За приход од 100.000 денари ќе се плаќа данок од 10.800 денари


Скопје, 6 ноември, 2018 - 12:03 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

На пример, доколку на лицето од горниот пример тие 100.000 денари му се единствениот доход во годината, на него ќе му бидат вратени 800 денари, затоа што 100.000 денари на годишно ниво е под годишниот праг од 1.080.000 денари за повисоката стапка од 18 отсто.

„За да можат граѓаните навремено и прецизно да следат колку доход имаат остварено во текот на годината, колку данок имаат платено, колку данок треба да доплатат или да им се врати, а со тоа и соодветно да си планираат, ќе се изработи онлајн сервис преку кој граѓаните во кое било време ќе можат да ги добијат сите овие информации, и преку кој ќе можат предвреме да доплатат даночен долг“, информираа од Министерството за финансии.

Најавата на Владата ги фати неподготвени работодавачите и работниците со оглед на тоа што промената се најавува само два месеци пред да стапи на сила и на крајот на годината кога компаниите веќе ги имаат подготвено финансиските планови за 2019 година. Речиси сите стопански комори реагираа, а некои од нив побараа одложување на примената на прогресивниот данок за пет години. Реагираа и вработените во компаниите од софтвреската индустрија со образложение дека тие не се најбогатиот слој граѓани за кои власта тврди дека е наменета новата даночна реформа.

Од друга страна, од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефектвната даночна стапка.

„За најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, соопшти Министерството за финансии.


Бошњаковски: Бројчаникот на Триумфална порта го платил лично Заев


Скопје, 31 август, 2018 - 15:08 (META) 

Бројчаникот што ноќеска беше поставен на Триумфалната порта е платен лично од премиерот Зоран Заев, а ќе профункционира наскоро, рече во одговор на новинарско прашање портпаролот на Владата, Миле Бошњаковски по редовната прес-конференција.

Тој рече дека се запазени сите процедури при поставувањето на бројчаникот, а Заев како граѓанин на Република Македонија упатил барање за согласност за поставување на електронски екран и тој е набавен лично од него.

–  Се разбира дека имало постапка, процедура и документацијата е комплетна од доставувањето на барањето, одобрувањето и поставувањето. Како што е веќе информирана јавноста, ќе бидат објавувани финансиските средства кои ќе бидат враќани во Буџетот на Република Македонија, од судските процеси кои се во тек – појасни Бошњаковски.

На 22 ноември 2016 година, во предизборието за предвремените парламентарни избори (декември 2016),  Заев на партискиот митинг во скопската општина Аеродром вети дека украдените народни пари ќе бидат вратени назад на државата и дека тоа ќе го регистрира бројчаник поставен на „Порта Македонија“  во Скопје.


Грција официјално излегува од европската програма за помош


Атина, 20 август, 2018 - 11:53 (META) 

Грција денеска официјално ќе го одбележи завршувањето на програмата за европска помош, со што излезе од една од најголемите кризи во својата историја, која исто така силно се закануваше на еврозоната. Сепак, земјата ја очекуваат уште многу потешкотии за одржување на нејзината економска одржливост.

Првиот пакет за помош Грција, како членка на еврозоната, го доби во мај 2010 година, а потоа вкупно уследија 326 милијарди евра од ЕУ и Меѓународниот монетарен фонд.

– Без европската финансиска помош, грчката економија ќе доживееше колапс, од кој веројатно не ќе можеше да се извлече неколку децении – рече Пјер Московиси, еврокомесарот за економска прашања.

За да го поддржи враќањето на Грција во состојба на економска и финансиска автономија, Еврогрупата во јуни додели дополнителни 24 милијарди евра за покривање на сите финансиски потреби на Грција до летото 2020 година.


Постигнат договор за долгот, Грција излегува од програмата за помош


Атина, 22 јуни, 2018 - 9:57 (META) 

Кредиторите се договорија за начинот на излегување на Грција од програмата за помош која од земјата се користи веќе осум години и за мерките за намалување на долгот, информираат повеќе релевантни извори.

-Постигнавме договор за Грција – изјавил европски извор синоќа, по состанокот на министрите за финансии на еврозоната во Луксембург, кој траел повеќе од шест часа.

Други два извора за агенцијата АФП изјавиле дека новиот договор ќе овозможи, како што претходно било планирано, официјална Атина од 20 август веќе да не биде под покровителство на доверителите и повторно сама да почне да се финансира на пазарите, по повеќегодишната длабока рецесија.

Расправата се продолжила бидејќи Германија во последен момент се спротивставила на намалување на грчкиот долг, кој останува највисок во ЕУ (180 отсто од БДП).

Како што наведуваат европски извори, министрите од еврозоната на крајот се согласиле дека ќе ги продолжат роковите за исплата на поголем дел од долгот за десет години, што е и последното олеснување оценето како неопходно, со цел да се обезбеди кредибилитетот на Грција на финансиските пазари.

Европејците, исто така, се согласиле за исплата на последниот пакет од 15 милијарди евра помош. По напуштањето на програмата, Атина ќе биде под европска контрола, која ќе биде многу построга отколку во Португалија, Кипар и Ирска.

Грција во последните осум години доби повеќе од 273 милијарди евра помош од своите доверители, еврозоната и Меѓународниот монетарен фонд (ММФ), преку три програми за помош.
За возврат, Грците мораа да спроведат стотици реформи, често болни за општеството, особено за да ги залечат своите јавни финансии.


СДСМ: Се враќаат долговите од криминалното владеење на ВМРО-ДПМНЕ


Скопје, 21 јуни, 2018 - 12:55 (META) 

Се враќаат долговите од криминалното владеење на ВМРО-ДПМНЕ, а Владата предводена од СДСМ одговорно управува со јавните финансии, ја намалува фреквенцијата на задолжување и редовно ги сервисира наталожените долгови, одговараат од СДСМ на денешното обвинување од ВМРО-ДПМНЕ дека власта се повеќе ја задолжува земјата и не дава отчет за тоа.

„Со дел од средствата од вчерашните аукции се враќаат стари долгови направени од ВМРО-ДПМНЕ. Овие средства се обезбедени со пониски камати во однос на аукциите во минатото кога се движеле и до 4,60%. Само во месец јуни по основ на претходни долгови, односно за претходно издадени државни хартии од вредност за исплата доспеваат речиси 30 милиони евра“, се вели во реакцијата.


ВМРО-ДПМНЕ: Заев ја задолжи државата за нови 7,1 милиони евра


Скопје, 21 јуни, 2018 - 9:56 (META) 

Опозициската ВМРО-ДПМНЕ денеска обвини дека премиерот Зоран Заев „додека го продава името,не пропушти да ги задолжи граѓаните“.

„Зоран Заев и криминалниот картел кој го води ја задолжија државата за нови 7,1 милиони евра. Власта се задолжи на 15 години со годишна каматна стапка од 3%. Тоа значи дека за земените 7,1 милион евра за 15 години ќе вратиме 3,2 милиони евра само за камати. Картелот ја задолжува државата без реална потреба. Расипништвото на власта само за првите 3 месеци од годината ги чинеше граѓани 300 милиони евра нов долг. Од тогаш долгот само се зголемува“, обвинува ВМРО-ДПМНЕ, порачувајќи дека власта ја презадолжува државата без да им каже на граѓаните на што ги троши парите.


Хаџи-Мишев: „TЕ-ТО“ отвори лажен стечај за да не го плати долгот кон „Топлификација“


Скопје, 20 јуни, 2018 - 14:01 (META) 

„Топлификација“ АД Скопје ја обвини компанијата за комбинирано производство на топлинска енергија „ТЕ-ТО“ дека покренала стечај сама на себе, за да не го плати долгот кон Топлификација и тоа во период, кога по тригодишен период на лоши финансиски резултати, лани остварува добивка од 8 милиони евра.

– Причина за овој судски процес во кој фирмата „ТЕ-ТО“ предлага стечај сама на себе е пресудата на Врховниот суд од 27 декември 2017 година, во која, Врховниот суд го прифаќа барањето на „Топлификација АД“, дека заемите дадени од „Топлификација АД“ на „ТЕ-ТО“ во периодот на градба на објектот се достасани и „ТЕ-ТО“ треба да и плати на „Топлификација“ АД околу 6,3 милиони евра главен долг, а со камата, „ТЕ-ТО“ треба да и плати на „Топлификација“ 11,4 милиони евра. Имајќи предвид дека оваа тужба на „Топлификација“ е за дел од заемите дадени во периодот на градба на објектот, вкупниот долг на „ТЕ- ТО“ кон „Топлификација“ ќе биде над 30 милиони евра со камати пресметани до 1 март 2018 година. Доколку оваа стечајна постапка на „ТЕ-ТО“ се реализира, како што е замислена, штетата на „Топлификација“ ќе биде над 30 милиони евра – рече директорот на „Топлификација“ АД, Димитар Хаџи-Мишев.

Тој додаде дека имајќи предвид дека дел од побарувањата на „Топлификација“ од „ТЕ-ТО“ се реинвестирани кредити кои „Топлификација“ ги добила од „Комерцијална банка“, доколку се реализира стечајот како што е замислен, сериозни штети може да има и банката-кредитор.

„Врховниот суд одлуката ја носи во декември, одлуката станува извршна на 2 април 2018 по доставување на истата на тужениот. Во меѓувреме „ТЕ-ТО“ започнува активности со серија незаконитости со цел преку лажен стечај да спречи извршување на судската пресуда на „Врховен суд“ и да ја оштети „Топлификација“ за над 30 милиони евра – додаде Хаџи-Мишев.

Овој судски спор, како што рече Хаџи-Мишев, нема да се одрази на испораката на топлинска енергија кон граѓаните, но неисплаќањето на 30 милиони евра ќе има сериозно влијание врз работењето на компанијата.


Тевдовски: По 10 години, јавниот долг е ставен под контрола


Скопје, 21 мај, 2018 - 14:35 (META) 

Отплатени се дел од старите долгови, зголемена е рочноста на издадените државни хартии од вредност, намалена е каматната стапка и зголемена е довербата кај инвеститорите, истакна министерот за финансии Драган Тевдовски, кој учествуваше на јавната дискусија на Економскиот факултет насловена „Јавните финансии на крстопат“.

Тој додаде дека за прв пат после повеќе од 10 години, јавниот долг е ставен под контрола и подобрена е структурата преку зголемена рочност и пониски каматни стапки. Владата планира постепена буџетска консолидација, со буџетски дефицит од 2 отсто на среден рок.

-Зголемена е и довербата на инвеститорите ако се земе предвид дека е издадена еврообврзница со историски најниска каматна стапка од 2,75 отсто како и државна обврзница со рочност 30 години. Зголемената доверба се гледа и од извештаите на кредитните агенции, како на пример „Фич“ кој го подобри изгледот за рејтингот на земјата – истакна Тевдовски.

Во своето излагање на Економскиот факултет, министерот најави реформи во јавните финансии до крајот на годинава. Согласно Акцискиот план за спроведување на Програмата за реформи во управување со јавните финансии годинава ќе се подготви законската регулатива за нов систем за јавни набавки, за повеќегодишно буџетирање и предпополнета даночна пријава за олеснување на обврските на даночните обврзници.

Во насока на зголемување на транспарентноста како една од најкрупните реформи која ќе се спроведе е објавување на Трезорот на веб-страна, односно целосен увид на јавноста во сите расходи на државната каса во реално време.

– Досега се преземени 15 чекори за зголемувањето на увидот на јавноста во јавните финансии. Тие чекори се однесуваат на објавување на извештаи кои досега не се објавувале, зголемување на фрекфенција на објавување на податоците, јавна дебата за буџетот, подобрување на веб-страницата на Министерството за финансии, јавно достапна платформа Отворени одатоци на Бирото за јавни набавки, изработка на граѓански буџети и приклучување на Македонија кон меѓународниот стандард за владини статистики на ММФ – истакна Тевдовски.


Гинекологија ќе добие аванс од ФЗОМ за да ја одблокира сметката


Скопје, 5 април, 2018 - 11:53 (META) 

Проблемот со блокираната сметка на Универзитетската клиника за гинекологија и акушерство (ГАК) во Скопје е решен и клиниката ќе добие аванс за да ја одблокира сметката, објави претпладнево министерот за здравство Венко Филипче. Тој тврди дека работењето на ГАК не е загрозено и дека ќе има плати за вработените.

Клиниката ќе добие пари во форма на аванс од Фондот за здравство, откако во понеделникот сметката на оваа јавна здравствена установа беше блокирана.

Авансот ќе изнесува околу 660.000 евра, колку што недостасуваат за да се одблокира сметката, која е замрзната поради доспеани судски извршни решенија за случаи во кои родителите тужеле заради тоа што нивните предвремено родени деца добиле ретинопатија додека престојувале на клиниката.


Раководството и сопственикот на Фабрика за кабли Неготино добија кривични пријави


Неготино, 14 јануари, 2018 - 14:45 (META) 

Полициската станица Неготино поднела кривична пријава против Г.Х. (47),генерален директор на АД „ФКН“ (Фабрика за кабли Неготино), против Ј.Ј. (37) претседателот  на одборот на директори на АД „ФКН“, против двајца членови на одборот на директори на АД „ФКН“, сите од Република Бугарија, како и против Љ.К. (61) од Велес, исто така член на одборот на директори.

Тие се товарат за злуопотреба на службената положба и овластување, но и за намерно предизвикување стечај, како и за оштетување или повластување на доверители и за фалсификување службена исправа. Како што наведува неготинската полиција, малверзациите биле со цел да се префрли имотот и сопственоста на АД ФКН врз друга фирма од Бугарија.

Кривични пријави за помагање добиле уште двајца Бугари, односно Ј.С. (41), сопственик и управител на ФКН ДООЕЛ Неготино и С.С. сопственик и управител на “Мега Ел ООД“ Софија, која е мнозински акционер во АД „ФКН. Нив полицијата ги товари за помагање во извршување на кривично дело.

Според пријавата, раководителите на АД ФКН во 2007 ја задолжиле фабриката кај една банка и под хипотека го ставиле целиот движен и недвижен имот, при што во спогодба со банката е наведена помала вредност на тој имот. Потоа во повеќе наврати од 2007 до 2010 година со двајцата сопственици и управители на другите фирми вршеле зделки со долгот, без одобрение од Собрание на акционери на АД „ФКН“ Неготино.

Раководството на Фабриката за кабли се товари и дека на ФКН ДООЕЛ му ги отстапиле сите договори, лиценци и сертификати за производство, со намера да го префрлат целокупниот имот во сопственост на „ФКН“ ДООЕЛ.

На овој начин АД „ФКН“ Неготино станало трајно неспособно да ги извршува обврските кон другите доверители и со тоа извршиле оштетување на останатите доверители, акционери и на Република Македонија за износ од 847.217.663 денари, вели полицијата.