Орбан на Заев му го честита Договорот со Грција


Будимпешта, 20 јули, 2018 - 16:25 (META) 

Премиерот Зоран Заев добил писмо од унгарскиот премиер Виктор Орбан со честитки по повод договорот за македонско-грчкиот спор за името и за стратегиско партнерство меѓу двете земји, информираат од владината прес-служба.

Во писмото, кое премиерот на Унгарија Орбан го потпишал и во име на Вишеградската Четворка, го поздравува решението што двете земји, Република Македонија и Република Грција, го најдоа во врска со прашањето за името.

„Унгарската Влада постојано, преку сите форуми се залага за забрзување на евроатланската интеграција на целиот регион на Западен Балкан, така и за Република Македонија. Унгарија го поддржа усвојувањето на резолуцијата на Европската Унија со која се овозможува започнување на преговорите за членство на Република Македонија во ЕУ“, се вели во писмото.

Орбан во писмото исто така вели дека Унгарија ја поддржува поканата за членство што Макеоднија ја доби од НАТО на 11 јули.


„Дали сте за ЕУ и НАТО со прифаќање на договорот за името“, е можното референдумско прашање


Скопје, 19 јули, 2018 - 9:30 (META) 

Премиерот Зоран Заев по лидерската средба синоќа, информираше дека можното прашање на референдумот ќе биде – „Дали сте за членство во ЕУ и НАТО со прифаќање на Договорот меѓу Република Македонија и Република Грција?“. Tој рече дека референдумот ќе биде консултативен и за денеска попладне најави нова лидерска средба.

Заев посочи дека разговарал со лидерите на сите партии освен на ВМРО-ДПМНЕ, чиј лидер Христијан Мицкоски ја напушти средбата по околу еден час од нејзиниот почеток. Тој потенцираше дека сите што останале на лидерската средба се за влез во ЕУ и во НАТО и за успешен референдум како процес.

– Разговаравме и за насоката на која не упатува членот 27 од Законот за референдум, според кој во услови кога Собранието допрва треба да донесе некоја исклучителна важна одлука за иднината потребно е референдумот да биде консултативен со цел граѓаните на Република Македонија да бидат консултирани за вака важно прашање пред да биде донесена одлуката, а согласно договорот со Грција тоа е одлуката за уставни промени – рече Заев.

Одлуката, додаде Заев, се смета за конечна, доколку на референдумот излезат најмалку 50 проценти од вкупниот број на запишани избирачи во Избирачкиот список и таа ќе биде обврзувачка за сите политички чинители во Собранието.

Во однос на датумот кога ќе се одржи референдумот, Заев повтори дека треба да биде распишан 60 до 90 дена пред одржувањето, но додаде дека планот е некаде кон средината на јануари да се заврши со сите постапки при успешен референдум, со што ќе се овозможи Парламентот во Грција да гласа за Договорот.

На прашањето за предвремени избори рече дека изборите се секогаш опција, но додаде дека тие во моментов не се поволност.

-Сите знаеме што значат изборите, неколкумесечно уназадување, а трендот е одличен во Македонија заради тоа што во овој момент имаме покана за НАТО, добиваме датум за преговори со ЕУ и треба да бидеме паметни сето ова да го искористиме за економскиот стандард на граѓаните, за инвестиции, за придвижување, охрабрување на институциите – изјави Заев и појасни дека според него, треба да се оди на редовни избори.


Димитров: Ако има глас повеќе против Договорот, ќе прифатиме дека тоа не е вистинскиот пат


Скопје, 18 јули, 2018 - 12:03 (META) 

Министерот за надворешни работи, Никола Димитров во интервјуто за „Ал Џезеира балканс“ изјави дека референдумот ќе помине успешно и дека граѓаните ќе го одобрат Договорот постигнат со Грција.

– Ако има еден глас повеќе против ние сме апсолутно спремни да подадеме рака и да кажеме дека ова не е вистинскиот пат. Пред големи историски дилеми граѓаните знаеле да го изберат правиот пат. Пред нас е избор меѓу минатото и иднината, стравот и надежта. Минатото е многу важно за нашиот идентитет, но не можеме да го смениме, можеме конечно на нашите граѓани да им понудиме избор каква држава ќе биде Македонија. Немаше поголема патриотска должност да ја создадеме оваа шанса и да им овозможиме на граѓаните да изберат. Сигурен сум дека ќе ја изберат иднината – вели Димитров.

Во врска со ставот на опозицијата, тој порачува дека прашањето е побитно од нечии политички игри и кариери.

– Ова е процес на растење. Не смееме да се плашиме од волјата на граѓаните, волјата на народот. Ова прашање е многу поголемо од целата политичка елита, од сите партии. Не смееме да мислиме на себе си, на личната кариера. Не сме совршени, правиме и грешки. Има многу области за партиско политичка битка, но стратешката игра на нашата нација не смее да биде предмет на партиски препукувања – посочува министерот.

На прашањето од новинарот дали Владата има план Б доколку не успее референдумот, Димитров кажа дека тие се фокусирани на планот А.

– Убедени сме дека извлековме максимум. Дека имаме издржан компромис со јасна дистинкција меѓу нашата држава и делот на историскиот регион кој се наоѓа во Грција. Македонија нема друга стратешка алтернатива – додава тој.


Курц: Балканот ни е приоритет, ЕУ да ги прекине преговорите со Турција


Виена, 16 јули, 2018 - 10:05 (META) 

Договорот меѓу Скопје и Атина покажува дека упорните преговори и дипломатијата носат резултат, вели канцеларот на Австрија, Себастијан Курц во интервју за грчкиот весник „Катимерини“ и ја потенцира австриската поддршка за европската перспектива на земјите од Западен Балкан.

– Топло го поздравуваме договорот меѓу двете страни. Тој покажува дека упорните преговори и дипломатијата носат резултат. За Австрија, регионот на Западен Балкан е основен приоритет во нашата надворешна и европска политика, но и на нашето претседателство со ЕУ. Ја поддржуваме линијата на комесарот за проширување, Јоханес Хан. Обезбедувањето чесен и веродостоен пат кон ЕУ за земјите од Западен Балкан им служи на нашите интереси на безбедносно, политичко и економско ниво – вели Курц.

Австрискиот канцелар за „Катимерини“ коментира дека треба веднаш да запрат преговорите меѓу ЕУ и Турција, бидејќи „Турција во изминатите години се оддалечува од Европа и од европските вредности“.


СДСМ: Иванов да не се става над Уставот и да не се противставува на волјата на граѓаните


Скопје, 6 јули, 2018 - 15:29 (META) 

Ѓорге Иванов работи спротивно на интересите на државата, нема чувство за реалноста ниту за значајноста на моментот во кој се наоѓа Македонија, велат од СДСМ како реакција на соопштението од кабинетот на Иванов во кое се вели дека тој нема да го поддржи Договорот со Грција.

„Ако на Иванов не му е јасно дека Договорот е за членство на Македонија во ЕУ и НАТО нека ги преслуша пораките од целиот демократски свет, од сите демократски лидери. Најавата на Иванов дека нема да ја почитува волјата на граѓаните искажана на референдум е во најмала рака скандалозна за секој нормален, одговорен политичар. Претседател на држава не треба да се спротивставува на волјата на граѓаните, на огромното мнозинство граѓани, туку да ја почитува. Иванов не смее да се става над законите и Уставот, тој е должен да го потпише Указот за Законот за ратификација на Договорот“, велат од СДСМ.

Од таму додаваат дека Иванов треба да има предвид дека СДСМ, граѓаните, демократската јавност, нема да дозволат ниту една деструктивна сила да ја закочи македонската иднина, ниту пак да ја врати Македонија во мрачното минато на изолација, поделби и неизвесност.


Иванов: Заев ја лаже јавноста, нема да го поддржам Договорот со Грција


Скопје, 6 јули, 2018 - 13:38 (META) 

Претседателот Ѓорге Иванов преку соопштение од неговиот кабинет вели дека најостро ги демантира лагите изнесени од премиерот Зоран Заев во интервјуто за грчката телевизија „ЕРТ“ дека тој ќе го поддржи Договорот со Грција.

„Премиерот Заев со своите променливи, контрадикторни и конфузни ставови продолжува да ја лаже и манипулира не само македонската, туку и грчката и меѓународната јавност. Членството на Македонија во Европската Унија и НАТО, не смеат да се злоупотребуваат за прифаќање на штетен Договор со несогледливи последици по македонската држава и македонскиот народ“, велат од претседателскиот кабинет.

Од таму додаваат дека „Иванов не прифаќа Договор на штета на македонскиот национален идентитет и на штета на интересите на Македонија и потенцираат дека нема да го поколебаат никакви притисоци, уцени и закани.“

Заев во вчерашното интервју искажа уверување дека референдумот ќе биде успешен и дека ќе мора да го почитуваат сите институции во државата.

-Референдумското прашање кај нас ќе не стави сите политичари да ги послушаме граѓаните. Тоа значи и власта и позицијата, а и претседателот Иванов. Затоа што ние им служиме на граѓаните. Референдумот ќе биде успешен, јас сум сигурен и на тој начин ќе следуваат понатаму и уставните амандмани и потписот од претседателот на државата за да можеме после тоа да очекуваме и грчкиот парламент да го ратификува договорот – рече Заев.


„Дали сте за ЕУ и НАТО поддржувајќи го името Северна Македонија“, e можно прашање вели Заев


Атина, 6 јули, 2018 - 10:42 (META) 

Заев во интервју за грчката национална телевизија ЕРТ истакна дека три датуми се во игра за референдумот– 23 септември, 30 септември или 7 октомври.

Тој изрази уверување дека референдумот ќе биде успешен и дека граѓаните ќе се изјаснат позитивно, а бидејќи тој ќе има обврзувачки карактер, ќе мора да биде прифатен од сите, па дури и од претседателот Ѓорге Иванов Иванов.

– Народот убеден сум дека ќе биде „за“ договорот со Грција заради тоа што прашањето веројатно ќе биде „Дали сте за Европската Унија и за НАТО и за поддршка на договорот со Грција?“. Веројатно во тој правец ќе биде заради тоа што едно со друго кај нас е поврзано и од таков аспект граѓаните кога ќе го дадат својот глас, политичарите, владата, парламентот, претседателот на државата сме должни да го почитуваме. Или можеби прашањето ќе биде „Дали сте за Европската унија и НАТО поддржувајќи го името Република Северна Македонија?“, заради тоа што тоа е договорот. Верувам дека граѓаните ќе бидат целосно позитивни – изјави Заев во интервју за грчката телевизија.

Македонскиот премиер вели дека доказ дека договорот е фер и правичен е што двете опозиции и во Македонија и во Грција се критички кон решението, а тоа значи дека двете страни подеднакво отстапиле или подеднакво добиле.


63,8 отсто од Грците негативно го оценуваат Договорот од Преспа


Атина, 5 јули, 2018 - 15:07 (META) 

Речиси 7 од 10 Грци негативно го оценуваат Договорот од Преспа меѓу Македонија и Грција, покажува истражувањето на агенцијата МРБ спроведено меѓу 22 и 29 јуни годинава, преку директни интервјуа со вклучени 2.000 граѓани со право на глас.

На прашањето „Врз основа на она што го знаете, она што го имате слушнато, што го имате прочитано, како во целост го оценувате договорот што го потпиша грчката влада со ПЈРМ?“, позитивен одговор одбрале само 12,8 отсто, 3,5 отсто рекле сигурно позитивно, 9,3 отсто веројатно позитивно, додека пак 68,3 отсто од испитаниците одговориле негативно. Од нив 48,4 отсто го оценуваат сигурно негативно договорот, а 19,9 отсто веројатно негативно.

Делот каде стои дека новото име на соседната земја ќе биде Република Северна Македонија и ќе се користи ерга омнес, 62 отсто од анкетираните го оценуваат негативно. Точката која што вели дека државјанството на жителите на соседната земја ќе биде македонско/граѓанин на Република Северна Македонија негативно ја оценуваат 64,4 отсто од испитаниците.

Над 7 од 10 анкетирани сметаат дека Грција можеше да постигне подобар договор (75,1 отсто), дека Договорот повеќе им служи на македонските интереси (73,3 отсто) дека е штетен за националните интереси на Грција (70,5 отсто) и дека во иднина ќе создаде сериозни проблеми (68,5 отсто).

На прашањето која земја ја сметате се реална закана за Грција и со можност да одберат најмалку две од понудените одговори: Турција, Албанија, Македонија и Бугарија, 15,4 отсто од испитаниците ја одбираат Македонија, со што нашата земја е на третото место. 87,9 отсто од испитаниците одговориле Турција, 33,5 отсто Албанија, а само 6 отсто Бугарија.


Заев апелира до Иванов да го потпише Законот за ратификација на Договорот со Грција


Скопје, 5 јули, 2018 - 13:29 (META) 

Претседателот Ѓорге Иванов да го потпише законот за ратификација на Договорот со Грција, а референдумот тоа само ќе го потврди, апелираше денеска премиерот Зоран Заев.

Одговарајќи на новинарски прашања по пуштањето во употреба на првиот фотоволтаичен систем на приватен објект, Заев напомена дека првпат по 27 години граѓаните добиваат шанса да одлучуваат за иднината на Македонија.

– Верувам во нашиот народ и во успешноста на процесот со кој ќе се гордеат многу генерации – истакна премиерот.

Нарекувајќи го Договорот фер и правичен, Заев напомена дека веќе е вторпат ратификуван. Следува референдум, уставни промени, а потоа и ратификација во грчкиот Парламент по што Договорот и официјално стапува во сила, односно ќе почне употребата на новото име.

Во врска со денешните пресуди за обидот за убиство на Зијадин Села, премиерот беше дециден, дека тие значат само понесување одговорност за оној што го прекршил Законот.

– Владеењето на правото мора да важи за сите – потенцира Заев.


Собранието по втор пат го ратификуваше Договорот со Грција, Мухиќ гласаше воздржано


Скопје, 5 јули, 2018 - 12:13 (META) 

Собранието со 69 гласа „за“, еден „воздржан“ и без присуство на опозициската ВМРО-ДПМНЕ, по втор пат го изгласа законот за ратификација на Договорот со Грција кој го постигнаа македонската и грчката влада, а на 17 јуни во Преспа го потпишаа министрите за надворешни работи, Никола Димитров и Никос Коѕиас.

Шефот на македонската дипломатија, Никола Димитров, во образложението на Договорот се осврна на петте точки кои претседателот Ѓорге Иванов ги даде во своето писмо до Собранието како аргументи за непотпишување на законот.

– Првата точка вели дека не може да се прифатат идеи и предлози кои што ќе го загрозат македонскиот идентитет и јазик. Ве уверувам дека ниту јас ниту било кој член на владата прифаќа такви идеи. Конечната спогодба е сосема спротивното. Таа не само што не ги загрозува туку ги реафирмира и ги зацврстува како никогаш до сега. Во пракса спогодбата ќе донесе етаблирање на нашиот идентитет и ќе ја надмине ситуацијата на несоодветно именување и на државата и на народот. Во точка два се цитира уставот, должни сме да бидеме искрени. Како што идентитетот не може да се брани компромитирајќи го, така и Уставот не може да се брани кршејќи го. Претседателот, според Уставот, е должен да го потпише законот – рече Димитров.

Тој анализирајќи еден од аргументите на Иванов потенцираше дека до сега Собранието ратификувало вкупно 897 договори, од кои само пет биле потпишани од институцијата претседател. За последниот аргумент, во кој Иванов вели дека потпишувањето на законот е кривично дело, Димитров вели дека е „на линија на ширење страв“.

– Време е кога нам ни треба пред се храброст и одговорност за сите идни генерации. Време е да се најдеме на интересите на татковината. Сите имаме лични, некои имаат и партиски, но сите мора да бидеме сплотени во интересите на државата – додаде Димитров.

Единствениот кој гласаше воздржано беше пратеникот од владејачката коалиција Ферид Мухиќ кој рече дека едногласноста е спротивна на демократијата и рече дека за ова судбоносно прашање ќе гласа според совеста и дека тоа му е загарантирано со Устав.

– Сите зборуваме за придобивките кои што ни се ветени но познато е дека во политиката не постои бесплатен ручек. Ова е ултиматум за да го добиеме она што ни припаѓа. Самиот услов промена на името е спротивно на меѓународно право и претставува апсолутен преседан што до сега не се случил. Спогодбата е втемелена врз голема неправда. Гласот на овој народ треба да се слушне, светот мора да разбере на што е принудена оваа влада овој народ и оваа држава. Се создава впечаток дека сме украле нешто туѓо, дека сме фатени во таа кражба и сега мора да го вратиме туѓото – рече Мухиќ.