Радев: Партнерството меѓу уставните судови на Бугарија и Македонија е во духот на Договорот за пријателство


Софија, 4 јуни, 2018 - 15:40 (META) 

Бугарскиот претседател Румен Радев денеска прими делегација на Уставниот суд на Република Македонија предводена од претседателот на судот, Никола Ивановски, соопшти прес службата на претседателот.

Според Радев, партнерството меѓу уставните судови на Бугарија и Македонија е важен чекор за развојот на билатералните односи во духот на Договорот за пријателство, добрососедство и соработка меѓу двете држави.

Бугарскиот претседател посочил дека со потпишување на Договорот за добрососедство Бугарија и Македонија на сите земји од регионот им дадоа пример како проблемите можат да се надминат во име на дијалогот и разбирањето, а соработката меѓу уставните судови на двете држави го дава својот придонес.

– Важно е да покажеме дека овој договор функционира и притоа ние да се водиме од неговиот дух. Уставниот суд е гарант за владеењето на законот, а тоа е меѓу најважните услови за членството во Европската Унија. Уставните судови можат корисно да соработуваат и да го разменуваат своето искуство – изјавил Радев.

Радев ја искористил можноста да ги повика и мултидисциплинарните комисии на двете држави, што се занимаваат со решавање на отворените прашања меѓу Бугарија и Македонија, да ја добијат неопходната поддршка во својата работа.

Претседателот на Уставниот суд на Македонија, Никола Ивановски, го запознал бугарскиот претседател со работата, компетенциите и надлежностите на Уставниот суд. Тој се заблагодарил за сестраната поддршка на Бугарија како претседател на Советот на ЕУ и особено во однос на евроатлантската перспектива на Македонија.


Димитров од утре во Бугарија на средби со Борисов, Радев и Захариева


Скопје, 13 февруари, 2018 - 14:07 (META) 

Шефот на македонската дипломатија, Никола Димитров, од утре до 16 февруари ќе престојува во работна посета на Бугарија, соопшти Министерството за надворешни работи.

За време на посетата е предвидено тој да има средби со бугарскиот претседател Румен Радев, премиерот Бојко Борисов и со министерката за надворешни работи на Бугарија, Екатерина Захариева.

„Во рамки на билатералната средба со министерката Захариева, која е закажана за утре, предвидено е министрите да извршат размена на ратификациони документи на Договорот за пријателство, добрососедство и соработка, со што и практично ќе се заврши формалната постапка за стапување на Договорот во сила, по неговата ратификација во Собранието на Република Македонија, на 15 јануари 2018, и во Националното Собрание на Република Бугарија на 18 јануари 2018“, стои во соопштението.

Од МНР информираат и дека на покана на високата претставничка на Европската Унија за надворешни работи и безбедносна политика, Федерика Могерини и министерката за надворешни работи на Бугарија, Екатерина Захариева (во својство на земја претседавач со Советот на ЕУ), Димитров на 15 и 16 февруари ќе учествува и на неформалниот состанок на Министрите за надворешни работи на земјите-членки на Европската унија и земјите-кандидати за членство во ЕУ – Македонија, Албанија, Црна Гора, Србија и Турција – Гимних што ќе се одржи во Бугарија.

Дискусиите на состанокот ќе се фокусираат на соработката и партнерството во областа на безбедноста и одбраната.


Столтенберг: Вратата е отворена, но преминувањето на прагот бара работа


Скопје, 18 јануари, 2018 - 13:26 (META) 

Вратата на НАТО е отворена за нови членови, но преминувањето на прагот бара сериозна работа, порача Генералниот секретар на НАТО, Јенс Столтенберг, во обраќањето пред пратениците, државниот врв и првите луѓе на повеќе институции на седница на Собранието на Република Македонија. Во него тој посебно се осврна и ги пофали ратификацијата на Договорот за добрососедство со Бугарија и изгласувањето на Законот за јазиците.

Столтенберг порача дека членките на северноатланската алијанса може едногласно да поканат која било европска земја да стане членка, но за тоа да се случи има уште работа што треба да се заврши. Сепак, како што рече, пред седиштето на НАТО има место за уште знамиња.

– Договорот од Вашингтон нагласува дека членките може преку едногласен договор да поканат која било европска земја да се приклучи на Алијансата, доколку таа земја е во состојба да  ги следи обрските на договорот и придонесува во северноатлантската сфера. Под тие услови Црна Гора стана 29. членка на НАТО минатата година, со еднаков глас во нашите дискусии и еднакви права и одговорности како сите други земји – членки. Гледањето како црногорското знаме се издига за првпат пред седиштето на НАТО беше горд момент за мене. Но, има сè уште место за уште знамиња пред седиштето на НАТО – рече Столтенберг.

Сепак, рече тој, едно е да се биде амбициозен, а друго е реалната ситуација и мора да се реши прашањето за името на, како што рече, „вашата земја“. Тој инаку не го употреби зборот Македонија ниту еднаш во говорот што траеше дваесетина минути.

– Сакам да успеете, НАТО сака да успеете, но иако е добро да се биде амбициозен, важно е да се биде и реален. Има уште работа што треба да се сработи. Тоа значи – решавање на прашањето за името на вашата земја. Ова е прашање што му тежи на овој регион и на оваа земја предолго време. Оттука, ја поздравувам покажаната волја на оваа влада да се разреши ова прашање. Вчерашната средба на преговорачите во Њујорк беше уште еден важен чекор. Охрабрен од неодамнешниот напредок, ја користам оваа шанса да ве поттикнам да се приближите напред – порача Генералниот секретар на НАТО.

Подеднакво важно е да се подобрат односите со сите соседи, рече тој.

– Исто така добро е да покажете добри односи со соседите. Членките на НАТО се одушевени поради развојот на односите со Бугарија, и јас честитам за ратификацијата на Договорот за добрососедство со Бугарија, но мора да работите да ги подобрите односите со останатите во регионот – рече Столтенберг.

Генералниот секретар на НАТО ги спомена и насилствата од 27 април минатата година и рече дека настаните во Собранието го шокирале и него и сите членки на НАТО.

– Сепак бевме импресионирани од тоа што го видовме од тој ден понатаму, за напредокот што сите го сторивте за формирање нова отворена поинклузивна политичка култура, во калење на новиот национален дух, гледање напред и истрајност. Пред девет месеци се приближивте кон работ на една карпа. Но, од тогаш една држава од потенцијална нестабилност се претворивте во држава на реални можности – рече Столтенберг.

Тој посебно значење даде на диверзитетот и на донесувањето на законот за јазиците.

–  Како поранешен пратеник и премиер на Норвешка разбирам многу од предизвиците со кои продолжувате да се соочувате. Долгата политичка кариера ме научи колку е поинклузивно едно општество, толку е поуспешно. Диверзитетот е сила, не слабост. Таму каде што има диверзитет придружен од добро управување има успех – порача Генералниот секретар на НАТО.

Во говорот тој оддаде признание на македонската одбрана за придонесот на мисијата на НАТО во Авганистан, но рече дека и во тој сектор се потребни реформи, а како посебно важно го посочи зголемувањето на буџетот за одбраната до ниво од 2 отсто од БДП.


Заев – Борисов: Договорот гарантира долгорочни пријателски односи


Софија, 16 јануари, 2018 - 13:23 (META) 

Договорот за пријателство, добрососедство и соработка, кој вчера беше ратификуван во македонското Собрание, гарантира долгорочни пријателски односи меѓу Бугарија и Македонија, заеднички оцениле премиерите на двете држави, Зоран Заев и Бојко Борисов во телефонски разговор што го имале по повод ратификацијата на Договорот.

„Во телефонскиот разговор Борисов и Заев беа едногласни дека Договорот гарантира одржливо градење на пријателски односи меѓу Бугарија и Македонија и е стабилна основа за соработка во регионот втемелена на европските вредности“, се наведува во соопштението од кабинетот на Борисов.

Заев, како што се посочува во соопштението, му посакал успех на Борисов при претставувањето на приоритетите на бугарското претседателство пред Советот на ЕУ утре во Стразбур.

Ратификацијата на Договорот ја поздравија еврокомесарот за соседска политика и проширување, Јоханес Хан, европратеникот Едвард Кукан и бугарскиот државен врв.

Договорот за пријателство, добрососедство и соработка, Заев и Борисов го потпишаа на 1 август 2017 година во Скопје.


Радев: Договорот за добрососедство дава силен сигнал за позитивниот развој на Балканот


Софија, 15 јануари, 2018 - 19:31 (META) 

Бугарскиот претседател, Румен Радев ја поздрави ратификацијата на Договорот за пријателство, добрососедство и соработка меѓу Република Бугарија и Република Македонија од страна на Собранието на Република Македонија.

– Договорот, кој е резултат на долгогодишните напори на дипломати и државници, отвора нова европска страница во односите помеѓу двете земји. Ратификацијата на документот се случува во момент кога Бугарија претседава со Советот на ЕУ. Тоа има огромно значење за бугарско-македонските односи и дава силен сигнал за позитивниот развој на Балканот, што го приближува регионот кон Европа, имајќи ги предвид приоритетите на бугарското претседателство – се наведува во соопштението од кабинетот на бугарскиот претседател.

Претседателот Радев повикува за стриктно исполнување на условите наведени во Договорот, како и за започнување на сите проекти кои ќе бидат корисни за граѓаните.


Борисов и МНР го поздравија ратификувањето на Договорот за добрососедство


Софија, 15 јануари, 2018 - 15:21 (META) 

Бугарскиот премиер, Бојко Борисов и бугарското министерство за надворешни работи попладнево го поздравија ратификувањето на Договорот за пријателство, добрососедство и соработка меѓу Република Македонија и Република Бугарија во македонското Собрание денеска.

Борисов се обрати преку својот фејсбук-профил од Азербејџан, каде што е во официјална посета.

„Го поздравувам парламентот на Република Македонија, кој денеска го ратификуваше Договорот за пријателство, добрососедство и соработка меѓу Република Македонија и Република Бугарија. Со тоа покажаа дека желбата да изградиме модерни, европски односи на пријателство и доверба е заедничка“, напиша бугарскиот премиер.

Во своето обраќање преку официјалната веб-страница, бугарското МНР порача дека Бугарија и понатаму активно ќе ја поддржува европската интеграција на Македонија.

„Со овој чин се потврдува волјата за градење добрососедски односи, кои што се важен елемент од европската перспектива на сите држави од Западен Балкан. Република Бугарија ќе продолжи да биде активна во поддршката за европската интеграција на Република Македонија. Тоа е стратегиски избори на нашата држава, втемелен и во приоритетите на бугарското претседателство со Советот на ЕУ“, се вели во пораката.


Собранието го ратификуваше Договорот за добрососедство со Бугарија


Скопје, 15 јануари, 2018 - 12:29 (META) 

Со 61 глас „за“ и еден воздржан Собранието го ратификуваше Договорот за пријателство, добрососедство и соработка меѓу Република Македонија и Република Бугарија. Воздржан беше независниот пратеник Ферид Мухиќ, кој пред гласањето најави дека ќе гласа воздржано.

Пред гласањето на денешната 30. седница, зборуваа пратениците Никица Корубин, Артан Груби и Ферид Мухиќ. На седницата не присуствувaа пратениците од ВМРО-ДПМНЕ, како и тие од БЕСА.

Зборувајќи во име на предлагачот, Владата на Република Македонија, министерот за надворешни работи, Никола Димитров ги повика пратениците да гласаат за ратификација на Договорот бидејќи, како што рече, „треба да се влијае на иднината и да се создаваат пријатели“.

– Денес ќе направиме важна работа ако ја поддржите ратификацијата. Во државите во нашиот регион, кој е многу оптоварен со историја, историјата е многу важна, но на неа не може да делуваме, можеме на иднината. Добро е што и двете држави решивме да излеземе од сигурноста на рововите. Убаво е со соседите да се однесуваме како со еднакви, да создаваме пријатели – рече Димитров.

Шефот на македонската дипломатија изрази жалење што во салата не се пратениците на опозицијата и рече дека и тие требало да бидат присутни на гласањето, затоа што владеењето на ВМРО-ДПМНЕ довело до тоа другата страна да бара некои работи.

– За жал немавме сили во формата на политичката организација на општеството, мислам на опозицијата… Ќе беше добро да беа тука и да го поддржеа овој договор. Се надевам ќе најдат сила да бидат тука за битни перспективи, особено што договорот произлезе од политика што ги донесе до атмосфера другата страна да инсистира да се потпише ваков договор – рече Димитров.

Според Ферид Мухиќ воообичаено е договорите за пријателство да бидат правени врз принципи на реципроцитет, а според него, овој договор не влегува во таа стандардна форма и излегува од стандарната процедура и значи од македонска страна било дадено повеќе од она што го бара меѓународното право.

– Затоа, поради несиметричноста, но и поради големината на гестот на Република Македонија, јас ќе гласам воздржано – рече Мухиќ.


Зелено светло за ратификација на Договорот со Бугарија


Скопје, 26 декември, 2017 - 13:43 (META) 

Комисијата за надворешна политика денеска ја заврши расправата по предлог-законот за ратификација на Договорот за добрососедство помеѓу Македонија и Бугарија и му предложи на Собранието да го донесе на пленарна седница.

Договорот за пријателство, добрососедство и соработка помеѓу двете држави, го потпишаа премиерите на Македонија и на Бугарија, Зоран Заев и Бојко Борисов, на 1 август годинава во Скопје.

Пратеничката на ДОМ, Лилјана Поповска која е дел од парламентарното мнозинство предводено од СДСМ, истакна дека со Договорот се отстранува блокадата на Бугарија во однос на интеграцијата на Македонија во Европската Унија и во НАТО и со него, како што рече се обезбедува официјално признавање на македонскиот јазик како посебен, бидејќи јасно стои дека е потпишан на македонски јазик согласно со Уставот и на бугарски јазик согласно Уставот на Бугарија“.

Артан Груби од ДУИ рече дека Договорот е во духот на заложбите и на посветеноста на парламентарното мнозинство и на Владата на принципот на добри меѓуетнички односи, етничка еднаквост и добри односи без никакви проблеми со соседите, а во насока на интеграцијата на земјата во ЕУ и во НАТО.


Предлог-законот за ратификација на Договорот со Бугарија утре оди во Собрание


Скопје, 19 декември, 2017 - 22:27 (META) 

Владата на денешната седница го утврди предлог-законот за ратификација на Договорот за добрососедство и пријателство со Бугарија и истиот утре ќе биде испратен со Собранието, соопшти портпаролот на Владата, Миле Бошњаковски на неговиот профил на „Твитер“.

Премиерите на Македонија и на Бугарија, Зоран Заев и Бојко Борисов на 1 август во Скопје го потпишаа Договорот за пријателство, добрососедство и за соработка.

Договорот ќе стапи на сила откако ќе биде парламентите на двете земји ќе ги ратификуваат.


Софија го достави Договорот за добрососедство со Македонија на ратификација во парламентот


Скопје, 7 ноември, 2017 - 14:05 (META) 

Владата на Бугарија денеска и формално го достави Договорот за пријателство, добрососедство и за соработка со Република Македонија на ратификација во бугарското Народно собрание.

Договорот беше потпишан на 1 август во Скопје, од премиерите на двете држави, Зоран Заев и Бојко Борисов.

Ратификацијата на документот е израз на желбите на Бугарија да изгради добрососедски односи врз основа на европските вредности, се наведува во соопштението од прес-службата на бугарската влада.

„Договорот ќе даде видливи резултати во однос на проширувањето на транспортните врски и комуникации меѓу двете држави, учество и обезбедување средства за регионални инфраструктурни и прекугранични проекти, како и олеснување на комуникацијата меѓу луѓето на двете земји“, велат од бугарската влада.

Договорот за пријателство, добрососедство и за соработка со Република Македонија формално ќе стапи на сила кога ќе биде ратификуван од парламентите на двете земји.