат и трошат, на начин приемчив за граѓаните.

Натпреварувачите на „Фин хакатонот“, кој го организира Министерството во соработка со Фондот за иновации и технолошки развој, ќе треба да ја исполнат оваа задача во рок од 48 часа, од петок до недела. Фондот за награда ќе биде 1,5 милиони денари.

– Најдобрите идеи доаѓаат од народот. Во овој случај граѓаните ќе креираат апликација, видео и игра кои ќе ги доближат јавните финансии до граѓаните. Ќе го употребиме нивното видување за буџетот да стане поразбирлив и подостапен за сите – рече министерот за финансии Драган Тевдовски, кој посочи дека имало голем интерес за пријавување на „Фин хакатонот“.

На „Фин хакатонот“ учествуваат седум тима натпреварувачи во групи од три до шест лица – програмери, графички дизајнери, економисти и креатори на софтвер.

Тие за време на викендот ќе се преселат во Министерството за финансии и континуирано ќе работат на идејното решение. Во недела жирито ќе избере најдобри предлози. Во жирито покрај министерот за финансии ќе бидат и директорот на Фондот за иновации Јован Депостовски, како и претставници на академската заедница, на невладиниот сектор и експерти.

Хакатонот е натпревар, предизвик, во кој во ограничен временски период и простор програмери, графички дизајнери, хакери и креатори на софтвер, да работат на развој на софтверски или мултимедијален производ на зададена тема.

– Буџетот претставува најсеопфатен документ на проектите и политките кои ги спроведува Владата. Затоа овој „Фин хакатон“ е посветен токму на буџетот. Граѓанскиот буџет добива нова форма, многу попристапна и поразбирлива за јавноста – додаде Тевдовски.


Тевдовски: Преку ЕБОР обезбедни 10 милиони евра повластени кредити за претпријатијата


Скопје, 20 јуни, 2018 - 15:21 (META) 

Министерот за финансии, Драган Тевдовски присуствуваше на потпишувањето на договорот помеѓу ЕБОР и Охридска банка, со кој, на малите и средни претпријатија им се ставаат на располагање 10 милиони евра повластени кредити за нови инвестиции.

Тевдовски истакна дека ваквите кредитни линии кои ги поддржуваат инвестициите на малите и средни претпријатија се од големо значење за економијата.

– Кредитната линија од ЕБОР, преку Програмата за поддршка на конкурентност и иновативност, е стимул за вложувања во нови производни капацитети и отворање на нови работни места. За време на годишните состаноци на ЕБОР со претставници од банката зборувавме за вложувањата во приватниот сектор и заклучивме дека ова е навистина добар проект. Со вкупен фонд од 30 милиони евра и 6 милиони евра ЕУ инвестициски грантови оваа линија е ликвидносна инјекција, која ќе придонесе за раздвижување во секторот мали и средни претпријатија-  рече Тевдовски.

Кредитната линија содржи механизми за стимулирање на инвестициите. Малите и средни претпријатија за 15 проценти од реализираната инвестиција ќе може да добијат поврат на средствата во форма на грант.


Општините ќе може да апицираат за 5 милиони евра за подобрување на услугите


Скопје, 11 јуни, 2018 - 15:34 (META) 

Општините ќе може да аплицираат со капитални проекти за средства од Проектот за подобрување на општинските услуги, информираше министерот за финансии, Драган Тевдовски  на отпочнувањето на градба на општинската зграда на Oпштина Арачиново.

Тој најави дека ќе биде објавен јавен оглас за 5 милиони евра заеми преку проектот и ги повика градоначалниците кои што имаат добар проект да аплицираат за средствата.Општинската зграда во Арачиново e финансирана со грант средства од ИПА во износ од 260.000 евра.

– Голема благодарност до Светската банка и Европската унија, кои финансиски го поддржуваат Проектот за подобрување на општинските услуги. Станува збор за вкупен фонд за заеми од 81,1 милиони евра од Светска банка и 20,6 милиони евра грант-средства од ЕУ преку ИПА-фондовите – рече министерот.

Проектот за подобрување на општински услуги е наменет за финансирање на капитални инфраструктурни проекти во општините. Тој поддржува проекти од типот на локална патна инфраструктура, изградба на детски градинки, зелени пазари, водоснабдување, енергетска ефикасност, комунални како и други општински услуги.

Досега се склучени 72 договори со 56 општини за заем преку проектот, додека за ИПА грантовите се склучени договори со сите 78 општини за 133 проекти.


Тевдовски: Работиме на подобрување на деловната клима и фискална консолидација


Скопје, 11 јуни, 2018 - 13:39 (META) 

Реформи во насока на подобрување на деловното окружување и постепена фискална консолидација, најави министерот за финансии Драган Тевдовски на конференцијата по повод започнување на изработка на Програмата за економски реформи 2019-2021.

На конференцијата присуствуваше амбасадорот на Европската унија во Македонија, Самуел Жбогар и сите инситуции кои се вклучени во подготовката на реформскиот документ кој се доставува до ЕУ.

-За првпат имаме јасна и кредибилна стратегија за реформи во јавните финансии, подготвена заедно со ЕУ. Таа содржи акционен план за подобрување на сите поважни елементи на системот на јавни финансии во следните три години. Значително е подобрена транспарентноста. Денес граѓаните имаат увид во тоа како се трошат државните пари. Се објавуваат граѓански буџети, како и низа извештаи за извршување на буџетот, кои порано не беа достапни на јавноста. Јавно се достапни и договорите за јавни набавки на институциите, а со новиот закон ќе бидат достапни и сите понуди доставени на тендерите – рече Тевдовски.

Жбогар посочи дека Македонија имала најдобро остварување во спроведувањето на реформите минатата година во однос на сите други земји, како и дека го подобрила сопствениот резултатот во однос на претходните години.

– Достигнат е видлив прогрес во управувањето со јавните финансии. Земјата започна со имплементирање на реформската програма која ја усвои, а и драстично е подобрена фискалната транспарентност. Народната банка во континуитет спроведува стабилна монетарна политика, одржувајќи го нивото на денарот и ценовната стабилност. Владата го лимитираше носењето на закони по скратена постапка. Исто така, сега сите министри се обврзани да ги објавуваат законите на ЕНЕР за јавна консултација. усвојувањето на стратегијата за образование содржи чекори за подобрување на квалификациите на наставниците- рече Жбогар.

Програмата за економски реформи е сеопфатен документ за економското управување, кој земјите аспиранти за членство се обврзани да го поднесуваат до Европската комисија секоја година. Програмата 2019-2021 треба да се достави до Европската комисија до 31 јануари 2019 година.


Тевдовски: 33,4 милиони долари за грантови за градинки и социјални услуги


Скопје, 4 јуни, 2018 - 12:00 (META) 

Грантови за општините за изградба на нови градинки, за реновирање на постоечки и пренамена на постојни објекти во институции за деца на предучилишна возраст, најави министерот за финансии Драган Тевдовски на отворењето на првата градинка во Oпштина Чашка, каде присуствуваше и министерката за труд и социјала Мила Царовска.

Станува збор за проект во износ од 33,4 милиони долари, кој Светска банка, за време на Пролетните средби во Вашингтон, изразила интерес да го финансира.

Освен за изградба и реконструкција на градинки парите од заемот од Светска банка би се користеле и за подобрување на квалитетот на услугите во предучилишните установи, унапредување на наставните програми и обуки на кадрите. Исто така, ќе се доделуваат грантови и за други социјални услуги на локално ниво.

– Во тек е мисија на тимот на Светска Банка за проценка на проектот. Преговорите помеѓу Владата и банката треба да почнат на почеток на јули. За крај на септември се планира проектот да биде одобрен од бордот на директори на Светска Банка. Потпишувањето на договорот треба да се случи на крајот на годинава – изјави Тевдовски и истакна дека затекнати се бројни проблеми во предучилишното образование.

Тевдовски посочи дека во годинешниот буџет има определено значително повеќе средства за блок дотации за детски градинки или околу 1,6 милијарди денари. Предвидени се и средства за 200 нови вработувања во градинките како и за покачување на платите на вработените за 5 отсто, почнувајќи од септември годинава.

„Во буџетот за 2018 има 58 милиони денари за изградба и опремување на детски градинки и објекти за социјална заштита – додаде Тевдовски.


Поддршка од ЕК за реформите во јавните финансии


Скопје, 31 мај, 2018 - 13:52 (META) 

Постои силна политичка волја за подобрување на управувањето со јавните финансии, беше истакнато денеска од страна на Европската комисија, на настанот за спроведување на Програмата за реформи во јавните финансии (ПФМ) во Министерство за финансии.

Пред претставници на Комисијата, вклучително и амбасадорот на ЕУ во Македонија, Самуел Жбогар, се обрати министерот за финансии Драган Тевдовски, кој ја поздрави заложбата на институциите во изработка и спроведување на реформите, кои како што истакна се работат со засилено темпо.

„Согласно Програмата предвидено е во текот на годината да се направат крупни реформи во фискалниот сектор. Во рамки на тие реформи се воведувањето на среднорочно буџетирање, новиот закон за јавни набавки, даночни реформи, закон за јавна внатрешна финансиска контрола и континуирано унапредување на фискалната транспарентност“, информираат од Министерство за финансии.

Реформите во Програмата се структуирани во рамки на седум приоритети чија цел е подобрување на ефикасноста и ефективноста на јавните трошења преку фискална дисциплина, одржливост на долгот и ефикасно, транспарентно и современо управување со јавните финансии, одржлив развој и благосостојба на граѓаните.