!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Груевски: Овие избори ќе бидат порака од народот за насилството на власта


Скопје, 6 октомври, 2017 - 0:06 (META) 

На 15 октомври гласањето нема да биде само гласање за градоначалници и за советници, ќе биде порака од народот за овие четири и пол месеци владеење и злоупотреби, ќе биде порака и за секојдневните политички хајки и прогони, порача вечерва лидерот на ВМРО-ДПМНЕ, Никола Груевски, на партискиот митинг во општина Центар.

– На овие избори претходеа едни други избори во декември, на овие избори претходеше едно дивјачко, незаконско, неделовничко, неуставно, со кршење на сите процедури и потценување на волјата на народот и граѓаните, назначување на претседател на Собранието, а по него и Влада. На овие избори и центарци и скопјани ќе можат да го кажат своето мислење за тој чин – рече Груевски.

Тој истакна дека проблемот е во начинот на владеење и во потценувањето на интелигенцијата на народот и порача дека на овие избори граѓаните ќе можат да се изјаснат и за секојдневните демонстрации на сила и на насилство од страна на, како што рече, новодонесената и новозалепената власт.

Груевски се осврна и на Договорот за добрососедство со Бугарија, порачувајќи дека власта на 15 октомври ќе добие одговор и за ова прашање и за тоа дали ВМРО-ДПМНЕ е виновно што не е решен спорот со Грција.

– Отидоа со Бугарите, прифатија сè за една минута, без никакви преговори. Прифатија дека Илинденското востание не било македонско, било бугарско. 11 Октомври – првата пушка против фашизмот – не било востание, било идеолошка борба помеѓу двете спротивставени страни на Бугарите во Македонија. Ќе им каже сега македонскиот народ на 15 октомври чие е Илинденското востание и што е 11 Октомври. На 15 октомври ќе добијат одговор и за тоа дали ние сме биле виновни што не сме прифатиле промена на името на државата, името на нацијата, на јазикот – рече Груевски, кој посочи и дека Владата секој ден го споменува зборот „реформи“ по најмалку 20 пати, а ниту една реформа не е направена.

На митингот во општина Центар зборуваше и актуелниот и кандидат за иден градоначалник на Скопје, Коце Трајановски, кој рече дека граѓаните на локалните избори гласаат за личност во која имаат доверба и не ризикуваат со кандидати кои водат политика.

Претходно денеска ВМРО-ДПМНЕ одржа митинг во општина Кисела Вода.


ОМД: Заев вети дека во 2019 година ќе има попис во Македонија


Вашингтон, 22 септември, 2017 - 11:11 (META) 

Премиерот Зоран Заев на средбата со Обединетата македонска дијаспора (ОМД) рекол дека во 2019 година ќе биде спроведен попис на населението во Македонија, тврди ОМД во соопштението за средбата што се одржа оваа недела во Њујорк, каде премиерот со владина делегација присуствува на 72. Генерално собрание на Обединетите нации.

На средбата претседателот на ОМД, Методија Колоски, стои во соопштението, побарал од Заев објаснување за Законот употреба на јазиците и го повторил ставот дека за ОМД е неприфатливо се што „задира во македонскиот устав, унитарноста, националните интереси, територијалниот интегритет на Република Македонија, како и можно креирање на бинационална држава наместо држава за македонците и сите малцинства со подеднакви права“

„(Коловски) доби објаснување од премиерот Заев дека овој предлог закон претставува само последниот легален дел од Законот за јазици донесен во 2008 и во 2011 година и не задира во Уставот на Република Македонија. Во тој контекст, Колоски го постави прашањето за попис на населението во Република Македонија, на што премиерот Заев даде ветување дека ќе биде спроведен во 2019 година“, стои во соопштението од ОМД.

На состанокот станало збор и за спорот за името со Грција. Членот на ОМД, Владимир Котевски потенцирал дека ОМД инсистира да се прекинат сите преговори за името, а го критикувал и договорот со Бугарија, истакнувајќи дека „било какви други договори не смеат да бидат на штета на интегритетот на државата и заштитата на правата на македонските малцинства во тие држави.

„Претседателот Колоски се надоврза со потенцирање на ставот на ОМД за НАТО и европската интеграција на Македонија, со посебен нагласок дека Владата на Република Македонија не треба да дозволи влезот во НАТО и во ЕУ да биде проследен со услов за промена на име“, стои во соопштението.

Претставниците на Обединетата македонска дијаспора се пожалиле за проблемите на македонската заедница во Њујорк и во Њу Џерси поради немањето на активен конзул, а искажале и незадоволство од одлуката на министерот за надворешни работи, Никола Димитров за повлекување на македонскиот генерален конзул Јовица Палашевски од Торонто.


Собранието ја отфрли интерпелацијата за министерот за надворешни работи Димитров


Скопје, 11 септември, 2017 - 23:52 (META) 

Собранието денеска со 43 гласа „за“, 56 гласа „против“ и ниту еден воздржан, ја отфрли интерпелацијата за министерот за надворешни работи Никола Димитров поднесена од пратениците на опозициската ВМРО-ДПМНЕ, кои го обвинија Димитров за кариеризам.

Претседателот на Собранието следната седница, на која треба да се најдат интерпелациите за министерката за труд и социјална политика, Мила Царовска, и на министерот за земјоделство, шумарство и водостопанство, Љупчо Николовски, ја закажа за утре во 16 часот.

Фокусот на пладневниот дел од расправата за интерпелацијата на министерот за надворешни работи, Никола Димитров беше на Договорот за добрососедство со Бугарија. Пратениците на опозициската ВМРО-ДПМНЕ обвинија дека Договорот бил постигнат набрзина, кратко време по формирањето на новата влада и дека решенијата во него се на штета на националните и на државните интереси на Македонија.

Поранешниот шеф на македонската дипломатија и актуелен пратеник од редовите на ВМРО-ДПМНЕ, Никола Попоски, рече дека Договорот, меѓу другото, бил постигнат за во земјава Владата да создаде атмосфера на триумфализам и „за да се изнудат аплаузи на отворена сцена“.

– Ние долг временски период разговаравме со Бугарија, разгледувавме алтернативи и консултиравме историчари, консултиравме претставници од СДСМ кои за некои од овие прашања имаа најрадикални позиции. Процесот беше во рамките на 5 до 6 отворени прашања и во однос на тие прашања Македонија треба да го заштити својот интерес и Бугарија да го заштити својот интерес, а сега имаме резултат кој што е 6:0 во корист на бугарската страна – рече Попоски.

Неговиот колега и поранешниот технички премиер, Емил Димитриев, истакна дека она што нему му оставило впечаток била брзината со која бил донесен Договорот со Бугарија, што, како што рече, остава простор за сомнеж околу неговиот квалитет.

Координаторот на пратеничката група на СДСМ, Томислав Тунтев, им порача на пратениците на ВМРО-ДПМНЕ да не ги омаловажуваат напорите и придонесот на нивната влада и на нивниот премиер, кои преговарале со Бугарија за Договорот.

– Договорот е услов за економски развој и јас тука ја гледам најголемата негова предност – рече Тунтев.

Трајчо Димков од ВМРО-ДПМНЕ од собраниската говорница потсети дека на денешен ден Струмица била ослободена од бугарскиот фашистички окупатор во Втората светска војна, на што Тунтев одговори дека и Јапонија и Германија и Италија биле фашистички држави во Втората светска војна, но сега се сојузници и најголеми поддржувачи на Македонија.


Интерпелација: Опозицијата го обвини Димитров за кариеризам


Скопје, 11 септември, 2017 - 15:26 (META) 

Собранието ја почна расправата за интерпелацијата што пратениците на ВМРО-ДПМНЕ ја поднесоа за министерот за надворешни работи, Никола Димитров.

Интепелацијата ја образложи пратеникот Антонио Милошоски, поранешен министер за надворешни работи, кој од собраниската говорница рече дека „единствената идеологија на Димитров е кариеризмот“.

– Видете ја неговата биографија и ќе видете дека кариерата му била приоритет без разлика дали на власт бил Љубчо Георгиевски, Никола Груевски или Зоран Заев – рече Милошоски.

Тој го обвини Димитров за „штетниот“ Договор за добрососедство со Бугарија, за газење на декларираниот принцип на инклузивност со неиспраќањето на Александар Николовски за амбасадор на Македонија во Брисел и за неуспех во регионалната политика, за што како доказ ја наведе трилатералната средба на претседателот на Србија и на премиерите на Бугарија и на Грција. Како четврта причина поради која се бара интепелација на шефот на македонската дипломатија, Милошоски го истакна планот за населување мигранти во земјава, посочувајќи дека имаат „добри информации дека од Македонија се барало и се бара да ги зголеми своите капацитети за прием, населување и за давање права на мигрантите“.

Министерот за надворешни работи во своето образложение на одговорот на интерпелацијата, ја обвини опозицијата за хипокризија во однос на Договорот со Бугарија, регионалната политика и за нејзините декларативните заложби за добрососедски односи од една, и спроведувањето политики на изолација од друга страна.

Тој нагласи дека „неговата идеологија е државниот интерес на Република Македонија“.

Според собранискиот деловник, расправата за интерпелација трае еден ден, а гласањето по неа може да биде најдоцна до полноќ.

Пред почетокот на расправата за интерпелацијата на Димитров, пратениците со 77 гласа „за“ ги изгласаа измените на Изборниот законик со кои Движењето Беса, како втора опозициска партија што на последните парламентарни избори освоила најмногу пратеници, сега ќе има член во Државната изборна комисија наместо ДПА.


Заев: Стоте дена ги посветивме на граѓаните, на економијата и на пријателство кон соседите


Скопје, 5 септември, 2017 - 16:26 (META) 

Премиерот Зоран Заев денеска на прес-конференција даде отчет за сработеното во првите 100 дена од формирањето на Владата – под мотото „Зборот е збор“.

Заев подвлече дека активностите и мерките на Владата во првите сто дена биле насочени кон пет сектори: враќање на парите кај граѓаните, економијата, враќање на институциите во служба на граѓаните, пријателство со соседните земји и отвореност на Владата.

Премиерот го посочи донесениот ребаланс на буџетот, со кој, како што рече, се направени големи кратења на непродуктивните трошоци, а парите се пренасочени кон „потребите на граѓаните“. Во овој контекст, тој ги спомена законите за стечајците, за минимална плата и укинувањето на радиодифузната такса, кои се во собраниска процедура, како и враќањето на евтината тарифа на струјата. Заев нагласи дека во изминатите 100 дена се обезбедени пари за мали и средни претпријатија и за домашни гринфилд-инвестиции, а во овој период се издвоени повеќе од 110 милиони евра помош за земјоделците.

Во однос на надворешната политика, како особено значајно Заев го посочи потпишувањето на Договорот за добрососедство со Бугарија, кој, како што истакна, е доказ дека „таму каде што има волја, проблемите можат лесно да се решаваат“.

– Овој наш став е водечки и во процесот на реафирмирање на односите со Грција – рече Заев.

Планот „3-6-9“, рече премиерот, ја враќа Македонија на брзата патека на евроатлантските интеграции, а со воената вежба на полигонот Криволак воспоставено е ново ниво на соработка меѓу Македонија и Соединетите Американски Држави.

Заев соопшти дека во текот на оваа недела треба да биде донесена и стратегијата за реформите во правосудниот систем, што е еден од приоритетите на Владата за враќање на владеењето на правото и на довербата во правосудството.

Премиерот го спомена и Законот за употребата на јазиците, со кој, како што рече, се затвора и последното отворено прашање од Охридскиот рамковен договор.

Одговарајќи на новинарско прашање, Заев изјави дека овој закон е поднесен со европско знаменце во Собранието бидејќи е дел од националната програма за усогласување на македонското со европското законодавство.

– Ова е последното легислативно прашање од Охрдискиот рамковен договор. Овој договор, освен законите, кои во најголем дел се донесени, има и свој дух. Тој постои за граѓаните и тие се тие што на крајот кажуваат дали некое прашање е навистина затворено или не – рече Заев.

Во врска со одлуката на министерот за здравство, Арбен Таравари, да се кандидира за градоначалник на Гостивар, Заев рече дека ги почитува политичките и партиските одлуки на коалициските партнери, но додаде дека секој избран функционер има морална и етичка одговорност пред граѓаните.


ВМРО-ДПМНЕ ќе бара интерпелација и за Никола Димитров


Скопје, 9 август, 2017 - 14:31 (META) 

Пратениците на опозициската ВМРО-ДПМНЕ во Собранието денеска најавија дека ќе поднесат иницијатива за интерпелација и на министерот за надворешни работи, Никола Димитров.

Антонио Милошоски на прес-конфренција соопшти дека причини за интерпелација на Димитров има повеќе, а како прва го наведе „брзоплетото и штетно“ потпишување на Договорот за добрососедство со Бугарија. Тој рече дека со договорот Македонија не ги „заштитила своите интереси и се откажала од македонското малцинство во Бугарија“.

Друга причина, додаде Милошоски, е неименувањето, односно прекинување на постапката за испраќање на Александар Николовски за амбасадор во Брисел.

– Иако Александар Николовски ги помина сите процедури, од МНР добивме заклучок дека постапката се прекинува. Ако можеше ВМРО-ДПМНЕ да го испрати Нано Ружин за амбасадор во НАТО, зошто да не може СДСМ да го испрати Николовски – посочи Милошоски.

Тој како причина го наведе и немањето категоричен и јасен став околу притисокот за изградба на кампови за мигранти во Македонија.

Претходно пратениците на ВМРО-ДПМНЕ најавија дека ќе поднесат иницијативи за интерпелација на министерката за труд и социјална политика, Мила Царовска, и за министерот за земјоделство, шумарство и водостопанство, Љупчо Николовски.


Канческа-Милевска: Заев потпиша договор со Бугарија за да го смени името по грчки терк


Скопје, 8 август, 2017 - 15:44 (META) 

Договорот за добрососедство со Република Бугарија што го потпиша владата на Зоран Заев е во спротивност со македонските државни и национални интереси и прави од македонската страна губитник во целиот процес, изјави денеска на прес-конференција поранешната министерка за култура и сегашна пратеничка од ВМРО-ДПМНЕ, Елизабета Канческа-Милевска.

– Во членот 2, став 2 од Договорот, Бугарија вели дека ќе се согласи со одлуката што ќе биде донесена од врвот на НАТО. Со овој член Зоран Заев буквално ја обврзал Република Македонија поддршката од Република Бугарија за влез во НАТО да ја добие тогаш, кога за тоа ќе добие амин од Грција, односно ќе го смени името на државата по грчки терк. Доколку Зоран Заев сакал да извојува фер позиција за Република Македонија, во договорот требало да ја вклучи пресудата на Меѓународниот суд во Хаг, во врска со спорот за името со Грција, во која според сите норми на меѓународното право, беше пресудено дека Република Македонија може да се приклучи кон НАТО во согласност со привремената спогодба – вели Канческа-Милевска.

Пратеничката од ВМРО-ДПМНЕ вели дека македонските граѓани можат да го казнат Социјалдемократскиот сојуз за ваквиот однос на локалните избори на 15 октомври.


ВМРО-ДПМНЕ бара од СДСМ да се повлече од Договорот со Бугарија


Скопје, 3 август, 2017 - 10:21 (META) 

ВМРО-ДПМНЕ се залага за пријателски и за добрососедски односи со Република Бугарија, која е пријателска земја, и за пријателство меѓу македонскиот и бугарскиот народ, но Договорот што Заев го потпиша не ги почитува интересите на македонскиот народ и на Република Македонија, велат од ВМРО-ДПМНЕ преку соопштение до медиумите.

„Додека во Бугарија се слави потпишувањето, во Македонија има незадоволство и чувство на пораз, нешто што беше видливо и на прославите на националниот празник Илинден на Мечкин камен и во Пелинце, каде што имаше катастрофална, речиси непостоечка посетеност на народот на овие настани. ВМРО-ДПМНЕ како единствен виновник за овој штетен договор го посочува Зоран Заев и неговата неспособна влада. Доколку се потрудеше и доколку имаше капацитет, желба и волја за работа, СДС можеше да постигне подобар договор, кој ќе беше вистински израз на пријателство и на соработка и со кој немаше да има чувство на победник и на поразен“, пишува во соопштението на опозициската партија.

Од ВМРО-ДПМНЕ бараат СДСМ да се повлече од Договорот и дека тој треба да понуди еквиваленција во поглед на правата и на обврските со што ќе се почитуваат националните и државните интереси на Македонија.


Османи од Иванов побара поддршка за договорот со Бугарија и за законот за јазиците


Скопје, 31 јули, 2017 - 15:29 (META) 

Претседателот Ѓорге Иванов и вицепремиерот за европски прашања, Бујар Османи, денеска се сретнаа во вилата „Водно“ и разговараа за кохабитацијата помеѓу Владата и претседателот на државата, како и за односите помеѓу политичките претставници и можностите за унапредување на меѓусебната соработка, информираат од кабинетот на вицепремиерот.

– Иако наша партиска определба останува принципот на етничка консензуалност при изборот на следниот претседател на Република Македонија, подаваме рака за остварување единство, консензус и поддршка за реформите потребни за нашите европски и евроатлантски интеграции. Инклузивноста е важна за да обезбедиме постабилна и поредовна кохабитација помеѓу Владата и претседателот, со што би се обезбедила поефикасна и постабилна функционалност на политичкиот систем – изјави Османи по средбата.

На средбата, Османи го претставил планот „3-6-9“ и од Иванов побарал поддршка за спроведување на мерките и на реформите и за остварување на политичко единство за теми како што е договорот со Бугарија, но и градењето доверба помеѓу Македонија и Грција.

– Меѓу другото, особено внимание посветив на експликација на делот од планот поврзан со меѓуетничките односи, т.е. новиот предлог-закон за употреба на јазиците. Покрај поддршката и за другите мерки од планот „3-6-9“, од претседателот Иванов побарав поддршка и за новиот закон за употреба на јазиците – рече Османи и додаде дека очекува поддршка за новиот закон за употреба на јазиците и од опозициската ВМРО-ДПМНЕ.


ОМД: Договорот со Бугарија негативно би се одразил врз македонските национални интереси


Вашингтон, 28 јули, 2017 - 11:00 (META) 

Обединетата македонска дијаспора (ОМД) содржината на договорот со Бугарија ја опиша како нецелосна, нејасна и контрадикторна и смета дека со потпишувањето, како и со евентуална ратификација во Собранието, негативно би се одразил врз македонските национални интереси, но и на унапредување на долгорочните односи помеѓу Македонија и Бугарија.

„Наместо да се договара зад затворени врати, договорот требаше да биде објавен многу порано, за да ѝ се овозможи на јавноста дебата, со што би се составил во корист на заштита на македонските национални интереси, а не само на Бугарија, која го користи како уцена да ја поддржи Македонија за членство во евроатлантските институции. ОМД е со цврст став дека овој договор е контрадикторен во својата содржина. Без да навлегуваме во историски факти, кои би требало да бидат оставени на историчарите, треба да се прецизира точно кој дел од историјата ни е заеднички, за да може да се затвори можноста што моментално ја нуди содржината на договорот, Бугарија да изврши преписка на целосната македонската историја како своја, а не како посебна историја на македонскиот народ и држава“, велат од ОМД.

Од ОМД препорачуваат да не се избрзува со потпишување, како што велат, на ваков неуставен и нејасен нацрт-договор и додаваат дека ќе ги употребат сите свои ресурси и мрежа за заштита на македонското малцинство во Бугарија.

„Бугарија повеќе од две децении издава бугарско државјанство на секој заинтересиран Македонец за да го докаже добро познатиот бугарски став дека во Македонија живее голема бугарска заедница, но без притоа да нагласи дека реалната причина за стекнување бугарското државјанство на Македонците е единствено од економски карактер и ништо повеќе од тоа. Вистинската причина за овој тренд е тоа што Бугарија е земја членка на ЕУ и поради тоа границите и можностите за подобар економски живот низ Европа е отворен за Македонците кои имаат бугарско државјанство, а не поради тоа што овие Македонци се Бугари или се чувствуваат како Бугари“, додаваат од ОМД.

Од Обединетата македонска дијаспора како спорно го посочуваат тоа што во договорот никаде не се споменува признавање на македонскиот јазик и дека содржината на договорот, каква што е сега, може да ѝ дозволи на Бугарија да направи приговор кон употребата на официјалниот македонски јазик во ЕУ.