ДПА започна со кампања за референдумот


Скопје, 10 септември, 2018 - 11:45 (META) 

Демократската партија на Албанците викендов донесе одлука за формирање централен партиски штаб за претстојниот референдум кој ќе се одржи на 30 септември. Одлуката е донесена на седница на централното претседателство на партијата.

Според нив, евроатланските интеграции се еден од основните сегменти во програмата на ДПА и барање на Албанците, каде и да живеат.

Централното претседателство за претседател на штабот го избра генералниот секретар на партијата Имер Алиу.

„Во текот на викендот се формираа општинските и локалните штабови и официјално се започна со кампањата ЗА референдумот. ДПА ќе стартува со кампањата од денеска со одржување на собири и средби со граѓаните со цел да се зголеми поддршката за референдумот “, соопштуваат од партијата.


Заев го достави списокот со имињата за владината реконструкција до Собранието


Скопје, 23 мај, 2018 - 9:46 (META) 

Собранието вчера доцна попладне го прими предлогот за нови министри и заменици министри во Владата. Се очекува, седницата за реконструкција на Владата да се одржи во текот на следната недела.

Во предлогот за владината реконструкција се наведени имињата на кандидатите за министри и заменик-министри од редовите на новите коалициски партнери – Беса на Африм Гаши и ДПА на Мендух Тачи.

Заев пред два дена рече дека до крајот на месецов биографиите на кандидатите ќе бидат ставени на дневен ред на пленарна седница и на тој начин, како што рече, конечно ќе се комплетира составот на Владата.

Според предлогот, досегашната министерка за образование Рената Тренеска Дескоска е предложена за нова министерка за правда, а за министер за образование нејзиниот актуелен заменик Арбр Адеми, кадар на ДУИ. Роберт Алаѓозовски повеќе нема да биде министер за култура, на негово место е предложен Асаф Адеми, кој доаѓа од Беса, додека за министер без ресор е предложен Бардул Даути, која доаѓа од ДПА.

Во текот на вчерашниот ден во јавноста излегоа и информации за тоа кои би биле новите заменици министри во одредени ресори. Така на местото на Арбр Адеми во образование ќе биде предложен пратеникот од СДСМ Петар Атанасов, додека за заменик министер во Министерството за надворешни работи се споменуваше името на поранешниот градоначалник на Центар Андреј Жерновски. Испразнето е и министерското заменичко место во здравство.


Тачи: ДПА влегува во Владата со министер без ресор


Тетово, 15 мај, 2018 - 14:01 (META) 

Пред почетокот на Централното собрание на ДПА денеска во Тетово, претседателот на партијата Мендух Тачи, рече дека имаа конкретна и коректна понуда од премиерот Зоран Заев за ДПА како дел од владината коалиција, јави МИА.

Станува збор за позицијата министер без ресор задолжен за економија и странски инвестиции и заменик министер за транспорт и врски, додека за другите позиции формирани се работни групи за да се договорат и овие кадровски решенија.

– Мислам дека нема да му биде тешко на Централното собрание да одлучи, поаѓајќи од конструктивното однесување на ДПА за време на политичката криза и конструктивниот пристап на новата Влада за реформи и особено за интеграциските процеси за кои имаме точни информации дека ќе имаат позитивен напредок и затоа се надевам дека Централното собрание ќе донесе позитивна одлука – рече Тачи.


Заев: За коалицијата ќе разговараме следните денови, прво да ги оладиме главите


Скопје, 1 ноември, 2017 - 15:20 (META) 

Премиерот Зоран Заев денеска изјави дека досега не разговарал со коалиционите партнери и со другите политички партии за евентуално велгување или излегување од Владата, како и за пополнување на испразнетите министерски, заменик-министерски и директорски места по локалните избори.

Тој очекува за овие прашања да се дискутира во наредните денови, откако, како што рече, ќе слегне прашината и сите ќе бидат со ладни глави.

– Очекувам овие денови прашината да слегне. Сега имаме малку подзапалени политички глави во нашата држава. Се надевам во мирна атмосфера, некаде викендов, да ги отвориме процесите како понатаму заради тоа што имаме неколку испразнети места во Владата – министер, заменик-министер, неколку директори – рече Заев, одговарајќи на новинарски прашања на маргините на дешениот самит организиран од „Македонија 2025“.

Прашан дали ќе продолжи коалицијата со Алијанса за Албанците предводена од Зијадин Села, Заев изјави дека тоа не зависи само од него, туки и од Села, но и од другите коалициски партнери.

Како што изјави, разговори за влегување во владејачката коалиција немало ниту со лидерот на ДПА, Мендух Тачи, ниту со пратеникот Чедомир Саздовски, која ја напушти партијата ГРОМ на Стевчо Јакимовски и најави дека ќе дејствува како независен пратеник.

– Ние со Саздовски немаме разговарано за мнозинство, но јас посакувам да разговарам со многу пратеници и верувам ќе имам можност да разговарам. Не би сакал да ги форсирам процесите неприродно, туку сакам тие да се случуваат по природен пат. Знам дека имаме мнозинство и без Села, но секојпат сум поборник тоа мнозинство да биде колку што е можно посилно. Македонија е исправена пред сериозни одлуки и треба да ги завратиме ракавите и да работиме, а со поголемо и посилно мнозинство тоа е секако повозможно и би било поуспешно – изјави Заев.


СДСМ ќе раководи во 56 општини и во Скопје, ВМРО-ДПМНЕ во 5, ДУИ во 10, Алијансата во 3


Скопје, 30 октомври, 2017 - 9:33 (META) 

Според резултатите од двата круга на локалните избори, СДСМ ќе раководи со 56 општини и со Град Скопје, ВМРО-ДПМНЕ во пет, ДУИ во 10, Алијанса за Албанците во три, Беса, ДПА и ДПТ во по една, а кандидати предложени од група избирачи во три општини.

СДСМ, во првиот круг од изборите, кој се одржа на 15 октомври, покрај во Град Скопје, победи во 37 општини, односно во Центар, Ѓорче Петров, Карпош, Аеродром, Арачиново, Берово, Битола, Богданци, Босилово, Валандово, Василево, Вевчани, Велес, Гевгелија, Дебрца, Делчево, Демир Хисар, Дојран, Зелениково, Конче, Кочани, Кратово, Крива Паланка, Кривогаштани, Крушево, Куманово, Лозово, Маврово Ростуше, Неготино, Ново Село, Охрид, Пехчево, Прилеп, Радовиш, Ресен, Свети Николе и во Струмица.

Во вториот круг кандидатите за градоначалници на СДСМ, победија уште во 19 општини: Бутел, Гази Баба, Кисела Вода, Виница, Градско, Демир Капија, Јегуновце, Карбинци, Македонски Брод, Македонска Каменица, Могила, Новаци, Пробиштип, Росоман, Старо Нагоричане, Чашка, Чешиново Облешево, Штип и Шуто Оризари.

ВМРО-ДПМНЕ во првиот круг победи во Илинден, Петровец и во Сопиште, а во вториот во Зрновци и во Кавадарци.

ДУИ во првиот изборен круг освои градоначалнички мандати во Кичево и во Пласница, а во вториот победи и во Чаир, Тетово, Сарај, Дебар, Долнени, Липково, Теарце и во Струга.

Алијансата за Албанците освои вкупно три градначалнички манадати, сите во вториот круг, и ќе раководи со општините Боговиње, Врапчиште и Гостивар.

Беса победи во Желино, ДПА во Студеничани, Демократската патрија на Турците во Центар Жупа, а кандидати кои беа предложени од група избирачи ќе раководат Ранковце, Чучер Сандево и Брвеница.


Тачи очекува ДПА да постигне подобри резултати на локалните избори


Мендух Тачи, 15 октомври, 2017 - 20:04 (META) 

Лидерот на ДПА, Мендух Тачи, денеска откако го искористи своето гласачко право, соопшти дека очекува гласањето на локалните избори да помине во мирна атмосфера, а партијата да постигне добри резултати.

– Мислам дека на крајот ќе успееме да имаме мирни и демократски избори и се надевам на добар резултата на нашата партија – рече Тачи откако гласаше на избирачко место во старата градинка „Младост“ во Тетово.


Петте кандидати за Гостивар ветија транспарентност и решенија за проблемите


Гостивар, 6 октомври, 2017 - 17:22 (META) 

На дебатата од карванот „Живот во Македонија“ (#Debatpernime), кој го организираат „Порталб“, „Калѕо“, „Вистиномер“ и телевизијата „Арт“, во Гостивар петте кандидати за градоначалник на општината, секој посебно, ветија решавање на сите проблеми на граѓаните.

Во дебатата водена од новинарката Јета Џара, Арбен Таравари од Алијанса за Албанците, Асаф Адеми од Беса, Невзат Бејта од ДУИ, Себајдин Изири од ДПА и Шпат Исеини од коалицијата на Национална демократска преродба и Унитети зборуваа за своите решенија за горливите проблеми во општината.

Беше ветено решавање на проблемите со депонијата Русино, но и на инфраструктурните проблеми, а за булеварот Браќа Ѓиновци беше кажано дека ќе се прошири. Беше нагласено и дека на Гостивар, наместо казина на секој чекор, му се потребни библиотека и театар во Домот на културата.

Речиси сите кандидати ветија дека ако го освојат мандатот, ќе работат транспарентно.

Дебатата од карванот „Живот во Македонија“ вечерва ќе се одржи во Кичево.


Кандидатите за градоначалници ветуваат препород за Сарај


Скопје, 5 октомври, 2017 - 10:34 (META) 

Со буџет на Општина Сарај од 20 милиони евра, кога би застанале на челото на општината, четворицата кандидати за градоналник на оваа општина, ветуваат дека ќе направат многу. Така кажаа на вчерашната дебата од дебатниот карван „Живот во Македонија“ (#Debatpernime), кој го организираат „Порталб“, „Калѕо“, „Вистиномер“ и телевизијата „Арт“.

Башким Бакиу од Беса, Блерим Беџети од ДУИ, Екрем Алија од Алијанса за Албанците и Сефедин Алиу од ДПА ветија дека 30 отсто од буџетот би се трошеле за реконструкција на постојните и за изградба на нови улици и патишта, како и за изградба на училиште во Чајлане, превоз за учениците од селата, изградба на поликлиника во Сарај, подобро управување со отпадот и за инвестиции во туристичките капацитети Матка, езерото Треска и рекреативниот центар Сарај.

Исто така, беше ветено ново училиште во Свиларе и ординации и други медицински установи од јавното здравство, а ако недостига медицински кадар, би се ангажирале и Косовци, пренесува „Порталб“.

Дебатата ја водеше новинарката Јета Џара. Дебатниот карван „Живот во Македонија“ продолжува денеска во Гостивар.


Ермира Асани-Салија предложена за нов член на ДИК од Беса


Скопје, 20 септември, 2017 - 12:17 (META) 

Собраниската комисија за прашања на изборите и на именувањата на денешната седница го потврди предлогот на Беса, Ермира Асани-Салија да биде нов член на Државната изборна комисија (ДИК).

Асани-Салија е дипломиран правник од Гостивар и членка на централното претседателство на Беса.

Таа доаѓа на местото на Бедредин Ибраими од ДПА, бидејќи сега Беса е четврта партија во Собранието според бројот на пратеници по предвремените парламентарни избори што се одржаа на 11 декември минатата година.

Претседателот на Комисијата, Илија Димовски, изрази благодарност до Бедредин Ибраими за досегашниот ангажман и коректната работа како член на ДИК.

Како што е највено, изборот на новиот член на ДИК ќе биде ставен на дневен ред на денешната пленарна седница.


Средба на албанските партии во Собранието, Беса повторно бојкотира


Скопје, 19 јули, 2017 - 12:28 (META) 

Албанските парламентарни политички партии денеска во 14 часот, на покана на Весел Мемеди од НДП, ќе одржат средба во Собранието, на која ќе присуствуваат и претставници на ДПА иако таа партија не е потписничка на декларацијата на албанските политички партии. Наспроти тоа, средбата повторно ќе ја бојкотира Движењето Беса.

„Во согласност со Декларацијата на албанските политички партии донесена на 7 јануари оваа година и обврските што произлегуваат за одржување на редовни состаноци на тркалезна маса на албанските парламентарни партии за заеднички да го набљудуваат текот на имплементацијата на декларацијата, имам чест да ве повикам на следниот состанок на претседателите на парламентарните албански партии, која ќе се одржи во просториите на Собранието на Република Македонија во 14 часот“, се вели во поканата на Мемеди.

Од Движењето Беса велат дека се отворени за комуникација со албанските партии, но дека бараат од Али Ахмети да објасни кои точки од декларацијата се вметнати во владината програма.

„Наместо покана, Али Ахмети мора прво да одговори што се случи со декларацијата на албанските партии? Кои точки од тој документ беа вклучени во програмата на Владата? Значи, Али Ахмети, пред да нè кани преку своите „сателити“, мора прво да даде објаснување зошто дури и во пресрет на 100 дена од формирањето на оваа влада нема закон за албанскиот јазик“, велат од Беса.

На претходната средба, која се одржа на 28 јуни во хотелот „Александар палас“, лидерот на ДУИ, Али Ахмети, изјави дека повеќето барања на албанските политички партии се вклучени во владината програма.

– Ги споредивме програмите на албанските политички партии и констатиравме дека дел од тие програмски определби веќе се вклучени во програмата на новата влада. Останува вo иднина овие средби да продолжат да се одржуваат – изјави тогаш Ахмети.