Трамп до поддржувачите: Ваша грешка ќе биде ако ме отповикаат


Вашингтон, 7 септември, 2018 - 12:49 (META) 

Претседателот на САД, Доналд Трамп, на предизборен митинг во Билингс, главниот град на државата Монтана, вчера повторно се наврати на кампањата за негово отповикување од функцијата, велејќи дека ако до тоа дојде, виновни ќе бидат неговите поддржувачи што не гласале.

На митингот на Мет Розендејл, кој е противкандидат за место во Сенатот на сегашниот сенатор од Демократите, Џон Тестер, Трамп ги нападна демократите чија суштина на дејствување е кампањата за негово отповикување. Најгласната од нив е Максин Вотерс од Калифорнија, пратеник во Претставничкиот дом на Конгресот.

– Тие сакаат да го користат зборот „отповикување“. Да го отповикаме Трамп. Максин Вотерс: „Ќе го отповикаме“. „Но тој не стори ништо погрешно“. „Ќе го отповикаме“. „Но, зошто да отповикаме некој што одлично си ја работи работата, што ништо не згрешил?. Економијата е добра. Како да се направи тоа“. „Ќе го отповикаме“ – грмеше Трамп рецитирајќи ги „прашањата“ и „одговорите.

„Ако не излезете да гласате, единствено така може да се случи тоа“, им порача Трамп на поддржувачите.


Трамп му честиташе на Иванов: Договорот од Преспа го поплочува патот до НАТО и ЕУ


Скопје, 6 септември, 2018 - 16:11 (META) 

Договорот од Преспа го поплочува патот на Македонија до членството во НАТО и Европската Унија, му порачува американскиот претседател Доналд Трамп на својот македонски колега Ѓорге Иванов во честитката за Денот на независноста – 8 Септември. Трамп упати честитки и до граѓаните на Македонија.

„Македонија има многу причини да биде горда за годинава. Историскиот Договор од Преспа го решава долгогодишниот спор за името со Грција и го поплочува патот на Македонија до членство во НАТО и во ЕУ. Договорот и членството на Македонија во НАТО ќе ги зајакнат безбедноста, стабилноста и просперитетот во целиот регион. САД се подготвени да ја поддржат Македонија, особено во претстојните разговори за зашето членство во НАТО“, се вели во честитката на Трамп до Иванов, која денеска беше објавена на веб-сајтот на амбасадата на САД.


„Њујорк тајмс“ објави непотпишана колумна против Трамп од функционер на Белата куќа


Њујорк, 6 септември, 2018 - 11:09 (META) 

Во редок преседан за најголемите американски весници, „Њујорк тајмс“ објави анонимна колумна од висок функционер во администрацијата на претседателот на САД, Доналд Трамп, кој вели дека заедно со многумина други, тој потајно работи за да спречи многу штетни политики на Трамп.

Колумната има наслов „Јас сум дел од движењето на отпорот внатре во администрацијата на Трамп“.

Анонимниот колумнист вели дека „Трамп е аморален и не следи основни принципи“.

„Тоа што претседателот Трамп не го сфаќа целосно е дека многумина високи функционери во неговата администрација посветено работат од внатре за да попречат делови од неговата агенда и неговите најлоши намери. Добро го знам тоа, јас сум еден од нив“, вели авторот за кој „Њујорк тајмс“ тврди дека му го знае, но не го открива идентитетот.

Во колумната, членот на администрацијата на Трамп вели дека не станува збор за „левичарски“ отпор, туку за искрена намера на заговорниците да успее вистинската администрација, чии политики досега ја направиле Америка побезбедна и попросперитетна.

„Затоа, многумина именувани од Трамп дадоа завет да направат што можат за да се заштитат демократските институции и за да осуетат многу од лошите импулси што ги прави, се додека не си замине од функцијата“, вели колумнистот.


ЕУ и САД ја прекинаа трговската војна


Вашингтон, 26 јули, 2018 - 11:40 (META) 

Претседателот на САД, Доналд Трамп и претседателот на Европската комисија, Жан Клод Јункер се договорија дека „ќе ја прекинат трговската војна“ и ќе почнат преговори за отстранување на пречките во трговијата.

„Ова е голем ден за слободната трговија. Веднаш ќе почнеме со преговорите, но добро знаеме во која насока одат“, изјави Трамп по состанокот со Јункер во Белата куќа.

Тој додаде дека заеднички ќе работат на ослободување од царините и субвенции за индустриските производи, со исклучок на автомобилската индустрија.

„Исто така ќе работиме на намалување на пречките и зголемување на трговските услуги, хемиски, фармацевтски, медицински производи“, изјави Трамп и додаде дека Европа ќе го зголеми купувањето на природен плин од САД.

Преговорите ќе го решат проблемот и со високите царини кои САД ги воведе за челикот и алуминиумот од Европа, но Јункер додаде дека се договориле дека нема да воведат нови царини за време на разговорите.

„Имавме конструктивен состанок“, накратко додаде Јункер.


Европската унија и Јапонија потпишаа договор за слободна трговија


Токио, 17 јули, 2018 - 13:23 (META) 

Договорот за слободна трговија кој го потпишаа Европска унија и Јапонија претставува „јасна порака против протекцинизмот“, изјави денеска претседателот на Европскиот совет, Доналд Туск во Токио, алудирајќи на американските царински тарифи кои ги воведе претседателот на САД, Доналд Трамп.

„Покажуваме дека сме многу силни и во подобра позиција кога работиме заедно“, изјави претседателот на Европската комисија, Жан Клод Јункер.

Договорот помеѓу ЕУ и Јапонија предвидува зона на слободна трговија која покрива речиси една третина од светскиот домашен бруто-производ (БДП).

Состанокот во Токио требаше да се одржи минатата недела во Брисел, но јапонскиот премиер Шинзо Абе ја откажал средбата поради поплавите во Јапонија во кои настрадаа повеќе од 200 лица.


„Ројтерс“: Трамп напаѓа на самитот, состанокот продолжи без Авганистан и Грузија


Брисел, 12 јули, 2018 - 13:15 (META) 

На главниот настан од самитот во седиштето на НАТО денеска, претседателот на САД, Доналд Трамп, одново ги нападна членките на НАТО поради тоа што не ги зголемиле трошењата за одбрана, по што самитот на претседателите на земји и на премиерите продолжи зад затворени врати, а покрај комплетните делегации на Авганистан и Грузија биле замолени да излезат и другите членови на делегациите од земјите-членки јави Ројтерс, повикувајќи се на свои извори од самитот.

Според агенцијата, Трамп исто така го прекршил дипломатскиот протокол и на германската канцеларка Ангела Меркел и се обратил со личното име.


Трговската војна помеѓу САД и Кина се повеќе се заострува, Трамп воведува нови царини


Вашингтон, 11 јули, 2018 - 10:15 (META) 

Соединетите Американски Држави направија нов список на увозни кинески производи во вредност од 200 милијарди долари годишно на кој од септември би можела да биде воведена царина, изјави американскиот трговски претставник Роберт Лајтхајзер.

Владата на американскиот претседател Доналд Трамп го зголеми притисокот во трговската војна против Пекинг минатата недела и воведе данок на 34 милијарди долари увоз од Кина, во име на авторски права. Кина веднаш возврати со иста мера.

Лајтхајзер изјави дека даноците ќе покријат вкупно 50 милијарди долари увоз од Кина и тоа производи кои имале од бенефит од „присилен трансфер на технологија“, пракса за која американските власти ја обвинуваат Кина.

Реципрочните мерки од Кина предизвикаа нова закани од Вашингтон.

„Како последица на кинеските реципрочни мерки и нивната неспособност да го променат односот, претседателот му наложи да се почне процес со цел воведување на царина од десет отсто на дополнителни 200 милијарди долари“, рече Лајтхајзер.


Туск: САД немаат подобар сојузник од Европската унија


Брисел, 10 јули, 2018 - 15:41 (META) 

Претседателот на Европскиот совет, Доналд Туск го повика американскиот претседател Доналд Трамп наместо секојдневно да ја критикува Европа, да ги почитува своите сојузници.

По потпишувањето на новиот договор за соработка помеѓу ЕУ и НАТО, Туск изјави дека САД нема, ниту ќе има подобар сојузник од Европа.

Американскиот претседател, Доналд Трамп ги повика членките на НАТО, да ја исполнат обврската за издвојување на два отсто од домашниот-бруто производ (БДП) за одбрана.

„САД издвојуваат за одбраната далеку повеќе од која било друга земја за истата таа земја да ја заштитат. Тоа не е фер кон даночните обврзници“ напиша Трамп истакнувајќи дека членките на НАТО треба да плаќаат повеќе, а САД помалку.


ЕУ со реципрочни мерки кон САД, воведува царина за американски производи


Брисел, 6 јуни, 2018 - 16:50 (META) 

Европската унија соопшти дека од јули почнува со воведување царини на увоз на американска стока, како одговор на одлуката на американскиот претседател Доналд Трамп да воведе царини на увоз на челик и на алуминиум од Европа.

– Листата на американски производи за кои ќе се воведе царина ќе биде готова овој месец и ќе се применува од почетокот на јули, изјави денеска потпретседателот на ЕК, Марош Шефчовиќ.

ЕУ нагласува дека ќе воведе царина за американски стоки меѓу кои се челик, земјоделски производи, бурбон путер од кикирики и сок од портокал.


Земјите погодени од одлуката на Трамп за оданочување на челикот, најавија контрамерки


Вашингтон, 1 јуни, 2018 - 10:55 (META) 

Европските лидери реагираа остро на одлуката на американскиот претседател Доналд Трамп, за воведувањето на данок на увоз на челик и алуминиум од земјите-членки на Европска унија, Канада и Мексико.

Земјите кои се погодени од оваа одлука, која денеска стапува на сила, најавија контра-мерки. Францускиот претседател Емануел Макрон во телефонски разговор со Трамп, овие даноци ги опшал како „илегални“. Макрон исто така рекол дека ЕУ ќе реагира на цврст и соодветен начин.

Воведувањето на новите царини, кои стапија на сила на полноќ, Трамп ги оправда со тврдењето дека американските производители на челик и алуминиум се од витално значење за националната сигурност, но се загрозени од глобалното снабдување.

Владата на САД преговара и за Северноамерикански договор за слободна трговија.Трамп му упатил порака на канадскиот премиер Џастин Трудо дека „САД ќе прифатат фер договор или воопшто нема да има договор.“

Трудо, пак, царините ги нарече „потполно неприфатливи“ и најави дека тие би можеле да ги променат односите на двете земји. Тој објави план за воведување на царина на 12,8 милијарди долари, американски извоз.