Кина воведе царина од 25 отстo на 128 американски производи


Пекинг, 2 април, 2018 - 10:17 (META) 

Кина воведе царина од 25 отсто на 128 американски производи вклучувајќи ги и свинското месо и виното, како реципрочна мерка на САД за царината за увоз на челик и алуминиум од Кина.

Зголемувањето на царината стапува на сила денеска и ќе влијае на увозот кој изнесува околу три милијарди долари.

Пекинг информира дека овој потег ќе ги заштити кинеските интереси и ќе ги балансира загубите предизвикани од новите американски царини.

Пртеходно, Кина за овие мерки најави дека не сака трговска војна, но ќе преземе одредени мерки ако економијата почне да ги трпи последиците.

Но, Трамп е на ставот дека „трговските војни се добри“ и дека лесно САД би победиле. Американските власти веќе најавија планови за воведување на нови тарифи.


Трамп го разреши Тилерсон, нов државен секретар е шефот на ЦИА, Мајк Помпео


Вашингтон, 13 март, 2018 - 15:24 (META) 

Актуелниот директор на aмериканската разузнавачка служба ЦИА, Мајк Помпео, ќе биде нов државен секретар на САД и ќе го замени Рекс Тилерсон.

Ова го објави американскиот претседател Доналд Трамп на социјалната мрежа „Твитер“ и додаде дека Помпео извонредно ќе ја врши работата. Тој истовремено му се заблагодари на Тилерсон.

Американскиот претседател за нова директорка на ЦИА ја назначи досегашната заменичка на Помпео, Џина Хаспел.

Двете назначувања мора да добијат и потврда во Сенатот на САД.


Трамп ја прифати поканата да се сретне со Ким Јонг-ун


Вашингтон, 9 март, 2018 - 9:52 (META) 

Севернокорејскиот лидер, Ким Јонг-ун и американскиот претседател, Доналд Трамп ќе се сретнат лично во мај откако Трамп ја прифати поканата за средба но напомена дека санкциите за Северна Кореја ќе останат.

Чунг Еуи-Јонг, специјалниот советник за национална безбедност на претседателот на Јужна Кореја, кој пред неколку дена имаше средба со Ким во Пјонгјанг, на Белата куќа ѝ ја пренесол пораката на Ким дека Северна Кореја е посветена на денуклеаризација и дека ќе ги замрзне нуклеарните тестирања.

-Доколку Трамп и Ким се сретнат по меѓукорејскиот самит, целосна денуклеаризација на Корејскиот Полуостров ќе може да почне да се остварува – изјави претседателот на Јужна Кореја, Мун Џае-Ин.

Трамп на „Твитер“ го опиша развојот на настаните како голем напредок, додавајќи дека санкциите кон Северна Кореја ќе останат на сила додека не се постигне цврст договор.

Досега ниту еден американски претседател се нема сретнато со лидер на Северна Кореја, а односите меѓу двете земји со години се толку лоши, што немаат ни дипломатски претставништва.


Кочовски: Македонскиот челик не е директно погоден од тарифите кои ги најави Трамп


Скопје, 2 март, 2018 - 14:26 (META) 

Најавата за воведување на увозни тарифи за челични и алуминиумски производи од страна на американскиот претседател Доналд Трамп за Соединетите Американски Држави нема најдиректно да ги погоди македонските производители, бидејќи тој пазар не им е таргет, изјави за „Мета“ претседателот на Здржението на металургија при Стопанската комора на Македонија и директор на „Макстил“, Митко Кочовски.

Но како што објасни, со воведувањето на овие мерки може да дојде до пореметување на другите пазари, што индиректно може да повлијае и на македонските компании.

– Секое затворање на еден пазар, може да повлијае на другите пазари и на светските производители што продаваат таму. Европската економија заживеја, но таа не е толку силна за да ги апсорбира сите количини на челик кои ги извезува Кина, која е најголем свестки производител – вели Кочовски.

Тој додава дека по напливот на челик од Кина, како најголем производител, американската економија има основ да се штити од вештачка конкуренција и од дампинг цени.


Трамп и Путин телефонски разговарале за судирот помеѓу Израел и Палестина


Москва, 12 февруари, 2018 - 20:41 (META) 

Претседателите на Русија и на САД, Владимир Путин и Доналд Трамп денеска телефонски разговарале за решавање на судирот помеѓу Израел и Палестина.

– Само што разговарав со претседателот на САД, господинот Трамп. Секако, зборувавме за решавање на судирот помеѓу Израел и Палестина – изјави Путин пред средбата со палестинскиот претседател Махмуд Абас, кој е во посета на Москва.

Путин потенцираше дека односите помеѓу Израел и Палестинците се далеку од тоа што посакува Русија.

„Трамп му изјави и сочувство на Путин поради падот на рускиот патнички авион, при што загинаа 71 човек“, соопшти Кремљ.


ЕУ ќе реагира соодветно ако САД го ограничи увозот при трговијата


Брисел, 29 јануари, 2018 - 20:30 (META) 

Европската Унија е подготвена да реагира брзо ако Соединетите Американски Држави го ограничат увозот од Европа, објави денеска Европска комисија.

Оваа реакција следува откако американскиот претседател, Доналд Трамп се закани дека „соодветно ќе одговори на неправедната трговска политика на Европска Унија“.

„Нашите производи не можат да влезат на пазарот на Европска Унија, а тие ни испраќаат нивни производи за кои не плаќаат данок или тој е мал. ЕУ е неправедна спрема САД, но тоа е на нивна штета“, изјавил Трамп.

Според портпаролот на Европската комисија, Маргаритис Шинас, трговијата помеѓу САД и ЕУ треба да биде во добивка и за двете страни.

„Веруваме дека трговијата, освен што треба да биде отворена, треба да се темели на правила. ЕУ е подготвена да реагира брзо и на соодветен начин доколку нашиот извоз е погоден од рестриктивни трговски мерки од страна на САД“, изјавил Шинас.

Трамп побара спроведување на трговски правила и минатата недела потпиша закон за воведување на 30 отсто царина на увозни соларни плочи и 20 отсто на машини за перење.


Постои шанса САД да се вратат на договорот за климатските промени, вели Трамп


Вашингтон, 28 јануари, 2018 - 10:39 (META) 

Претседателот на САД, Доналд Трамп би бил подготвен да го потпише Парискиот договор за климатските промени, но само доколку во документот бидат внесени значајни измени, јавуваат светските агенции.

Во интервју, кое во целост ќе се емитува на британската телевизија „Ај-ти-ви“, Трамп рекол дека „ако биде постигнат добар договор, секогаш постои шанса САД се вратат“.

Трамп ги повторил претходно изнесените тврдења дека догорот е „ужасен“ и „неправеден“ за САД, се наведува во деловите од интервјуто.

Американскиот претседател на 1 јуни 2017 година изјави дека САД се повлекуваат од договорот и дека прекинуваат со примената на одредбите од документот.

– Ако некој ни каже да се вратиме на договорот, тој би морал да биде целосно поинаков, затоа што договорот што сега го имаме е ужасен – вели Трамп, додавајќи дека би сакал да биде во ситуација САД повторно да пристапат кон договорот.


„Гугенхајм“ не дава слика на Ван Гог за Белата Куќа, нуди шолја за тоалетот


Њујорк, 26 јануари, 2018 - 12:43 (META) 

Белата Куќа во септември годинава побарала од музејот Гугенхајм во Њујорк да и ја позајми сликата „Пејсаж со снег“ на Винсент Ван Гог, насликана во 1888 година, за со неа да го украси резиденцијалниот дел од Белата Куќа, во кој живеат претседателот на САД и првата дама, Доналд и Меланија Трамп.

Одговорот што стасал од Ненси Спектор, главниот кустос на „Гугенхајм“ бил дека тоа барање не може да биде задоволено ама затоа може да ја позајмат скулптурата „Америка“ за тоалетот. „Америка“ е тоалетна шолја, од 18-каратно злато, дело на уметникот Маурицио Кателан, која изминатава година беше „изложена“ во музејот, известува весникот „Вашингтон Пост“, кој тврди дека има копија од електронското писмо што Спектор го испратила до Белата Куќа.

Целосно функционалната златна тоалетна шолја, критичарите на уметноста ја оквалификуваа како сатира за преголемото богатство во САД. Изминатава година таа беше во тоалет на петтиот кат на музејската зграда, каде сите посетители можеа да ја користат како секоја друга тоалетна шолја.

Бидејќи изложбата по една година траење е завршена, шолјата е на располагање „доколку претседателот и првата дама се заинтересирани да ја инсталираат во Белата Куќа, напишала Спектор, која е критичар на Трамп.

„Уметникот би сакал да ја понуди на Белата Куќа како долготрајна позајмица. Шолјата, се разбира, е екстремно вредна и лесно оштетлива, но ќе ви ги дадеме сите инструкции за нејзино инсталирање и за одржување“, напишала Спектор во електронското писмо цитирано од „Вашингтон Пост“.


Трамп ги доведе во прашање мировните преговори меѓу Израел и Палестина


Давос, 25 јануари, 2018 - 17:52 (META) 

Претседателот на САД, Доналд Трамп ја доведе во прашање можноста за продолжување на мировните преговори меѓу Израел и Палестина, префрлајќи ја одговорноста за тоа на палестинската страна, пренесува „Би-би-си“.

Како што изјавил Трамп во Давос, Палестинците „покажале непочитување“ кон САД, по неговата одлука да го признае Ерусалим за главен град на Израел.

– Кон САД мора да биде искажана почит или едноставно не одиме понатаму – изјавил Трамп пред новинарите во Давос.

Седејќи покрај израелскиот премиер, Бенјамин Нетанјаху на Светскиот економски форум во Давос, Трамп рекол дека Израел секогаш ги поддржувал САД и дека за него било чест тоа што го направил со признавањето на Ерусалим за главен град.

По одлуката за Ерусалим, палестинските официјални претставници соопштија дека САД повеќе не можат да се сметаат како неутрални посредници во преговорите. Палестинскиот претседател Махмуд Абас ја нарече декларацијата на Трамп за Ерусалим „шлаканица на векот“.


Нетанјаху: Прашањето со Ерусалим е веќе решено


Давос, 24 јануари, 2018 - 17:55 (META) 

Израелскиот премиер, Бенјамин Нетанјаху изјави дека нема намера да разговара со американскиот претседател Доналд Трамп за Ерусалим на Светскиот економски форум во Давос.

Нетанјаху вели дека тоа прашање „веќе е решено“.

Белата куќа соопшти дека Трамп ќе настојува да ја повтори американската силна посветеност на Израел и напорите да се намали влијанието на Иран врз Блискиот исток како начин да се постигне траен мир.

Трамп предизвика бура од реакции со одлуката да ја премести амбасадата на САД од Тел Авив во Ерусалим и тој град да го признае како престолнина на Израел.