!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Хоџа: Долгот на државата кон приватните компании е околу милијарда евра


Скопје, 18 јуни, 2017 - 11:39 (META) 

Новата влада треба да направи ревизија на тоа колку должи државата и кои институции колку должат за да можеме понатаму да размислиме дали ние би влегле во преговори за соработка со некоја од тие институции, вели Неби Хоџа, претседател на Стопанската комора на Северозападна Македонија, во неделното интервју на „Радио Слободна Европа“.

Тој вели дека долгот на владата или на државата кон приватните компании, најверојатно изнесува некаде околу една милијарда евра.

– Долгот на владата или на државата кон приватните компании, се шпекулира дека е некаде околу една милијарда евра, меѓутоа тоа во сите држави е така, секаде државата му должи на приватниот сектор. Најбитниот фактор е тоа тие задолжувања да не бидат подолги од три месеци, затоа што во приватниот сектор секое задолжување е товар за бизнисот. Во однос на тоа, нормално дека новата влада треба да направи ревизија на тоа колку тие долгови изнесуваат, за да можеме ние како бизнис-сектор во иднина да имаме увид кои државни институции колку должат за да можеме понатаму да размислиме дали ние би влегле во преговори за соработка со некоја од тие институции – вели Хоџа.

На прашањето може ли бизнис-секторот да си дозволи зголемување на минималната плата, а просечната плата да се искачи на 500 евра, тој вели дека тоа е не само изводливо, туку и неопходно за да се задржи квалитетниот кадар во земјава.

– Ние како стопанска комора подолго време го промовираме тоа дека митот на евтина работна сила во Македонија мора да се промени, поради тоа што со таква социјална политика ние не можеме да имаме некоја перспектива во однос на сите држави во опкружувањето. Во друг контекст гледајќи ние како стопанственици не можеме со таква евтина работна сила да ги држиме нашите капацитети или нашите човечки ресурси од повисок ранг. Во овој случај сите капацитети кои излегуваат од нашите универзитети, кои мислиме дека ќе бидат прифатливи за нашите компании, размислуваат да избегаат од државата. Со ваква просечната плата, каква што беше во минатото, мислиме дека нема да има некаков успех и ќе бидеме повеќе социјална политика, отколку економска политика – вели претседателот на Стопанската комора на Северозападна Македонија.


ВМРО-ДПМНЕ: Досега не се случило образовна институција да остане без струја поради долг


Скопје, 16 јуни, 2017 - 17:16 (META) 

„Колку и да се обидуваат да бараат алиби, фактите говорат дека досега никогаш не се случило студентските домови или која било друга образовна институција да остане без електрична енергија поради долг кон дистрибутерот. Електрична енергија немало само кога се реализирале градежни интервенции во објектите“, се вели во реакцијата на ВМРО-ДПМНЕ на соопштението на Министерството за образование и наука.

„Обврските се сервисираа, па за неколку години се исплатени 66 милиони денари за заостанат долг. Дополнително во студентските домови, кои СДС така бргу ги заборави, во време додека ВМРО-ДПМНЕ ја водеше Владата, беа вложени повеќе од 8,3 милиони евра во изградба на целосно нови сместувачки капацитети и во реконструкција на дел од постојните, во набавка на целосно нов мебел за сите државни студентски домови. Беа набавени и инсталирани нови лифтови во сите објекти, а исто така првпат се поставија перални и сушални кои се на располагање бесплатно“, велат од партијата.

Според ВМРО-ДПМНЕ, ако по утрото денот се познава, тогаш „новата влада на СДС не носи живот, туку носи мрак во Македонија“.


МОН информираше дека ДСЦ „Скопје“ има долг од 4,5 милиони евра


Скопје, 16 јуни, 2017 - 14:55 (META) 

Министерството за образование и наука информираше дека Државниот студентски центар „Скопје“, под чија закрила функционираат студентските домови „Стив Наумов“, „Гоце Делчев“ и „Кузман Јосифовски – Питу“, има долгови од 4,5 милиони евра.

Од нив, за комунални услуги, греење, комуникации и транспорт долгот е 1,6 милиони евра.

„Доколку раководството на ДСЦ „Скопје“ навреме ги намируваше долговите и обврските, немаше да се доведат студентите кои се сместени во студентскиот дом „Гоце Делчев“, но и во другите студентски домови да ги подготвуваат испитите во темница и да стравуваат дека ќе останат без електрична енергија или вода за пиење и елементарни услови за престој во објектите“, соопшти Министерството за образование.

Студентскиот дом „Гоце Делчев“ синоќа остана без струја поради неплатени сметки, по што студентите реагираа до Министерството за образование и наука и до Владата.

Од МОН информираа дека со „ЕВН Македонија“ договориле исплатата на долгот да биде на рати.


Нема договор за намалување на грчкиот долг


Атина, 23 мај, 2017 - 10:32 (META) 

Грција и меѓународните кредитори не успеаја да постигнат договор за потенцијално реструктуирање и намалување на грчкиот долг. На понеделничкиот состанок на Еврогрупата, претставниците на грчката влада, министрите на државите од еврозоната и Меѓународниот монетарен фонд (ММФ) не се договорија за конкретно намалување на грчкиот долг, нешто на кое грчката влада се надеваше по усвојување на нов пакет мерки кои ќе почнат да се спроведуваат до 2019 година.

За темата според информациите во Грција и Брисел можно е да се разговара следниот месец.
Првиот човек на еврогрупата, Јерун Дајселблум по состанокот го поздрави големиот напредок направен од грчка страна за имплементирање на мерки и реформи договорени со кредиторите, за што за возврат ќе добие нова рата од финансиската помош.

Според Дајселблум, во овој момент не е можен договор за намалување и реструкуирање на грчкиот долг и најави дека е неопходна и натамошна дискусија на оваа тема.

Најголемиот проблем за сега е неволноста на ММФ да се приклучи кон ваков договор. Пол Томсен од ММФ истакна дека Грција има направено напредок во спроведување на мерките, но потребна е и понатамошна работа за ММФ да се вклучи во програмата за кратење на грчкиот долг.

Дел од грчките медиуми го критикуваат неуспехот на состанокот на Еврогрупата, коментирајќи дека премиерот Алексис Ципрас со усвојување на новиот пакет мерки вложил многу, а за возврат добил само ветување дека за намалување на долгот ќе се разговара и понатаму.


Долгот на „Агрокор“ изнесува 5,4 милијарди евра


Загреб, 11 мај, 2017 - 17:42 (META) 

Хрватската компанија „Агрокор“ денеска испратила соопштение во кое се наведува дека актуелниот долг на фирмата, заклучно со 31 март 2017 година, изнесува околу 5,4 милијарди евра, пренесува балканскиот сервис на „Радио Слободна Европа“.

Наведената сума на долгови, по доспеани камати, други позајмици, одложено плаќање на даночни обврски и друго, како што било посочено, не ги прикажува долговите на целата групација, туку само тие на најголемите 19 друштва во рамките на „Агрокор“.

Во оваа сума не е прикажан ниту заемот од 80 милиони евра што компанијата го подигна на 13 април оваа година.

Од фирмата навеле дека и понатаму ги проверуваат потенцијалните неправилности во финансиските извештаи и според тоа, можна е ревизија и на овие податоци.

Инаку, на почетокот на април хрватското собрание донесе посебен закон за спасување на „Агрокор“.


УЈП ја објави новата листа на должници


Скопје, 11 мај, 2017 - 10:53 (META) 

Управата за јавни приходи (УЈП) ја објави петтата листа на должници за долгови доспеани до 31 јануари и за неплатени долгови до 30 април врз основа на данок на додадена вредност (ДДВ), данок на добивка, персонален данок на доход, придонеси од задолжително социјално осигурување, акцизи и царини.

На листата се компании, јавни претпријатија и физички лица.

„Македонија пат“ е едно од јавните претпријатија што за неплатен данок на добивка и за ДДВ должи околу седум милиони евра.


СДСМ: Јавниот долг во првиот квартал од годинава е зголемен за 28,3 милиони евра


Скопје, 2 мај, 2017 - 16:25 (META) 

Јавниот долг во првиот квартал од 2017 година во апсолутен износ е зголемен за 28,3 милиони евра, а во најновиот извештај Министерството за финансии лажно сака да прикаже негово намалување пресметано како процент од домашниот бруто-производ (БДП), велат од СДСМ.

Оттаму додадваат дека иако пред 40 дена, Министерството за финансии јавно се огради од методологијата на пресметка на БДП на Државниот завод за статистика, сега во своите пресметки ја прифаќа, па „дури и ја надградува“.

„Миноски во извештајот на Министерството за финансии нелогично пресметал дека домашниот  бруто-производ за 2017 година ќе изнесува неверојатни 10 милијарди и 300 милиони евра. Направени се сериозни статистички злоупотреби со кои Министерството за финансии во последните 40 дена го зголемува износот на БДП за нереални 890 милиони евра за да прикаже фиктивно намалување на јавниот долг како процент од БДП“, велат од СДСМ.

Од партијата додаваат дека „новата реформска влада посветено и транспарентно ќе раководи со јавните финансии, а ќе ги преиспита и сите злоупотреби направени со пари на граѓаните“.


Германија ги отфрли тврдењата на Трамп дека им должи пари на НАТО и на САД за одбрана


Берлин, 19 март, 2017 - 16:54 (META) 

Германската министерка за одбрана, Урсула фон дер Лејен, денеска ги отфрли тврдењата на американскиот претседател Доналд Трамп дека Германија должи „огромна сума“ пари на НАТО и на САД за одбрана, јавуваат светските агенции.

„Не постои долг кон НАТО. Парите за одбрана се вложуваат во мировните мисии на Обединетите нации, во нашата европска мисија и во заедничката борба против Исламска држава“, навела во своето соопштение Урсула фон дер Лејен.

Според германската министерка за одбрана, сите сакаат товарот да се дели рамномерно, но за тоа да се случи, неопходно е да се направи „модерен безбедносен концепт“, кој вклучува модернизација на НАТО, но и на одбранбениот систем на Европската Унија.

Претседателот на САД, Доналд Трамп, вчера на својот твитер-профил напиша дека Германија им должи на САД и на НАТО огромна сума пари за одбрана.


Јакимовски ја задолжил Општина Карпош за 10,5 милиони евра, обвини СДСМ


Скопје, 18 март, 2017 - 13:48 (META) 

Градоначалникот на општина Карпош, Стевчо Јакимовски, и „неговите соработници од ВМРО-ДПМНЕ“ ја задолжиле Општината за 10,5 милиони евра, обвинија денеска од општинската организација на СДСМ во Карпош.

Од СДСМ велат дека официјалните извештаи на Општината и завршните сметки покажуваат дека само во 2016 година долгот се искачил за нови 5 милиони евра.

– Непознато е каде отидоа овие пари, кога изминатата година не е изграден ниту еден објект од интерес на граѓаните. Но, затоа, само за ставката „репрезентација“, Јакимовски потрошил 140.000 евра во 2015 и во 2016 година, односно по околу 20.000 денари дневно за гозби и за ручеци од џебот на граѓаните – изјави денеска на прес-конференција претседателот на општинската организација на СДСМ во Карпош, Душко Весковски.

Весковски истакна дека од планираните 300 милиони денари за улици и за патишта, потрошени биле само 68 милиони денари, поради што жителите на Карпош имаат „раскопани и непроодни улици и тротоари, кои служат само за паркирање автомобили“. Тој порача дека по новата реформска влада, доаѓа и нова локална власт во општина Карпош.


СДСМ: Власта во заминување за утре планира нови милионски долгови


Скопје, 9 јануари, 2017 - 10:27 (META) 

Владата во заминување сака утре да ги задолжи граѓаните 15 милиони евра повеќе од обврските што се стигнати за враќање оваа недела, се вели во соопштение на СДСМ.

Во него се додава дека Министерството за финансии, според најавената аукција, утре ќе побара 31,7 милиони евра, а за враќање се доспеани 15,8 милиони евра.

– Бараме од Кирил Миноски веднаш да објасни за кого и за што бара 15 милиони евра повеќе, што треба да ги враќаат граѓаните. СДСМ и со ограничените ингеренции во Министерството за финансии во Владата за организирање и за спроведување на изборите им заштеди на граѓаните повеќе од половина милијарда евра, или точно 570 милиони евра нов долг, без притоа да биде доведена во прашање редовната исплата на платите, пензиите, субвенциите, социјалната помош – се додава во соопштението на СДСМ.