За приход од 100.000 денари ќе се плаќа данок од 10.800 денари


Скопје, 6 ноември, 2018 - 12:03 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

На пример, доколку на лицето од горниот пример тие 100.000 денари му се единствениот доход во годината, на него ќе му бидат вратени 800 денари, затоа што 100.000 денари на годишно ниво е под годишниот праг од 1.080.000 денари за повисоката стапка од 18 отсто.

„За да можат граѓаните навремено и прецизно да следат колку доход имаат остварено во текот на годината, колку данок имаат платено, колку данок треба да доплатат или да им се врати, а со тоа и соодветно да си планираат, ќе се изработи онлајн сервис преку кој граѓаните во кое било време ќе можат да ги добијат сите овие информации, и преку кој ќе можат предвреме да доплатат даночен долг“, информираа од Министерството за финансии.

Најавата на Владата ги фати неподготвени работодавачите и работниците со оглед на тоа што промената се најавува само два месеци пред да стапи на сила и на крајот на годината кога компаниите веќе ги имаат подготвено финансиските планови за 2019 година. Речиси сите стопански комори реагираа, а некои од нив побараа одложување на примената на прогресивниот данок за пет години. Реагираа и вработените во компаниите од софтвреската индустрија со образложение дека тие не се најбогатиот слој граѓани за кои власта тврди дека е наменета новата даночна реформа.

Од друга страна, од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефектвната даночна стапка.

„За најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, соопшти Министерството за финансии.


УЈП објави нова листа на должници, прва годинава


Скопје, 11 јануари, 2018 - 10:31 (META) 

Управата за јавни приходи (УЈП) ја објави првата листа на должници за оваа година на која се најдоа вкупно 3.964 физички и правни лица.

Нивните долгови се доспеани до 30 септември и неплатени до 31 декември лани, а се по основ на данок на додадена вредност (ДДВ), данок на добивка, персонален данок на доход, придонеси за задолжително социјално осигурување, акцизи и царини.

Кај физичките лица и самостојни вршители на дејност, долгот надминува 120.000 денари, додека кај правните лица тој износ е повеќе од 300.000 денари.


Просечниот личен доход е 302 евра месечно, а кај најбогатите тој изнесува 4.180 евра


Скопје, 25 август, 2017 - 15:15 (META) 

Просечниот личен доход лани изнесувал 302 евра месечно, а најбогатите (еден процент) во Македонија имале просечен доход од околу 4.180 евра месечно, објави Министерството за финансии врз основа на податоци од Управата за јавни приходи.

Од Министерство за финансии велат дека „бројките покажуваат дека Македонија е со висока стапка на доходовна нееднаквост помеѓу граѓаните“.

– Педесет проценти од луѓето во Македонија што остваруваат доход, имаат доход што е под 212 евра месечно, 70 проценти имаат доход што е под 297 евра месечно, 90 проценти имаат доход што е под 495 евра месечно, а од друга страна, два проценти од луѓето имаат доход над 1.044 евра, а еден процент од луѓето имаат доход над 1.523 евра – изјави советникот во кабинетот на министерот за финансии, Бранимир Јовановиќ.

Тој посочи дека највисокиот доход лани изнесувал 2,6 милиони евра, а 15 лица оствариле доход од над еден милион евра. Половина милион евра доход, лани имале 66 лица.

– 775  лица кои имале над 100 илјади евра доход заедно оствариле доход од 190 милиони евра, што е еднакво на вкупниот остварен доход на 210 илјади лица кои имале најниски приходи – појасни Јовановиќ.

Тој додаде дека неопходна е даночна реформа со која најбогатите треба да плаќаат повисоки даноци.

Министерот за финанасии, Драган Тевдовски оцени дека направената анализа е важна, бидејќи без веродостојни податоци не може да се креираат нови економски и социјални политики, а од друга страна се создава притисок да се работи на намалување на неедаквоста на доходот.

– Подготвуваме даночна реформа, до крајот на годинава ќе излеземе со нашите предлози – истакна Тевдовски.

Со анализата се опфатени околу 90 проценти од граѓаните кои оставруваат доход или 940 илјади лица.


Ребалансот на буџетот стигна до Влада, седницата закажана за 15 часот


Скопје, 28 јули, 2017 - 13:06 (META) 

Владата попладнево ќе ја одржи својата седумнаесетта седница, со почеток во 15 часот, информираат оттаму. На седницата ќе се разгледа ребалансот на буџетот за кој заврши комисиската расправа.

„Дневниот ред за денешната седница предвидува Владата да ја разгледа и информацијата на Министерството за финансии за статусот на проектот „Поедноставување на процедурите за известување и плаќање на персонален данок на доход за граѓаните“, кој го води Управата за јавни приходи“, информираат од Влада.

На денешниот дневен ред пред министрите ќе се најдат и неколку предлози за кадровски решенија, а исто така ќе бидат разгледани и дополнителни предлози и прашања.


СДСМ: Праведна даночна распределба за сиромашните да плаќаат помалку


Скопје, 15 февруари, 2017 - 13:43 (META) 

Промените во даночниот систем ќе обезбедат поголема праведност во распределбата на доходот и богатството во нашата земја, се вели во соопштението на СДСМ.

Оттаму велат дека тоа ќе го направат преку воведување на праведен персонален данок на доход, укинување на максималната горна граница за плаќање на придонесите на плати, воведување на праведно оданочување за поседување на повеќе имот и посилно оданочување на луксузот.

– Истовреме ќе обезбедиме голема транспарентност во трошењето на парите од буџетот, праведност во плаќањето на некои јавни услуги и ќе работиме на зголемување на квалитетот на јавните услуги. Дополнително во секое семејство ќе влегува плата плус од поврат на 15 проценти на данок на додадена вредност (ДДВ) – додаваат од СДСМ.

Во соопштението се вели дека „уште во првите шест месеци од мандатот, на граѓаните кои имаат вкупен месечен личен доход до нивото на законски утврдената минимална плата ќе им биде вратен износот кој како персонален данок на доход претходно бил уплатен од страна на нивните работодавачи.“

– Граѓаните чијашто основна дејност им е земјоделство и ги исполнуваат условите за паушално оданочување ќе бидат ослободени од плаќање на персонален данок на доход – велат од СДСМ.


УЈП: Во најкраток рок да се плати персоналниот данок на доход


Скопје, 9 јануари, 2017 - 13:05 (META) 

Доколку граѓаните не извршиле плаќање на утврдените даночни обврски за персонален данок на доход за 2015 година и за претходни години врз основа на годишна даночна пријава или за 2016 година врз основа на аконтативна даночна пријава, тоа да го сторат во најкраток можен рок, порачуваат од Управата за јавни приходи (УЈП).

Оттаму прецизираат дека укажувањето се однесува и за самостојните вршители на дејност – занаетчии, земјоделци, трговци поединци, адвокати, нотари и други кои не извршиле плаќање на персоналниот данок на доход, без разлика дали станува збор за обврзник кој го плаќа данокот според реален или паушално утврден приход.