DOCU.TECH ќе ги собере на едно место младите иноватори и ентузијасти за технологија


Скопје, 17 мај, 2018 - 16:50 (META) 

На 9 и 10 јуни во Креативниот центар „Термокис“ во Приштина неколку десетици ентузијасти за технологија и млади иноватори ќе имаат можност да разменуваат идеи, да дискутираат и да добијат совети на DOCU.TECH 2018 еден од најголемите технолошки настани на Балканот.

Организатори на овој настан се Фондот за Западен Балкан, кој обезбедува и дел од финансиите, како и Фондацијата Шеар од Србија и ДОКУФЕСТ од Косово.  Фондацијата за интернет и општество „Метаморфозис“  во соработка со Фондацијата ИПКО од Косово, оваа година овозможува покривање на сите трошоци за одреден број на млади учесници од Македонија.

„Метаморфозис“ на 23 мај со почеток во 13 часот во училницата 101 на Универзитетот на Југоисточна Европа во Тетово ќе организира Инфо-ден. Потоа веднаш ќе почне и пријавувањето, со испраќање на мотивациско писмо на англиски јазик и биографија на docutech@metamorphosis.org.mk.

ДОКУ.ТЕК е одлична можност за студентите и младите да дознаат за новите технолошки трендови, како и да сретнат еминентни говорници од целиот свет, односно познати имиња од областа на технологиите и бизнисот. Повеќе за овој настан може да прочитате на следниот линк.


Средба со организаторите на „Доку-тек“ на 15 јули


Скопје, 7 јули, 2015 - 14:39 (META) 

Фондацијата „Метаморфозис“ на 15 јули ќе организира средба со тимот на „Доку-тек“ (Doku: Tech) на која технолошките ентузијасти од Македонија ќе добијат шанса да учествуваат на уникатната технолошка конференција во регионот, што ќе се одржи во Призрен, Косово, на 8 и на 9 август.

„Доку-тек“ ги истражува социјалните импликации на технолошките иновации преку поврзување, содржина, отвореност и безбедност. Конференцијата ќе се одржи во Призрен, Косово, а ќе настапат реномирани говорници, набљудувачи, истражувачи од целиот свет, кои ќе зборуваат за отворено знаење, дигитална безбедност, приватност, социјално претприемништво и за бизнис.

На средбата, што ќе се одржи во ГЕМ-клубот во Старата скопска чаршија, ќе присуствуваат организаторите на конференцијата и тоа ќе биде можност сите заинтересирани од Македонија да се информираат за деталите поврзани со конференцијата, говорниците, како и со градот-домаќин.