!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

МПЦ-ОА: Договорот со Бугарија може да помогне во решавањето на црковните прашања


Скопје, 25 септември, 2017 - 17:36 (META) 

Договорот за добрососедство меѓу Македонија и Бугарија, покрај регулирањето на општествената сфера, можат да помогнат и во решавањето на отворените црковни прашања, се вели во соопштението на Македонската православна црква – Охридска архиепископија (МПЦ-ОА) по денешната седница на Светиот архиерејски синод.

„Во оваа јубилејна година за МПЦ – ОА, владите на Република Македонија и на Република Бугарија објавија акт за пријателство, добрососедство и за соработка, чин во кој може да се препознае модел за решавање на отворените прашања од минатото за да се гради иднината меѓу братските соседни народи во рамките на евро-интеграциските процеси. Ваквите договори, покрај регулирањето во општествената сфера, можат да помогнат и во решавањето на отворените црковни прашања и да остварат своја конструктивна рефлексија во градењето на релациите меѓу црковните структури во регионот“, стои во соопштенито на МПЦ.

По полувековен опстој на автокефалниот статус на МПЦ-ОА, се додава во соопштението, Синодот ја изразува својата надеж дека „се ближи времето кога Сеправославната црковна полнота ќе ја препознае и прифати македонската црковна реалност, олицетворена во автокефалната МПЦ – ОА“.

Инаку, на 30 септември и на 1 октомври, на денот на празникот Собор на сите македонски светители, во Охрид ќе се одржи централната прослава на 50 години од возобновувањето на автокефалноста на МПЦ – ОА. Синодот, во соопштението, ги повикува народот, свештенството и монаштвото да земат учество во прославата.


Каракачанов: Темата за Македонци во Бугарија не е добра за односите меѓу двете земји


Скопје, 18 септември, 2017 - 14:19 (META) 

Сакам изрично да нагласам за да ги прекинам политичките шпекулации – ги поддржуваме државното единство и територијалниот интегритет на Република Македонија. Немаме проблем со името на Репубика Македонија, ја признаваме земјата под уставно име. Подготвени сме да помогнеме во решавање на спорот со други земји за конечно да се отворат вратите на Македонија за полноправно членство во НАТО. Ова денеска го изјави бугарскиот министер за одбрана, Красимир Каракачанов, по средбата со неговата македонска колешка и домаќин, Радмила Шекеринска.

Одговарајќи на новинарско прашање дали ќе има промени во идеологијата и во неговите ставови во врска македонското малцинство во Бугарија по потпишувањето на Договорот за добрососедство меѓу двете земји, Каракачанов рече дека темата е многу долга и дека за секој што се интересира за историјата на македонското прашање може да даде „специјални лекции“ како историчар, но денеска е дојден во Македонија како министер за одбрана.

– Отсекогаш сум сметал дека не треба да се измислуваат проблеми таму каде што нема, таков проблем во Бугарија нема. Тука сум во улога на министер за одбрана. Ако сакате да водиме историски разговори ќе зборувам во улога на историчар. Вакви теми не се во корист за добрите односи меѓу двете земји – рече тој.

Шекеринска и Каракачанов нагласија дека денешната средба, меѓу другото, е одржана за да се покаже дека договорот што го потпишаа двете земји нема да остане само на зборови.

– Тој договор и она што се случуваше по потпишувањето покажува дека двете држави се свесни дека само преку добрососедството нашиот регион може да оди напред и да ја гарантираме нашата заедничка безбедност – рече Шекеринска.

Каракачанов истакна дека за време на бугарското претседателство со Европската Унија, приоритет ќе биде интеграцијата на регионот на Западен Балкан во Унијата. Тој додаде дека официјална позиција на Бугарија е поддршка на Македонија за членство во НАТО и дека по потпишувањето на договорот од 1 август „работите почнаа да се движат во позитивна насока“.

На средбата двајцата министри се договориле за зголемување на соработката меѓу специјалните сили, проширување на соработката во делот на образованието во одбраната и за соработка меѓу воздухопловните сили.

Шекеринска истакна дека Македонија и Бугарија ќе имаат заедничка воена вежба, планирана во 2018 година, која јасно ќе покаже дека двете земји се одлучни да градат добри соседски односи и да ја градат заедничката безбедност во регионот.


Каракачанов утре во официјална посета на Македонија


Скопје, 17 септември, 2017 - 12:38 (META) 

Министерот за одбрана на Бугарија, Красимир Каракачанов, утре ќе престојува во официјална посета на Македонија и ќе има средба со министерката за одбрана, Радмила Шекеринска, соопштија денеска од Министерството за одбрана.

Станува збор за прва официјална посета на висок бугарски функционер по потпишувањето на Договорот за добрососедство меѓу Македонија и Бугарија, на 1 август оваа година во Скопје. Каракачанов и тогаш беше дел од делегацијата предводена од бугарскиот премиер, Бојко Борисов. Тој тогаш изјави дека Бугарија ќе ѝ помогне на Македонија на патот кон НАТО.

Пречекот на бугарската делегација е предвиден утре во 9 часот на платото пред Министерството за одбрана. Половина час подоцна е закажана средбата помеѓу делегациите на двете земји, а во 10.30 часот Шекеринска и Каракачанов ќе дадат изјави за медиумите.

Бугарскиот министер за одбрана ќе ја посети и касарната „Илинден“ во Скопје, каде полкот за специјални операции ќе изведе показна вежба.

Инаку, Каракачанов е долгогодишен лидер на бугарската ВМРО-БНД, која е позната по екстремниот национализам кон Македонија.


Хојт Ји: Договорот меѓу Македонија и Бугарија е важен за целиот регион


Блед, 5 септември, 2017 - 11:01 (META) 

„Го поздравувам Договорот за пријателство, добрососедство и за соработка со Република Македонија. Тој е важен за народите на Република Бугарија и на Република Македонија, но и за целиот регион“.

Ова го изјавил заменик-помошникот државен секретар на САД, Хојт Брајан Ји, на средбата со бугарската вицепремиерка и министерка за надворешни работи, Екатерина Захариева, во рамките на Бледскиот стратешки форум во Словенија, соопшти бугарското МНР.

– Се надевам дека овој договор ќе создаде одлична атмосфера, во која Република Македонија ќе ги подобри односите и со другите соседи – додал Ји.

Захарива на средбата истакнала дека една од најголемите придобивки на договорот е тоа што тој е изработен без странска помош, со што двете страни покажале дека ги решаваат прашањата без посредници.

Захариева и Хојт Ји разговарале и за актуелната политичка ситуација во регионот и за иницијативите на Бугарија во надворешната политика.


Џафери – Главчев: Договорот за добрососедство е почеток на новата историја меѓу двете земји


Скопје, 8 август, 2017 - 15:53 (META) 

Со Договорот за пријателство, добрососедство и соработка меѓу Македонија и Бугарија почнува новата историја во односите меѓу двете земји, оценија денеска во Скопје претседателот на Собранието, Талат Џафери, и неговиот бугарски колега, Димитар Главчев.

Џафери, како што соопштија од неговиот кабинет, се заблагодарил за поддршката што Бугарија ѝ ја дава на Македонија и за нејзините аспирации за членство во НАТО и во Европската Унија и ја поздравил одличната соработка меѓу претседателите и пратениците на двата парламента во сите последователни мандати. Тој, исто така, изразил надеж дека во иднина соработката ќе се интензивира, особено во светло на потпишаниот договор.

Главчев, кој е во кратка посета на Македонија, оценил дека со потпишувањето на договорот се отвораат нови хоризонти за соработка на сите полиња, вклучително и меѓу двата парламента на ниво на комисии и групи за соработка, на теми од заемен интерес и особено од интерес на Република Македонија и исполнувањето на критериумите за нејзина евроатлантска интеграција.

Бугарскиот спикер, во духот на добрососедските односи, го поканил претседателот Џафери да присуствува на ратификацијата на Договорот во Народното собрание на Република Бугарија.


Мицкоски: Заев на Бугарија ѝ даде можност да блокира отворање поглавја од преговорите


Скопје, 3 август, 2017 - 16:58 (META) 

Со Договорот за добрососедство Бугарија ќе има можност да го преиспита однесувањето на Македонија на целокупниот пат кон Европската Унија, бидејќи Заев прифати таа да има можност да не дозволи отворање на кое било поглавје од преговорите за членство доколку не се исполнат нејзините цели и позиции, порача денеска генералниот секретар на ВМРО-ДПМНЕ, Христијан Мицкоски. Тој додаде дека тоа значи нови проблеми и нови последици за Република Македонија, а како одговорен за тоа го посочи премиерот Зоран Заев.

Тој на прес-конференцијата во седиштето на партијата рече дека во договорот има „срамна формулација за дефинирање на македонскиот јазик“ и нема симетрија на правата и на обврските на двете страни.

– Со договорот не се дефинира македонскиот народ како реална и идентитетска посебност, а Зоран Заев срамно и недостојно се откажува од грижата за македонското национално малцинство. Договорот предвидува опасна можност за промена на македонските учебници и на другите идентитетски обележја што се дел од нашето историско наследство – нагласи Мицкоски.


ВМРО-ДПМНЕ нема да даде поддршка на Договорот, му порача Груевски на Борисов


Скопје, 1 август, 2017 - 20:55 (META) 

Лидерот на ВМРО-ДПМНЕ, Никола Груевски, и бугарскиот премиер Бојко Борисов разговараа за односите помеѓу Република Македонија и Република Бугарија и за заедничката посветеност за унапредување на добрососедските односи во сферите од заеднички интерес, како и за интеграцијата на Република Македонија во Европската Унија и во НАТО, соопштија од ВМРО-ДПМНЕ.

Груевски истакнал дека ВМРО-ДПМНЕ е за продлабочување на пријателството со Бугарија, за економски развој и за подобра соработка помеѓу македонскиот и бугарскиот народ.

„Во однос на Договорот за добрососедство, пријателство и за соработка, претседателот Груевски истакна дека ВМРО-ДПМНЕ во однос на оваа тема има принципиелни, долгогодишни и аргументирани ставови, чија основна идеја беше постигнување договор во кој нема да има чувство на победник и поразен и кој ќе ја реализира идејата за вистинско и рамноправно пријателство и соработка помеѓу двете држави и народи. Тој го извести својот соговорник дека во согласност со ставот на централниот комитет на партијата, ВМРО-ДПМНЕ нема да даде поддршка на договорот што го потпиша марионетската влада на Зоран Заев, а за кој ВМРО-ДПМНЕ имаше конструктивни и суштински забелешки и предлози за негово подобрување“, стои во соопштението.

Груевски и Борисов ја истакнале значајноста и потребата од што побрза интеграција на Република Македонија во НАТО и во Европската Унија, како приоритет кој ќе обезбеди трајна стабилизација на регионот и ќе обезбеди услови за дополнителен економски развој.

Соговорниците, исто така, разговарале и за соработката во областа на Европската народна партија, каде што членуваат и двете партии, ВМРО-ДПМНЕ И ГЕРБ.


Иванов до Борисов: Спорните прашања да се решаваат мирнo и преку искрен дијалог


Скопје, 1 август, 2017 - 19:11 (META) 

Претседателот на Република Македонија, Ѓорге Иванов, и бугарскиот премиер Бојко Борисов денеска разговараа за Договорот за пријателство, добрососедство и за соработка меѓу двете земји, како и за волјата и ангажираноста на сите што во изминатиот период беа вклучени во напорите за негово усогласување, соопштија од кабинетот на претседателот.

– Со овој чин се потврдува политичката волја и заложба на двете држави за преземањето понатамошни чекори кон градење меѓусебна доверба и надминување на отворените прашања. Неопходно е заеднички да се соочуваме со предизвиците, во исто време бранејќи ги своите национални интереси. Токму затоа сметам дека ниту еден меѓудржавен договор не смее да биде на штета на сопствените државни и национални интереси. Постојано ја нагласувам потребата од решавање на спорните прашања на мирен начин и преку искрен и отворен политички дијалог, во согласност со меѓународното право и со добрососедските односи за да се постигнат праведни и фер решенија врз основа на принципите на заемно почитување и поддршка и воздржување од мешање во внатрешните работи на државите – рече Иванов и додаде дека како и досега, така и во иднина ќе се залага за континуирано унапредување на добрососедските односи.

Претседателот ја реафирмирал целосната посветеност на Македонија на европската и евроатлантската интеграција и истакнал дека земјата очекува отворена поддршка од Бугарија за почеток на пристапни преговори за членство во ЕУ, како и поддршка во однос на приемот на Република Македонија во НАТО.

Претседателот Иванов изразил очекување за интензивирање на политичкиот дијалог меѓу двете земји и средба со бугарскиот претседател, Румен Радев, посочувајќи дека посетите на највисоко ниво, претставуваат дополнителен импулс во градењето на меѓусебната доверба и добрососедските односи.


Димитров – Захариева: Владите имаат капацитет да решаваат отворени прашања


Скопје, 1 август, 2017 - 18:06 (META) 

Шефот на македонската дипломатија, Никола Димитров, и бугарската министерка за надворешни работи, Екатерина Захариева, попладнево констатираа дека денешното потпишување на Договорот за пријателство, добрососедство и за соработка меѓу двете земји ќе отвори нови перспективи за односите и за соработката меѓу двете држави.

Министрите, како што се вели во соопштението од македонското МНР, изразиле задоволство што владите на двете држави практично покажале дека имаат капацитет самостојно да решаваат отворени прашања, како и визија за заедничка европска и евроатлантска иднина, пример кој отвора нови перспективи за стабилен и интегриран регион.

– Денеска е историски ден. Договорот е манифестација на цврстата волја да се решаваат отворените прашања и заедно да чекориме напред, кон иднината и Европската Унија. Договорот е инспирација за целиот регион – рече Димитров.
Министерката Захариева изразила благодарност до министерот Димитров и до премиерот Заев, како и до тимовите кои работеа на Договорот.

– Јас сум цврсто убедена дека ако твоите соседи не се добро, ни ти нема да бидеш добро. Договорот е прв чекор за нештата што треба да ги градиме заедно. Ефектот од овој договор допрва ќе се мери – рече Захариева.

Таа додаде дека Бугарија е подготвена да ѝ понуди експертска помош на Македонија за реформите што претстојат и изрази надеж дека следната година Македонија конечно ќе има позитивен почеток во преговарачкиот процес со ЕУ.


Шекеринска – Каракачанов: Бугарија ќе ѝ помогне на Македонија на патот кон НАТО


Скопје, 1 август, 2017 - 16:48 (META) 

Зајакнувањето на добрососедските односи меѓу Македонија и Бугарија се од полза не само за двете земји, туку и за регионот и за цела Европа, оценија министерката за одбрана, Радмила Шекеринска, и нејзиниот бугарски колега, Красимир Каракачанов, на работната средба одржана по потпишувањето на Договорот за добрососедство помеѓу Бугарија и Македонија.

Шекеринска се заблагодарила на брзата реакција на бугарската влада која понуди помош во хеликоптери за гаснење на пожарите што ја зафатија Македонија. Договорот за помошта бил постигнат на средбата на двајцата премиери, Заев и Борисов, а личниот ангажман на министерот Каракачанов овозможил помошта да се реализира веднаш.

Каракачанов на средбата истакнал дека политиката на официјална Софија секогаш била да ја поддржи државната независност на Македонија и го става на располагање своето искуство и контакти за побрз прием на Македонија во ЕУ и во НАТО.

– Бугарија сака да ѝ помогне на Македонија. Контактите кои ги создадовме на нашиот пат кон ЕУ и кон НАТО може да ви бидат многу полезни. Кога Бугарија, Грција, но и Македонија и сите држави од регионот ќе бидат дел од ЕУ, проблемите ќе се решаваат полесно. За приемот на Македонија во НАТО ја нудиме нашата експертиза и совети – рече Каракачанов.