!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Метаморфозис“ и „Мајкрософт“ нудат можности за донации на софтвер за граѓанските организации


Скопје, 15 мај, 2017 - 12:44 (META) 

Во Конгресниот центар на Скопски саем утре ќе се одржи „Ден на Мајкрософт“, посветен на граѓанскиот сектор, на тема „Технологијата во облак (cloud) го помага општеството“.

„Денот на Мајкрософт“ посветен на НВО-секторот, организиран од Фондацијата „Метаморфозис“ со поддршка на „Мајкрософт“, ќе им овозможи на претставниците на граѓанскиот сектор да научат повеќе за можностите да добијат софтверски донации и донација во вредност од 5.000 долари на „Microsoft Azure“ од програмата на „Мајкрософт“ за поддршка на граѓанскиот сектор, кој во Македонија и на Балканот се спроведува од страна на Фондацијата „Метаморфозис“, преку платформата „Теchsoup Balkans“.

Настанот ќе го отворат генералниот менаџер на „Мајкрософт Македонија“, Љупчо Георгиев, и Бардил Јашари, извршен директор на Фондацијата „Метаморфозис“.


ВМРО-ДПМНЕ рекордер со 1,88 милиони евра собрани донации во 2016 година


Скопје, 11 мај, 2017 - 14:35 (META) 

Рекордер меѓу политичките партии по собрани донации од 1 јануари до 31 декември 2016 година е ВМРО-ДПМНЕ, со собрани вкупно 1,88 милиони евра членарини и донации од поединци и од фирми, се гледа од извештаите што вчера ги објави Државниот завод за ревизија.

Од вкупно регистрирани 5.880 уплаќачи, партијата собрала 115,55 милиони денари, односно 1,878 милиони евра. Уплаќале партиски функционери, функционери во државни институции и пратеници, а на листата се и Борис Дамовски, еден од организаторите на протестите „За заедничка Македонија, кој уплатил 91.000 денари, како и аналитичарите Александар Пандов со 30.000 денари и Александар Даштевски со 13.000 денари.

На сметката на СДСМ во 2016 година уплатиле 698 донатори, главно поединци, но и фирми, во форма на попусти на услуги.

Партијата Беса имала 110 донатори, од кои најмногу пари дал лидерот Билал Касами, 4.500 евра.

За ДУИ во 2016 членарина платиле или донирале 74 физички лица, но и фирми, меѓу кои и „Конти хидропласт“ (300.000 денари) и „Европа 92“ (577.750 денари). Од двете фирми плус од Илир Хасани, стасале 17.200 евра, од Министерството за правда стасале вкупно 178.000 евра, а од членарини партијата добила 31.740 евра.

За НСДП пари стасале само од Министерството за правда, и тоа 1.513.163 денари, односно 24.600 евра.

Демократски сојуз на Павле Трајанов лани имал 177 донатори или вкупно на сметката на оваа партија се слеале 788.338 денари.

Во Либералната партија донирале само двајца – поранешниот и сегашниот претседател на партијата. Стојан Андов дал 36.000 денари, а Ивон Величковски 215.000 денари.

Во ГРОМ на Стевчо Јакимовски се уплатени 98.230 денари. Во Левица донирале 35 лица, а во ЛДП – 12 донатори или 2.863.000 денари.

Другите десетина партии го известиле Државниот ревизор дека немале донации во 2016 година. Најавтентично тоа го сторил лидерот на Титови леви сили, Слободан Угриновски, кој на лист хартија со пенкало напишал и ги известил ревизорите дека ни денар не е уплатено на партиската сметка.


„Метаморфозис“ и „Мајкрософт“ го помагаат цивилниот сектор во дигиталната трансформација


Тирана, 10 март, 2017 - 12:35 (META) 

Фондацијата за интернет и општество „Метаморфозис“, во соработка со локалната канцеларија на „Мајкрософт“ во Албанија, на 7 март ја организираа конференцијата „Тек фор гуд“ (Tech4Good) во Тирана, со учество на претставници од граѓанскиот сектор.

Конференцијата се одржа за да им се помогне на претставниците на цивилниот сектор во дигиталната трансформација, преку донациите добиени преку платформата „Тек суп Балканс“ од донаторот „Мајкрософт“.

– Оваа конференција има цел на непрофитните организации во Албанија да им ги презентира можностите што им ги нуди „Мајкрософт“ преку софтверските пакети за да ги исполнат успешно нивната мисија и цели – изјави извршниот директор на Фондацијата „Метаморфозис“, Бардил Јашари.

Овие донации се на располагање на непрофитните организации што имаат статус на друштва на граѓани.

– Познавањата што ги имаат организациите околу овие продукти се многу мали, како што се и познавањата за технологиите што можат многу да им ги олеснат работните процеси  – рече менаџерката за образовни програми на „Мајкрософт“ во Албанија, Косово и во Македонија, Влора Адеми.

На конференцијата присутните имаа можност да слушнат и за предизвиците со кои се соочуваат непрофитните организации во Албанија, а кои наведоа дека технологијата навистина им помогнала да ги надминат финансиските тешкотии и да ги намалат трошоците на организациите користејќи ги овие донации.


ВМРО-ДПМНЕ: Шилегов e новата Радмила Шекеринска


Скопје, 13 февруари, 2017 - 9:42 (META) 

Милионерот Петре Шилегов во изборната кампања на СДСМ донирал 60.000 денари или тројно помалку од парите кои на партијата великодушно и ги дале невработениот студент Ивана Туфегџиќ и соросовиот платеник Павле Богоевски, се вели во соопштението на ВМРО-ДПМНЕ.

Во него се додава дека „Шилегов, за разлика од Туфегџиќ и Богоевски кои повеќе време минаа одработувајќи за СДСМ на терен, имал повеќе време да заработи за себе.“

– За две години, според јавно достапните податоци, успеал да стане побогат за дури 200.000 евра, подновувајќи се со три станови за две години. Според сите индиции, Шилегов е новата Радмила Шекеринска која е позната по тоа што си изнајмува сама на себе станови за 5.000 евра – се вели во соопштението на ВМРО-ДПМНЕ.


Акција за донирање апарати за домаќинство и облека за поплавените


Скопје, 25 септември, 2016 - 10:27 (META) 

Градската организација на СДСМ Скопје, под мотото „Хумано Скопје подава рака“, организира хуманитарна акција за помош на граѓаните што беа погодени со августовските поплави.

Како што соопштија од партијата, акцијата ќе се спроведува на три пункта во општина Аеродром и во општина Кисела Вода, во период од 10 до 12 часот, а ќе се собираат исправни електрични апарати за домаќинство и облека.

Пунктовите во Аеродром се наоѓаат на паркиралиштето на „Неоком“, кај Железничка станица, паркиралиштето на ОУ „Љубен Лапе“ и на последната автобуска станица на линијата број 5 во населба Ново Лисиче. Пунктовите во Кисела Вода се во паркот спроти Општина Кисела Вода, паркот спроти киното „Расадник“ и на паркиралиштето пред поштата во населба Драчево.


Кампања против ксенофобија насловена „Деца на планетата Земја“


Скопје, 24 септември, 2016 - 11:04 (META) 

Во Паркот на франкофонијата денеска се одржува манифестацијата „Деца на планетата Земја“, која е дел националната кампања против ксенофобија.

„Деца на планетата Земја“ е граѓанска акција на Фондација „Отворено општество“ – Македонија, која порачува дека сите имаме право да живееме мирно, слободно и безбедно.

Во рамки на манифестацијата, која почнува во 11.30 часот и ќе трае до 19 часот, ќе се одржат изложби, проекции на филмови, работилници за изработка на маици и на постери, а ќе биде отворен и пункт за донации кои се наменети за бегалците на пограничниот премин во Гевгелија. Собраните донации ќе бидат предадени во текот на утрешниот ден.Programa sabota 24.09.2016 2 del (2-2)

 

Организаторите порачуваат дека на бегалците во кампот им се потребни чинии, лажици, вилушки и стаклени чаши за кујните во камповите, како и играчки, разни едукативни боенки, блокчиња, боички, фломастери, школски прибор и слично, кои децата ќе ги коритстат во занималните во кампот.


На двете сметки на Црвен крст собрани 829.669 евра


Скопје, 26 август, 2016 - 14:57 (META) 

На жиро-сметката на Фондот за солидарност на Црвен крст до денеска се уплатени 37.799.764  денари или 614.630 евра, а од донирањето 100 денари со повик на телефоните 075/070/077 143 400, собрани се 13.224.900 денари, односно 215.039 евра, или вкупно 829.669 евра, соопштија од Црвен крст.

Досега, како што известија од Црвен крст, нивните екипи дистрибуирале:

  • 33.454 пакети со храна (еден пакет е наменет за 4 лица);
  • 31.004 дневни и топли оброци;
  • 46.013 литри млечни производи;
  • 6.776 пакети со хигиенски производи;
  • 2.519 бебешки пакети;
  • 315 тони вода;
  • 586 душеци;
  • 4.590 кебиња;
  • 600 килограми облека;
  • 764 пара чизми;
  • 341 литар дезинтал.

Акцијата за собирање помош продолжува до 29 август, а собраните средства потоа ќе бидат линеарно распределни на семејствата кај кои е извршена проценка на штетата.


Рокот за за донации за поплавените Црвен крст ќе го продолжи до петок


Скопје, 22 август, 2016 - 14:06 (META) 

Црвен крст ќе го продолжи периодот за донации за граѓаните од поплавените подрачја до петок, изјавија од Црвен крст за „Мета“.

Тоа значи дека со продолжување на акцијата, граѓаните сè уште ќе можат да донираат по 100 денари на телефонските броеви 075/070/077 143 400.

– Има интерес од граѓаните за донирање и не е фер да ги прекинеме линиите – изјави за „Мета“ секретарот на Црвен крст, Сузана Тунева-Пауновска.

Акцијата на собирање средства беше планирано да трае до 21 август, две недели од отворањето на телефонските линии, но уште тогаш беше најавено дека доколку има интерес, ќе се продолжи периодот на собирање донации.


Собрани 660.158 евра на солидарната сметка на Црвен крст и од телефонските броеви


Скопје, 17 август, 2016 - 15:56 (META) 

На жиро сметката на Фондот за солидарност на Црвен крст до денеска се уплатени 27.573.229 денари или 448.345 евра, а од донирањето на 100 денари со повик на телефоните: 075/070/077 143 400 собрани се 13.026.500 денари или 211.813 евра, или вкупно 660.158 евра.

До сега тимовите на Црвен крст дистрибуирале:

27.630 пакети со храна (еден пакет е наменет за 4 лица)

21.000 дневни оброци

9.700 топли оброци

11.619 литри млеко

15.422 литри јогурт

3.918 пакети со хигиена

583 бебешки пакети

237 тони вода

746 пакети пелени

556 душеци

4.392 ќебиња

600 килограми облека

734 чифта чизми

332 литри дезинтал

98 градежни колички

126 лопати

Акцијата на собирање на средствата е планирана да трае до 21 август, а продолжувањето на истата ќе зависи од заинтересираноста на граѓаните и правните субјекти за донации.

По завршување на акцијата средствата ќе бидат префлени на сметките на граѓаните погодени од полавите согласно проценката на овластени комисии кои дејствуваат на терен.


Пунктот пред „Веро Центар“ се затвора за донации, останува собирно место за волонтери


Скопје, 17 август, 2016 - 10:08 (META) 

Пунктот пред „Веро Центар“ за собирање помош за настраданите од поплавата, од денеска се затвора за донации и во иднина ќе служи само како собирно место за волонтери кои ќе се упатуваат да помагаат на терен.

– Десет дена собиравме помош од граѓаните за настраданите и проценивме дека повеќе нема потреба. Луѓето во поплавените подрачја полека се враќаат во нормала, отворени се дел од продавниците каде што можат да си ги купат потребните производи – изјави Драган Додевски за „Мета“.

Тој е презадоволен од досегашниот одзив на луѓето и компаниите и вели дека сета помош била доставена до семејствата.

Пунктот пред „Веро Центар“ ќе биде собирно место за волонтерите, и според Додевски тие веќе ги мапирале социјално-загрозените семејства на кои им е потребна помош на терен.

– Од името на сите волонтери, сакам да искажам благодарност до сите граѓани, компании и организации кои се одважија на нашиот апел да помогнат на жителите од поплавените подрачја. Продолжуваме со работа на терен, им стоиме на располагање на сите, кои на било кој начин сакаат да се вклучат во санација на штетите предизвикани од поплавата – вели Додевски.