Европската унија и Јапонија потпишаа договор за слободна трговија


Токио, 17 јули, 2018 - 13:23 (META) 

Договорот за слободна трговија кој го потпишаа Европска унија и Јапонија претставува „јасна порака против протекцинизмот“, изјави денеска претседателот на Европскиот совет, Доналд Туск во Токио, алудирајќи на американските царински тарифи кои ги воведе претседателот на САД, Доналд Трамп.

„Покажуваме дека сме многу силни и во подобра позиција кога работиме заедно“, изјави претседателот на Европската комисија, Жан Клод Јункер.

Договорот помеѓу ЕУ и Јапонија предвидува зона на слободна трговија која покрива речиси една третина од светскиот домашен бруто-производ (БДП).

Состанокот во Токио требаше да се одржи минатата недела во Брисел, но јапонскиот премиер Шинзо Абе ја откажал средбата поради поплавите во Јапонија во кои настрадаа повеќе од 200 лица.


Туск: САД немаат подобар сојузник од Европската унија


Брисел, 10 јули, 2018 - 15:41 (META) 

Претседателот на Европскиот совет, Доналд Туск го повика американскиот претседател Доналд Трамп наместо секојдневно да ја критикува Европа, да ги почитува своите сојузници.

По потпишувањето на новиот договор за соработка помеѓу ЕУ и НАТО, Туск изјави дека САД нема, ниту ќе има подобар сојузник од Европа.

Американскиот претседател, Доналд Трамп ги повика членките на НАТО, да ја исполнат обврската за издвојување на два отсто од домашниот-бруто производ (БДП) за одбрана.

„САД издвојуваат за одбраната далеку повеќе од која било друга земја за истата таа земја да ја заштитат. Тоа не е фер кон даночните обврзници“ напиша Трамп истакнувајќи дека членките на НАТО треба да плаќаат повеќе, а САД помалку.


Туск: Отворен е патот кон ЕУ, останете посветени на реформите


Брисел, 28 јуни, 2018 - 15:20 (META) 

Ова е добра недела за вашата земја и за Западен Балкан, министрите за надворешни работи на ЕУ го отворија патот за отпочнување преговори за членство за Македонија и Албанија во јуни 2019 година и за неколку часа очекувам шефовите на влади да ја потврдат одлуката, изјави денеска на прес-конференција претседателот на Советот на ЕУ Доналд Туск со премиерот Зоран Заев.

Тој рече дека напредокот немало да биде успешен без силниот ангажман на македонската Влада, посочувајќи го постигнатиот Договор за добрососедство со Бугарија и Договорот со Грција за решавање на спорот со името, кои, според него, претставуваат пример за другите во регионот како да се решаваат проблемите.

– За време на мојата посета на Скопје ја видов јасно изразената политичка волја да одите напред во евроатлантските интеграции, и оти ќе останете на тој пат да одржите чекор во реформите во клучните области – рече Туск.

Премиерот Заев истакна дека денеска во Брисел во срцето на Европа е потврдена големата вест Република Македонија да добие датум за преговори во јуни 2019.

– Нашата земја го заслужи тоа. Лидерите на ЕУ рекоа да, земјата го заслужува тоа. ЕУ прифати дека Македонија од заробена држава за само една година направи пресврт. За само една година Република Македонија е земја позитивни промени, на инклузивност, политички дијалог, за политичка волја за решавање на проблемите со соседите – рече Заев на прес-конференцијата.


Заев во дводневна посета на Брисел, средби со Туск, Хан и Столтенберг


Брисел, 28 јуни, 2018 - 9:44 (META) 

Премиерот Зоран Заев, вицепремиерката Радмила Шекеринска, вицепремиерот Бујар Османи и министерот за надворешни работи Никола Димитров од денеска се во дводневна работна посета на Брисел, информираат од владината прес-служба.

За време на оваа работна посета владината делегација денеска ќе се сретне со претседателот на Европскиот Совет Доналд Туск, со кого ќе имаат и заедничка изјава за медиумите, а ќе има средба и со комесарот за соседска политика и проширување, Јоханес Хан.

Премиерот Заев денеска, во попладневните часови, ќе се обрати и на Форумот Кран Монтана, на сесијата насловена „Југоисточна Европа и нејзиното пристапување кон Европската Унија“.

Утре предвидена е средба со Генералниот секретар на НАТО, Јенс Столтенберг, по што ќе следува и заедничка прес-конференција.

Во текот на дводневната работна посета на Брисел премиерот Заев ќе учествува и на работниот состанок на Партијата на европските социјалисти.


Иванов побара паралелни преговори од ЕУ за Македонија


Скопје, 28 април, 2018 - 17:15 (META) 

Иднината на Западен Балкан е во европското семејство, но работа се уште има, а билатералните прашања мора да се решаваат пред влезот во Унијата, се дел од заклучоците од двочасовниот состанок на шефовите на држави и влади од Процесот Брдо- Бриони што се одржа во Скопје вчера.

Домаќинот на самитот, македонскиот претседател Ѓорге Иванов, побара паралелни преговори за спорот со името и за членство во Европската Унија.

– Повикувам Унијата да овозможи паралелно движење на преговорите зачленство и надминување на билатералнаата разлика меѓу  Македонија и Грција. По самата своја природа проширувањето е политичко, а не само техничко прашање. Ако ЕУ не ни ја обезбеди иднината  тогаш ние ќе се занимаваме  со минатото – рече македонскиот претседател.

Претседателот на Европскиот совет, Доналд Туск пак порача дека доаѓа со силна порака и цврста заложба за европската иднина на земјите од регионот. Македонија според него, покажала дека за една година успеала невозможното да го направи возможно во процесот на преговорите со името.

– Ќе го повторам тоа што го кажав за Кореја – невозможното станува возможно. Минатата година слушнав дека е невозможно да се реши ова прашање, меѓутоа блиску сте до успех. Можно е историјата на Балканот, која што личи на хорор филм кој никогаш не завршува,  сепак да има среќен крај – рече Туск.

Бугарскиот премиер Бојко Борисов порача дека спорот за името со Грција би требало да се реши набргу.

-Се надевам дека Македонија и Грција ќе најдат начин да го решат проблемот со името и тоа мора да са случи многу набрзо, затоа што имаме историска можност и како што кажа мојот пријател  Доналд кој е историчар рече, во иднината за шеесет години од сега историчарите ќе го оценуваат овој момент – порача Борисов.


Доналд Туск на македонски порача дека ЕУ стои зад Македонија


Скопје, 27 април, 2018 - 12:28 (META) 

Претседателот на Европскиот Совет Доналд Туск, по средбата со премиерот Зоран Заев, на прес-конференцијата во Владата на македонски јазик зборуваше пред новинарите и порача дека ЕУ стои зад Македонија, исто како што Македонија ја поддржа Европската унија во случајот Солзбери.

Тој рече дека многу работи се сменети во земјава од 2015 година, кога бил овде по повод мигрантската криза.

– Од тогаш т.н. западно балканска рута е затворена и така мора да остане. Да ви се заблагодарам за вашата поддршка тогаш и за вашето континуирано будно следење на ова прашање. ЕУ ќе ви помогне во вашите напори за реализација на реформите. Ги имате сите неопходни состојки да успеете. Постигнавте договор со Бугарија, а се надевам истото ќе го постигнете со Грција. Ја имате мојата беузсловна поддршка. Јас верувам во вас – порача Туск.

Туск, кој е од Полска, рече дека чувствува промена во политичкиот менталитет во Скопје и вистинска политичка волја за придвижување кон евро-атпанските интеграции.

– Воедно забележувам храбро лидерство кај премиерот Заев насочено кон иднината. ЕУ е и ќе остане најдоверливиот партнер за целиот регион, ЕУ е најголем инвеститор, најголем донатор и најголем трговски партнер за целиот регион. Ова се однесува и на вашата земја. Околу 80 отсто од вашиот извоз оди во ЕУ, а 13 отсто во Западен Балкан. Само 1,5 отсто во Турција, а 1% со Русија и 1% со Кина. Освен трговија и инвестиции убеден сум дека ЕУ е најголема надеж за подобра иднина на вашите граѓани. Ова го кажувам од лично искуство како Полјак, денес во рамките во ЕУ можеме да го негуваме нашиот национален идентитет додека сме дел од поголемата заедница во која сите можеме да просперираме – рече Туск.

Според него, препораката за отпочнување на преговори на Македонија со ЕУ е најдобриот доказ дека напорите на граѓаните и на властите импресионираат во Европа. Туск посочи дека претстојниот самит во Софија во мај треба да донесе нова енергија во односите и треба пред се да ја реафирмира европската перспектива на регионот.

– Со Бугарија докажавте дека кога постои волја да се надминат духовите од минатото, постои начин да се оди кон иднината. Се надевам дека истото ќе постигнете со Грција. Ја имате мојата безусловна поддршка и јас верувам во вас – рече Туск.

Премиерот Заев изјави дека посетата на Туск е големо признание, охрабрување, но и одговорност. Тој порача дека нема време за опуштање, а реформите ќе станат поконкретни, повидливи и поефикасни.


Туск: ЕУ е отворена за можноста Велика Британија и натаму да остане членка


Брисел, 16 јануари, 2018 - 19:10 (META) 

Европската Унија е отворена за можноста дека Велика Британија ќе го промени ставот за Брексит и ќе остане дел од Унијата, рече претседателот на Европскиот совет, Доналд Туск, во Европскиот парламент.

Туск изјави дека доколку владата на Велика Британија остане на својата одлука да ја напушти ЕУ, Брексит со сите свои негативни последици ќе стане реалност во март 2019 година.

-Се разбира, оставаме и простор нашите британски пријатели да го променат мислењето. Ние овде на континентот не сме го промениле мислењето и натаму сме отворени за вас – рече Туск.

Претседателот на Европската комисија, Жан-Клод Јункер, рече дека се надева оти пораката на Туск ќе биде јасно слушната во Лондон.


Туск во Софија на бугарски ги воспеа и им го направи ќеифот на Бугарите


Софија, 12 јануари, 2018 - 14:25 (META) 

Добро е што еден од приоритетите на бугарското претседателство е иднината на Западниот Балкан, порача вчера на бугарски јазик претседателот на Европскиот Совет, Доналд Туск, говорејќи на церемонијата за бугарското претседавање со Советот на ЕУ, која се одржа во театарот „Иван Вазов“ во Софија, јавуваат бугарските медиуми.

Говорот го одушеви и Џејмс Крисп, дописникот на лондонски „Телеграф“ од Брисел, кој на „Твитер“ порача дека Туск „убивал“ во својот говор на бугарски, цитирајќи го споменувањето на Спартак, „Игра на тронови“ и Христо Стоичков.

Обраќајќи се на бугарски, Туск нагласи дека Бугарија е „најстарата држава во Европа“, која никогаш не загубила воено знаме во битка, а Бугарите се потомци на познатиот роб-востаник од Тракија, Спартак.  

Говорот што ги одушеви Бугарите, Туск го почна со цитат на првата строфа од познатата поема „Отечество љубезно“ од Иван Вазов.

– Како Полјак, многу добро сфаќам колку многу работа, смелост и решителност ви требало вам, Бугарите, да ги постигнете овие европски успеси за вашата татковина. Никој не ви дал ништо дарум, вие самите на прво место сте творците на овој историски пресврт, на овие понови убавини – рече Туск, споменувајќи го и познатиот актер Захари Бахаров, кој се прослави со својата улога во култниот серијал „Игра на тронови“, а потоа и познатиот фудбалер Христо Стоичков, а на крајот го пофали и бугарскиот премиер Бојко Борисов, за кого рече и дека „би можел да преплаши не само еден тракиски војник“.


Туск: Историјата на Балканот е подраматична од „Игра на тронови“ иако нема змејови


Софија, 12 јануари, 2018 - 10:10 (META) 

Претседателот на Европскиот совет Доналд Туск смета дека историјата на Балканот е подраматична и поинтересна од дејството во популарната телевизиска серија „Игра на тронови“ (Game of Thrones).

Тој, на инаугурацијата на бугарското претседателство со ЕУ, во Софија, предупреди дека на Западен Балкан, каде Брисел се обидува да воспостави тесни врски со земјите кои сакаат да се приклучат на ЕУ, не треба да се дозволи да се случи сценарио од популарната серија.

-Историјата на Балканот е подраматична и поинтересна од сценариото на „Игра на тронови“, иако во неа нема змејови. Сите посакуваме сегашноста и иднината на Балканот да биде како помалку драматично сценарио. Стабилност, безбедност, напредок е она што го заслужуваат луѓето од целиот регион. А целта на ЕУ е да го направи ова сценарио реалност – рече Туск.


Платите во Европска Унија ќе се зголемат и до 500 евра во 2018 година


Брисел, 21 декември, 2017 - 10:46 (META) 

Платите и пензиите на работниците во земјите-членки на Европска Унија ќе бидат зголемени за 1,5 отсто, почнувајќи од 1 јули 2018 година, што значи дека месечната плата, може да биде зголемена и до 500 евра.

Заводот за статистика на Европска Унија, „Евростат“ го пресмета зголемувањето на платите врз основа на платата на јавните службеници во земјите-членки на ЕУ и зголемување на трошоците за живот во Белгија и Луксембург.

Основната плата на административците ќе биде зголемена од 2.830 на 2.872 евра во најниската група, односно од 19.588 на 19.882 евра во највисоката група.

Германски „Билд“ пишува дека, платата на канцеларката Ангела Меркел моментно изнесува 18.388 евра, без дневниците, а околу 800 вработени во Европска комисија заработуваат повеќе од канцеларката.

Претседателот на Европска комисија, Жан Клод Јункер и претседателот на Европскиот совет, Доналд Туск заедно со додатоците, ќе заработуваат 32.200 евра месечно.

Платите на шестмината потпретседатели на Европска комисија ќе се зголемат за околу 450 евра, односно на 30.217 евра. Месечните плати на пратениците ќе се зголемат од 8.484 на 8.611 евра.