!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Сончево и топло време, на северот можен пороен дожд


Скопје, 16 август, 2017 - 9:45 (META) 

Времето во Македонија денеска ќе биде променливо. Претпладне ќе биде сончево и топло, а од пладне облачноста ќе се зголемува и ќе дува умерен северен ветер, што ќе биде најприсутен на североистокот на земјава.

Во попладневните часови во северните делови на Македонија ќе има услови за локална појава на пороен дожд проследени со грмежи.

УВ индексот ќе изнесува 8.

Температурите ќе се движат од 11 до 20 степени утрово, а максималните дневни ќе изнесуваат  до 29 до 36 Целзиусови степени.

Во Скопје времето претпладнево ќе биде сончево, а од пладне ќе настапи зголемена облачност, со услови за краткотраен дожд и ретки грмежи. Температурниот максимум ќе изнесува 33 Целзиусови степени.

Од утревечер следува период на претежно стабилно и се потопло време. Дневната температура до сабота ќе биде во постепен пораст, но ќе се задржи во рамките на просекот за овој период од годината. Најтопло ќе биде в сабота со максимална температура до 38 Целзиусови степени на југоистокот од земјава. Позначителни врнежи од дожд со намалување на температурата се очекуваат на крајот од викендот.


Дождот изгасна најголем дел од пожарите, соопшти ЦУК


Скопје, 13 август, 2017 - 12:34 (META) 

Најголем дел од пожарите кои беа активни во земјава се изгаснати, по врнежите од дожд кои утрово ја зафатија Македонија, соопштија денеска од Центарот за управување со кризи (ЦУК).

Оттаму информираат дека пожари има на уште пет локации, кои се ставени под контрола.

Како што информираат од ЦУК, под контрола е пожарот во близина на манастирот „Трескавец“ и населените места Мажучиште, Мараморани и Горно Село. Таму сè уште гори сува трева, но, како што наведуваат од ЦУК, огнот е далеку од манастирот и нема никаква опасност по него, а на терен има екипа на прилепската противпожарна единица.

Активни, но под контрола, се и пожарите во близина на селата Крушевица и Бонче, кај селото Никодин, шумскиот пожар во атарот на селото Нерово и пожарот кај местото Фрлогоец на планината Бистра.


Денеска облачно и посвежо, со температури до 28 степени


Скопје, 13 август, 2017 - 9:26 (META) 

Денеска времето во Македонија ќе биде променливо облачно и посвежо, со засилен ветер од северен правец. Претпладне ќе има слаб локален дожд, а во попладневните часови врнежите од дожд ќе престанат и облачноста ќе се намалува.

Утринската температура се движи од 14 до 21 Целзиусов степен, а дневната ќе достигне од 21 до 28 степени. УВ-индексот ќе изнесува 7.

Во Скопје ќе преовладува слично време, претпладне облачно со локален дожд, а во попладневните часови облачноста ќе се намалува. Максималната дневна температура во главниот град ќе достигне до 24 Целзиусови степени.

Од утре синоптичарите најавуваат стабилизирање на временската состојба со постепен пораст на дневната температура, но во рамките на просекот за овој период од годината.


Денеска сончево и многу топло, попладне пороен дожд и грмежи


Скопје, 12 август, 2017 - 9:36 (META) 

Денеска времето во Македонија ќе биде сончево со мала до умерена облачност, а ќе дува умерен до засилен ветер, во западните делови од западен и југозападен правец, а во источните од јужен правец. Попладне ќе има локална појава на пороен дожд и грмежи.

Кон крајот на денот и во текот на ноќта на места процесите ќе бидат поинтензивни, на места со услови за појава на невреме со поинтензивен пороен дожд, силен ветер и можна појава на град, особено во североисточните делови од земјата.

Утринската температура се движи од 15 до 23 Целзиусови степени, а дневната ќе достигне од 32 до 39 степени.

Во Скопје времето ќе биде сончево со мала до умерена облачност и со умерен до засилен ветер, претежно од јужен правец. Кон крајот на денот ќе има појава на пороен дожд и грмежи, а можна е и појава на краткотрајно невреме со поинтензивен пороен дожд и силен ветер. Дневната температура во главниот град ќе достигне до 39 Целзиусови степени.

Утре, според синоптичарите, ќе преовладува променливо облачно и свежо време со засилен северен ветер, а претпладне со слаб локален дожд. Максималната температура на места ќе опадне и за повеќе од 10 степени и ќе се движи во интервал од 22 до 29 Целзиусови степени.


Температурата и денеска до 40 степени, продолжува портокаловата фаза


Скопје, 10 август, 2017 - 9:16 (META) 

Времето денеска ќе биде сончево и многу топло. УВ-индексот ќе има вредност 9. Утринската температура ќе се движи од 14 до 22 Целзиусови степени, а дневната од 32 до 40 степени.

Во Скопје се очекува слично време. Утринската температура ќе достигне до 20 Целзиусови степени, а дневната до 40 степени.

До петок ќе се задржи претежно сончево и многу топло време со натпросечна температура. В сабота во текот на денот ќе има зголемување на облачноста и ќе дува засилен југозападен ветер, но дневната температура сè уште ќе бележи високи вредности.

Во вечерните часови и преку ноќта кон недела ќе има врнежи од дожд и грмежи, а најобилни врнежите се очекува да бидат во североисточните делови од земјава.


Денеска сончево, попладне можен дожд на југот на земјата


Скопје, 9 август, 2017 - 9:36 (META) 

Времето во Македонија денеска ќе биде сончево, со мала до умерена облачност, а попладне во јужните делови од земјава ќе има услови за краткотраен дожд со ретки грмежи, вели прогнозата на Управата за хидрометеоролошки работи (УХМР).

УВ-индексот ќе биде 9. Температурата ќе се движи од 31 Целзиусов степен на западот, до 40 степени во Повардарието и на крајниот југоисток на земјава. Во Скопје живата во термометрите ќе се искачи најмногу до 39 Целзиусови степени.

До петок ќе се задржи претежно сончево и многу топло време. В сабота, во текот на денот ќе има зголемување на облачноста и ќе дува засилен југозападен ветер, но дневната температура сè уште ќе биде висока. Преку ноќта кон недела се очекуваат врнежи од дожд проследени со ретки грмежи. В недела ќе дува засилен северен ветер, а дневната температура значително ќе се намали.


Сончево и многу топло време со температура до 42 степени


Скопје, 7 август, 2017 - 9:23 (META) 

Времето денеска ќе биде сончево и многу топло, a попладне со мала до умерена облачност. УВ-индексот ќе биде 9, а температурата ќе се движи од 14 до 41 Целзиусов степен.

Локално во планинските делови ќе има услови за краткотраен пороен дожд и за ретки грмежи. Ќе дува слаб до умерен северен ветер, што ќе услови благо намалување на температурата во северните делови од земјава.

Во Скопје се очекува слично време со температура до 39 Целзиусови степени. Попладне се очекува мала до умерена облачност. Ќе дува и слаб до умерен северен ветер, што ќе услови благо намалување на температурата.


Една година од поплавите во Скопско во кои 22 лица ги загубија животите


Скопје, 6 август, 2017 - 11:38 (META) 

Пред една година невремето предизвикано од обилни дождови и силен ветер во Скопскиот Регион кај населените места Стајковци, Смиљковци, Синѓелиќ, Ченто, Црешево предизвика поплави во кои загинаа 22 лица, десетици беа повредени, а причинета беше голема материјална штета.

Граѓаните од целата држава се солидаризираа за собирање на најнеопходната помош за настраданите, а 8 август 2016 беше прогласен за Ден на жалост во Република Македонија.

На дел од улиците поплавени беа сите дворови, подруми и првите катови на куќите, а водата однесе и дел од бетонските огради на куќите како и нивната покуќнина.

Жителите, војската, но и повеќемина доброволци со денови по поплавата со кофи и со пумпи ја испумпуваа водата и ги исфрлаа калта и ѓубрето од поплавените домови.

На 6 август 2016 година во текот на 24 часа во Скопје наврнаа 92,9 литри на квадратен метар, а во текот на првите два часа од почетокот на невремето имало повеќе од 800 громови.


Сончево време со температура до 38 степени


Скопје, 31 јули, 2017 - 9:26 (META) 

Во Македонија денеска времето ќе биде сончево и топло, а попладне со мала до умерена локална облачност. Во западните планински делови попладне ќе има услови за ретка појава на краткотраен дожд и на грмежи.

Ќе дува слаб до умерен североисточен ветер. УВ-индексот ќе биде 8.

Максималната температура ќе се движи од 28 Целзиусови степени на крајниот запад на земјата, 33 степени во Охридско-струшкиот Регион, 35 степени во Пелагонија, 32 степени во Малешевијата, 34 степени на крајниот североисток, а највисоката температура ќе биде измерена во Тиквешијата и во Демир Капија, до 38 степени.

Во Скопје и на крајниот југоисток живата во термометрите ќе се искачи најмногу до 37 Целзиусови степени.

Утре времето ќе биде без позначителни промени, а максималната температура ќе биде меѓу 32 и 38 Целзиусови степени. Од среда се очекува пораст на температурата, која на некои места ќе надмине 40 Целзиусов степени.


Времето утре сончево со мала локална облачност


Скопје, 28 јули, 2017 - 19:02 (META) 

Времето во Македонија утре ќе биде сончево и топло, со мала локална облачност. Ќе дува слаб северен ветер, особено долж Повардарието. Утринската температура ќе се движи од 9 до 19 Целзиусови степени, а дневната од 30 до 37 степени, вели прогнозата на УХМР.

УВ-индексот ќе биде 9.

Во Скопјe ќе биде сончево и топло, со слаба облачност и со слаб северен ветер. Утринската температура ќе се спушти до 17 Целзиусови степени, а дневната ќе достигне до 35 степени.

За време на викендов, како и во наредната седмица, следува стабилно, сончево и се потопло време со постепен пораст на дневната температура. Најтопло се очекува да биде кон средината на следната работна недела, кога дневната темпертура на воздухот ќе достигне до 40 Целзиусови степени.
В недела и в понеделник попладне во западните делови ќе има услови за појава на краткотраен дожд со ретки грмежи.