Црвен крст со повик за помош на настраданите во пожарите во Грција


Скопје, 25 јули, 2018 - 12:12 (META) 

Пожарите кои го зафатија подрачјето на градот Атина во Грција во кој загинаа 76 лица предизвикаа големи материјални штети кои го погодија населението.

Од Црвениот крст на Република Македонија велат дека континуирано ја следат состојбата и согласно добиените насоки од страна на Меѓународната федерација на Црвениот крст и Црвената полумесечина соодветно ќе дејствуваат.

Од таму ги повикува заинтересираните правни субјекти и граѓани да се вклучат во акцијата за помош на настраданото население.

Преку донација на парична помош:
– Жиро сметка на Фонд на солидарност 300000001327966 ДБ 4030984271620 – Комерцијална банка
– Донирање на 100 денари со повик на телефоните: 075/070/077 143 400

Донација на средства во странска валута:
NAME OF THE ORGANIZATION: MACEDONIAN RED CROSS
BANK NAME: KOMERCIJALNA BANKA AD SKOPJE
BANK ADDRESS: UL. ORCE NIKOLOV NO.3, 1000 SKOPJE, MACEDONIA
BANK ACCOUNT: 300000000000133 25730522-11
SWIFT CODE: KOBSMK2X
IBAN CODE: MK07300701000001228

Исто така, граѓаните самоиницијативно се организираат за собирање на помош, па така пункт е отворен во „Нано бар“.

Истовремено уметниците покренаа иницијатива за донирање на уметнички дела, по примерот на грчките уметници кои истото го сториле и за Скопје после катастрофалниот земјотрес во 1963 година. Уметниците кои сакаат да се вклучат во оваа акција потребно е да го контактираат Зоран Кардула.


Чешка и донира милион евра на македонската полиција


Скопје, 8 јуни, 2018 - 14:09 (META) 

Министерството за внатрешни работи доби донација во висина од еден милион евра од Чешката Република за зголемување на капацитетите на македонската полиција, односно за набавка на техничка опрема за справување со последиците од мигрантската криза.

Договорот за донација денеска во Скопје го потпишаа министерот Оливер Спасовски и чешкиот амбасадорот во Македонија, Мирослав Томан.

Министерот Спасовски по потпишувањето, рече дека ова е трета донација од чешкото МВР и Владата на Чешката Република од почетокот на мигрантската криза, што вкупно со денешната е во висина од околу три милиони евра.

Тој посочи дека Чешката Република во изминатите години била и е еден од најзначајните поддржувачи на Македонија на патот кон полноправно членство во ЕУ и НАТО.

Чешкиот амбасадор Томан, по потпишувањето изрази уверување дека соработката ќе продолжи, особено во полето на размена на искуства меѓу колегите од двете министерства.


Засадено „дрво на човековите права“ на местото на споменикот на Ќосето


Скопје, 10 мај, 2018 - 15:42 (META) 

На местото каде што до пред два месеци стоеше споменикот на Андон Јанев – Ќосето, денеска беше засадено дрво гинко, кое, како што вели скопскиот градоначалник Петре Шилегов, е дрво на човековите права.

Во церемонијата, освен Шилегов, учествуваа и заменик-министерот за надворешни работи на Германија, Михаел Рот, претседателката  на Градскиот совет на партијата СПД во Нирнберг, Ања Прелс-Камерер и амбасадорот на Германија, Томас Герберих, како и претставници од Нирнберг, кој е збратимен град со Скопје.

На церемонијата беше промовирана и изгравирана плоча, донација од Нирнберг. Таа, рече Шилегов, ќе потсетува на правото на праведно и јавно судење на секој граѓанин пред независен и непристрасен суд, изразено во Универзалната декларација за човекови права на Обединетите нации.

– Поставувањето на споменикот на Ќосето пред зградата на судот беше сфатено како порака за партиска послушност на судиите на тогашната власт. Но, отстранувањето на споменикот и засадувањето на таканареченото дрво на човекови права на местото на постаментот-дивоградба е симбол на почитување на законитоста, правдата и правичноста – истакна Шилегов.


Јавноста исклучена, во судница се слушаат прислушувани разговори за „Поткуп“


Скопје, 12 април, 2018 - 13:10 (META) 

На судењето на случајот „Поткуп“, во кој обвинет е премиерот Зоран Заев, во судницата се слушаат прислушувани разговори кои со употреба на посебни истражни мерки биле обезбедени во истрагата за овој случај, објави „Фокус“.

Поради тајноста на овие докази, а на кои се слуша гласот на Заев, јавноста беше исклучена од рочиштето.

Засега е непознато и дали во судница јавно ќе биде презентирана снимката на која Заев и бизнисменот Сачавалиев зборуваат за донација за изградба на црква.

Заев и неговите адвокати побараа оваа снимка да биде презентирана јавно, бидејќи, според нив, снимката која беше објавена на „Јутјуб“, а со која се создаде впечаток дека Заев барал поткуп, е нецелосна.

Обвинителката во случајот, пак се спротивстави на ваквото барање и поднесе жалба до Апелација, која што треба да одлучи дали новинарите ќе можат да го видат овој доказ.

Адвокатите на Заев на денешното рочиште побараа исказот на сведокот Иван Николов да не се прифати како доказ во судската постапка против премиерот Зоран Заев, бидејќи, како што велат, тој бил агент – провокатор, односно бил инструиран да бара поткуп.

По ова барање, судскиот совет рече дека дополнително ќе се изјасни. Потоа обвинителката Валентина Бислимовска ги изведуваше писмените докази.


ЕЛЕМ ќе донира прочистувачи на воздух, бидејќи загадува при производство на струја


Скопје, 27 декември, 2017 - 18:16 (META) 

ЕЛЕМ ќе донира прочистувачи на воздух во градинки и училишта, бидејќи како што велат, при производство на струја ја загадуваат околината.

„Во АД Електрани на Македонија сме свесни дека компанијата и дел од нејзините производни капацитети се сметаат за објекти кои во еден сегмент негативно придонесуваат кон загадувањето, што е неизбежен дел во производството на електрична енергија. Како ново раководство, се обидуваме да достигнеме што повисоки еколошки стандарди при производството, да ги почитуваме барањата и одредбите и на невладните организации и на домашните и меѓународните закони од оваа област и ќе го правиме тоа континуирано и во иднина“, вели генералниот директор на ЕЛЕМ, Драган Миновски.

ЕЛЕМ ќе донира прочистувачи на воздухот во пет градинки, во општините Карпош, Центар, Аеродром, Тетово и Кичево, како и во училиштата во Општина Новаци, која се наоѓа најблиску до РЕК Битола.

Од компанијата најавија и донација за во болницата во Битола, на одделението за белодробни заболувања

„Набавката на овие апарати ќе чини околу 40 илјади евра и тие пари ЕЛЕМ ги обезбеди со пренамена на средствата кои беа предвидени за адвокатски услуги“, додаде Миновски.


Министерство за здравство уверува: Нема инсулинска криза


Скопје, 27 декември, 2017 - 15:54 (META) 

Нема инсулинска криза, порача Министерството за здравство попладнево, откако во некои медиуми беше пренесен апелот на дијабетичарите до премиерот Зоран Заев да преземе итни мерки да се реши проблемот со инсулинот. Според „Шеќерче – Лолипоп“ еден месец нема инсулин, што директно погодува околу 50.000 пациенти коишто мора да го примаат.

Министерството за здравство вели дека се обезбедени доволни количества преку донација од компанијата – производител.

„Министерството ги уверува болните од дијабетес, кои имаат потреба од инсулин дека може да бидат спокојни, бидејќи овој лек го има. Исто така, сакаме да потенцираме дека проблемот кој го имавме неодамна, беше причина повеќе Министерството да почне со изработка на ново законско решение, процес кој веќе е во тек, односно веќе се работи на системско решавање на овој проблем и создавање предуслови, со кои ќе спречиме во иднина да се јавуваат вакви или слични проблеми“, се вели во соопштението.


Полицијата доби 45 нови „шкоди“, вредни еден милион евра – донација од Чешка


Скопје, 14 декември, 2017 - 14:28 (META) 

Амбасадорот на Чешка во Македонија, Мирослав Томан денеска на министерот за внатрешни работи, Оливер Спасовски му ја предаде донацијата од 45 возила од марката „шкода“, во вредност од околу еден милион евра.

Спасовски истакна дека за време на мигрантската криза Чешка дала „извонреден придонес за зајакнување на капацитетите на македонската полиција“.

– Нивната финансиска и материјално-техничка помош веќе надминува два милиони евра. Со оваа донација набавени се возила кои ќе служат и за граничната полиција, но и за полициските станици кои се во граничните подрачја, се со цел да може да ја зголемиме ефикасноста на полицијата, а со тоа и безбедноста на граѓаните – рече Спасовски на свеченото примопревање на возилата на паркингот во кругот на Министерството за внатрешни работи.

Амбасадорот Томан истакна дека Чешка со задоволство и помага на македонската полиција и дека тоа ќе го прави и во иднина.

– Со министерот Спасовски разговараме како понатаму Република Чешка да му помогне на МВР. Република Чешка не помага само финансиски туку на јужната граница веќе е 14-от контингент на чешки полицајци, кои помагаат јужната граница да биде што побезбедна. Соработката меѓу македонските и чешките полицајци е одлична и во следната 2018 година ќе продолжиме со истиот број на полициски службеници – рече Томан.

Од 2016 година до сега во обезбедувањето на јужната граница учествуваа 534 чешки полициски службеници, а реализацијата на проектот е предвидена и за наредната 2018 година.

Вчера, македонската полиција доби донација од Европската Унија во возила и опрема вредна околу четири милиони евра, исто така наменета за подигање на капацитетите на граничната полиција.


ЕУ на МВР му донираше возила и опрема вредни околу четири милиони евра


Гевгелија, 13 декември, 2017 - 16:23 (META) 

Македонската полиција денеска доби донација од Европската Унија во возила и опрема вредна околу четири милиони евра.

Донацијата, со која треба да се подигнат капацитетите на граничната полиција, се состои од осум комбиња, осум патнички возила, осум четирицикли и пет специјални возила за надзор на границата со термални камери, од кои едно опремено со радар, потоа 100 рачни радио терминали и програмски алатки, 250 рачни палки со ознака „Стоп полиција“со лед светла, четири детектори за срцево отчукување, четири рачни скрининг-системи за карго-товар и проверка на возила, шест системи за проверка на валидност на документи – ВИСПЕК, комуникациска мрежа, како и локално распоредлив координативен-комуникациски центар, мобилен систем за надгледување со камери и радар.

Евроамбасадорот Самуел Жбогар рече дека самиот слоган „ЕУ за тебе“ значи дека Европската Унија е тука за да и помогне на нашата земја да се справува со предизвиците.

– Со оваа донација, полицијата ќе биде поподготвена да се справува со предизвиците со кои се соочува на границата. Европската Унија останува посветена на давањето поддршка за да може полесно да се справите со овие предизвици – рече Жбогар.

Спасовски ја посети и полициската станица во Гевгелија, каде беше информиран дека безбедносната состојба во општината е на задоволително ниво, а беше запознаен и со условите и проблемите со кои се соочуваат полицајците при извршувањето на задачите.


Скопје ја откажа новогодишната програма, средствата ќе ги донира


Скопје, 20 ноември, 2017 - 16:24 (META) 

Град Скопје се откажува од организирање новогодишна прослава, што ќе биде втора година по ред да се прави тоа, а планираните пари ќе се подарат на Клиниката за белодробни заболувања, соопшти градоначалникот Петре Шилегов на денешната седница на Советот на Град Скопје.

На расправата за првичните мерки за загадувањето, Шилегов истакна дека следејќи ги препораките да не се одржуваат средби на отворено, настанот се откажува и ги повика и спонзорите да ги донираат парите предвидени за прославата на оваа ноќ во добротворни цели.

Предновогодишните празнични активности, односно базарот на ракотворби, трката на дедомразовци и детската програма не се откажани и ќе се одржат.


Општина Аеродром ќе донира 300.000 денари за лицата со аутизам од здружението „Во мојот свет“


Скопје, 8 ноември, 2017 - 10:42 (META) 

Општина Аеродром ќе донира 300.000 денари финансиска поддршка за Здружението на граѓани за третман на лица со аутизам, АДХД и Аспергеров синдром – „Во мојот свет“, за вработување на две лица во втора смена.

На средбата, претставници на Здружението „Во мојот свет“ го информирале градоначалникот на Општината, Златко Марин, дека имаат потреба и од простории, по што Марин им ветил дека ќе им помогне и за тој проблем.

Здружението „Во мојот свет“ веќе соработува со градинките и со училиштата од Општина Аеродром во сферата на едукација на кадри, а Марин им ветил дека Општината ќе продолжи да се залага за уште поуспешна соработка и ќе нуди постојана поддршка.

– Ветувавме целосна поддршка и инклузија на лицата со попреченост и почнавме веднаш со работа во таа насока. Очекувам уште многу заеднички корисни проекти, заради максимална инклузија за секој граѓанин – изјави Марин.