Апостолска: Нема оштетени документи, нова зграда за Државниот архив е најдобро решение


Скопје, 4 април, 2018 - 12:40 (META) 

Министерката без ресор, задолжена за странски инвестиции, Зорица Апостолска, на прес-конференција потврди дека Државниот архив ќе добие нова зграда. Таа потенцираше дека материјалите во Архивот не се оштетени и додаде дека изградбата на нова зграда за оваа институција е најдоброто можно решение.

Старата зграда на Ахривот ќе биде користена за потребите на Обвинителството за организиран криминал, а за пренамената се искористени пари од европските фондови.

-Обвинителството за организиран криминал и корупција се наоѓа веќе пред непосредно вселување. Направена е пренамена. Потрошени се средства за да се отворат лаборатории и истражни центри. Да го вратевме Архивот во старата зграда ќе создадевме проблем со ист карактер – изјави денеска Апостолска.

Одлуката за иселување на Архивот, како што рече таа, е донесена во 2012 година. Просториите во Археолошкиот музеј, не се соодветни за архиварска дејност, од тие причини, додаде министерката, е донесена одлука за изградба на нов објект иако Владата е свесна дека тоа решение ќе ја чини државата поскапо.

-Самото враќање на Архивот капацитетно не го решава проблемот, затоа што имаме голема документација која не е повлечена од институции и која стои таму неколку години. Оваа Влада ги решава на најдобар начин проблемите создадени од претходната. Имајќи го предвид значењето на сите институции, особено на архивскиот материјал, најцелосходна одлука е да се гради нов објект – додаде Апостолска.

Како што рече таа, засега нема ништо уништено во поплавите и протекувањата на покривот во Археолошкиот музеј.


Архивскиот материјал од Државниот архив не е оштетен, утврдила Владата


Скопје, 9 февруари, 2018 - 18:30 (META) 

Архивскиот материјал кој се наоѓа во зградата на Државниот архив не е оштетен, утврдила комисија составена од претставници од Влада, Државниот архив и Јавното обвинителство.

Увидот бил извршен на барање на министерката без ресор задолжена за странски инвестиции, Зорица Апостолска. Во увидот, како што информираат од Владата, учествувале и секретарот на Јавното обвинителство, Митко Митревски и заменик директорот на Државен Архив, Музафер Бислими со својот стручен тим.

Комисијата констатирала дека дел од архивскиот материјал од прва категорија, од најголемо национално и историско значење, освен во просториите на новото, се наоѓа и во старото депо.

„За време на увидот е констатирано дека во новата зграда на Архивот, архивскиот материјал не е оштетен од неодамнешните поплавувања на објектот, ниту пак директно е загрозен и дека е целосно заштитен во непропустливи метални сефови. Дополнително од увидот е заклучено дека има потреба да се направи дополнителна проценка на состојбата на микрофилмуваниот архивски материјал, со цел да се утврди дали има потреба од негово преместување во старото депо“, стои во владиното соопштение.

Со увидот било констатирано дека е потребна итна санација на покривот на зградата, со што ќе се спречат понатамошни поплавувања на објектот.


Владата се пофали дека објавила документи што со закон е должна да ги објави


Скопје, 27 ноември, 2017 - 15:26 (META) 

Владата на својата официјална интернет-страница денеска објави десетици документи и информации кои се однесуваат на работата на Генераниот секретаријат, кабинетот на премиерот Зоран Заев, вицепремиерот за економски прашања Кочо Анѓушев и на работата на уште неколку министри без ресор.

Од Владата дека велат дека ова е „во насока на зголемување на транспаретноста и на отчетноста“.

„На интернет-страницата на Владата првпат се достапни буџетите од минатата и од оваа година, ревизорски извештаи, планови за набавки, листа на вработени со официјални телефони и е-маил адреси, правилници за систематизација на работните места, правилници за организација, закони и подзаконски акти во надлежност на институциите, листа на информации од јавен карактер, органограм за внатрешната организација, како и календар на настани“,  пишуваат од Владата.

Документите се достапни во категоријата „Информации од јавен карактер“, на веб-страницата, каде стои дека Владата на 34. седница „разгледа и усвои информација што се однесува на листа на акти и материјали коишто министерствата согласно закон се обврзани да ги објават на своите веб-страници“.


Објавени нови документи за убиството на Кенеди


Вашингтон, 4 ноември, 2017 - 11:16 (META) 

Американскиот Национален архив објави нови 676 владини документи поврзани за убиството на некогашниот претседател на САД, Џон Ф. Кенеди, во 1963 година. Тоа е трето објавување на документи од Националниот архив годинава.

Претседателот на САД, Доналд Трамп, минатата недела нареди преостанатите податоци да станат достапни за јавноста и им нареди на федералните агенции повторно да ги проучат предложените интервенции и што помал број информации да останат тајни.

Поголемиот број од денешните документи опфаќаат 553 податоци на ЦИА, кои досега не биле објавени.  Документите за убиството на претседателот Кенеди беа ставени под ознаката „строго доверливо“ во 1992 година со одлука на тогашниот американски претседател Џорџ Буш Постариот, со која се воведе 25-годишна забрана за објавување на овие податоци поврзани со атентатот врз Кенеди.

Таквата одлука на Буш уследи по прикажувањето на филмот „Џ.Ф.К.“ на Оливер Стоун во 1991 година, во кој беа изнесени тврдења за заговор на американските власти за убиство на Кенеди.


Судот ја комплетирал документацијата за екстрадиција на Грујовски и на Бошковски


Скопје, 1 ноември, 2017 - 16:05 (META) 

Кривичниот суд во Скопје ја комплетирал потребната документација за екстрадицијата на поранешните началници во УБК, Горан Грујовски и Никола Бошковски, од Грција во земјава и ја доставил до Министерството за правда.

Грујовски и Бошковски беа уапсени на 18 октомври на аеродромот во Солун, досека со лажни бугарски пасоши се обидувале да отпатуваат за Будимпешта. Тие во моментов се во екстрадициски притвор во Солун, а на почетокот на декември треба да се појават пред солунскиот суд во врска со лажните бугарски пасоши, постапка која беше двапати одложувана бидејќи судот не успеа да обезбеди преведувач.

Грујовски и Бошковски се обвинети во случаите „Тврдина“ и „Таргет“ на Специјалното јавно обвинителство за незаконското прислушување и за уништување на опремата од прислушувањето.

Тие три месеци беа во бегство за да го избегнат притворот што им го одреди Апелацискиот суд, а беше потвреден и од Врховниот суд.


Владата за две недели ќе објави 21 документ за поголема отвореност


Скопје, 31 октомври, 2017 - 16:17 (META) 

Владата на денешната седница го усвоила предлогот на Министерството за информатичко општество и администрација на веб-страниците на министерствата и на другите органи на државната управа да бидат објавени листа на акти и на материјали што министерствата согласно закон се обврзани да ги објават и навремено да ги ажурираат.

Станува збор за список од 21 документ, што во наредните 15 дена треба да бидат објавени на веб-страниците, информираше министерот за информатичко општество и администрација, Дамјан Манчевски.

– Анализите спроведени во 2016 година, покажуваат дека во поглед на отвореноста на извршната власт, Македонија е на последно место во регионот со исполнување на само 36 отсто од индикаторите во истражувањата. Имајќи ја во предвид целта на Владата за транспарентност и за отчетност во своето работење, се наметна потребата да се преземат конкретни мерки и активности за подобрување на оваа затекната состојба – рече Манчевски.

Помеѓу документите се буџетите, ревизорски извештаи, планови за јавни набавки, правилници за систематизација, списоци на лица вработени во институцијата со позиција, службен е-маил и службен телефон, консолидирани текстови од закони и подзаконски акти во надлежност на секое министерство, листа на информации од јавен карактер, биографии и најави на месечни настани или интернет-календар.


Јакимовски: Полицијата насилно упадна, од Општината собиравме лични работи


Скопје, 17 октомври, 2017 - 16:48 (META) 

Досегашниот градоначалник на општина Карпош, Стевчо Јакимовски, денеска на прес-конференција обвини дека полицијата „под водство на режимот на Зоран Заев“ насилно упаднала во Општина Карпош додека неговите колеги пакувале лични работи.

Тој рече дека некој им јавил на вработените во Општината дека денеска ќе се случи примопредавањето на градоначалничката функција и дека затоа тие пакувале работи од кабинетот на Јакимовски.

– Јас таму имам лични предмети на мое име и нормално дека треба да се одвои што е на Општината, а што е на лично име, како документи и фотографии, бидејќи во оваа Општина јас сум бил осум и пол години. Ние денеска можевме да ја видиме ефикасноста на нашата полиција под водство на режимот на Зоран Заев и можевме да се увериме како тие изминативе два дена не можат да ги најдат и не направиле разговор со тие што сакаа да нè колат вечерта на изборите, ама денеска ефикасно дојдоа, вклучувајќи и „алфи“, и забранија влез во Општината за потоа да дојдат инспектори од стопански криминал и да констатираат дека ние раздвојуваме што е лично, а што општинско и ништо повеќе од тоа. Луѓето се насмеаја и си заминаа – изјави Јакимовски.

Поранешниот градоначалник нагласи дека сите документи што се важни за локалната самоуправа се наоѓаат во архивата и додаде дека Општината има електронска архива.

Настанот го потврдија и од Министерството за внатрешни работи, од каде истакнаа дека добиле дојава дека се изнесуваат документи од Општината.

„Врз основа на допрен глас дека од просториите на Општина Карпош се изнесува документација на Општината, од страна на полициски службеници од СВР Скопје е излезено на местото на настанот, при што е констатирано дека во моментот на проверката не се изнесува никаква документација. Од извршениот разговор со градоначалникот Стевчо Јакимовски, утврдено е дека тој се подготвувал за изнесување на личните предмети од сопствениот кабинет заради подготвување за примопредавање на функцијата“, велат од МВР.


Обвинителството бара документи од институции за кривичната против Вангеловски


Скопје, 10 октомври, 2017 - 11:14 (META) 

Основното јавно обвинителство Скопје побарало „податоци и документација“ од институции во врска со кривичната пријава што неодамна против претседателот на Врховниот суд, Јово Вангеловски, ја поднесе Советот за утврдување на факти, и поведување постапка за утврдување одговорност за судија, велат за „Мета“ од Јавното обвинителство.

„Надлежниот обвинител од Основното јавно обвинителство Скопје, тргнувајќи од наводите содржани во кривичната пријава на Советот за утврдување на факти против лицето за кое покажувате интерес, достави барања до соодветни институции за прибирање податоци и документација неопходни за расветлување на случајот“, стои во одговорот на јавното обвинителство на нашите прашања дали е прифатена кривичната пријава, дали е отворена постапка и во која фаза е таа.

Кривичната пријава Советот ја поднесе на 28 септември, откако две недели претходно Вангеловски не им дозволи на членовите на комисијата која ги истражува околностите за бегството на Горан Грујовски и на Никола Бошковски, да влезат во Врховниот суд и да извршат увид во списите од предметите „Таргет“ и „Тврдина“.

Комисијата што ја формираше Советот треба да утврди дали судии од Кривичниот, Апелацискиот и од Врховниот суд, кои одлучувале по барањата за притвори на СЈО, ја прекршиле постапката и им овозможиле на поранешниот началник на петтата управа, Горан Грујовски, и на Никола Бошковски, вработен во УБК, да побегнат од државата.


Вангеловски не ѝ дозволил на комисијата за Грујовски и за Бошковски да влезе во Врховен


Скопје, 13 септември, 2017 - 13:33 (META) 

На Комисијата која истражува дали судиите од Кривичниот, Апелацискиот и од Врховниот суд, кои одлучувале по барањата за притвори, ја прекршиле постапката и им овозможиле на Горан Грујовски и на Никола Бошковски да побегнат од државата, денеска не ѝ било дозволено да влезе во Врховниот суд и да изврши увид во списите од предметите „Таргет“ и „Тврдина“.

Како што соопштија од Советот за утврдување на факти, кој ја формираше комисијата, минатата недела го информирале Врховниот суд дека денеска ќе вршат увид во документите, но кога пристигнале во судот, судската полиција не ги пуштила да влезат внатре.

Според Советот, припадниците на судската полиција им кажале на членовите на комисијата дека не ги пуштаат внатре зашто таква наредба добиле од претседателот на Врховниот суд, Јово Вангеловски.

„На барање на членовите на Комисијата да им се објасни кој не го дозволува нивниот пристап во судот и извршување на потребното службено дејство – увид во списте на предметите, судската полиција усно објасни дека претседателот на Врховниот суд им наредил да не ја пуштаат Комисијата во судот. Потоа претседателот на Врховниот суд по телефон го повика претседателот на Комисијата и му предочи дека претходно упатил писмо до Советот за факти во кое го известил дека не дозволува да се врши увид во бараните списи, сè додека на судот не му биде доставена основа поради која Комисијата го бара увидот, а потоа тој ќе оценел дали ќе дозволи увид, ќе определел термин и простор каде да биде извршено таквото дејство, со закана дека со ваквиот начин на комуницирање ќе поднесуваме последици“, стои во соопштението од Советот за утврдување на факти.

Оттаму велат дека ваквото однесување Вангеловски претставува спречување на членовите на комисијата во вршењето на нивните овластувања, согласно членот 42 од законот за Советот за утврдување на факти, поради што, како што велат од Советот, ќе поведат кривична постапка против Вангеловски пред надлежен јавен обвинител.

Од Советот напоменуваат дека ова не е првпат Вангеловски и судиите во Врховниот суд да прават опструкции кога биле повикувани од Советот да дадат изјави или да овозможат пристап до информации кои ги има Врховниот суд.

„И денешното однесување на претседателот на Врховниот суд претставува повторување на нивното претходно однесување, односно и понатаму тече опструкцијата“, велат од Советот.


За да добијат бесплатни документи, новинарите треба да објаснат зошто ги бараат


Скопје, 13 септември, 2017 - 11:57 (META) 

Централниот регистар денеска информираше на кој начин новинарите може да го остварат своето право на бесплатен пристап до информации откако Владата на 26. седница донесе ваква одлука.

Во одлуката на Владата стои дека Централниот регистар и Агенцијата за катастар за недвижности треба во рок од 30 дена да им овозможат на новинарите бесплатен пристап до јавните исправи кои ги издаваат овие институции.

За новинарите е спорно тоа што во барањата треба да се наведе за какви истражувачки теми ќе се бараат документите.

„Пристапот ќе се овозможи на секој новинар кој ќе достави писмено барање со потпис и со печат од главниот уредник на медиумот во кој е вработен, со објаснување за какви истражувачи цели се бара јавната исправа“, стои во одлуката на Владата.

Директорката на Централниот регистар, Марија Бошковска-Јанковски, рече дека не знае зошто е потребно да се наведе ова објаснување од страна на новинарите и дека тоа било одлука на Владата.

– Ние, како институција, треба да се заштитиме и треба да знаеме за што се потребни тие информации – рече Бошковска-Јанковски.

Во одлуката на Владата се вели и дека Централниот регистар и Агенцијата за катастар на недвижности прецизно мора да назначат на видно и јавно место дека бараниот документ е во функција на истражувачка дејност и дека не треба да се злоупотребува за други цели.

Бошковска-Јанковски информираше дека новинарите имаат можност да добијат 2.000 информации по 80 проценти пониска цена од тарифникот на Централниот регистар.

Портпаролот на владата, Миле Бошњаковски во изјава за НОВА ТВ појасни дека новинарите нема да треба да ја кажат темата на која ќе работат, туку да дадат генерална насока за какво истражување се работи.

– Нема да ги следиме истражувањата на новинарите, ќе треба да дадете само генерална насока за документите кои ги барате – рече Бошњаковски.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата „Отворено општество – Македонија“.