!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Поголема акциза за нафтата значи помалку пари во семејниот буџет


Скопје, 2 ноември, 2017 - 16:44 (META) 

Со зголемување на акцизата на горивата за фрапантни 3,54 денари, ќе се одземат пари од семејниот буџет на граѓаните, изјави на прес-конференција Драган Данев од ВМРО-ДПМНЕ, како реакција на најавеното зголемување на акцизата на нафтата и на нафтените деривати во предлог-буџетот за 2018 година.

Тој додаде дека зголемувањето на акцизата на горивата ќе значи и поголем трошок за повеќе производи кои директно зависат од цената на горивото, како транспортните услуги, градежните услуги, па дури и цената на лебот и прехранбените продукти.

– Ќе настрадаат сите граѓани, бидејќи зголемената цена на нафтата значи отворање на спиралата на инфлацијата: повисоки цени на превозот, повисоки цени на прехранбените и сите други производи. Доколку имате едно возило во семејството и месечно трошите 100 литри гориво, ќе плаќате 354 денари повеќе, а тоа во период од една година се 4.248 денари повеќе од секое семејство. Доколку имате две возила во семејството, тоа се 8.496 денари годишно, пари кои ќе се земаат од секое семејство за прикривање на расипништвото на СДС – изјави Данев.


ВМРО-ДПМНЕ: Управниот суд подлегна на притисоците од СДС и од СЈО


Скопје, 24 октомври, 2017 - 12:44 (META) 

Управниот суд подлегна под систематскиот притисок од СДС и од Специјалното јавно обвинителство и не дозволи прегласување во ниту едно избирачко место, реагираат од ВМРО-ДПМНЕ на одлуките на Управниот суд за тужбите што партијата ги поднесе во врска со одбиените приговори од ДИК за првиот круг од локалните избори.

– ВМРО-ДПМНЕ до Управниот суд поднесе 24 тужби за 45 избирачки места за изборни нерегуларности, а судот не дозволи прегласување во ниту едно избирачко место. Ваквото дејствување на Управниот суд е поради оркестрираниот притисок од страна на двоецот СДС – СЈО. Имено, СЈО во предизборниот период поведе монтирана постапка против пет судии во Управниот суд поради нивно слободно судско уверување, додека Судскиот совет под влијание на СДС, надвор од секаква правна логика, им го одзеде судскиот имунитет – изјави денеска пратеникот на ВМРО-ДПМНЕ, Драган Данев.

Тој рече дека Државната изборна комисија (ДИК) и Управниот суд биле под страшен притисок, како и целата администрација.

– ВМРО-ДПМНЕ ги предупредува и ги потсетува сите што за потребите на СДС вршат изборен криминал и ги изигруваат законите, дека со враќањето на демократијата во Македонија, ќе се врати и правната држава, а сите прекршители на законите ќе одговараат во согласност со законите – рече Данев.


Лага е дека странски инвеститори си заминуваат од Македонија, реагира СДСМ


Скопје, 17 септември, 2017 - 17:04 (META) 

Лага е дека странски инвеститори планираат да заминат од земјава, реагираат од СДСМ на прес-конференцијата на пратеникот на ВМРО-ДПМНЕ, Драган Данев.

„Нереформираната ВМРО-ДПМНЕ на Никола Груевски упорно шири лажни вести. Вистината е дека Владата предводена од СДСМ докрај ќе ги испочитува сите договори со странските инвеститори што се во тек, со заемно почитување на обврските“, стои во соопштението на СДСМ.

Од владејачката партија велат дека новиот план за економски пораст обезбедува стабилна бизнис-клима за трајни и долгорочни инвестиции, а новите мерки за привлекување странски и домашни инвестиции предизвикуваат заинтересираност и ентузијазам кај инвеститорите.

„ВМРО-ДПМНЕ и Данев очигледно се уплашени од изборниот пораз и видно вознемирени од соочување со одговорноста за сомнителното трошење на 225 милиони евра народни пари што Никола Груевски и неговите соработници го правеа 10 години во бесцелни и економски неиздржани политики за наводно привлекување странски инвестиции“, додаваат од СДСМ.


Во Владата залудно постојат министри за странски инвестиции, обвини ВМРО-ДПМНЕ


Скопје, 17 септември, 2017 - 13:36 (META) 

Владата на СДСМ за само три месеци ја покажа својата неспособност во привлекувањето инвеститори и во отворање нови работни места, обвини денеска опозициската ВМРО-ДПМНЕ.

– Во Владата залудно постојат министри без ресор за привлекување инвестиции. Во Владата залудно постојат двајца советници од Србија кои се плаќаат со народни пари. Овие дебели хонорари не донесоа никаква добробит. Резултатот од оваа неодговорност се нула инвеститори во овие три месеци и нула отворени работни места – изјави пратеникот на ВМРО-ДПМНЕ, Драган Данев.

Тој истакна дека економската политика на СДСМ е „фијаско“, а Владата наместо да привлекува странски инвеститори, по секоја цена сака да ги избрка и тие што веќе инвестирале во земјава.

– Ова нема да се одрази само на невработеноста. Тоа ќе се одрази и врз целото стопанство, бидејќи голем број фирми се директно поврзани со производствениот процес во странските инвестиции – рече Данев.


ВМРО-ДПМНЕ: Постапката за разрешувањето на Зврлевски е целосно незаконска


Скопје, 17 август, 2017 - 14:44 (META) 

Постапката за разрешување на Јавниот обвинител, Марко Зврлевски која сакаат да ја истуркаат пратениците на СДС и Талат Џафери во Собранието е целосно незаконска, изјави пратеникот од ВМРО-ДПМНЕ, Драган Данев.

Тој додаде дека „само за да се спаси од кривично гонење за делата како „Поткуп“, Зоран Заев е решен по незаконски пат и надвор од сите законски процедури да го менува Јавниот обвинител, Марко Зврлевски пред избори.“

– Државната комисија за спречување на корупцијата, во врска со процедурата за разрешување на Јавниот обвинител излезе со став кој е јасен и базиран на закон. ВМРО-ДПМНЕ е свесно дека мнозинството во Собранието е одлучено да го разреши Јавниот обвинител и дека тоа е политичка и партиска одлука на Зоран Заев. Одговорноста за носењето на одлука за разрешување на Јавниот обвинител, Марко Зврлевски и кршењето на Изборниот закон е целосно врз пратениците на мнозинството предводено од СДС како и Талат Џафери – додаде Данев.


Тевдовски: Обвинувањата за големи задолжувања се манипулација


Скопје, 4 август, 2017 - 14:42 (META) 

На третиот ден на расправата за ребалансот на буџетот, пратениците на ВМРО-ДПМНЕ ја обвинија власта дека со овој буџет ќе има ново задолжување, нема да се заврши ниту еден проект и дека ќе се зголеми буџетскиот дефицит.

Според пратеникот на ВМРО-ДПМНЕ, Крсто Мукоски, ребалансот на буџетот ги признава успешните политики на претходната влада и здраво поставените економски фундаменти.

– На глас ја критикувавте несразмерноста на буџетот од три милијарди евра, а со новиот ребаланс имате минимално намалување на буџетот од 1,5 отсто, односно висината на буџетот ја задржавте. Преку буџетскиот дефицит велевте дека минатата влада била недомаќинска, трошела непродуктивно, а вие со ребалансот дефицитот го здржувате на исто ниво од 302 милиони евра. Зошто, кога кратите на капитални инвестиции, не го намалите буџетскиот дефицит – праша Мукоски.

Тој додаде дека со вака поставените макроекономски показатели, буџетскиот дефицит ќе се зголеми на 3,5 проценти, а тоа значи и зголемување на задолжувањето, при што ќе мора да се повлече капитал од домашниот пазар и преку издавање на нова еврообврзница.

Министерот за финансии, Драган Тевдовски, одговори дека се неточни бројките околку задолжувањето.

– Во јуни и во јули нето-задолжувањето беше 1,8 милијарди денари на домашниот пазар. Кон странство беше вратен долг од 81,9 милиони евра. Ако некој треба да врати нечиј кредит од сума од 500 денари и денеска за тој кредит земе нов кредит од 550 денари, дополнителното нето-задолжување е 50 денари. Не правете манипулации  со бројките – одговори Тевдовски.

Тој рече дека има потреба од задолжување бидејќи во јануари 2018 година треба да се врати стар кредит од 90 милиони евра, а во 2020-2021 година треба да се вратат една милијарда евра, што, според Тевдовски, е двегодишна плата за цела администрација.

Пратениците на опозицијата обвинија дека со ребалансот нема поголеми плати, пензии, субвенции и нема поголем стандард на граѓаните, а на сметка на тоа има изградба на кампови за мигранти.

– Ребалансот на буџетот е чист популизам за да се вдомат партиските кадри за на 15 октомври да излезете на локални избори – обвини пратеникот Драган Данев од ВМРО-ДПМНЕ.

Благојче Трпковски од СДСМ рече дека ребалансот на буџетот е одраз на домаќинското работење на новата влада.

По паузата, расправата за ребалансот на буџетот ќе продолжи во 15.30 часот.


ВМРО-ДПМНЕ: СДСМ само на зборови сака инклузивност и соработка со опозицијата


Скопје, 29 јули, 2017 - 15:30 (META) 

ВМРО-ДПМНЕ денеска го обвини СДСМ за самоволие и дека нема ништо од ветувањата за инклузивност и за соработка со опозицијата.

– СДСМ мора да престане да се однесува како да се сопственици на Собранието на Република Македонија и да почне да се однесуваат како парламентарно мнозинство во една парламентарна демократија. Каде е демократијата која од уста не ја вадеа додека беа во опозиција? Ова не е демократија, ова е самоволие и обид за присвојување на сите процеси што се случуваат во Република Македонија – изјави пратеникот Драган Данев.

Тој истакна дека СДСМ преку блокада на амандманската расправа и бројните бесмислени реплики не дозволи сериозна и содржинска дебата, поради што мал број амандмани биле разгледани и образложени.

– Од вкупно 706 амандмани од пратениците на ВМРО-ДПМНЕ и на Коалицијата за подобра Македонија и нешто повеќе од стотина амандмани од страна на другите партии во опозиција, Комисијата за финансирање и буџет разгледа само 62 амандмани, односно преку одлговлекување и блокирање на расправите СДСМ имаше јасна цел, а тоа беше разгледување на што помал број на амандмани – рече Данев.

Тој исто така додаде дека поминатите амандмани биле предложени од парламентарното мнозинство и дека ниту еден амандман од опозицијата не бил прифатен.

– Ова претставува јасен показател за начинот на кој СДСМ планира да владее и да ја води државата. Неприфаќањето на ниту еден амандман на опозицијата од страна на СДСМ исто така е еден од ретките случаи кога парламентарно мнозинство на таков арогантен и игнорантски начин ја третира опозицијата – рече Данев.
Тој исто така порача дека ако владејачката партија навистина сака вклученост на позицијата во сите битни одлуки за државата, тогаш треба зборовите да ги покажат на дело, односно да покажат дека се спремни за соработка и инклузивност.


Од ВМРО-ДПМНЕ тврдат дека од работа биле избркани успешни директори на институции


Скопје, 24 јули, 2017 - 15:01 (META) 

Зоран Заев и СДС почнаа со партиските чистки и со политичкиот прогон на неистомислениците, со нивно бркање и смена од работни места, изјави на прес-конференција Драган Данев од ВМРО-ДПМНЕ.

Тој додаде дека во еден ден биле сменети 1.500 членови на управни и на надзорни одбори.

– Фондот за здравство сè уште не може да носи одлуки за лекување на болни осигуреници во странство поради ваквиот дилетантски однос на антиреформаторската влада. Се бркаат од работна позиција успешни директори на институции само и само затоа што не одработувале за интересите на Заев и на СДС и затоа што над нив новиот режим нема контрола. Покрај партиските војници, се вработуваат и децата на коалиционите партнери, разно-разни комичари, поети и самонаречени експерти, кои со години одработувале за СДС и за Заев, лажејќи ги сите другите граѓани дека се граѓански коректив на власта – додаде Данев.


ВМРО-ДПМНЕ ќе побара информации за новите вработувања во институциите


Скопје, 22 јули, 2017 - 13:11 (META) 

Пратениците на ВМРО-ДПМНЕ и на Коалицијата за подобра Македонија ќе поднесат барање да им се достават информации за тоа колку нови луѓе се ангажирани или вработени во државните институции на определен, неопределен период, засновале работен однос врз основа на договор за дело, авторски или друг договор, информираше на денешната прес-конференција пратеникот од ВМРО-ДПМНЕ, Драган Данев.

Тој додаде дека во согласност со Законот за слободен пристап до информации од јавен карактер, ќе бараат да им биде доставена оваа информација бидејќи „јавноста секојдневно е бомбардирана со вработувања на партиски војници, членови на таканаречената „Шарена револуција“ и лица кои се во директни роднински релации со функционери од власта.“

– СДСМ дури и во ребалансот на буџетот кој е во собраниска процедура има предвидено повеќе средства за партиски вработувања во рамките на министерствата. Во буџетот има допoлнителни 12 милиони денари за привремени вработувања во Владата, односно буџетот е направен за да одговори на основната желба на СДСМ за партизација на институциите – изјави Данев.


ВМРО-ДПМНЕ: Политиката на СДСМ е „не ме гледај што правам, слушај ме што зборувам“


Скопје, 19 јуни, 2017 - 15:39 (META) 

Опозициската ВМРО-ДПМНЕ попладнево на две одделени прес-конференции реагираше на назначувањето на министерот за внатрешни работи, Оливер Спасовски, за потпретседател на СДСМ и на укинувањето на дисперзираните студии од страна на Владата.

– СДС продолжува со лицемерната политика, која најдобро е опишана во народната поговорка „не ме гледај што правам, слушај ме што зборувам“. Зоран Заев и СДС најавуваа департизација и деполитизација на институциите додека беа во опозиција, а сега ја претвораат државата во алатка на партијата. Оливер Спасовски, наместо да се повлече од партиските функции и професионално да ја врши функцијата министер за внатрешни работи, тој е назначен за потпретседател на партијата. Граѓаните помнат дека во текот на претходните изборни циклуси, СДС го проблематизираше тоа што Гордана Јанкулоска во исто време била и министер за внатрешни работи и партиски функционер, бидејќи не се знаело „што е партија, а што држава“ – рече пратеникот на ВМРО-ДПМНЕ, Драган Данев, додавајќи дека ова е само продолжение на обидите на СДСМ „целосно да ги стават под партиска контрола органите на прогонот“.

На втората прес-конференција, Лука Кржалоски повторно обвини дека Владата на СДСМ не е реформска, туку антиреформска, истакнувајќи дека со укинувањето на дисперзираните студии се нанесува огромна штета на образовниот процес и се ускратуваат бенифициите што им биле достапни на студентите во изминатите 10 години.

– Оваа мерка им овозможуваше на студентите да заштедат средства врз основа на патување, сместување и исхрана, но и да заштедат средства по однос на уписнина. Студирањето на дисперзираните студии каде предаваат истите професори и се учи по истите наставни програми, материјали и учебници од кои се учи и на матичните високо-образовни установи од каде се изведени, чини само 100 евра годишно… Единствената причина поради која е укината ваквата мерка е тоа што дисперзираните студии се идеја, односно мерка воведена од страна на владата предводена од ВМРО–ДПМНЕ за обезбедување што поголема достапност на високото образование за сите граѓани – рече Кржаловски.