Општините лани склучиле договори за јавни набавки во вредност од 80 милиони евра


Скопје, 18 јули, 2018 - 11:05 (META) 

Вкупната вредност на јавните набавки на општините во Македонија лани изнесувалa 80 милиони евра, а биле реализирани 2.737 јавни набавки, покажува базата на податоци со сите набавки на општините во 2017 година, изработена од Центарот за граѓански комуникации. Трошоците за јавни набавки по жител изнесуваат 2.401 денари.

Општина која склучила најмногу јавни набавки е Град Скопје со 153, а најмалку Градско со три набавки.

Вкупната вредност на јавните набавки на Град Скопје изнесува околу 10 милиони евра и тие учествуваат со 8,58 проценти удел во општинскиот буџет. Трошоците за јавни набавки по жител во Скопје чинеле 1.179 денари.

На оваа листа, „Пуцко петрол“ е компанија со склучени највредни договори за јавни набавки во вредност од 2,9 милиони евра, на второ место е „Бауер БГ“, со 2,3 милиони евра и на трето „НБ Цомпани“ од Тетово во вредност од 2 милиони евра.

„Пуцко петрол“ е и на листата на фирми со најмногу договори за јавни набавки, 29. На оваа листа, прва е компанијата „Макпетрол“ со склучени 39 договори и „Рики јуниор“ со склучени 35 договори.

„Во 2017 година општините потрошиле за јавни набавки 80 милиони евра, што е за 44 проценти помалку од претходната година. Базата содржи податоци за општинските тендери за последните три години.  Базата на податоци за јавните набавки открива голем јаз помеѓу вредноста на набавките на општините. Само десет општини потрошиле за јавни набавки половина од парите што ги трошат сите општини заедно, односно околу 42 милиони евра. И кај фирмите е забележана истата концентрација. Првите десет фирми со најголема вредност на договорите за јавни набавки заедно учествуваат со 22 проценти во вкупната вредност на набавките на општините“, велат од Центарот за граѓански комуникации.

Базата овозможува пребарување на тендерите по општини и по фирми, како и графички прегледи на учеството на фирмите во набавките на секоја општина одделно.


Град Скопје предлага одржувањето на фонтаните во Центар да го преземе ЈП „Водовод“


Скопје, 17 јули, 2018 - 14:39 (META) 

Со предлог-одлуката за отстапување на чување, одржување, заштита и користење на фонтани, која ќе се најде пред Советот на Град Скопје на утрешната седница, се предлага јавното претпријатие „Водовод и канализација“ да ја презеде обврската за чување, одржување, заштита и користењето на поголем број фонтани лоцирани во централното градско подрачје, информираат од Град Скопје.

„Со предлог-одлуката Градот Скопје оваа обврска ја префрла на ЈП „Водовод и канализација“, а со истата се опфатени фонтана „Воин на коњ“, подна фонтана на плоштад Македонија, „Матрикс“, фонтани на плоштад „Филип II“ (Карпошово востание), фонтана на мост „Око“, фонтани на плоштад „Богородица“, фонтана во парк „Жена борец“, фонтана на плоштад „ВМРО“. Одржувањето на фонтаните од 2013 година го вршеше Градот Скопје, за чија цел се склучени неколку договори со „Бетон“, за што од градскиот буџет се одвојуваа од 25 до 30 милиони денари годишно. Средствата што досега беа користени за оваа намена, во иднина ќе бидат пренаменети за реализација на капитални проекти“, се вели во соопштението на Град Скопје.

Град Скопје се обврзува да ги подмирува сметките за потрошената електрична енергија на фонтаните, но нема да одвојува дополнителни средства за нивно одржување.


Потпишани првите договори за користење на средства од ИПАРД 2-програмата


Скопје, 21 јуни, 2018 - 12:29 (META) 

Вкупно 692 договори за набавка на трактори преку ИПАРД 2-програмата вредни 5,8 милиони евра, ќе бидат потпишани во наредните денови, а денеска во Министерството за земјоделство беа потпишани првите 13 договори.

Најголем дел од средствата се за набавка на трактори, но земјоделците покажале интерес и за приклучна механизација мотокултиватори, ѓубре-растурачи, прскалки, системи „капка по капка“, линии за транспорт на храна.

– Ова е рекорден број на корисници на средства од постоењето на ИПАРД-програмата воопшто. Со оваа поддршка ќе се унапреди состојбата на фармите и земјоделските стопанства, а тоа ќе значи поголема конкурентност – рече министерот за земјоделство, шумарство и водостопанство, Љупчо Николовски.

Директорот на Платежната агенција, Николче Бабовски рече дека по детектираните слабости на ИПАРД 1, процедурата за конкурирање за ИПАРД 2 е поедноставена.

Од вкупно проектираните 5,8 милиони евра за што ќе се потпишуваат договорите овие денови, 4,3 милиони се европски пари, а 1,4 милиони средства од националното финансирање.


Сугарески апелираше општините да искористат 12 милиони евра за изградба на водоводи


Тетово, 7 мај, 2018 - 14:33 (META) 

Министерот за транспорт и врски, Горан Сугарески ги повика општините да достават инфраструктурни проекти, бидејќи на располагање има околу 12 милиони евра неискористени средства од кредитната линија од Европската инвестициона банка (ЕИБ).

Тој денеска изврши увид во изградбата на резервоар за вода и потисен и доводен цевковод во Општина Желино, каде што има 18 населени места од кои само во едно населено место целосно е регулирано водоснабдувањето. Проектот е со вредност од околу 665 илјади евра, а средства се обезбедени преку заем од ЕИБ.

„Во таа насока, сакам да потенцирам дека, во тек е реализација на десетина проекти во вредност од 3,3 милиони евра за изградба и реконструкција на водоводи и канализации. Исто така со средства од ЕИБ, веќе се склучени договори за изградба и надзор за 11 проекти со вкупна вредност од 4,4 милиони евра, додека пак во фаза на тендерска постапка се осум проекти со вкупна вредност од 3,9 милиони евра“, додаде Сугарески.

Сугарески истакна дека овој проект е дел од програмска определба на Владата за обезбедување на високо ниво на покриеност на територијата со водоводна и канализациона мрежа.


Бертолини: За оваа година 80 милиони евра од ЕУ за Македонија – ако успеете да ги потрошите


Скопје, 19 март, 2018 - 10:41 (META) 

Раководителот на секторот за соработка на Делегацијата на Европска Унија, Никола Бертолини рече дека финансиската поддршка од ЕУ во Македонија значително се зголемува, па така за разлика од лани кога изнесувала 70 милиони евра, за годинава се предведени 80 милиони евра.

– За оваа година се превидени 80 милиони евра, само за билатералните договори, не сметајќи ги регионалните проекти. Претседателот на Европската комисија, Жан Клод Јункер при претставувањето на стратегијата за Западен Балкан, најави една милијарда евра. Според тоа, уште повеќе средства и фондови се предвидени за овде и во регионот. Успех е, доколку не се вратат парите назад – изјави Бертолини.

Претседателката на „Транспаренси интернешнл“ – Македонија, Слаѓана Тасева смета дека проблемот со искористување на европските пари до сега бил тоа што не сме биле подготвени да ги повлечеме.

– Не сме имале проекти, ниту капацитет. Парите кои што ЕУ ни ги дава, треба да се одработат. Мора капацитетите да се зајакнат за користење на странските фондови. Ако не е организирана државата, ако нема компетентни луѓе на вистински позиции, системот ќе се распадне  – изјави Тасева за „Мета“.


Потпишани првите договори за програмата ИПАРД 2014-2020


Скопје, 6 март, 2018 - 14:00 (META) 

Денеска во Агенцијата за финансиска поддршка во земјоделството и руралниот развој се потпишаа првите договори за користење на финансиски средства од програмата ИПАРД 2014-2020.

Министерот за земјоделство, шумарство и водостопанство, Љупчо Николовски посочи дека ефикасното искористување на програмите ИПАРД е еден од главните приорити на МЗШВ, со цел приближување до европскиот аграр.

„Станува збор за 60 милиони неповратни средства, европски пари и нашата цел е ефикасно искористување на европските фондови. Ако изминатите години искористеноста била слаба, сега сакаме ова да биде една успешна политика на Владата“, изјави Николовски.

На првиот јавен повик од ИПАРД- програмата 2014-2020 кој беше објавен лани, има рекордно голем број на добиени барања за ко-финансирање. Пристиганти се 1.648 барања, со вкупна побарана финансиска поддршка од околу 73,6 милиони евра.

Вкупните финансиски средства од целата програма ИПАРД 2014-2020, која може да се користи до 2023 година, изнесува 79,6 милиони евра, од кои 60 милиони евра се од европските фондови, а останатите се национално буџетирање.

До денеска се одобрени пет решенија за одобрување на барање за финансиска поддршка од мерката 3 „Инвестиции во основни средства за преработка на земјоделски и рибни производи“ со вкупна вредност на финансиска поддршка до 310.000 евра, од кои  232.500 евра се европски средства.

Во тек се проверките на останатите предмети од трите мерки и се очекува овој и следниот месец, да бидат склучени договорите за сите мерки.

Еден од проблемите со кој се соочуваат потенцијалните корисници на програмите ИПАРД е недостаток на средства за реализација на инвестицијата, затоа, од МЗШВ велат дека во соработка со другите институции работат на воспоставување на механизам, односно гарантен фонд, кој би овозможил предфинансирање за програмите ИПАРД.


Договорите за јавни набавки ќе бидат објавувани на „e-nabavki.gov.mk“


Скопје, 9 јануари, 2018 - 15:50 (META) 

За зголемување на транспарентноста и отчетноста во јавните набавки, на Електронскиот систем за јавни набавки (ЕСЈН) отсега ќе се објавуваат и доделените договори, при што во нив јавноста ќе има увид, информираат од Министерство за финансии.

„Договорите ќе бидат достапни во рамките на самите известувања за склучена набавка. По спроведување на набавките договорите ќе се објавуваат на следниот линк https://e-nabavki.gov.mk/PublicAccess/Home.aspx#/home“, информираат од министерство.

Владата оваа мерка ја најави со цел да се спречи обидот за корупција при склучување на договори помеѓу државни органи и компании.

Лани во март, на конференција на УСАИД, „Јавните набавки во Македонија: искуства и предлози за законски решенија за нивно подобрување“ беше истакнато дека од околу 70.000 активни компании во земјава, само 4.800 се вклучени во бизнисот со јавни набавки, кој годишно вреди околу една милијарда евра.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Утре попладне заедничка седница на владите на Македонија и на Албанија во Поградец


Скопје, 14 декември, 2017 - 18:46 (META) 

Владите на Македонија и на Албанија утре попладне ќе одржат заедничка седница во Поградец, Албанија. На седницата, како што соопштија од владината прес-служба, ќе се разговара за повеќе теми за унапредување на билатералната соработка, особено за инфраструктурното поврзување, изградбата на Коридорот 8, за олеснување и интензивирање на размената на стоки и услуги и за зајакнување на соработката во областа на безбедноста.

„На седницата е планирано да се потпишат неколку документи за соработка, вклучувајќи план за консултации помеѓу министерствата за надворешни работи на двете држави, меморандум помеѓу министерствата за внатрешни работи за соработка во областа на внатрешна контрола, како и формирањето на мешовит комитет за економска соработка. Од ресорот на образование и наука, ќе се потпише и меморандум за интензивирана билатерална соработка преку Институтот за културно и духовно наследство на Албанците од Република Македонија. Дополнително ќе се потпише меморандум за соработка во борбата против насилен екстремизам и радикализам, како и договор за соработка во спречување на кризи“, стои во соопштението за средбата.

Заедничката седница на владите на двете земји ќе се одржи во хотелот „Химети Палас“ во Поградец. Македонската владина делегација предводена од премиерот Зоран Заев е планирано да пристигне во 14.30 часот и ќе биде свечено пречекана од неговиот албански колега, Еди Рама и претставници на владата на Албанија.

По завршување на седницата, во 16.30 часот предвидена е заедничка прес-конференција на премиерите на Македонија и на Албанија.

В сабота, премиерите Заев и Рама во придружба на владини претставници ќе одат во Пустец каде ќе се сретнат со претставници на локалната самоуправа и ќе го посетат училиштето каде ќе донираат опрема за учениците.


Македонија и Бугарија договорија и потпишаа меморандуми за соработка во битни сектори


Струмица, 23 ноември, 2017 - 15:06 (META) 

Владите на Македонија и на Бугарија денеска во Струмица, по заедничата меѓувладина седница, потпишаа серија спогодби за соработка од областа на одбраната, телекомуникациите, туризмот, енергетика и на економијата.

Министрите за одбрана, Радмила Шекеринска и Красимир Каракачанов, потпишаа Протокол за соработка во спроведувањето обуки за припадници на АРМ во воентите школи во Бугарија и за интензивирање на соработката.

Со потпишување меморандум, министерот за информатичко општество и за администрација, Дамјан Манчевски, и бугарскиот министер за транспорт и информатички технологии, Ивајло Московски, го официјализираа и намалувањето на меѓународните тарифи за роаминг во телекомуникациските услуги.

Во согласност со договорот, регулаторните тела на двете држави треба да почнат процедура со која ќе ги поттикнат операторите да склучат договори за пониски цени при разговор, пораки и интернет во роаминг. Во моментов, за минута разговор во роаминг од Бугарија во Македонија се плаќа меѓу 90 и 210 денари и 750 денари за еден мегабајт интернет.

Бугарската министерка за туризам, Николина Ангелкова, и македонскиот заменик-министер за економија, Кире Наумов, потпишаа Договор за соработка во туризмот со кој, исто така, се предвидува и заедничко учество на туристички саеми, заедничко објавување туристички промотивни материјали, организација и учество на конференции, семинари и други туристички настани, како и заеднички настап на трети пазари.

Министрите, покрај тоа, потпишаа и два договора за соработка во енергетскиот сектор, со кои се предвидува од почетокот на 2018 година да се воспостави заеднички пазар за распределба на преносни капацитети меѓу електроенергетските оператори на двете земји. Со договорите се предвидува олеснето тргување со струја.

Бугарскиот оператор за гас „Булгартрансгаз“ ЕАД и АД „Македонски енергетски ресурси“ – МЕР потпишаа Договор за спроведување студија за исплатливост на изградба на нова гасна меѓусистемска врска, а агенциите за катастар на Македонија и на Бугарија потпишаа договор за размена на картографски и геодетски материјали и информации.

Претставниците на двете влади пред меѓувладината седница го посетија манастирот „Водоча“, а потоа се поклонија пред споменикот на загинатиот македонски претседател Борис Трајковски.


Заедничка седница на македонската и на бугарската влада, ќе се потпишат 9 документи


Струмица, 23 ноември, 2017 - 10:09 (META) 

Владите на Македонија и на Бугарија денеска во Домот на АРМ во Струмица ќе одржат заедничка седница.

Средбата помеѓу двете делегации почнува во 10 часот, кога премиерите Зоран Заев и Бојко Борисов ќе положат цвеќе на споменикот на загинатиот македонски претседател Борис Трајковски.

Владината седница ќе почне во 11 часот и на неа министрите ќе потпишат девет документи за билатерална соработка во областа на надворешната политика, инвестициите, енергетиката, одбраната, туризмот, телекомуникациите, инфраструктурата и реакцијата при катастрофи. Договорите се дел од Договорот за пријателство, соработка и соседство, потпишан на 1 август оваа година.

Во 12.20 часот делегациите ќе имаат заедничка прес-конференција, по што бугарската владина делегација ќе ѝ предаде донација на Општина Струмица.