Обвинителството отвори истрага за затајување данок при увоз на дизел гориво


Скопје, 25 јануари, 2018 - 15:10 (META) 

Основното јавно обвинителство за гонење на организиран криминал и корупција денеска соопшти дека, отворило предистражна постапка по допрен глас во врска со злоупотреба и затајување на данок при увоз на дизел гориво.

„Предистражната постапка е започната поради постоење на сомнение дека се увезувала стока декларирана како нафта за домаќинство, а всушност се увезувало дизел гориво при што е нанесена штета на буџетот на Република Македонија. Основното јавно обвинителство за гонење на организиран криминал и корупција презема дејствија за утврдување на фактите“, стои во соопштението на Обвинителството.

На почетокот на оваа година дел од компаниите, коментирајќи го новиот закон за енергетика, го отворија прашањето за даночно затајување и неплаќање на акцизата при увоз на гориво на дел од увозниците.

Големите компании, кои надлежните институции редовно ги контролираат, тврдат дека малите увозници наместо дизел, на граница пријавуваат нафта за домаќинство и на тој начин плаќаат девет денари помалку за акциза по еден литар гориво.

Со последните измени на Законот за акцизи во ноември, минатата година акцизата за дизелот се зголеми за три денари и сега изнесува 15,121 денар по литар, додека акцизата за нафтата за домаќинство, која исто така се зголеми за три денари, од 1 јануари 2018 година изнесува 6,136 денари по литар.


ОЈО отвори предмет против Дрисла за загадување на животната средина


Скопје, 12 јануари, 2018 - 13:52 (META) 

По допрен глас, Основното јавно обвинителство Скопје отвори предмет за кривично дело, загадување на животната средина и природата, информираат од таму.

„Во насока на утврдување на фактите, надлежниот јавен обвинител испрати барање до Министерството за животна средина и просторно планирање за добивање потребни податоци во врска со досегашна извршена контрола над работењето на депонијата Дрисла, како и доколку е извршена контрола дали е констатирано почитување на протоколите за согорување на медицински отпад од страна на депонијата и други информации“, се вели во соопштението на ОЈО.

Депонијата Дрисла во 2012 година требало да добие нова печка, но тоа не се случило од непознати причини, информираше денеска градоначалникот на Град Скопје, Петре Шилегов.

– Нашите претходници пред шест години планирале нова печка за согорување на медицински отпад во депонијата Дрисла, но печката не е набавена. За набавката постои и меница од 700 илјади евра која е нереализирана од за нас непознати причини – рече Шилегов.


Продолжува со работа Комисијата за следење изборни нерегуларности на Обвинителството


Скопје, 21 ноември, 2016 - 14:41 (META) 

Јавното обвинителство денеска соопшти дека Комисијата за следење изборни нерегуларности, формирана од Јавниот обвинител во март годинава, продолжува со својата работа, чија цел е заштита на изборниот процес од криминални и од други противзаконити активности.

Со комисијата претседава обвинител од Јавното обвинителство на Република Македонија, а членови се четворица виши јавни обвинители и основниот јавен обвинител на ОЈО Скопје. Нивна задача е, како што информираат од Јавното обвинителство, да го следат изборниот процес и за сите настани за кои ќе оценат дека вклучуваат индиции за изборни нерегуларности да дадат насоки за итно постапување од Основните јавни обвинителства.

„Привремената Комисија за следење изборни нерегуларности при Јавното обвинителство на Република Македонија денеска одржа работна средба во насока на зајакнување на активностите поврзани со изборниот процес за претстојните избори. Целта на средбата беше да се утврди начинот на меѓусебното комуницирање, а во насока на превенирање и постапување по противзаконски дејства што евентуално би биле сторени при организирањето и при спроведувањето на изборниот процес на 11 декември 2016 година“, стои во соопштението од Јавното обвинителство.

Во рамките на активностите на комисијата, во функција е електронската адреса izbori@jorm.gov.mk, на која граѓанските организации, но и граѓаните воопшто, ќе можат да пријавуваат секакви сомнежи за сторени кривични дела поврзани со изборите, а сите пријави ќе бидат проследени до комисијата, која предметите ќе ги испраќа на итно постапување кај надлежен обвинител.

„Дополнително на ова, Комисијата на дневна основа ќе ги следи сите информации објавени во медиумите и при евентуални известувања за изборни нерегуларности ќе формира предмети и по допрен глас“, додаваат од Јавното обвинителство.