!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Саемот за мебел почнува утре, ќе има 400 домашни и странски изложувачи


Скопјхе, 20 март, 2017 - 11:12 (META) 

Меѓународниот саем на мебел почнува утре и ќе трае до 26 март. На саемот ќе учествуваат 400 домашни и странски изложувачи, а се очекува да го посетат повеќе од 50.000 лица.

Во 11 хали ќе бидат претставени мебел и опрема за домаќинства, а една хала е наменета за машини и за репроматеријали за индустријата за производство на мебел.

Традиционално ќе се организира стручно оценување на пријавени експонати и ќе бидат доделени признанија на најдобрите учесници на саемот, во две категории, производители и трговци.

Има учесници од Србија, Хрватска, Грција, Италија, Босна и Херцеговина  и од Словенија.

Саемот ќе биде отворен од 10 до 20 часот, цената на влезницата е 100 денари, а за групни посети и за студенти чини 50 денари.


Европската комисија ја намали проекцијата за економскиот пораст на 2,1 отсто


Брисел, 10 ноември, 2016 - 11:50 (META) 

Европската комисија предвиде помал пораст за македонската економија и од 3,7 проценти ја намали на 2,1 отсто во есенската економска прогноза за земјите членки и за земјите кандидати за членство во Европската Унија.

Како причина за намалување на прогнозата се наведуваат поплавите и политичката криза.

Во првата половина на годината економијата имала забавен пораст, а се очекува подобрување по одржувањето на изборите на 11 декември.

Се очекува следната година порастот на производството да има основа во поглемите инвестициите и потрошувачка на домаќинствата, под услов политичката криза да заврши.

Европската комисија во овој извештај прогнозира дека јавниот долг ќе продолжи да се зголемува. Тој годинава изнесува 40,5 отсто, а во наредните две години ќе достигне 43 отсто.


Минатата година 21,5 отсто од граѓаните биле сиромашни


Скопје, 28 октомври, 2016 - 15:38 (META) 

Стапката на сиромашни лица во Македонија во 2015 година изнесувала 21,5 отсто, објави денеска Државниот завод за статистика.

Анализирано по типови на домаќинства, стапката на сиромаштија на домаќинствата составени од двајца возрасни со две издржувани деца е 22,8 отсто.

Стапката на сиромашни вработени лица е 9 проценти, додека стапката на сиромашни пензионери е 7,2 проценти.

Коефициентот „џини“ (мерка за нееднаквоста во распределбата на приходите) изнесува 33,8 проценти.

Основа на пресметките на сиромаштијата се приходите, а прагот на сиромаштијата е дефиниран на 60 отсто од медијалниот еквивалентен приход.

Државниот завод за статистика го пресметува индексот врз основа на податоците од анкетата за приходи и услови за живеење, која се спроведува во согласност со препораките на Европската Унија.


Минимално зголемување на трошоците за живот во септември


Скопје, 7 октомври, 2016 - 14:50 (META) 

Трошоците на животот во септември, во однос на претходниот месец, се поголеми за 0,2 отсто, објави Државниот завод за статистика.

Зголемувањето е резултат на повисоките индекси на свежиот и разладен зеленчук за 2,6 проценти, јајцата за 2,4 проценти, компирот за 1,3 отсто, месото, рибата, морските плодови и замрзнатото овошје за 0,7 отсто.

Во септември, исто така, зголемување на индексите на трошоците за живот е забележано и кај гасот за домаќинствата за 3,7 проценти, течните горива за домаќинствата за 3,2 проценти, течните горива и мазива за 2,4 проценти, средствата за чистење и за одржување на станот за 2 проценти.

Намалување на индексот на трошоците на животот во септември 2016 година, во споредба со претходниот месец, е забележано кај оризот и полномасното млеко за 1,1 отсто, другите прехранбени производи за 0,4 отсто и свежото и разладеното овошје за 0,3 отсто.

Исто така, намалување на индексите на трошоците за живот е забележано и кај авионскиот превоз на патници за 15,2 проценти, туристичките пакет-аранжмани за 10,6 проценти, услугите за сместување за 6,4 проценти, болничките услуги за 6,1 отсто.


Депозитите во јули под очекуваниот пораст од 7,4 проценти


Скопје, 26 септември, 2016 - 10:54 (META) 

Вкупните депозити во јули забележаа пораст по намалувањето во претходните три месеци, се вели во најновиот извештај на Народна банка.

„Повисокото ниво на вкупната депозитна база на банките претставува сигнал за понатамошно видливо стабилизирање на очекувањата на економските субјекти. Анализирано по сектори, порастот речиси во целост произлегува од зголемувањето на депозитите на домаќинствата, при мал пораст и на депозитите на корпоративниот сектор, додека кај депозитите на другите финансиски институции се забележува умерено намалување“, се додава во извештајот на банката.

Годишната стапка на пораст на вкупните депозити во јули изнесува 3,4 проценти и е понизок од порастот од 7,4 проценти што Народната банка го проектираше за третиот квартал на 2016 година.

„Во јули се зголеми придонесот на денарските депозити во годишниот пораст на вкупните депозити. Депозитите на домаќинствата во јули и понатаму се зголемуваат, речиси двојно посилно во однос на претходниот месец,“ се додава во извештајот.


СДСМ: Кој украде 53 милиони долари на гасоводот?


Скопје, 12 септември, 2016 - 16:53 (META) 

„Министерот за транспорт и врски, Владо Мисајловски, е добредојден во Струмица и во Куманово лично да се увери и да ги види единствените изградени дистрибутивни системи за природен гас во Македонија. Студијата за оправданоста на изградбата на делницата Клечовце – Штип предвидува дека изградбата ќе чини 24 милиони долари, а потрошени се вртоглави 77 милиони долари“, се вели во соооштението на СДСМ.

Во него се додава дека „во студијата за оправданост се разоткрива неспособноста на власта да реализира проекти за гасификација“.

„Крајниот рок до кога требаше да се осигура снабдување со природен гас на оваа приоритетна делница е 2015 година. Во 2016 година власта допрва ќе почнува со изградба. За 10 години неодговорно владеење на ВМРО-ДПМНЕ ниту домаќинствата ниту граѓаните дочекаа гасификација на Македонија. Владо Мисајловски да каже на чија сметка легнаа овие пари или тоа нека го направи Јавното обвинителство кое има обврска да дејствува по допрен глас,“ се додава во соопштението на СДСМ.


Трошоците за живот незначително намалени во август во однос на претходниот месец


Скопје, 7 септември, 2016 - 14:22 (META) 

Трошоците за живот во август, во споредба со истиот месец лани, бележат намалување од 0,3 отсто, а индексот на цените на мало бележи намалување од 0,2 проценти, објави Државниот завод за статистика.

Трошоците за живот во август во однос на претходниот месец се намалени за 0,1 отсто.

Намалувањето на цените е резултат на пониските индекси на замрзнатото овошје за 2,9 проценти, свежото и разладеното овошје за 2,5 проценти, оризот за 2,4 проценти, брашното и другите житарици и компирот за 1,7 отсто, другите прехранбени производи за 0,7 отсто.

Во август, исто така, намалување на индексите на трошоците за живот е забележано и кај централното греење за домаќинствата за 10,7 проценти, течните горива за домаќинствата за 5,8 проценти, течните горива и мазива за 3 проценти, гасот за домаќинствата за 2 проценти.

Пораст на индексот на трошоците за живот во август, во споредба со претходниот месец, е
забележан кај месото за 1 процент, шеќерот, џемот, медот, чоколадата и кондиторските производи за 0,9 отсто.

 


Граѓаните најмногу бараат потрошувачки кредити


Скопје, 30 август, 2016 - 15:32 (META) 

Кредитите на банкарскиот сектор забележаа намалување од два проценти во второто тримесечје, наспроти малиот пораст од 0,1 процент во претходниот квартал, објави Народна банка.

Значителен пад на кредитите кај компаниите и домаќинствата најмногу се почувствувало во јуни.

– Во вториот квартал се забележува намалување на побарувачката на корпоративни и на станбени кредити и понатамошно олеснување на вкупните кредитни услови. Од структурен аспект, намалувањето на кредитирањето на приватниот сектор во второто тримесечје е под влијание на падот на корпоративните кредити, додека кредитите на населението остварија умерен квартален пораст – се вели во извештајот на Народна банка.

Од аспект на валутната структура, забележано е намалување и на денарските и на девизните кредити, со поголем интензитет кај кредитите во домашна валута.

Во вториот квартал на 2016 година, кредитирањето на секторот „домаќинства“ остварил пораст од 0,2 отсто на квартална основа. Се намалила побарувачката за станбени кредити, а се засилила побарувачка на потрошувачки кредити.

Кредитирањето на корпоративниот сектор се зголемува на квартална основа за околу 2,1 отсто.


Депозитниот потенцијал на банките се намали за 2,9 проценти на квартална основа


Скопје, 30 август, 2016 - 14:16 (META) 

Вкупниот депозитен потенцијал на банките во вториот квартал годинава забележа намалување од 2,9 проценти на квартална основа, што е резултат на влошената доверба на економските субјекти во домашната економија, објави Народна банка.

– Гледано од аспект на валутата, намалување се забележува кај денарските депозити, додека девизните депозити бележат минимален пораст на квартална основа. Од секторски аспект, намалувањето на депозитите на банките во вториот квартал во најголем дел произлегува од падот кај депозитите на домаќинствата, 3,5 проценти на квартална основа. Притоа, поинтензивно намалување на вкупното штедење на населението е реализирано во текот на април и мај, додека во јуни, првпат по два месеци, е забележан скромен пораст – се вели во извештајот на Народна банка.

На годишна основа, порастот на вкупните депозити на домаќинствата дополнително забави и се сведе на 0,2 проценти во јуни, наспроти 3,1 отсто во март 2016 година. Депозитите на корпоративниот сектор во вториот квартал од годината се намалија на квартална основа за 3,6 проценти, наспроти падот од 1,7 отсто во првиот квартал.

– Ваквата динамика на движење на корпоративните депозити е вообичаена за овој период и веројатно е поврзана со циклусот во нивното деловно работење и начинот на финансирање на нивните активности, сезонските исплати на дивиденди, но одреден ефект веројатно имаше и зголемената домашна неизвесност – се додава во извештајот.

 


БЕГ почнува со акција за бесплатно приклучување на системот за топлинска енергија


Скопје, 22 август, 2016 - 15:03 (META) 

„Балкан енерџи“ почнува акција за бесплатно приклучување на системот за топлинска енергија, информираат од компанијата.

Акцијата ќе трае до 15 септември, а сите заинтересирани потрошувачи што сакаат да бидат приклучени на системот за топлинска енергија до почетокот на грејната сезона треба да се пријават што поскоро.

– Акцијата за бесплатно приклучување ќе биде спроведена по принципот „прв пријавен, прв услужен“ – велат од „Балкан енерџи“.

Според последната одлука на Регулаторната комисија за енергетика, цената на топлинската енергија (парното грење) за домаќинствата се намали за 10,93 проценти.

Најновата можност за бесплатно приклучување кон системот за греење, покрај домаќинствата, можат да ја искористат и правни лица. Оваа група потрошувачи со одлука на Регулаторната комисија за енергетика добија намалување на цената од 28,74 проценти до 40,61 процент, во зависност од категоријата на потрошувачот.